
马尔巴大师教言集MARPA11རྒྱུད་བརྟག་པ་གཉིས་པའི་ཁྲིད་ཡིག་འབུམ་ཆུང་ཉི་མ།
1-1-94a
༄༅། །རྒྱུད་བརྟག་པ་གཉིས་པའི་ཁྲིད་ཡིག་འབུམ་ཆུང་ཉི་མ།
༄། །བརྟག་པ་དང་པོ་ལ། ལེའུ་དང་པོ། རྡོ་རྗེ་རིགས་ཀྱི་ལེའུ།
བླ་མ་དམ་པ་རྣམས་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་རྒྱུ་ཚོགས་གཉིས་བསགས་ནས་འབྲས་བུ་མངོན་པར་རྫོགས་པར་སངས་རྒྱས་པ་དེས། ཐེག་པ་གསུམ་གྱི་ཆོས་ཀྱི་འཁོར་ལོ་བསྐོར་བ་ལ། དེ་ཡང་གདུལ་བྱའི་བསམ་པའམ། དབང་པོའི་བྱེ་བྲག་གི་སྒོ་ནས་ཉན་ཐོས་དང་། རང་སངས་རྒྱས་དང་ཐེག་པ་ཆེན་པོའོ། །དེ་ལ་ཕ་རོལ་ཏུ་ཕྱིན་པ་དང་སྔགས་ཀྱིའོ། །དེ་གཉིས་གྱི་ཁྱད་པར་ཡང་བདེ་བས་སྐྱོབ་པ་དང་མྱུར་བས་སྐྱོབ་པའོ། །དེ་ནས་ཕ་རོལ་ཏུ་ཕྱིན་པའི་ཐེག་པ་ནི་ཚོར་བ་དག་སྡུག་བསྔལ་ལམ་དུ་བྱེད་ལ། སྔགས་ནི་ལམ་དུ་བདེ་བས་འཁྱེར་ཏེ། དེ་ལྟར་ཡང་འདོད་ཆགས་མེ་ཡིས་ཚིག་པ་ལ། སླར་ཞིང་མེ་ལ་གདུང་བར་བྱ་ཞེས་པ་དང་། མ་ཧ་མ་ཡ་ནས་དག་དང་བདེ་བས་འགྲུབ་པར་འགྱུར་ཞེས་པ་དང་། འདོད་པའི་ཡོན་ཏན་ལྔ་རྣམས་ལ། །ཅི་བདེ་བར་ནི་བརྟེན་པས་འགྲུབ། །ཅེས་པ་དང་ཡང་བདེ་བ་སྒྲུབ་པ་ཞེས་བྱ་བ། བདེ་བས་འཁོར་བ་གཅོད་པར་བྱེད་ཞེས་(ཅེས་)སོ། །ཕ་རོལ་ཏུ་ཕྱིན་པའི་ཐེག་པ་ནི་བསྐལ་པ་གྲངས་མེད་པ་གསུམ་ན་སངས་རྒྱས་ཐོབ་པར་འདོད་ལ། འདིར་ནི་ཚེ་གཅིག་གི་སངས་རྒྱས་ཐོབ་པར་འདོད་དོ། །དེ་ལྟར་ཡང་སྐལ་(བསྐལ་)པ་བྱེ་བ་གྲངས་མེད་ཀྱིས(ཀྱི)། །སངས་རྒྱས་གོ་འཕང་ཐོབ་འགྱུར་བ། །ཚེ་འདི་ཉིད་ཀྱིས་བདེ་བླག་དུ(ཏུ)། །སངས་རྒྱས་གོ་འཕང་ཐོབ་འགྱུར་ཏེ། །རྡོ་རྗེ་འཆང་ཆེན་ཉིད་དམ་ནི། །ཡང་ནི་བདེ་ཆེན་སྐུ་ཉིད་དོ། །ཞེས་པ་དང་། ཚེ་འདི་ཉིད་ལ་སངས་རྒྱས་སམ། །རྡོ་རྗེ་སེམས་
1-1-94b
དཔའ་ཉིད་ཐོབ་ལ། །ཞེས་པ་དང་། རྡོ་རྗེ་མིང་གི་དབང་བསྐུར་ན། །སྐྱེས་(སྐྱེ་)བ་འདིར་ནི་སངས་རྒྱས་ཉིད། །ཞེས་པ་དང་། སྐྱེ་འདིར་སངས་རྒྱས་མཆོག་ཉིད་དུ། །སེམས་སྒོམ་པས་ནི་སངས་རྒྱས་སྟེ(ཏེ)། །རིན་ཆེན་སེམས་ལས་ཕྱིར་གྱུར་པ། སངས་རྒྱས་མེད་ཅིང་སེམས་ཅན་མེད་དོ། །ཞེས་གསུངས་སོ། །ཁྱད་པར་དེ་ལྟ་བུར་ལྡན་བའི་རྡོ་རྗེ་ཐེག་པ་ལ་རྒྱུད་སྡེ་བཞི་སྟེ། བྱ་བའི་རྒྱུད། རྣལ་འབྱོར་རྒྱུད། རྣལ་འབྱོར་ཕའི་རྒྱུད། རྣལ་འབྱོར་བླ་ན་མེད་པའི་རྒྱུད་དོ། །དེ་ཡང་དམན་པ་རྣམས་ནི་བྱ་བའི་རྒྱུད། །བྱ་མེད་རྣལ་འབྱོར་དེ་ལྟག་ལའོ། །རྣལ་འབྱོར་མཆོག་ནི་སེམས་ཅན་མཆོག །རྣལ་འབྱོར་བླ་ན་མེད་དེ་ལྟག་ལའོ། །ཞེའོ་དེ་ནི་དབང་པོའི་བྱེ་བྲག་གིས་བཞག་ལ། འདོད་ཆགས་གཞིའི་(བཞིའི་)བྱེ་བྲག་གིས་ཀྱང་རྩ་རྒྱུད་ནས། རྒོད་དང་ལྟ་བ་དག་གིས་ཀྱང་། །འཁྱུད་དང་དེ་བཞིན་གཉིས་གཉིས་ཀྱིས། །རྒྱུད་ཀྱང་རྣམ་པ་བཞི་རྣམས་ཀྱིས་ཞེས་སོ། །འོ་ན་མའི་ཞེས་མཚན་འཇུག་པའི་རྒྱུ་མཚན་ཇི་ལྟ་བུ་ཞེ་ན། དོན་གྱི་མ་སྐྱེ་མེད་རང་གི་མཚན་ཉིད་མངོན་སུམ་དུ་སྟོན་པའི་ཐབས་དང་། དེ་ལ་གོམས་ཤིང་འདྲིས་པའི་ཐབས་སྟོན་པ་དང་། འབྲས་བུ་ཡང་དོན་ཡུམ་ཆེན་མོ་དེ་འཆར་བས་མི་རྒྱུད་དོ། །དེ་ཡང་ཤེས་རབ་ཕ་རོལ་ཏུ་ཕྱིན་པའི་ཐབས། །འདི་ནི་རྣལ་འབྱོར་མར་བཤད་དེ་ཞེས་སོ། །ཕྱག་རྒྱ་ཆེན་པོ་རྟོགས་པའི་ཐབས་དང་། དེ་ལ་གོམས་པའི་ཐབས་དང་། འབྲས་བུ་ཡང་མ་ཧཱ་མུ་ཏྲར་འཆར་བས། མ་ཧཱ་མུ་ཏྲ་ཏན་ཏྲ་ན་མ་ཞེས་བྱའོ། །དེ་ལྟར་ཡང་ཕྱག་རྒྱ་ཆེན་པོ་རབ་སྦྱོར་བས། །གང་ཕྱིར་དེ་ཉིད་ལ་འཇུག་པས། །ཞེས་གསུངས་པས་སོ། །མ་རྒྱུད་ལ་དབྱེ་ན་གསུམ་ཏེ། མཁའ་འགྲོ་སྡེ་དང་རྒྱ་མཚོ་སྡེ་དང་ནམ་མཁའ་དང་ཞེས་བྱའོ། །དགོས་པ་ནི་བཙུན་མོ་བསྡུ་བའི་ཕྱིར་མ་བརྒྱུད་བཤད་དེ་
1-1-95a
དེ་ལྟར་བཙུན་མོ་རྣམས་ནི་བསྡུ་བའི་ཕྱིར། །བདེ་བའི་ཐབས་ནི་རྒྱས་མིན་ཅིང་ཞེས་པ་དང་། བཙུན་མོ་རྣམས་ནི་བསྡུ་བའི་ཕྱིར། །རྣལ་འབྱོར་མའི་རྒྱུད་རབ་བཤད་ཞེས་པ་དང་། ལྷ་མོ་ཤིན་ཏུ་འཇིགས་པས་ཏེ། །ངོ་མི་ཆོགས་པས་ཁྱོད་ལ་བཤད། །ཞེས་(ཅེས་)པས་སོ། །སྔོན་འབྱུང་དུ་སྐྱེས་པ་རྣམས་འདུལ་བའི་དོན་དུ་རྣལ་འབྱོར་ཕ་རྒྱུད་བཤད་པའོ། །དེ་ཡང་འདི་ནི་རྒྱུད་སྡེ་བཅུ་གསུམ་པོ་ལས་སྙིང་པོ་ལྟ་བུའི་རྒྱུད་ཀྱེའི་རྡོ་རྗེའོ། །དེ་ལྟར་ཡང་སངས་རྒྱས་ཐམས་ཅད་དགྱེས་པའི་རྡོ་རྗེའི་དཀྱིལ་འཁོར་དང་ཞེས་པས་སོ། །སྙིང་པོ་ཀྱེའི་རྡོ་རྗེ་བཤད་ཀྱིས་ཉོན་ཞེས་པ་དང་། གང་གིས་མི་ཤེས་ཀྱེེ་(ཀྱེ་)རྡོ་རྗེ། །དེ་ནི་དལ་བ་དོན་མེད་འགྱུར་ཞེས་པ་དང་། ཀྱེའི་རྡོ་རྗེ་དལ་བ་སོ་ན་མ་རིག་སོགས་པས་མི་འཛིན་ཅིང་ཞེས་པས་སོ། །དེ་ལྟ་བུ་སྙིང་པོའི་རྒྱུད་འདི་བརྟག་པ་སུམ་བཅུ་(ཅུ་)རྩ་གཉིས་པོ་འདི་མིང་མཐུན་ཡིན་ཟེར་སྟེ་(ཏེ་)གཞན་གཞུང་ངོ་། །དེ་ཡང་རྒྱས་པར་བརྟག་པ་བཅུ་གཉིས་ལས་ཞེས་པ་དང་། དེ་ལྟར་རྒྱུད་རྣམས་ཐམས་ཅད་ཀྱི་འདི་སྐད་བདག་གིས་ཐོས་པས་སྟེ(ཏེ)། དུས་དང་དུས་ནི་གཅིག་ནས་སོ། །ལྟ་ཞེས་པས་ན་ལྟ་སྟངས་དགུག་དང་བརྡ་ཆེན་དང་། །ཞེས་པ་ལ་སོགས་ཀྱི་དོན་བྱེད་རྣམ་མང་བཤད་པས་སོ། །རྒྱུད་འདི་བསྡུས་པ་ཡིན་ཟེར་སྟེ(ཏེ)། གུར་གྱི་བརྟག་པའི་གྲངས་དང་འདིའི་སྡེ་བ་མཐུན་ལ། བརྟག་པ་སུམ་བཅུ་(ཅུ་)རྩ་གཉིས་ཀྱི་དོན་བསྡུས་པ་ཡིན་པས་སོ། །རང་གཞུང་ནི་འདི་ནི་བརྟག་པ་སུམ་བཅུ་(ཅུ་)རྩ་གཉིས་ཀྱི་སྟོང་ནས་ཕྱུང་བ་ཡིན་སྟེ(ཏེ)། དེ་ལྟར་ཡང་རྡོ་རྗེ་སྙིང་པོ་མངོན་པར་བྱང་ཆུབ། །བརྟག་པའི་རྒྱལ་པོ་དང་པོ་ཡིན་ཞེས་པ་དང་། རྡོ་རྗེ་སྙིང་པོ་མངོན་པར་བྱང་ཆུབ་པ་ཞེས་བྱ་བ་བརྟག་པའི་རྒྱལ་པོ་རྫོགས་སོ། །
1-1-95b
ཞེས་མཐུན་པས་སོ། །དེ་ལྟ་བུའི་རྒྱུད་དེ་(དེའི་)གནས་ནི་བཙུན་མོ་ཐམས་ཅད་ཀྱང་བྷ་ག་གཅིག་ཏུ་བསྡུས་པའི་ཆོས་འབྱུང་གྲུ་གསུམ་པ་དེར་གསུངས་ཏེ། དེ་ཡང་གྲུ་གསུམ་ནི་རྣམ་པར་ཐར་པ་གསུམ་མཚོན་ལ། ནང་སྟོང་པ་ནི་ཆོས་ཉིད་སྟོང་པའི་བརྡའོ། །རྩ་བ་ཐུར་དུ་ཟུག་པས་ནི་ཐབས་ཐུགས་རྗེ་ཆེན་པོས་འགྲོ་བའི་དོན་བྱེད་པའོ། །དེ་ཡང་བདེ་སྟོང་ཕུན་སུམ་ཚོགས་པས་གནས་ཕུན་སུམ་ཚོགས་པ་ཞེས་བྱའོ། །ཤེས་བྱ་རང་གི་མཚན་ཉིད་ལ་ནི་ནམ་མཁའ་གང་དུ་ཁྱབ་པ་ན་གནས་པས་སོ། །གདུལ་བྱ་ངོར་སྣང་ལ་རང་གང་ལྟར་སྣང་བ་དེ་ཉིད་ལ་བྱ་བ་ཡིན་ནོ། །དེས་ན་ཤེས་བྱ་རང་གི་མཚན་ཉིད་གྱི་སྟོན་པ་ནི་བདེ་བ་ཆེན་པོའི་སྐུ། ཡབ་ཡུམ་ཞལ་སྦྱར་བ་བདེ་སྟོང་ཐུགས་སུ་བསྟར་བའོ། །དེ་ཡང་ཤིན་ཏུ་སྦྱར་བའི་རྣལ་འབྱོར་ལ། །མ་མ་ཀི་མེད་མི་སྐྱོད་མེད་ཞེས་(ཅེས་)ལས་སོ། །དེ་ཉིད་གདུལ་བྱ་སྣང་ནི་ཕྱག་དྲུག་པ་དང་། ཕྱག་བཞི་པ་དང་། ཕྱག་གཉིས་པ་ལ་སོགས་པ། གདུལ་བྱ་མོས་པ་མི་འདྲ་བ་རྣམས་ལ་བསྟན་པའོ། །དེ་ཡང་ཡབ་ཡུམ་ཅིག་(གཅིག་)ལ་གཅིག་འཁྱུད་པ་ནི་སྣང་བ་དང་སྟོང་པ་གཉིས་མེད་མཚོན་ལ། རྡོ་རྗེ་པདྨ་སྦྱར་བ་ནི་སྣང་སྟོང་གི་རོ་བདེ་བར་ཉམས་སུ་མྱོང་བའོ། །དེ་ཡང་བདེ་བ་དང་སྟོང་པ་ཕུན་སུམ་ཚོགས་པ་ཞེས་བྱའོ། །དེ་ལ་འཁོར་ནི་འཇིག་རྟེན་པ་དང་འཇིག་རྟེན་ལས་འདས་པའི་འཁོར་རོ། །འདས་པའི་འཁོར་ལ་གཉིས་སྟེ(ཏེ)། ལུས་ལ་གནས་པ་དང་། འཁོར་དུ་བཀོད་པའོ། །ལུས་ལ་གནས་པ་ནི་སྐུ་གསུང་ཐུགས་ཀྱི་ལྷ་གསུམ། སྐྱེ་མཆེད་དྲུག་གི་ལྷ་དྲུག །ཐུགས་ཁའི་ཡེ་ཤེས་སེམས་དཔའ་བཅུའོ། །འཁོར་དུ་བཀོད་པའི་འཁོར་ནི་གཉིས་ཏེ། ཤེས་རབ་ཀྱི་དང་། ཐབས་ཀྱི་འཁོར་རོ། །དེ་ལ་ཤེས་རབ་ཀྱི་འཁོར་ནི། བཪྣ་རི་
1-1-96a
ཁྲོད་མ་ལ་སོགས་པ་རི་རབ་ཀྱི་རྡུལ་ཕྲ་རབ་གྱི་གྲངས་དང་མཉམ་པའོ། །དེ་ཡང་དེ་དག་ལ་སོགས་པ་རི་རབ་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའི་རྣལ་འབྱོར་མ་རྣམས་ཚིག་འདི་དག་ཐོས་ནས་ཞེས་གསུངས་སོ། །དེའི་ཕྱི་ན་ཐབས་ཀྱི་འཁོར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བའོ། །དེ་ཡང་ཕ་དང་བུ་དང་མ་ཡང་རུང་ཞེས་པ་དང་། བྱམས་པ་ལ་སོགས་པའི་བྱང་ཆུབ་སེམས་དཔའ་ཐམས་ཅད་ཀྱིས་གསོལ་བ་ཞེས་གསུངས་སོ། །འཇིག་རྟེན་པའི་འཁོར་ནི་ལྷ་དང་ཀླུ་ལ་སོགས་པ་དཔག་ཏུ་མེད་པའོ། །དེ་ཡང་ལྷ་དང་མི་དང་ལྷ་མ་ཡིན། དྲི་ཟའི་འཇིག་རྟེན་དུ་བཅས་པའི་འཁོར་ཐམས་ཅད་ཞེས་གསུངས་སོ། །དེ་རྣམས་ལ་ཐབས་ཤེས་རབ་བམ་བདེ་སྟོང་ཕུན་སུམ་ཚོགས་པས་འཁོར་ཕུན་སུམ་ཚོགས་པ་ཞེས་བྱའོ། །དུས་ནི་ཐམས་ཅད་འཛོམ་པ་སྟེ་ཐམས་ཅད་བདེ་སྟོང་དུ་འཛོམ་པས་དུས་ཕུན་སུམ་ཚོགས་པ་ཞེས་བྱའོ། །ཆོས་ནི་འབུམ་ལྔ་བརྟག་པ་སུམ་བཅུ་(ཅུ་)རྩ་གཉིས་སོ། །བསྡུད་པ་པོ་རྡོ་རྗེ་སྙིང་པོས་བསྡུས་སོ། །བསྡུས་ནས་ཀྱང་མཁའ་འགྲོ་མ་རྣམས་ལ་གཏད་དེ་རྒྱས་བཏབ་བོ། །དེ་ཡང་མི་ཡུལ་དུ་ན་ག་ཛུ་ནས་བླངས་ནས་རྒྱས་ཤིང་རྒྱ་ཆེར་འཕེལ་ལོ། །དེ་ལྟ་བུའི་རྒྱུད་དེ་རྡོ་རྗེ་སྙིང་པོ་ནས་རྒྱུད་པ་མ་ཆད་པ་ལ་བླང་བར་བྱའོ། །རྒྱུད་དེ་ལ་ཡང་གང་ཟག་སྦྱོར་ལམ་པས་མཚན་གྱི་ནང་དུ་དོན་ཐམས་ཅད་བསྡུས་ཏེ། དེ་ཡང་གཞུང་ཚོགས་ཀྱི་མིང་སྒྲ་སྤྱིའི་རྣམ་པ་ཧེ་བཛྲ་ཏན་ཏྲ་ཛ་ན་མ་ཞེས་བྱ་བ་དེ་རུ་དོན་ཐམས་ཅད་བསྡུས་པར་གོ་ཞིང་བཞེད་དོ། །གཞི་དབང་གང་ལྟར་གོ་ན། ཧེའི་འགྲེང་བུས་ལས་རྒྱའི་གོའོ། །ཧས་གྲུ་གསུམ་ནང་གི་རྩ་ཁ་ག་མུ་ཁ་གོ། ཁོང་གི་ཨས་འདུ་ཤེས་གསུམ་ལྡན་གྱི་ལས་རྒྱའོ། །བཛྲ་ཡབ་ཡུམ་གཉིས་མེད་བསྡམ་པའོ། །
1-1-96b
ཤྲིས་དེའི་དུས་ཀྱི་དགའ་བ་བཞིའི་ཉམས་སུ་མྱོང་བ་གོ། དེ་ཡར་ལ་བུམ་པའི་དབང་ནས་སློབ་མའི་མཚན་ཉིད་ལ་ཐུག་གི་བར་གོ། མར་དབང་བཞི་པའི་དོན་གོ། བསྐྱེད་པའི་རིམ་པ་ལ་སྦྱར་བ་ནི། འདྲེང་བུས་ཆོས་འབྱུང་གོ། དེར་ཧ་ས་ཀྱེའི་རྡོ་རྗེ་གོ། ཁོང་ན་ཨ་ཤད་གནས་པས། ཡུམ་བདག་མེད་མ་གོ་ལ་བཛྲས་ནི་ཡབ་ཀྱིས་ཡུམ་ལ་འཁྱུད་པས་སྣང་བས་སྟོང་པ་མི་སྟོང་པའི་བརྡའ་ཡིན་ལ། ཡུམ་གྱིས་འཁྱུད་པས་ནི་སྟོང་པས་སྣང་བ་མི་སྟོང་བའི་བརྡའ་ཡིན་ལ། རྡོ་རྗེ་པདྨ་སྙོམས་པར་ཞུགས་པ་ནི་སྣང་སྟོང་གི་རོ་བདེ་བར་ཉམས་སུ་མྱོང་བའོ། །ཤྲིས་འཁོར་གྱི་ལྷ་མོ་བརྒྱད་བསྐྱེད་པ་གོ། དེ་ཡང་དོན་ཆེན་པོའི་བརྡར་བསྟན་སྟེ་(ཏེ་)འཁོར་ནི་སྣང་སྟོང་དུ་གནས་པའི་གཉུག་མའི་ཤེས་པ་དེ་ཉིད་ཕུང་པོ་ལྔར་སྣང་བ་དང་འབྱུང་བ་བཞིར་ཤར་བ་ལས་ལྷ་མོ་རྣམས་སུ་བྱུང་ལ། ཚུར་ལ་ལྟས་པས་ཐམས་ཅད་ཀྱང་ཆོས་འབྱུང་གྲུ་གསུམ་པ་དེར་བདེ་སྟོང་དུ་ཤར་བའོ། །དེ་རྣམས་ཀྱང་དབང་པོ་རབ་ཀྱི་བསྐྱེད་རིམས་ཡིན་པས་ཆོ་ག་སྐད་གཅིག་(ཅིག་)གིས་བསྐྱེད་ཅིང་གྲུབ་པའོ། །རྫོགས་པའི་རིམ་པ་ཅི་ལྟར་གོ་ན། ཚོགས་པ་མང་པོས་བསྐོར་བ་ལ་བཤད་པ་དང་། སློབ་མ་རེ་རེའི་དོན་དུ་བཤད་པའོ། །དེ་ལ་དངོས་པོའི་གནས་ཐབས་དང་། ལམ་གྱི་གནས་ཐབས་དང་། འབྲས་བུའི་གནས་ཐབས་སོ། །དང་པོ་ལ་སེམས་དངོས་པོའི་གནས་ཐབས་དང་། ལུས་དངོས་པོའི་གནས་ཐབས་སོ། །སེམས་དངོས་པོའི་ཐབས་ཀྱིས་བསྒོམ་(སྒོམ་)རྒྱུད་དོན་གྱི་ངོ་བོ་ཤེས་པའི་དགོས་པ་ཡོད་དོ། །དེ་ཡང་སེམས་ཉིད་རྣམ་མེད་དག་པ་གསལ་བ་ཟུང་འཇུག་གཉིས་སུ་མེད་པ་སྟེ། ད་ལྟར་གྱི་སེམས་དངོས་པོའི་གཉུག་མ་ཐམས་ཅད་ལ་གསལ་བར་ཡོད་པ་འདི་གློ་བུར་མ་རིག་པས་སྒྲིབས་(སྒྲིབ་)ནས་གནས་པ་སྟེ། དཔེར་ན་དུང་ལ་
1-1-97a
སོལ་བ་བྱུགས་པ་ལྟ་བུ་འམ་མར་མེ་རྫ་མས་བསྒྲིབས་པ་བཞིན་དུ་གནས་ཏེ། ད་ལྟར་གྱི་ཤེས་པ་ཅི་སྐྱེས་ཐམས་ཅད་འཁྲུལ་པའི་དྲི་མ་ཀུན་རྫོབ་རྫུན་པས་སྟེ(ཏེ)། དེ་ཕར་བཞག་ན་རྣམ་པ་ཐམས་ཅད་ནུབ་པའི་ཤེས་པ་གནས་བདེ་སྟོང་གཉིས་མེད་གྱི་ངོ་བོར་གནས་པའོ། །བདེ་སྟོང་གཉིས་མེད་དེ་ཉིད་ལ་དངོས་པོ་དང་དངོས་མེད་དང་གཟུང་འཛིན་ལ་སོགས་པ་སྟོང་ལ། གསལ་བ་དེའི་རང་བཞིན་ཅིར་ཡང་མ་གྲུབ་པ། དེ་ཉིད་ཀྱི་རང་བཞིན་གསལ་བར་འདུག་སྟེ་དེའི་རོ་བདེ་བར་ཤར་བས་གནས་ཀྱང་བདེ་ཆེན་དུ་གཟུང་རྒྱུ་མེད་ལ་སྟོང་པར་འདུག་ཀྱང་སྟོང་པ་ཞེས་བྱ་བ་རང་དུ་ཡང་མ་གྲུབ་ལ་བདེ་སྟོང་གཉིས་མེད་དུ་གནས་པར་འདོད་པའོ། །དེའི་མཚན་དུ་བཤད་ན་ཧེའི་འགྲེང་བུས་བདེ་བ་གོ། ཧས་སྣང་བ་གོ། ཨས་སྟོང་པ་གོ། བཛྲ་དེ་རྣམས་དབྱེར་མེད་པ་གོ་བའོ། །ཤྲིས་གཉུག་མའི་ལྟ་བ་དེ་བཞིན་དུ་རྟོགས་ན་ལེགས་པ་ཐམས་ཅད་སྟེར་བ་གོ། ལུས་དངོས་པོའི་གནས་ཐབས་ཀྱིས་བསྒོམས་པའི་གནད་ཤེས་པ་བསྟན་པ་ནི། ཧས་སེམས་ཅན་ཐམས་ཅད་ཀྱི་སྤྱི་བོ་ན་བྱང་སེམས་ཧྃ་གི་རྣམ་པར་གནས་པར་གོ། འགྲེང་བུ་ཨེས་ནི་ལྟེ་བའི་རྩ་མདུད་གྲུ་གསུམ་གོ། ཁོང་གི་ཨ་ནི་རྩ་མདུད་དེའི་ནང་ན་ཨ་གནས་པ་གོ། བཛྲས་ནི་གཟུང་འཛིན་གྱི་རྩ་ལ་ལ་ན་དང་ར་གཉིས་གོ་སྟེ། ལུས་དེའི་གནས་ལུགས་ཤེས་པས། ཤེས་པའི་བརྟེན་(རྟེན་)ཤེས་པའི་དགོས་པ་ཡོད་ལ། དེ་ཤེས་པས་ཡེ་ཤེས་འཆར་བ་ལ་ཚེགས་མེད་པའོ། །ལམ་གྱི་གནས་ཐབས་ལ་རང་ལུས་དང་། གཞན་ལུས་སོ། །དང་པོ་ལ་གཏུམ་མོ་དང་སྒྱུ་ལུས་འོད་གསལ་ལོ། །གཏུམ་མོ་མཚན་དུ་ཇི་ལྟར་གསོལ་ན་ཧེའི་གྲེང་བུས་ལྟེ་བའི་རྩ་མདུད་གྲུ་གསུམ་གོ། ཧས་ནི་སྤྱི་བོའི་
1-1-97b
ཧྃ་གོ། ཁོང་གི་ཨས་གྲུ་གསུམ་གྱི་ནང་གི་ཨ་གོ། དེ་ལ་འབར་འཛག་བྱས་པས་བྱང་ཆུབ་སེམས་བདེ་བ་ལ་ཨ་སྟོང་ལ། དེ་གཉིས་གཉིས་སུ་མེད་བཛྲ་གོ་བའོ། །ཤྲིས་ནི་རང་ལུས་ཀྱི་དགའ་བ་བཞི་འཆར་བ་གོ་བའོ། །སྒྱུ་ལུས་འོད་གསལ་ཇི་ལྟར་གོ་ན། ཧས་སྙིང་ཁ་དང་འགྲིན་པའི་རྩ་འདབ་བཞིའི་ཨ་ཨ་ནུ་ཏ་ར་དང་ཧཱུྃ་དང་ཨོཾ་ལ་ཤེས་པ་གཟུང་བ་གོ། ཁོང་གི་ཨས་དབུས་ཀྱི་ཡི་གེ་ལ་ཤེས་པ་བཟུང་བ་འོད་གསལ་བར་བྱུང་བའོ། །འགྲེང་བུས་སྟོང་པའི་རོ་བདེ་བར་ཤར་བ་གོ། བཛྲས་དེའི་རོ་ཉམས་མྱོང་གི་ཕྱེད་པ་གོ། འབྲས་བུའི་གནས་ཐབས་ནི་ཉམས་མྱོང་གོང་ནས་གོང་དུ་སྐྱེས་པ་ལ་བྱའོ། །དེ་ལྟར་སྐྱེད་(བསྐྱེད་)རྫོགས་ལྡན་པས་འབྲས་བུ་ལས་དང་དངོས་གྲུབ་ཇི་ལྟར་གོ་ན། ཧེས་སྙིང་རྗེ་སྟེ་ཐབས་གོ། བཛྲས་ཤེས་རབ་གོ་སྟེ་ཐབས་ཤེས་རབ་གཉིས་སུ་མེད་པའི་གང་ཟག་གིས་ལས་དང་དངོས་གྲུབ་ཞེས་པ་ནི་ཤྲིས་གོ་བའོ། །ཏན་ཏྲ་ཞེས་པ་རྒྱུད་ཀྱི་ངོ་བོ་དང་། དབྱེ་བ་དང་ངེས་ཚིག་གོ། ངོ་བོ་ནི་ཐབས་ཤེས་གཉིས་སུ་མེད་པའོ། །ངེས་ཚིག་ནི་འབྲེལ་བའི་དོན་གྱི་རྒྱུད། འབྲེང་ཆགས་པས་རྒྱུད། ཚོགས་པས་ན་རྒྱུད་དོ། །དབྱེ་བ་ལ་ཐེག་པ་ཐུན་མོང་བ་ལ་བསླབ་པ་དང་། ཐུན་མོང་མ་ཡིན་པ་ལ་བསླབ་པའོ། །དེ་ཡང་ཐུན་མོང་གི་བསླབ་བྱ་ནི་ཉན་ཐོས་བྱེ་བྲག་པ་དང་མདོ་སྡེ་པ་དང་སེམས་ཙམ་པ་དང་། དབུ་མའི་གྲུབ་མཐའ་ལ་བསླབ་པའོ། །དེ་ལྟར་ཡང་དང་པོ་གསོ་སྦྱོང་སྦྱིན་པར་བྱ། །ཞེས་པ་ལ་སོགས་པ་གསུངས་སོ། །ཐུན་མོང་མ་ཡིན་པའི་བསླབ་བྱ་ལ། གཞིའི་རྒྱུད་དང་རང་བཞིན་གྱི་རྒྱུད་དང་འབྲས་བུའི་རྒྱུད་དོ། །དེ་ལྟར་ཡང་འདུས་པའི་ལེའུ་བཅོྭ་བརྒྱད་པ་ལས། གཞི་དང་རང་བཞིན་འབྲས་བུ་དང་། །ཞེས་པ་ལ་སོགས་པ་གསུངས་སོ། །དེ་ལ་
1-1-98a
གཞིའི་རྒྱུད་ལ་བཞི་སྟེ། སློབ་དཔོན་གྱི་མཚན་ཉིད་དང་། སློབ་དཔོན་གྱི་ལས། སློབ་མ་དཀྱིལ་འཁོར་དུ་གཞུག་ཅིང་ལྷ་ངོ་བསྟན་པ་དང་། དབང་བསྐུར་བའོ། །རང་བཞིན་གྱི་རྒྱུད་ལ་རྣལ་འབྱོར་དང་། རྣལ་འབྱོར་གྱི་དམ་ཚིག་དང་། རྣལ་འབྱོར་གྱི་སྤྱོད་པ་དང་གསུམ་མོ། །རྣལ་འབྱོར་ལ་སྐྱེད་(བསྐྱེད་)རྫོགས་གཉིས་སོ། །སྐྱེད་(བསྐྱེད་)རིམས་ལ་ལས་ཚོགས་ལྷའི་སྐྱེད་(བསྐྱེད་)རིམས་དང་། མངོན་པར་རྟོགས་པ་ལྷའི་སྐྱེད་(བསྐྱེད་)རིམས་སོ། །དང་པོ་ནི་ལྷ་མོ་བདུན་གྱི་ལས་བདུན་བསྒྲུབས་པ་དང་། ཀུ་རུ་ཀུ་ལེའི་བསྒྲུབ་(སྒྲུབ་)ཐབས་དང་བརྒྱད་འདི་ནས་སྟོན་ལ། གུར་ནས་འབྱུང་པོ་འདུལ་བས་གནོད་སྦྱིན་མོ་སྒྲུབ་པ་ལ་སོགས་དང་། སྟོབས་པོ་ཆེ་ཆར་དབབ་པ་དང་། སྒྲོལ་མ་ལྷ་བཅུ་གཅིག་སྒྲུབ་པའི་ཐབས་དང་། པྲད་ཉཱ་པ་ར་མི་ཏས་བློ་རྣོ་བ་དང་། ཁྲོ་བོ་བཅུའི་སྒྲུབ་ཐབས་བཅུ་དང་། སྤྱན་རས་གཟིགས་ལ་སོགས་པའི་སྒྲུབ་ཐབས་བཅུ་དང་། ཡན་ལག་མེད་པས་བུ་མོ་དགུག་པ་དང་། མ་ཧཱ་ཀ་ལས་དགྲ་བསད་པ་དང་། དེ་ལྟར་ཉི་ཤུ་རྩ་དྲུག་སྟོན་ལ་གོང་གི་བརྒྱད་དང་གཉིས་ལོག་པས་སུམ་བཅུ་(ཅུ་)སོ་བཞིའོ། །མངོན་རྟོགས་སྐྱེད་(བསྐྱེད་)རིམས་ལ། བསྡུས་པས་དལ་ལམ་དུ་ཁྱེར་བ་དང་། རིགས་སོ་སོའི་དལ་ལམ་དུ་ཁྱེར་བའོ། །བསྡུས་པ་ལ་གཉིས་ཏེ། ལྔ་ཚན་ལྔ་ལམ་དུ་འཁྱེར་བ་དང་། དགུ་ཚན་ལྔ་ལམ་དུ་འཁྱེར་བའོ། །དེ་གཉིས་ལ་གཙོ་བོ་འཕོས་པས་བཅུར་འགྲོས་སྟེ(ཏེ)། འགྲོ་ཡང་རེ་ཤིག་གཉིས་སུ་བགྲང་ངོ་། །རིགས་སོ་སོའི་དལ་ལ་ལྔ་སྟེ། ཧེ་རུ་ཀ་རྡོ་རྗེའི་རིགས་ཀྱི་དལ་ལམ་དུ་འཁྱེར་བ་དང་། རྡོ་རྗེ་རྟག་པ་དེ་བཞིན་གཤེགས་པའི་དལ་དང་། རྡོ་རྗེ་ཉི་མ་རིན་པོ་ཆེའི་དལ་དང་། པདྨ་གར་གྱི་དབང་ཕྱུག་པདྨའི་དལ་དང་། རྟ་མཆོག་ལས་ཀྱི་རིགས་ཀྱི་དལ་ལམ་དུ་འཁྱེར་བའོ། །རྡོ་རྗེའི་རིགས་ལ་གཉིས་ཏེ། 
1-1-98b
ཁྲག་འཐུང་ལྷ་དགུ་ལམ་དུ་འཁྱེར་བ་དང་། མཁའ་འགྲོ་མ་བཅོ་ལྔ་ལམ་དུ་འཁྱེར་བའོ། །ལྷ་དགུ་ལ་ཕྱག་བཅུ་དྲུག་པ་ལམ་དུ་དང་། ཕྱག་གཉིས་པ་ལམ་དུ་དང་། ཕྱག་བཞི་པ་ལམ་དུ་དང་། ཕྱག་དྲུག་པ་ལམ་དུ་བྱེད་པ་དང་བཞིའོ། །དེ་ལྟར་ན་མངོན་རྟོགས་ཀྱི་སྐྱེད་(བསྐྱེད་)རིམས་ལ་བསྒྲུབ་(སྒྲུབ་)ཐབས་བཅུ་གཅིག་དུ་(ཏུ་)བསྡུས་པས་བཅུ་གཉིས་སོ། །རྫོགས་རིམས་ལས་ཚོགས་ལ་བཤད་ན། རྩ་དང་རླུང་དང་། བྱང་ཆུབ་སེམས་དང་། བསམ་མི་ཁྱབ་དང་བཞིའོ། །སློབ་མ་ལ་བཤད་ན་དངོས་པོའི་གནས་ཐབས་དང་། ལམ་གྱི་གནས་ཐབས་དང་། འབྲས་བུའི་གནས་ཐབས་དང་གསུམ་མོ། །དེ་ལྟར་སྐྱེད་(བསྐྱེད་)རྫོགས་ལོགས་(ལོག་)པས་ཆོས་བཅོ་ལྔས་ནི་རྣལ་འབྱོར་གྱི་ལམ་དངོས་བསྟན་པའོ། །དམ་ཚིག་ལ་བཟའ་བ་དང་བསྲུང་བའི་དམ་ཚིག་གོ། །སྤྱོད་པ་ལ་གསུམ་སྟེ། དམན་པ་ལས་དང་པོ་པའི་སྤྱོད་པ་དང་། བརྟན་པ་བས་མང་པོ་སློབ་པའི་དཔྱོད་པ་དངོས་རྗེས་རོ་སྙོམས་པ་དང་། རིག་པ་བརྟུལ་ཞུགས་ཀྱི་སྤྱོད་པས་ལུས་ཚར་བཅད་པའོ། །དེ་ལྟར་རང་བཞིན་རྒྱུད་ལ་བསྡུ་ན་ཆོས་ཉི་ཤུ། གཞིའི་རྒྱུད་གྱི་བཞི་སྟེ་ཉེར་བཞིའོ། །འབྲས་བུའི་རྒྱུད་ལ་ལས་དང་དངོས་གྲུབ་གཉིས། ལས་ལ་ལས་ཆེན་པོ་བརྒྱུད་དོ། །དངོས་གྲུབ་ལ་མཆོག་འབྲས་བུ་སྐུ་བཞི་ཡན་ལག་བརྒྱད་དང་བཅས་པ་དང་། ཐུན་མོང་རྣམ་པ་བརྒྱད་དོ། །དེ་ལྟར་ན་ལས་བརྒྱད་དོ། །དེ་ལྟར་ན་ལས་བརྒྱད་དང་དངོས་གྲུབ་གཉིས་ཏེ་བཅུའོ། །དེ་གོང་གི་ཉི་ཤུ་རྩ་བཞིའི་སྟེང་དུ་མནན་པས་སུམ་བཅུ་(ཅུ་)སོ་བཞིའོ། །དེའི་སྟེང་དུ་ཐུན་མོང་གི་སླབ་(བསླབ་)བྱ་བསྣན་པས་སུམ་བཅུ་(ཅུ་)སོ་ལྔར་བྱས་ནས་འབུམ་ལྔའི་དོན་དེ་ལྟར་འཆད་འགྲེ་དེ་ལྟར་སྡུད་དོ། །ར་ཛཱ་ཞེས་པ་ནི་སྙིང་པོ་ལྟ་བུའི་རྒྱུད་ཡིན་པས་སོ། །དེ་ལྟ་བུའི་གཞུང་གི་ཚོགས་སྟོན་པ་ལ་ནམ་ཞེས་བྱའོ། །
1-1-99a
ཨེ་བམ་མ་ཡ་ཞེས་པ་ལ་གླེང་གཞི་བཤད་པ་དང་། གསང་བ་བླ་ན་མེད་པ་རང་གཞུང་བཤད་པའོ། །རང་གཞུང་དུ་བཤད་ན་འདི་བར་པར་འདོད་དེ། རྒྱུད་ཡིན་པར་གུར་དང་སམ་བུ་ཊས་རྒྱུད་དུ་བཤད་དོ། །དེ་ཡང་གང་ཟག་དབང་པོ་འབྲིང་ཚོགས་ལམ་ལ་གནས་པས་མཚན་དོན་དུ་བསྡུས་པ་དེ་ལ་གོ་ནས་འདི་བཤད་པས་གོ་བའོ། །དེ་ལ་གཞིའི་རྒྱུད་ཇི་ལྟར་གོ་ན་བྷ་ག་བན་ཞེས་པས་དབང་བསྐུར་བས་ཉོན་མོངས་པ་བཅོམ་པ་གོ། སརྦ་ཏ་ཐཱ་ག་ཏས་ཕུང་པོ་ཁམས་ལ་སོགས་པའི་དྲི་མ་འཁྲུད་པ་གོ། ཀ་ཡ་ཞེས་པས་བུམ་དབང་གོ། བྷ་གིས་འགྲིན་པར་རྫས་གཉིས་ལོངས་སྤྱད་པས་གསང་དབང་གོ། ཙི་ཏས་ལྷན་ཅིག་སྐྱེས་པའི་དོན་སྟོན་པས་ཤེས་རབ་ཡེ་ཤེས་གོ། རྡོ་རྗེས་དབང་བཞི་པ་གོ། བཙུན་མོས་གསང་དབང་དང་། ཤེས་རབ་ཡེ་ཤེས་ཀྱིས་ལས་རྒྱ་གོ། བྷ་གས་དེའི་བྷ་ག་དངོས་གོ། ཧ་ར་ཞེས་པས་དབང་གསུམ་པ་དོན་གྱིས་ལྷན་ཅིག་སྐྱེས་པ་གོ། དེ་ལྟ་བུའི་བླ་མ་དབང་བཞིའི་དོན་ཤེས་ཤིང་ཐོབ་པ་ལ་ཐོབ་པར་གྱིས་ཤིག་ཞེས་(ཅེས་)ཨེ་བམ་མ་ཡ་ཞེས་པའོ། །བསྐྱེད་རིམས་ལ་སྦྱར་ན་ཨེ་ཆོས་འབྱུང་གོ་དེར་གཞལ་ཡས་ཁང་གནས་དང་བཅས་པ་ཤུགས་ལ་གོ། བམ་ཀྱི་(གྱི་)གླད་སྐོར་གྱིས་གཙོ་བོ་སྐྱེད་པ་གོ། མས་ཡུམ་སྐྱེད་པ་གོ། ཡུམ་འཁྱུད་པ་ཏང་གིས་གོ། རྡོ་རྗེ་པདྨ་རླབས་ཏེ་བྱང་སེམས་ཡུམ་གྱི་པདྨར་ཕབ་པ་ཤུ་ཞེས་པས་གོ། དེ་བ་ག་ན་བྱང་སེམས་ཀྱི་ཐིག་ལེ་བརྒྱད་ཡོད་པ་རླུང་གིས་འཕངས་ནས་ཉི་ཟླའི་བར་དུ་སོང་བ་ཡས་གོ། ཨེ་ཀ་ཅེས་(ཞེས་)པ་དེ་དག་ཐམས་ཅད་བདེ་སྟོང་ལས་བྱུང་བར་གོ། སྨིན་ཞེས་པ་ལྷ་མོ་ཐམས་ཅད་སྐུ་དང་བརྒྱན་(རྒྱན་)ཆ་དང་བཞུགས་ཚུལ་རྫོགས་པ་ལ་བྱ། ས་མ་ཡ་ཞེས་པས་
1-1-99b
གང་ཟག་དམ་ཚིག་དང་ལྡན་པས་དེ་ལྟར་བསྒོམ་ཞེས་པའོ། །དེ་ལྟར་བསྒོམས་ན་ཉོན་མོངས་པ་བཅོམ་པ་ལ་བྷ་ག་བན་ཞེས་བྱའོ། །སརྦ་ཏ་ཐཱ་ག་ཏ་ཀཱ་ཡ་བ་ག་ཙི་ཏས་སྐུ་གསུང་ཐུགས་བརླབས་པ་གོ། ཧྲི་ད་ཡ་བཛྲ་ཞེས་པས་ཡེ་ཤེས་སེམས་དཔའ་ཚོན་གང་བ་དང་ཏིང་ངེ་འཛིན་སེམས་དཔའ་གོ། དེ་ནས་ཧཱུྃ་ལས་འོད་འཕྲོས་རྡོ་རྗེ་སེམས་དཔའ་སྤྱན་དྲངས་གཉིས་མེད་དུ་བསྲེས་པ་ཤུགས་ལ་གོ། ཡོ་གི་ཅེས་(ཞེས་)པ་དབང་བཞི་བླང་བ་གོ། དབང་བཞི་ཉམས་སུ་བླང་བ་ལ་བྷི་ཛ་ཧ་ར་ཞེས་པ་གོ་བའོ། །རྫོགས་རིམས་ལ་སློབ་མ་ལ་བཤད་པ་དང་། ཚོགས་བཤད་གཉིས་ལས། སློབ་མ་ལ་བཤད་ན་དེ་ལས་ཀྱང་སེམས་དངོས་པོའི་གནས་ཐབས་ཇི་ལྟར་གོ་ན། ཨེ་ཞེས་བྱ་བས་དམ་པའི་དོན། །བམ་ཞེས་བྱ་ཀུན་རྫོབ་སྟེ། །ཐིག་ལེ་གཉིས་མེད་སྦྱོར་བ་ནི། །དམ་པའི་དཀྱིལ་འཁོར་ལ་གནས་པའོ། །མ་ཞེས་བྱ་བ་ཡིད་ཡིན་སྟེ(ཏེ)། །ཡ་ཞེས་བྱ་བ་རླུང་དུ་བཤད། །ཤུ་ནི་ཅིག་དུ་(གཅིག་ཏུ་)འདྲེས་པས་སྟེ(ཏེ)། །དེ་ཉིད་གཏམ་དུ་ཡང་དག་བཤད། །ཨེ་ཤེས་(ཞེས་)བྱ་བ་རྟོགས་བྲལ་ཏེ། །ཀ་ཞེས་བྱ་བ་བདེ་དང་ལྡན། །སྨིན་ནི་མངོན་དུ་གྱུར་པ་སྟེ། །བདག་ཉིད་མི་རྟོག་བདེ་བ་དམ་པའོ། །པ་ཞེས་བྱ་བ་མཉམ་པར་བཤད། །ཕྱག་རྒྱ་ཆེན་པོ་ཐོབ་ཕྱིར་མ། །ཨེ་ཞེས་བྱ་བས་འབད་པ་མེད། །ཐམས་ཅད་བདེ་བར་རོ་གཅིག་པའོ། །བྷ་ཞེས་བྱ་བས་བཅོམ་པས་སྟེ(ཏེ)། །ག་ཞེས་བྱ་བས་ནམ་མཁར་བཤད། །བན་ནི་ཡང་དག་ལྡན་པ་སྟེ། །ལྡན་པ་ནམ་མཁའ་ཉེར་འགྲོ་བའོ། །ས་ཞེས་བྱ་བ་ཐམས་ཅད་ཡིན། །རྦ་ཞེས་བྱ་བ་རོལ་པར་བཤད། །ཏ་ནི་དེ་ལྟར་གནས་པས་སྟེ(ཏེ)། །ཐ་ནི་ཡང་དག་ལྡན་པའོ། །ག་ཞེས་བྱ་བ་འགྲོ་འོང་མེད། །ཏ་ནི་འདི་ལས་གཞན་དུ་མེད། །འདི་ལས་གཞན་དུ་གྱུར་པ་ནི། །འཇིག་རྟེན་གསུམ་ན་
1-1-100a
ཡོད་མ་ཡིན། །ཀ་ཞེས་བྱ་བ་ལུས་ཡིན་ལ། །ཡ་ཞེས་བྱ་བ་གང་གང་ཏེ(སྟེ)། །དེ་བཞིན་བག་ནི་ཚིག་གི་ལམ། །ཙི་ཞེས་བྱ་བ་སེམས་ཡིན་ནོ། །ཏ་ཞེས་བྱ་བ་སྟོང་པ་སྟེ། །རྣམ་རྟོག་ཐམས་ཅད་སྤངས་པའོ། །ཧྲི་ཞེས་བྱ་བ་སྙིང་པོ་སྟེ། །ད་ཞེས་བྱ་བ་དེར་སྟོང་པའོ། །ཡ་ནི་གང་དང་གང་འདོད་པ། །འདོད་པ་ཐམས་ཅད་རབ་གཏེར་བའོ། །བ་ཞེས་བྱ་བ་བློ་ཡིན་ཏེ། །ཛ་ནི་དེ་བཞིན་མི་ཕྱེད་པའོ། །ཡོ་ཞེས་བྱ་བ་རྣལ་འབྱོར་སྟེ(ཏེ)། །ཤིད་ཞེས་བྱ་བ་དགག་པ་ཡིན། །རྣལ་འབྱོར་ཆེན་པོ་འདི་ལ་ནི། །ཕྱི་རོལ་སྦྱོར་སྤངས་བདེ་བར་མནོས། །བྷ་ཞེས་བྱ་བ་བྷ་ག་སྟེ། །ག་ཞེས་བྱ་བ་བདེ་སྤྱོད་པ། །ཤྱ་ནི་དེ་བཞིན་མྱ་ངན་རྣམས། །འདི་ནི་མྱ་ངན་ཀུན་སྤངས་པའོ། །བི་ཞེས་བྱ་བ་སྣ་ཚོགས་པའོ། །ཛ་ཞེས་བྱ་བ་སྐྱེ་དང་ལྡན། །ཧ་ནི་མི་ཤིགས་པར་བཤད་དེ། །ར་ནི་ཆགས་པ་ཆེན་པོའོ། །ཞེས་པས་ལྟ་བ་བསྟན་ལ་ཕེབས་པར་འདོད། དེས་སེམས་དངོས་པོའི་གནས་ཐབས་ཀྱིས་སྒོམ་རྒྱུ་དོན་གྱི་ངོ་བོ་ངོ་ཤེས་པའི་དགོས་པ་ཡོད་དོ། །བསྒོམ་པའི་གནད་ཤེས་པར་བྱ་བའི་ཕྱིར། ལུས་དངོས་པོའི་གནས་ལུགས་གཏན་ལ་དབབ་པ་ནི། ཨེས་ནི་ཐ་མལ་པའི་མ་གོ། བས་ཕ་གོ། གླད་ཀོར་གྱིས་ས་བོན་དཀར་དམར་གཉིས་གོ། མས་ནི་ས་བོན་གྱི་བར་དུ་བར་དོ་ཞུགས་པ་གོ། དེ་ཡང་རླུང་གིས་འཕངས་པ་ཡས་གོ། ཤཱུ་ཏམ་ཞེས་པས་རྣམ་ཤེས་བཞུགས་ནས་དེ་རྣམས་འདྲེས་པ་གོ། ཨེས་ནི་བྷ་གའི་གནས་ལ་ཞུགས་པ་གོ། ཀས་ནི་དེ་ཡང་བདེ་བའི་ངོ་བོར་གནས་པ་གོ། སྨིན་ནི་ལུས་རྫོགས་པ་གོ། དེ་ཡང་ཐ་མལ་བའི་ལུས་དེ་ཡང་བྱང་ཆུབ་པ་ལྔས་བསྡུས་པའི་ལུས་དེ་ལ་བྷ་ག་བན་ཞེས་ཀྱང་བྱའོ། །སརྦ་ཏ་ཐཱ་ག་ཏ་ཀཱ་ཡ་བ་ག་ཙི་ཏ་ཞེས་པས་ནི་ཐ་མལ་པའི་ལུས་དེ་ཉིད་དེ་བཞིན་གཤེགས་པའི་སྐུ་གསུང་ཐུགས་རྡོ་རྗེའི་
1-1-100b
ངོ་བོར་གནས་པའོ། །བྷ་ག་ཞེས་པ་འཁོར་ལོ་བཞི་ན་རྩ་མདུད་བཞི་གྲུ་གསུམ་ཡོད་པ་གོ། བཞུགས་སོ་ཞེས་པས་དེ་ན་རླུང་དང་བྱང་སེམས་འདྲེས་པའི་ཐིག་ལེ་ལ་རྟེན་(བརྟེན་)པའི་ཤེས་པ་གནས་པ་ལ་བྱའོ། །ལམ་གྱི་གནས་ཐབས་ལ་ཀ་ཡ་ཞེས་པ་ཐ་མལ་གྱི་དུས་ན་སེམས་ཀྱི་རྒྱལ་པོ་དེ་ལྟེ་བ་ན་གནས་པ་ལ་ཙན་དྷ་ལི་སྒོམ་ལ་བྱ། བག་ནི་རྨི་ལམ་དུས་སུ་ཤེས་པ་དེ་ན་གནས་པའོ། །ཙི་ཏ་ནི་གཉིད་ཀྱི་དུས་དུ་བ་སྙིང་ཁ་ན་གནས་པའོ། །བཛྲས་ནི་སྙོམས་འཇུག་གི་དུས་སུ་ཤེས་པ་སྤྱི་བོ་ན་གནས་པ་ལ་བྱའོ། །གནས་དེ་བཞིན་ཡང་རྩ་མདུད་གྲུ་གསུམ་བཞིའི་ནང་ན་སེམས་ཀྱི་རྒྱལ་པོ་དེ་ཡི་གེ་བཞིའི་ངོ་བོར་ཞུགས་པ་ལ་ནི་བྷ་ག་ལ་ཞུགས་སོ་ཞེས་བྱའོ། །དེ་ལྟ་བུའི་གདམ་ངག་དེ་བླ་མ་ལ་སྒྲོ་བསྐུར་(སྐུར་)གཉིས་དང་བྲལ་བར་གྱིས་ལ་ལོང་ཤིག་ཅེས་པ་ནི། འདི་སྐད་བདག་གིས་ཐོས་པའི་དུས་གཅིག་ན་ཞེས་བྱའོ། །འབྲས་བུའི་རྒྱུད་ཀྱི་གོ་ལུགས་ནི། ཀ་ཡ་ཞེས་བྱ་བས་སྤྲུལ་པའི་སྐུ་གོ། བག་ཞེས་པས་ལོངས་སྐུ་གོ། ཙི་ཏ་ཞེས་པས་ཆོས་སྐུ་གོ། རྡོ་རྗེས་དེ་རྣམས་རོ་གཅིག་པ་བདེ་བ་ཆེན་པོའི་སྐུ་གོ། དེས་འཕངས་ནས་འབྲས་བུ་ལས་དང་ཐུན་མོང་གི་དངོས་གྲུབ་ཀྱང་ཤུགས་ལ་གོ་བའོ། །དེ་རྣམས་ཀྱིས་ནི། གང་ཟག་དབང་པོ་འབྲིང་གིས་(གི་)བཞུགས་ཚུལ་དུ་གོ་བས་སྟེ(ཏེ)། རྒྱུད་བར་པའི་དོན་བཤད་པའོ། །ད་ནི་རྣལ་འབྱོར་གྱི་རྒྱུད་ཆོ་ག་མན་ཆད་དང་ལུང་ཙམ་སྒོ་བསྟུན་ནས་རྒྱུད་རྒྱས་པའི་དབང་དུ་བྱས་ན་འདི་རྣམས་གླེང་གཞིར་མ་ཆད་དེ། དེ་ཡང་འདི་སྐད་ཐོས་ཞེས་པས་སྒྲོ་བསྐུར་(སྐུར་)དང་བྲལ་བར་སྟོན། བདག་གིས་ཞེས་པས་གཞན་ལ་མ་བརྒྱུད་པར་བསྟན་ཏོ། །དུས་གཅིག་ན་ཐོས་ཞེས་པས་དུས་ཀྱི་མཐའི་སྐད་ཅིག་མ་ལ་འདི་ཐོས་པ་སྟེ། འདིའི་ཐོས་པ་སྟེ། འདིའི་དུས་ན་འདི་ཐོས་ལ་གཞན་དུ་གཞན་
1-1-101a
ཡང་ཐོས་པས་ཐོས་པ་ཆེ་བ་དང་། གསང་སྔགས་འབྱུང་དཀའ་བས་དུས་གཅིག་ན་འབྱུང་བ་དང་། ཤེས་རབ་ཆེ་བ་དང་ངོ་། །དེ་སྐད་བརྗོད་པས་འཁོར་རྣམས་ལ་རྣམ་རྟོག་གསུམ་སྐྱེས་ཏེ། དེ་སྐད་དུ་ཐོས་ན་སྟོན་པ་གང་ལས་ཐོས། གནས་གང་དུ་ཐོས་འཁོར་གང་དང་ལྷན་གཅིག་(ཅིག་)ཏུ་ཐོས་སྙམ་པའི་ཐེ་ཙོམ་བཅད་པའི་དོན་དུ་བསྟན་པ་ནི། སྟོན་པ་ནི་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཞེས་པའོ། །གནས་ནི་གང་དུ་ནི་བཙུན་མོའི་བྷ་ག་རྣམས་ལ་ཞེས་སོ། །བཞུགས་སོ་ནི་འཁོར་བསྟན་ཏོ། །དེ་ལ་བཅོམ་ལྡན་འདས་ཞེས་པ་ནི་བདུད་བཞི་བཅོམ་པ་དང་ལེགས་པའི་ཡོན་ཏན་དྲུག་དང་ལྡན་པས་ན་བཅོམ་ལྡན་ནོ། །དེ་ཡང་དེ་ཁོ་ན་ཉིད་ཀྱི་ལེའུ་ལས་བཤད་དོ། །དེ་བཞིན་གཤེགས་པ་ནི་ཆོས་ཉིད་འོད་གསལ་སྟོང་པ་ལས་སེམས་ཅན་གྱི་དོན་དུ་གཤེགས་ཤིང་སླར་འོད་གསལ་དུ་བཞུད་པས་ན་དེ་བཞིན་གཤེགས་པའོ། །དེ་ཡང་ལེའུ་ལྔ་པ་ལས་ཤེས་སོ། །སྟོན་པ་དེ་ལྟ་བུ་དེ་ཡང་སྐུ་ཞེས་པ་ཕྱག་དྲུག་པའོ། །གསུང་ཞེས་པ་ཕྱག་བཞི་པའོ། །ཐུགས་ནི་ཕྱག་གཉིས་པའོ། །སྙིང་པོ་རྡོ་རྗེ་ནི་དེ་རྣམས་རོ་མཉམ་གྱི་སྟོན་པ་ཕྱག་བཅུ་དྲུག་པའོ། །དེ་རྣམས་ཀྱང་གདུལ་བྱའི་སྒོ་ནས་སྟོན་པ་དེ་རྣམས་སུ་བཞག་པ་ཡིན་ནོ། །བཙུན་མོའི་བྷ་ག་ཞེས་པ་ནི་ལྷ་མོ་ཐམས་ཅད་བྷ་ག་གཅིག་ཏུ་བསྡུས་པའི་ཆོས་འབྱུང་གི་ནང་དུ་གཞལ་ཡས་ཁང་དང་བཅས་པའི་གནས་སོ། །བཞུགས་སོ་ནི་འཁོར་ཐབས་ཤེས་རབ་རང་བཞིན་ལ་བྱའོ། །དེས་གླེང་གཞི་བསྟན་པའོ། །ད་ནི་དབང་པོ་ཐ་མའོ་{སོ་ལ་}ལྟ་བུ་ལས་དང་པོ་པའི་གང་ཟག་གི་དབང་དུ་བྱས་ནས་ཐར་ཆགས་སུ་རེ་རེ་ནས་སྟོན་པ་ནི་གཉིས་སྟེ་(ཏེ་)
1-1-101b
མཚན་དང་རྒྱུད་དངོས་སོ། །དེ་ལས་ཀྱང་མཚན་སྟོན་ཏེ། དེ་ལ་དྲིས་པ་དང་ལན་གཉིས་ལས། དྲིས་པ་ནི་དེ་བཞིན་གཤེགས་པའང་སྟོན་ཏེ། དེ་ལ་དོན་གྱིས་བཤད་དུ་གསོལ་ཞེས་བྱའོ། །དེ་ལ་གླེང་བཞི་བཀའ་དངོས་སུ་བྱས་ནས་སྐུ་གསུང་ཐུགས་སྙིང་པོ་རྗེ་བཙུན་ཞེས་བྱ་བ་དང་། རྣལ་འབྱོར་རྒྱུད་མན་ཆད་དུ་གསང་བ་ལས་དང་། ཆེས་གསང་བ་ལ་ཉན་ཐོས་དང་ཕ་རོལ་ཏུ་ཕྱིན་པའི་ཐེག་པར་གསང་བ་ལ་བྱའོ། །ལན་མདོར་སྟན་པ་ནི་ཨེ་མ་ཧོ་ཞེས་པ་ནི་ངོ་མཚར་བས་སྟེ(ཏེ)། རྡོ་རྗེ་སྙིང་པོ་ཁྱོད་རང་གིས་གོ་བཞིན་དུ་གཞན་དོན་དུ་འདྲི་བ་ལྟར་བྱེད་པའོ། །ལེགས་སོ་ལེགས་སོ་ནི་ཁྱོད་རང་གིས་ཤེས་བཞིན་དུ་འདྲི་ཚུལ་སྟོན་པ་ལ་བྱའོ། །རྡོ་རྗེ་སེམས་དཔའ་ཞེས་པ་ལ་སོགས་པ་ནི་གླེང་གཞི་དང་ཞུས་པའི་ཐུགས་གཉིས་པོ་ནི་རྡོ་རྗེ་སེམས་པ་ཡིན་ཏེ་ཉོན་ཅིག་པ་དང་། དེ་བཞིན་དུ་གསུང་ནི་སེམས་དཔའ་ཆེན་པོ་ཡིན་ལ། སྐུ་ནི་དམ་ཚིག་སེམས་དཔའ་ཡིན་ཞིང་། རྡོ་རྗེ་དང་སྙིང་པོ་རྗེ་བཙུན་ནི་སྙིང་པོ་ཀྱེའི་རྡོ་རྗེ་ཞེས་བྱ་བ་ཡིན་པས་ཉོན་གཅིག་(ཅིག་)པའོ། །རྡོ་རྗེ་སྙིང་པོ་ཞེས་པས་དྲི་བ་རྒྱས་པར་སྟོན་ཏེ་དེ་ལ་ཡང་སེམས་དཔའ་གསུམ་གྱིས་བསྟན་པ་ནི། གང་ཕྱིར་ཞེས་པ་ནི་གཏན་ཚིགས་གང་གི་ཕྱིར་ཞེས་པ་ལན་གྱི་རྡོ་རྗེ་སེམས་དཔའ་ཞེས་པ་ཅི་ལྟར་ལགས། འཐད་པ་ཇི་ལྟར་སེམས་དཔའ་ཆེན་པོ་ལགས། རྒྱུ་མཚན་གང་གིས་ན་དམ་ཚིག་སེམས་དཔའ་ལགས། དེ་གསུངས་ཞེས་པའོ། །དེའི་ལན་བརྒྱས་(རྒྱས་)པར་བསྟན་པ་ནི་བཀའ་སྩལ་ཞེས་པ་ལ་སོགས་པས་བསྟན་ཏེ། དེ་རྣམས་ལ་ལམ་སྐྱེད་(བསྐྱེད་)རིམས་གྱི་(ཀྱི་)དབང་དུ་བྱས་ན་ཅི་ལ་ཟེར། ལམ་རྫོགས་རིམས་གྱི་(ཀྱི་)དབང་དུ་བྱས་ན་གང་འབྲས་བུའི་དབང་དུ་བྱས་
1-1-102a
ན་གང་ཟེར་རོ། །དེ་ལ་སྐྱེད་(བསྐྱེད་)རིམས་དང་སྦྱར་ན་རྡོ་རྗེ་ནི་ཞལ་གཅིག་ཕྱག་གཉིས་པའི་གཡས་གྱི་རྡོ་རྗེ་རྩེ་ལྔ་ཉིད་ལ་བྱའོ། །དེའི་དོན་སྟོང་པ་ཉིད་ཡིན་ལ། དེ་ལ་བཟུང་འཛིན་གྱིས་མི་ཕྱེད་པས་ན་རྡོ་རྗེ་མི་ཕྱེད་ཞེས་བྱའོ། །དེ་སྟོང་པའི་བརྡའ་རྡོ་རྗེ་ལ་སེམས་དཔས་སེམས་དཔའོ། །སྐུ་དེ་ཡང་སྐུ་གསུང་ཐུགས་གསུམ་སྟོང་ཉིད་དུ་རོ་གཅིག་པས་སྲིད་པ་གསུམ་ཞེས་བྱའོ། །གཏན་ཚིགས་འདི་ནི་ཤེས་རབ་སྟོང་པ་དང་རིག་པའི་ཡེ་ཤེས་གཉིས་པོ་དེ་ལ་རྡོ་རྗེ་སེམས་དཔའ་ཞེས་བྱའོ། །སེམས་དཔའ་ཆེན་པོ་ནི་ཕྱག་བཞི་པ་སྟེ། ཡེ་ཤེས་ནི་ཧེ་རུ་ཀ་ཕྱག་བཞི་པ་དེ་ཐབས་བདེ་བ་ཆེན་པོའོ། །དེ་ལ་སེམས་དཔའ་ཆེན་པོ་ཞེས་བྱའོ། །དམ་ཚིག་སེམས་དཔའ་ནི་ཕྱག་དྲུག་པའོ། །དེ་ཡང་རྟག་ཏུ་ཞེས་པ་དུས་ཐུན་གསུམ་མམ་བཞིར་རོ། །དམ་ཚིག་ནི་དབང་ཐོབ་ནས་ལྷའི་སྐུ་དང་མི་འབྲལ་བའོ། །སྤྱོད་པ་ནི་ཉམས་སུ་ལེན་པའོ་དེ་ནི་དམ་ཚིག་སེམས་དཔའ་ཞེས་བྱའོ། །དེ་རྣམས་རྫོགས་རིམས་དང་སྦྱར་ན། གོང་གི་ཐུགས་ཞེས་པས་སྟེ(ཏེ)། ཡུལ་སྙིང་ཁ་གནད་དུ་སོང་བ་སྟེ། དུས་གཉིད་ཀྱི་དུས་སུ་ཡུལ་གྱི་གནད་སྙིང་ཀ་(ག་)ན་ཤེས་པ་གནས་པ་ལ་སེམས་བཟུང་བ་ནི་གཉིད་ལ་སྦྱོང་སྟེ་དེ་ཡང་སེམས་འོད་གསལ་དུ་བཅུག་ནས་དེ་ཉིད་སྒོམ་པའོ། །དེ་དཀྱུས་དང་སྦྱར་ན། སེམས་སྟོང་པ་འོད་གསལ་དུ་གནས་པ་དེ་ལ་གཟུང་འཛིན་གྱི་རྡོ་རྗེ་ལ་མི་ཕྱེད་པ་ལ། མི་ཕྱེད་རྡོ་རྗེ་ཞེས་བྱར་བརྗོད། སེམས་དཔའ་ནི་སེམས་ཀྱི་རྒྱལ་པོ་སྙིང་ཀ་(ག་)ན་གནས་པ་ལ་བྱའོ། །སྲིད་པ་གསུམ་ནི་གཉིད་ཀྱི་རྣམ་པར་གསལ་བ་འགགས་པ་སྟོང་པ། བར་མ་འགགས་པ་སྟོང་པ་ཆེན་པོའོ། །ཕྲ་བ་འགགས་པ་ཤིན་ཏུ་སྟོང་པའོ། །གཏན་ཚིགས་འདི་ནི་
1-1-102b
རིག་སྟོང་དབྱེར་མེད་ཀྱི་ཉམས་མྱོང་དེ་ལ་རྡོ་རྗེ་སེམས་དཔའོ། །སེམས་དཔའ་ཆེན་པོ་ལ་ཡུལ་གྱི་གནད་འགྲིན་པ་ན་སེམས་ཀྱི་རྒྱལ་པོ་དེ་གནས་ཏེ། དེའང་རྨི་ལམ་ལ་གཙོར་བྱས་ནས། སེམས་ཀྱི་རྒྱལ་པོ་དེ་འཛིན་དེ་དེའི་སྒོ་ནས་འབྲས་བུ་འབྱུང་ཞིང་འཆར་ཏེ། དེས་བར་དོ་ཟིན་ལ་ལུས་ལེན་པར་འདོད་ན་ཡང་གང་འདོད་པའི་ལུས་འཐོབ་བོ། །ཡེ་ཤེས་ཆེན་པོ་ནི་རྨི་ལམ་གྱི་ཉམས་མྱོང་ལ་རོ་གང་བྱའོ། །དེ་ཉིད་སེམས་དཔའ་ཆེན་པོའོ། །དམ་ཚིག་སེམས་དཔའ་ནི་ཙན་ད་ལི་སྒྲོམ་པའི་དུས་སུ་ཡུལ་ལྟེ་བའི་རྩ་མདུད་ན་སེམས་ཀྱི་རྒྱལ་པོ་ཨ་ལ་སེམས་བཟུང་བས་ཡེ་ཤེས་གྱི་མེ་འབར་ལ། དེ་འབར་བས་སྤྱི་བོ་ནས་བྱང་སེམས་ཕབ་པས་ཉམས་མྱོང་འབྱུང་བའོ། །དེ་ལ་རྟགས་སུ་ཞེས་པ་ནི་དུས་སོ། །དམ་ཚིག་ལ་སྤྱོད་པ་ནི་སྤྱི་བོ་ནས་བྱང་སེམས་འབེབས་པའོ། །དེ་ལ་དམ་ཚིག་སེམས་དཔའ་ཞེས་བྱའོ། །དེ་རྣམས་འབྲས་བུ་དང་སྦྱར་ན་རྡོ་རྗེ་སེམས་དཔའ་ཆོས་སྐུ་ཞེས་བྱའོ། །ཆོས་སྐུ་ནི་སྟོང་པ་ལ་བྱས་ཏེ། དེ་ལ་མཚན་མ་དང་རྣམ་རྟོག་དང་བྲལ། སྤྲོས་པ་ཐམས་ཅད་དང་བྲལ་བའི་རྡོ་རྗེ་མི་ཕྱེད་ཞེས་བྱའོ། །སེམས་དཔའ་ནི་སྟོང་པ་ཉིད་ཀྱི་རོ་བདེ་བར་གནས་པའོ། །སྲིད་པ་གསུམ་ནི་ས་འོག་ས་སྟེང་ས་བླ་རྣམས་རོ་གཅིག་པའོ། །གཏན་ཚིགས་འདིས་ནི་ཤེས་རབ་སྟོང་པ་དང་རིག་པའི་ཡེ་ཤེས་དེ་ཉིད་དབྱེར་མེད་དུ་གནས་པའི་སྐུ་ཡིན་པས་དེ་ལ་རྡོ་རྗེ་སེམས་དཔའོ། །འབྲས་བུ་ནི་སེམས་དཔའ་ཆེན་པོ་ལ་ལོངས་སྐུ། དེ་ལ་ཡེ་ཤེས་ནི་བདེ་བ་ཆེན་པོའི་རོས་གང་བ་ནི་རྒྱས་པས་སྟེ་(ཏེ་)བདེ་སྟོང་ལ་ལོངས་སྤྱོད་པས་སོ། །དེ་ལྟ་བུའི་ལོངས་སྐུ་དེ་ལ་སེམས་དཔའ་ཆེན་པོ་ཞེས་བྱའོ། །དམ་ཚིག་སེམས་
1-1-103a
དཔའ་སྤྲུལ་སྐུས་ཏེ། དེ་དུས་ཐམས་ཅད་དུ་གདུལ་བྱ་ལ་སྐུས་དོན་རྒྱུན་དུ་བྱེད་པས་རྟག་ཏུའོ། །དོན་བྱེད་པ་ལས་མི་འདའ་བས་དམ་ཚིག་སེམས་དཔའ་ལ་སྤྱོད་པའི་ཕྱིར་རོ། །དེ་ལྟ་བུའི་སྤྲུལ་སྐུ་ལ་དམ་ཚིག་སེམས་པར་བརྗོད་དོ། །ད་ནི་སྙིང་པོ་ཀྱེའི་རྡོ་རྗེ་དྲིས་ལན་ནོ། །དེ་ལ་དྲིས་པ་ནི། རྡོ་རྗེ་སྙིང་པོས་གསོལ་པ། མིང་བསྡུས་པ་ནི་ཇི་ལྟ་བུ་ཞེས་པ་ནས། ཅི་ཞེས་པའི་བར་གྱིས་སྟོན་ཏེ། གང་གིས་ཀྱེའི་རྡོ་རྗེ་ལགས་ཞེས་པ་སྐུ་གསུམ་རོ་གཅིག་པ་བདེ་བ་ཆེན་པོའི་སྐུའོ། །མིང་བསྡུས་པས་ནི་ཅི་ལྟ་བུ་ཞེས་པ་རྒྱུད་རྒྱས་པའི་བརྗོད་བྱ་ཐམས་ཅད་དབང་པོ་རབ་ཀྱིས་མཚན་དུ་གོ་ཞིང་བསྡུས་པ་ཡིན་ན། དེ་ཐམས་ཅད་བསྡུས་པའི་བཛྲ་ཞེས་པའི་དོན་དེ་རང་དབང་པོ་ཐ་མས་མ་གོ་ནས། གང་གིས་ཀྱེའི་རྡོ་རྗེ་ལགས། ཧེའི་རྣམ་པ་ཅི་ཞིག་བཤད། བཛྲ་ཡིས་ཀྱང་དེ་བཞིན་ཅི་ཞེས་དྲིས་པའོ། །དེའི་ལན་བཀའ་སྩལ་ཞེས་པ་ལ་སོགས་པས་སྟོན་པའོ། །ལན་དེ་སྐྱེད་(བསྐྱེད་)རིམས་དང་སྦྱར་ན་སྙིང་རྗེ་ཆེན་པོ་ནི་ཞལ་བརྒྱད་ཕྱག་བཅུ་དྲུག་པའོ། །ཤེས་རབ་ནི་ཡུམ་བདག་མེད་མའོ། །ཡུམ་གྱིས་ཡབ་ལ་འཁྱུད་པ་སྟོང་པས་སྣང་བ་མི་སྟོང་པའི་བརྡར། ཡབ་གྱིས་(ཀྱིས་)ཡུམ་ལ་འཁྱུད་པས་ནི་སྣང་བ་སྟོང་པ་མི་གཏོང་བའི་བརྡའོ། །རྡོ་རྗེ་པདྨ་སྙོམས་པར་ཞུགས་པ་ནི་སྣང་སྟོང་གི་རོ་བདེ་བར་ཉམས་སུ་མྱོང་བའོ། །དེ་ལྟ་བུ་དེ་ཌ་ཀི་བརྒྱད་གྱིས་བསྐོར་བའོ། །རྫོགས་རིམས་དང་སྦྱར་ན་ལས་གྱི་ཕྱག་རྒྱའི་འོག་སྒོ་བདེ་བ་ཆེན་པོ་སྟོན་སྟེ(ཏེ)། དུས་ཀྱི་གནད་དང་ལུས་ཀྱི་གནད་ཡུལ་གྱི་གནད་གསུམ་དང་ལྡན་པས་ཡེ་ཤེས་འཆར་བའོ། །དེ་ཡང་སྙིང་རྗེས་ནི་ཡབ་འདུ་ཤེས་གསུམ་ལྡན་ནོ། །ཤེས་རབ་ཀྱིས་ཡུམ་འདུ་ཤེས་གསུམ་ལྡན་ནོ། །ཐབས་ནི་ལུས་ཀྱི་
1-1-103b
རྩོལ་བས་བྱང་སེམས་དབབ་དང་། ཐིག་ལེ་ལུས་ཀྱི་འཁྲུལ་འཁོར་དྲུག་གིས་བཟུང་བ་རྣམས་བསྟན་ནོ། །ཤེས་རབ་ནི་དོན་དམ་པ་ཟག་པ་མེད་པའི་ཡེ་ཤེས་ལ་བྱ། རྒྱུད་ནི་དེ་ལྟ་བུའི་སྒྲའི་ཚོགས་སྟོན་པའོ། །དེ་ངས་བཤད་པར་བྱའོ། །དེ་ཉིད་འབྲས་བུ་དང་སྦྱར་ན་བདེ་བ་ཆེན་པོའི་སྐུའོ། །དེ་ཡང་སྙིང་རྗེ་ནི་གསལ་བ་སྤྲུལ་སྐུ་དང་བདེ་བ་ལོངས་སྐུའོ། །ཤེས་རབ་ནི་སྟོང་པ་ཆོས་སྐུའོ། །ཐབས་དང་ཤེས་རབ་བདག་ཉིད་རྒྱུད་ཅེས་པ་དེ་གསུམ་རོ་གཅིག་པའི་བདེ་བ་ཆེན་པོའི་སྐུའོ། །དེ་ལྟར་ན་ཧེ་རུ་ཀ་བཞི་པོ་ནི་རྒྱུད་ཀྱི་དོན་ཐམས་ཅད་བསྡུས་པར་བསྟན་པ་སྟེ། དེས་རྒྱུད་ཀྱི་མཚན་བསྟན་པའོ། །ད་ནི་ལྟ་སྟངས་ཞེས་པ་ལ་སོགས་ན་མར་རྒྱུད་དངོས་སྟོན་ཏེ། དེ་ཡང་ལེའུ་དང་པོ་ནི་འབུམ་ལྔ་ཙམ་གྱི་མདོར་བསྟན་དུ་འདོད་དོ། །དེ་ཡང་ལྟ་སྟངས་ནི་ལེའུ་བཅུ་གཅིག་པའོ། །དགུག་དང་ནི་ལེའུ་གཉིས་པ། དོན་བྱེད་རྣམ་མང་བརྗོད་པ་ལེའུ་གཉིས་པ། །རེངས་པར་བྱེད་པ་གཉིས་པ། །སྐྲོད་པར་བྱེད་པ་གཉིས་པ། སྡེ་རེངས་པར་བྱེད་པ་དང་མངོན་སྤྱོད་དང་གཉིས་པ་ནས་སྟོན་སྟེ(ཏེ)། དེ་རྣམས་ནི་འབྲས་བུའི་རྒྱུད། དེ་ལས་ཀྱང་ལས་བརྒྱད་དུ་བསྡུས་པའི་འོག་གི་མདོར་སྟན་(བསྟན་)ནོ། །ཇི་ལྟར་རིགས་རྣལ་འབྱོར་མ་ཞེས་པ་ནི། གཞིའི་རྒྱུད་གྱི་མདོར་བསྟན་པ་སྟེ། བསྙེན་པ་དང་ས་ཆོག་དང་སྟ་གོན་དང་དབང་སྐུར་བ་ལ་སོགས་པ་ཇི་ལྟར་རིགས་པ་ལ་བྱས་སྟེ(ཏེ)། དེ་ཡང་ལྷ་གང་གི་ང་རྒྱལ་གྱིས་བྱེད་ན་རྣལ་འབྱོར་མ་སྟེ། ལྷ་དགུའམ་ལྷ་མོ་བཅོ་ལྔའི་ང་རྒྱལ་གྱིས་དེ་རྣམས་བྱ་ཞེས་པའི་དོན་ཏོ། །ད་ནི་ལྷ་མོ་བཅོ་ལྔའི་སྐྱེད་(བསྐྱེད་)རིམས་ལེའུ་བརྒྱད་པའི་མདོར་བསྟན་པ་ནི། བསྐྱེད་རྒྱུའི་ལྷ་ཇི་ལྟར་རིགས་པའི་རྣལ་འབྱོར་མ་བསྐྱེད་ཚུལ་མངལ་སྐྱེས་སྒོང་སྐྱེས་བརྫུས་སྐྱེས་ཅི་རིགས་པས་སྐྱེད་པའོ། །གནས་ཞེས་པ་ནི་ལྷ་ལ་
1-1-104a
དབང་བསྐུར་བའི་ལེའུ་བཞི་པའི་མདོར་བསྟན་པའོ། །ཡང་ན་ལེའུ་དགུ་པའི་རྣམ་དག་གིས་སེམས་གནས་པའོ། །བྱེད་རྒྱུ་ནི་ལེའུ་གཉིས་པའི་ཌ་ཀི་བཅོ་ལྔའི་ས་བོན་གྱི་མདོར་བསྟན་པའོ། །ནུས་པ་ནི་ལེའུ་དྲུག་པའི་སྤྱོད་པ་ནི་མདོར་སྟན་པའོ། །བརྡའ་ཆེན་ནི་ལེའུ་བདུན་པའི་མདོར་བསྟན་པའོ། །རྣམ་ཤེས་ནི་ཡེ་ཤེས་སུ་སྒྱུར་བ་ནི་རྫོགས་རིམ་ལེའུ་བརྒྱད་པའི་མདོར་བསྟན་པའོ། །ཧེ་རུ་ཀའི་བསྐྱེད་རིམས་མདོར་སྟན་(བསྟན་)པ་ནི། ལེའུ་གསུམ་པའི་ལྷ་རྣམས་བསྐྱེད་རྒྱུ་ལ། སྐྱེད་ཚུལ་མངལ་སྐྱེས་སྒོང་སྐྱེས་ཀྱིས་ཇི་ལྟར་འབྱུང་བའོ། །དེའི་རྫོགས་རིམས་མདོར་བསྟན་པ་ནི། ཧེ་རུ་ཀ་ཞེས་པ་བསྒྲུབ་བྱར་གཞག་(བཞག་)ནས། དེ་ཐོབ་པའི་ཉེ་བའི་རྒྱུ་གང་ཞེ་ན་དང་པོ་ཨེ་ཀ་བསྒོམ་པར་བྱ་ཞེས་པ་སྟེ། ཨེ་ནི་སྟོང་པ་ཀ་ནི་བདེ་བ་སྟེ་བདེ་སྟོང་དེ་དང་པོ་ཁོ་ནར་སྒོམ་ཅེས་པའོ། །དེ་ལྟ་བུ་སྒོམ་པ་དེ་རྡོ་རྗེ་སྙིང་པོ་སྙིང་རྗེ་ཆེན་པོ་ཞེས་བོས་ནས། བདེ་སྟོང་གི་དངོས་པོ་ཉིད་ཀྱིས་རྣམ་གྲོལ་ཞིང་ཞེས་སོ། །ཐ་མལ་པས་བདེ་སྟོང་དེ་མ་ཤེས་པས་དངོས་པོའི་འཆིང་བས་འཆིང་བར་འགྱུར་ལ། བདེ་སྟོང་དེ་ཡོངས་སུ་ཤེས་པས་གྲོལ་བ་ཡིན་པས་དངོས་པོ་མེད་པས་བདེ་སྟོང་ཡོངས་སུ་ཤེས་པས་ན། ཤེས་རབ་དང་ལྡན་པས་དེ་བསྒོམས་ཤིག་པའོ། །དེ་ལྟར་ཞེས་པ་ནི་གོང་དུ་བསྟན་པ་ལྟར་བདེ་སྟོང་བསྒོམས་ན་འབྲས་བུའམ་བསྒྲུབ་བྱ་ཧེ་རུ་ཀ་དེ་ཐོས་པས་ཧེ་རུ་ཀ་བསྒོམ་བྱ་ཞེས་སོ། །དེ་ལྟར་ན་རྒྱུད་དངོས་ལ་འབྲས་བུའི་རྒྱུད་མདོར་སྟན་(བསྟན་)པ་ལ་ལེའུ་བཅུ་གཅིག་པ་ལྟ་སྟངས་ཀྱི་ལེའུ། ལེའུ་གཉིས་པའི་མདོར་བསྟན་ནོ།། །།རྨི་ལམ་མདོར་སྟན་(བསྟན་)དང་། རང་བཞིན་གྱི་རྒྱུད་མདོར་སྟན་(བསྟན་)དང་གསུམ་མོ། །དེ་ལ་ལྷ་
1-1-104b
མོ་བཅོ་ལྔའི་བསྐྱེད་རིམས་མདོར་བསྟན་པ་དང་། ལྷ་དབང་བསྐུར་མདོར་སྟན་པ་དང་། ལེའུ་དགུ་པ་རྣམ་དག་གི་དང་། ལེའུ་དྲུག་པ་དང་། བདུན་པའི་བརྡའ་དང་སྤྱོད་པ་མདོར་བསྟན་པ་དང་། ལེའུ་གསུམ་པ་ཧེ་རུ་ཀའི་སྐྱེད་རིམས་མདོར་སྟན་(བསྟན་)པ་དང་། རྫོགས་རིམས་མདོར་སྟན་(བསྟན་)པ་སྟེ་དྲུག་གོ། །དེ་ལ་ལྷ་མོ་བཅོ་ལྔའི་རྫོགས་རིམས་མདོར་སྟན་པ་དང་། ཧེ་རུ་ཀའི་རྫོགས་རིམས་མདོར་སྟན་པ་དང་། རྫོགས་རིམས་དངོས་པོའི་གནས་ཐབས་ཤེས་བྱའི་ཡུལ་དུ་བསྟན་པ་དང་། གཏུམ་མོ་བརྒྱས་(རྒྱས་)པར་བསྟན་པས་སྟེ་(ཏེ་)བཞིའོ། །ཤེས་བྱའི་ཡུལ་དུ་བསྟན་པ་ལ་སེམས་དངོས་པོའི་གནས་ཐབས་ཀྱིས་སྒོམ་རྒྱུ་དོན་གྱི་ངོ་བོ་ངོ་ཤེས་པར་བསྟན་པ་དང་། ལུས་དངོས་པོའི་གནས་ཐབས་རྩའི་རྣམ་པར་གཞག་(བཞག་)པས་བསྒོམས་པའི་གནད་ཤེས་པ་དང་། ལུས་དང་སེམས་བསྡོམས་པས། འཁོར་མྱ་ངན་ལས་འདས་པའི་ཆོས་ཐམས་ཅད་ཀྱི་རྒྱུད་རང་ལ་ཚང་བར་བསྟན་པས་སྟེ་(ཏེ་)གསུམ་མོ། །དེ་ལྟར་ན་བསྡུས་པའི་རྣམ་པར་གཞག་(བཞག་)པ་བྱས་ནས་དེ་ལ་ཚིག་དོན་ནི། དེ་ལས་ཀྱང་སེམས་དངོས་པོའི་གནས་ཐབས་ཚིག་དོན་ནི། ལུས་ཞེས་པ་ནི་དང་པོ་ཕའི་ཁུ་བ་དང་། མའི་ཁྲག་དང་བར་དོར་ཞུགས་པས་ཟླ་བ་བཅུར་བགྲོད་ནས་ཕྱིར་བྱུང་བའི་ལུས་སོ། །དེ་ལྟ་བུའི་ལུས་ལ་རྩ་བཞི་གནས་ལ། དེ་ལ་སེམས་ཀྱི་རྒྱལ་པོ་དེ་གནས་པས་ན་ལུས་ཞེས་བྱའོ། །དཔེར་ན་ཤིང་ལ་བྱ་གནས་པ་དང་འདྲའོ། །དེ་ལྟ་བུའི་སེམས་དེ་ཡང་བདེ་སྟོང་དབྱེར་མེད་པའི་ཡེ་ཤེས་ཆེན་པོ་ལ་གནས་ཞེས་སོ། །དེ་རྣམ་པ་ཐམས་ཅད་ནུབ་པའི་ཤེས་པ་རྟོག་པ་ལས་ལོག་ནས་རྟོག་མེད་དུ། གནས་པས། རྟོག་པ་ཐམས་ཅད་ཡང་དག་སྤངས་ཞེས་བྱའོ། །དེ་ཉིད་མ་ཁྱབ་པ་ལས་
1-1-105a
ལོག་ནས་ཁྱབ་པར་གནས་པས་དངོས་པོ་ཀུན་ལ་ཁྱབ་པ་པོ་ཞེས་བྱ། དེ་ལྟར་མཚན་ཉིད་གསུམ་དང་ལྡན་པ་དེ་ལུས་ལ་གནས་ན་ལུས་ཤི་བའི་དུས་སུ་ལུས་དོད་པ་གླག་པ་བཞིན་དུ་འགྲོ་འམ་ཞེ་ན། ལུས་ལ་མ་སྐྱེས་པའོ་ཞེས་པ་སྟེ། མཐོའི་སྟེང་དུ་བྱ་བབས་པ་དང་འདྲའ་སྟེ། མཐོ་ཞིག་ནས་བྱ་འཕུར་བ་དང་འདྲ་བར་ལུས་བོར་ཏེ་ཤེས་པ་འཕོས་ནས་དོད་གླག་པ་མ་ཡིན་ནོ། །དེ་ལྟ་བུ་མཚན་ཉིད་གསུམ་པའི་དུས་སུ་མཚོན་ལ། དེ་ཉིད་ལམ་རང་ལུས་སྟེང་སྒོ་འམ། གཞན་ལུས་འོག་སྒོ་ན་འབྲས་བུ་ཆོས་སྐུ་སེམས་ཉིད་དེ་རང་ཐོབ་པར་འགྱུར་ཞེས་སོ། །ད་ནི་ལུས་དངོས་པོའི་གནས་ཐབས་ཀྱིས་སྒོམ་པའི་གནད་ཤེས་པར་བྱ་བའི་ཕྱིར་ལུས་གཏན་ལ་དབབ་པ་ནི། དེ་ལ་དྲིས་པ་དང་ལན་ལས། ལུས་ལ་ཡེ་ཤེས་ཆེན་པོ་གནས་ཞེས་པ་དེ་ལ་དྲིས་པ་ནི། ཀྱེ་བཅོམ་ལྡན་འདས་ཞེས་བོས་ནས་རྡོ་རྗེ་ནི་བདེ་སྟོང་ལ་བདེ་སྟོང་གི་ལུས་ལ་རྩ་དུ་ལགས་པ་འམ། ཡང་ན་རྡོ་རྗེ་ནི་ཧེ་རུ་ཀ་སྟེ་ལུས་དང་པོ་ནས་གྲུབ་པའི་དུས་སུ་བྱང་ཆུབ་པ་ལྔས་གྲུབ་པ་ཡིན་པས་སེམས་ཅན་ཐམས་ཅད་དགྱེས་པ་རྡོ་རྗེ་ལས་མ་འདས་པས་རྡོ་རྗེའི་ལུས་ཞེས་བྱའོ། །རྩ་དུ་ལགས་ཞེས་པ་ནི་སེམས་ཉིད་གྱི་རྒྱལ་པོ་དེ་གནས་པའི་ལུས་ལ་རྩ་དུ་ལགས་ཞེས་པའོ། །དེ་ཡང་དང་པོ་འཆི་བའི་དུས་ན་ལུས་ན་ལུས་ཀྱི་འབྱུང་བ་ས་ཆུ་ལ་ཐིམ་པས་ལུས་ཟུག་མི་ཐུབ་ལ། ཆུ་མེ་ལ་ཐིམ་པས་ཁ་སྣ་སྐམས། མེ་རླུང་ལ་ཐིམ་པས་ལུས་ཀྱི་དྲོད་འཆོར་རླུང་རྣམ་པར་ཤེས་པ་ལ་ཐིམ་པས་དབུགས་ཤྭ་ཤྭ་བུ་འབྱུང་། རྣམ་པར་ཤེས་པ་དང་སྣང་བ་དང་སྣང་བ་མཆེད་པ་དང་། སྣང་བ་ཉེ་ཐོབ་(དུ་)ཏུ་བསྡུ་ནས་མ་རིག་པ་འོད་གསལ་དུ་བསྡུས་ནས་དེ་སྒོ་དགུ་གང་ཡིན་པ་ནས་
1-1-105b
ཤེས་པ་འཕོས་ནས་བར་མ་དོར་གནས་ལ། བར་དོ་དེ་ཞག་བདུན་བདུན་གྱིས་སྐྱེ་བར་འཇུག་ལ་དེ་ལས་མ་མཐུན་ན་དེར་ཡང་འོར་རེ་འཆི་ལ་དེ་ནས་ཡང་ལུས་ལེན་ལ་དེ་བཞིན་དུ་བདུན་བདུན་ལ་འཇུག་གོ། །ཞག་བདུན་བདུན་ལོན་པའི་ནང་པར་མི་འཇུག་མི་སྲིད་དོ། །དེར་འཇུག་པའི་དུས་སུ་ཕའི་ས་བོན་ཡི་གེ་འབྲུ་གསུམ་གྱི་སྒྲ་དང་བཅས་པས། མའི་ཁྲག་འབྲུ་གསུམ་དེའི་བར་དུ་བར་དོའི་ཤེས་པ་རྣམ་སྣང་གི་སྒོ་ནས་ཞུགས་སྟེ(ཏེ)། མེར་མེར་པོ་དང་ལྟར་ལྟར་པོ་དང་འཁྲང་འགྱུར་དང་། དེ་ནས་ཁྱབ་འཇུག་ཉའི་རྣམ་པ་ལྟ་བུའོ། །དེའི་དུས་སུ་ལྟེ་བ་གཏུམ་མོའི་རྩ་ཤད་ལྟ་བུ་ཆགས་སོ། །དེ་ནས་ཁྱབ་འཇུག་རུ་སྦལ་པ་ལྟ་བུ་སྦལ་པ་ལྟ་བུ་ནས་ལུས་རྫོགས་སྟེ(ཏེ)། དེ་ཡང་ལྟེ་བའི་རྩ་ལས་རྩ་གསུམ་བྱུང་། དེ་ལས་རྩ་གསུམ་བཅུ་(ཅུ་)རྩ་གཉིས་བྱུང་། དེ་ལས་ཞག་རེ་རེ་ལ་རྩ་ཉིས་བརྒྱ་ཉིས་བརྒྱ་འཕེལ་བ་འབྱུང་ངོ་། །དེས་ལུས་ཀྱི་རྩའི་འཁོར་ལོ་བཞི་ཆགས་པའོ། །དེ་ན་གདོད་མ་ནས་ལུས་གྲུབ་པའི་ཀུན་རྫོབ་བྱང་ཆུབ་སེམས་དང་རླུང་འདྲེས་པའི་ཐིག་ལེ་གནས་པས་འཁོར་ལོ་བཞི་ན་སེམས་ཀྱི་རྒྱལ་པོ་དེ་དེ་ན་བརྟེན་ནས་གནས་པའོ། །དེའི་ཕྱིར་ལུས་མ་ཤེས་ན་རྩ་མི་ཤེས་ལ་དེ་མ་ཤེས་ན་རྟེན་ཐིག་ལེ་མི་ཤེས། དེ་མི་ཤེས་པས་སེམས་ཀྱི་རྒྱལ་པོའི་བཞུགས་ས་མི་ཤེས་སོ། །ལུས་ཀྱི་གནས་ལུགས་ཤེས་ན་སེམས་གྱི་རྒྱལ་པོའི་བཞུགས་ས་ཤེས་སོ། །དེ་ཤེས་པས་གནད་དུ་སྒོམ་ཤེས་པར་འགྱུར་རོ། །དེ་མ་ཤེས་ན་བསྒོམས་ཀྱང་ཡེ་ཤེས་མི་འཆར་ཏེ། དཔེར་ན་བའི་འོ་མ་འཇོ་བའི་དུས་སུ་འཇུག་མ་ནས་ཐེན་པའི་ཚོད་ཡིན་ནོ། །དེ་ནི་ཤིན་ཏུ་གལ་ཆེ་བ་ཡིན་པས་དེ་ལྟར་ལུས་ཀྱི་གནས་ལུགས་མཁྱེན་པར་མཛོད་ལ་གནས་
1-1-106a
པར་སྒོམས་(སྒོམ་)གཅིག་པའོ། །དེའི་ལན་རྒྱས་པར་བསྟན་པ་ནི་རྩའི་དབྱེ་བ་སུམ་བཅུ་(ཅུ་)རྩ་གཉིས་ནི་མི་ཕྱེད་མ་དང་ཕྲ་གཟུགས་མ་ལ་སོགས་པའོ། །དེ་རྣམས་ཀྱི་ལས་ནི་བྱང་ཆུབ་ཀྱི་སེམས་སུམ་བཅུ་(ཅུ་)རྩ་གཉིས་འབབ་ཞེས་པ་སྟེ། སྤྱི་བོ་ནས་འབབ་པས་འགྲིན་(མགྲིན་)པ་ཡན་ཆད་ལ་ཕན་འདོགས་ལ། དེ་བཞིན་དུ་མགྲིན་པ་ནས་སྙིང་ཁ་དང་ལྟེ་བ་ནས་རྐང་མཐིལ་བར་དུ་ཕན་འདོགས་པའོ། །བདེ་བ་ཆེན་པོའི་གནས་སུ་འཛག་པའོ་ཞེས་པ་ནི་ཟས་དང་སྐོམ་ཅི་མཐུངས་པ་ཐམས་ཅད་གཏུམ་མོའི་མེས་ཕེང་ཕེང་ཕེང་ཞེས་པའི་སྒྲ་སྒྲོགས་པ་དེས་ཟས་ཀྱི་དངས་མ་སྙིང་ཁ་དང་འགྲིན་(མགྲིན་)པ་དང་དེ་ནས་སྤྱི་བོར་སྐྱེལ་བར་བྱེད་པའོ། །ཟས་སྐོམ་རྩིགས་མ་ཐམས་ཅད་ཕྱི་རོལ་དུ་དྲི་ཆེན་དྲི་ཆུར་འབྱུང་(དབྱུང་)བའོ། །གཏུམ་མོའི་མེ་ཞན་ན་ནད་ཀྱང་འཇུག་ལ་ཟས་ཀྱང་མི་འཇུ་བ་ལ་སོགས་འབྱུང་བའོ། །དེ་རྣམས་གྱི་(ཀྱི་)ནང་ན་ཤེས་པ་ནི་རྩ་གསུམ་པོ་དེ་དང་པོ་ནས་གྲུབ་པས་གཙོ་བོ་ཞེས་བྱའོ། །དེའི་མིང་ནི་རྐྱང་མ་ལ་སོགས་པ་གསུམ་མོ། །དེ་གསུམ་གྱི་མཚན་ཉིད་ནི་རྐྱང་མ་ཤེས་རབ་སྟེ་བཟུང་བ་དག་པའོ། །རོ་མ་ཐབས་སྟེ་(ཏེ་)འཛིན་པ་དག་པའོ། །ཀུན་དར་མ་ནི་བཟུང་འཛིན་གྱི་རྩ་གཉིས་སྤངས་པའོ། །དེ་གསུམ་གྱི་ལས་ནི་རྐྱང་མ་མི་སྐྱོད་(བསྐྱོད་)འབབ་པ་ལ་སོགས་པ་སྟེ། དངོས་སུ་འབབ་པ་ཡིན་ལ། བུད་མེད་ལ་ནི་ཟླ་བ་དེ་ཨ་བ་དྷུ་ཏི་སྣ་ཡར་འཁྱིལ་བ་སྟེ། དེ་ལ་རྩ་སྣ་དེ་དུང་གི་རི་མོ་དང་འདྲ་བས་དུང་ཅན་མ་དང་། གླང་པོའི་སྣ་འདྲ་བས་གླང་སྣ་མ་དང་། རྩ་སྣ་བག་ཙམ་བལྟབ་པས་རི་དྭགས་ཅན་དང་། མེ་ཏོག་པདྨ་ལྟར་ཁ་ཟུམ་མེ་འདུག་པས་པདྨ་ཅན་ཞེས་བྱའོ། །སྐྱེས་པ་ལ་དངོས་སུ་འབབ་པའོ། །ཁྲག་ནི་བུད་མེད་ལ་ཟླ་བ་ཡར་ངོ་མར་ངོ་ཀུན་འབབ་ལ། སྐྱེས་པ་ལ་
1-1-106b
རྩ་སྣ་དེ་སྣ་བུག་གཡས་ན་ཟུག་ཡོད་པས་ཁམས་མ་སྙོམས་པ་ལ་ངེས་པ་མེད་དོ། །ཁམས་སྙོམས་པ་ལ་ངེས་པར་སྣ་བུག་གཡས་ནས་འབྱུང་ངོ་། །ད་ནི་རྩ་དེ་རྣམས་གྱི་(ཀྱི་)རང་བཞིན་ནམ་མཚན་ཉིད་ཇི་ལྟ་བུ་ལགས་ཞེས་ན། བཅོམ་ལྡན་འདས་རྩ་སུམ་བཅུ་(ཅུ་)རྩ་གཉིས་པོ་འདི་རྣམས་གྱི་(ཀྱི་)རང་བཞིན་ནམ་མཚན་ཉིད་ཇི་ལྟ་བུ་ལགས་ཞེས་དྲིས་པ། བཀའ་སྩལ་པ་ལན་ཏེ། རྩ་ནི་ཤེས་རབ་སྟོང་པ་ཡིན་ལ། དེའི་ནང་དུ་བྱང་ཆུབ་སེམས་འབབ་པ་ནི་ཐབས་བདེ་བའོ། །དོན་ལ་ཐབས་ཤེས་རབ་གཉིས་སུ་མེད་པ་ཡིན་པའོ། །གཉིས་མེད་གྱི་རྩ་དེ་ཡང་འཁོར་ལོ་བཞིར་རྩ་འདྲེས་ཤིང་རྩ་མདུད་གྲུ་གསུམ་དུ་གནས་ལ་དེ་ནས་གྱེས་ཙམ་ན་བཞི་བཞིར་གྱེས་པའོ། །ལས་ཀྱང་ལྟེ་བ་མན་ཆད་ནས་ལས་གསུམ་པོ་དེ་ངེས་པ་ཡོད་པའོ། །དེ་ཡང་སྲིད་གསུམ་ནི་རྩ་གསུམ་ལ་དེ་ཡོངས་སུ་གྱུར་པ་གང་དུ་འདུས་ན་ཐམས་ཅད་ནི་ཞེས་པ་རྩ་སུམ་བཅུ་(ཅུ་)རྩ་གཉིས་པོ་ཐམས་ཅད་དོ། །གཟུང་བ་ནི་རྐྱང་མའོ། །འཛིན་པ་ནི་རོ་མའོ་དེ་རྣམ་པར་སྤངས་པ་ནི་ཨ་བ་འདུ་(དྷུ་)ཏི་ལ་དེ་མེད་པའོ། །དེ་ཡང་རྩ་ཐམས་ཅད་ཐ་དད་པ་མེད་དེ་རྩ་མདུད་གྲུ་གསུམ་དུ་འདྲེས་ཤིང་འཁོར་ལོ་བཞི་པོར་གཅིག་པས་ན། ཡང་ན་ཐབས་ནི་ཐམས་ཅད་ཀྱིས། །དངོས་པོའི་མཚན་ཉིད་དུ་ནི་བརྟག་ཞེས་(ཅེས་)བྱའོ། །དེ་ལྟར་གཉིས་མེད་གྱི་སེམས་དངོས་པོའི་གནས་ཐབས་ཀྱིས་ལྟ་བ་གཏན་ལ་ཕབ་པས་སྒོམ་རྒྱུ་དོན་གྱི་ངོ་བོ་ངོ་ཤེས་ལ། ལུས་ཀྱི་རྩས་སྒོམས་(བསྒོམས་)པའི་གནད་ངོ་བོ་ངོ་ཤེས་པར་བྱས་སྟེ་(ཏེ་)དེ་གཉིས་དང་ལྡན་ན་ཡེ་ཤེས་འཆར་བའོ། །ད་ནི་དེ་གཉིས་བསྡོམས་པ་ལས་ཐམས་ཅད་ཚང་ཞིང་ལྡན་པར་སྟན་(བསྟན་)པ་ནི་སྡོམ་པའི་དབྱེ་བ་ཞེས་པ་ལ་སོགས་གསུངས་སྟེ(ཏེ)། སྡོམ་པ་ནི་ལུས་སེམས་གཉིས་མེད་
1-1-107a
དུ་བསྡམས་པའི་རང་བཞིན་གཉུག་མ་སེམས་གྱི་རྒྱལ་པོ་དེ་ལའོ། །དབྱེ་བ་ནི་སེམས་ཀྱི་རྒྱལ་པོ་དེ་ཉིད་བྱེ་བྲག་ཅིར་ཡང་སྣང་ཞིང་ཤར་བ་ལ་བྱའོ། །དེ་ལྟར་ཚང་བས་བཤད་པར་བྱའོ། །རང་བཞིན་ཐ་མལ་པའི་ཨ་ལི་ཀ་ལི་རྣམས་སུ་བྱུང་། དེ་ཉིད་ཐ་མལ་པའི་ཉི་མ་དང་ཟླ་བར་སྣང་ཞིང་ཤར་བའོ། །ཤེས་རབ་ནི་སེམས་ཉིད་དེ་སྟོང་པའི་ངོ་ནས་སོ། །ཐབས་ནི་ཀུན་རྫོབ་ཅིར་སྣང་བསོ། །སེམས་ཉིད་དེ་ཉིད་སྐུ་དང་གསུང་དང་ཐུགས་སོ། །དེ་དག་ཐམས་ཅད་སེམས་ཉིད་གཉུག་མའི་རྣམ་འཕྲུལ་དུ་བྱུང་བར་སྟན་(བསྟན་)ནོ། །དེ་ལྟར་ན་ལུས་ལ་ཚང་བས་དབང་གསུམ་པ་ལ་ཚང་། དེ་དབང་དང་སྦྱར་ཏེ་སྡོམ་པ་ནི་སམ་བྷ་ར་སྟེ་བདེ་སྟོང་དེ་བསྡོམས་པ་ལ་བྱ། དབྱེ་བ་ནི་སེམས་ཀྱི་རྒྱལ་པོ་དེ་དབང་གི་དུས་སུ་འདི་ལྟར་སྣང་ཞེས་བྱའོ། །ཨ་ལི་ནི་ཡུམ་གྱི་པདྨ་ཧྲི་ལས་པདྨར་བྱིན་གྱིས་བརླབ་པའོ། །ཀ་ལི་འདུས་པའི་ཧཱུྃ་གིས་ཡབ་གྱི་(ཀྱི་)རྡོ་རྗེ་སློབ་པའོ། །དེ་ཉིད་ལ་ཉི་མ་དང་ཟླ་བ་བྱས་སྟེ་(ཏེ་)ཉི་མ་ཡུམ་ལ་ཟླ་བ་ཡབ་བོ། །དེ་ནས་ལུས་ཀྱི་རྩོལ་བས་བྱང་སེམས་དབབ་པ་དང་གཟུང་བ་དེ་ཐབས་སོ། །རྡོ་རྗེའི་རྩ་བར་སླེབ་ནས་བུམ་པར་ལྷན་སྐྱེས་ཉམས་སུ་མྱོང་བ་ཤེས་རབ་བོ། །དེའི་དུས་ཀྱི་ཉམས་མྱོང་ལ་སྟོང་པ་ཆོས་སྐུ། བདེ་བ་ལོངས་སྐུ། གསལ་བ་སྤྲུལ་སྐུ་གསུམ་མོ། །སྐུ་གསུང་ཐུགས་ཞེས་པ་ནི་བདེ་བ་སྐྱེད་པའི་རྩ་གསུམ་འདུས་པའི་རྩ་མདུད་བྷ་ག་དེར་བདེ་བ་དེ་ལྟ་བུ་འཆར་བར་བྱའོ། །དེ་ལྟར་དབང་ལ་ཚང་བས་ལམ་སྐྱེད་(བསྐྱེད་)རིམས་ལ་ཚང་བ་ནི་ཨ་ལི་ལ་ཟླ་བ་དང་། ཀ་ལི་ལས་ཉི་མ་དང་། དེ་གཉིས་ཀྱི་དུས་སུ་ཨ་ཧཱུཾ་བྱུང་བ་ལ་ཐབས་དང་ཤེས་རབ་བོ། །དེ་ལས་ཡབ་ཡུམ་གཉིས་སུ་མེད་པར་ལངས་པ་ལ་ཚང་བར་བསྟན་པ་ནི། ཨ་ལི་འདུས་པ་གཏུམ་མོའི་ཨ། ཀ་ལི་
1-1-107b
ལུས་ཀྱི་སྤྱི་བོའི་ཧྃ། ཟླ་བ་སྤྱི་བོའི་བྱང་ཆུབ་སེམས་ཐིག་ལེ། ཉི་མ་གཏུམ་མོའི་མེ་ཚ་བ། ཤེས་རབ་ལྟེ་བ་གྲུ་གསུམ། ཐབས་སྤྱི་བོའི་རྩ་མདུད། སྐུ་གསུང་ཐུགས་སྐྱེ་མེད་དུ་བའོ། །དེ་ཡང་རྒྱས་པར་ལོག་ནས་རྟོག་མེད་ཆོས་སྐུ། སྡུག་བསྔལ་ལས་ལོག་ནས་བདེ་བ་ལོངས་སྐུ། མི་གསལ་བ་ལས་ལོག་ནས་གསལ་བ་སྤྲུལ་སྐུའོ། །དེ་ལམ་དུ་འཁྱེར་སྟེ་(ཏེ་)སྒོམ་པ་བརྟན་པ་འོག་མའི་ལེའུ་བཞི་པར་བྷོ་ལའི་བདེ་བ་གཞན་དུ་བསྒོམ་ཅེས་བྱ་སྟེ། དེ་རྣམས་དངོས་པོའི་གནས་ལུགས་སུ་བསྟན་གྱི་ཉམས་སུ་བླང་བར་མི་འདོད་དོ། །དེ་ཡང་སེམས་ཉིད་དེའི་དབྱེ་བ་དེར་མ་ཟད་དེ་ལ་མྱ་ངན་ལས་འདས་པའི་ཆོས་ཚང་བར་སྟོན་པ་ནི། སྲ་བ་རུས་པ་ལ་སོགས་པ་འབྱུང་བ་ས་ལ། ཡི་གེ་ཨེ། ལྷ་མོ་སྤྱན་མའོ། །འཁོར་ལོ་ནི་ལྟེ་བ་སྤྲུལ་པའི་འཁོར་ལོའོ། །རང་གི་ལུས་གྱི་(ཀྱི་)གཤེར་བ་ཐམས་ཅད་འབྱུང་བ་ཆུ། ཡི་གེ་བམ། ལྷ་མོ་མ་མ་ཀི། འཁོར་ལོ་སྙིང་ཁའོ། །ལུས་ལ་དྲོད་དུ་བྱུང་བ་ཐམས་ཅད་འབྱུང་བ་མེ་ལ་ཡི་གེ་མའོ། །ལྷ་མོ་གོས་དཀར་མོ། འཁོར་ལོ་འགྲིན་པའོ། །སྒོ་དགུའི་རླུང་རྒྱུ་བ་འབྱུང་བ་ཐམས་ཅད་རྐང་མར་ཚིལ་བུ་ལ་སོགས་པ་ཐམས་ཅད་འབྱུང་བ་རླུང་། ཡི་གེ་ཡའོ། །ལྷ་མོ་ན་སྒྲོལ་མའོ། །འཁོར་ལོ་ན་བདེ་ཆེན་ནོ། །དེ་ལྟར་ན་སེམས་ཉིད་དེ་ཉིད་སྣང་ཞེས་བྱའོ། །ད་ནི་སེམས་ཉིད་དེ་ཉིད་འབྲས་བུ་དཀོན་མཆོག་གསུམ་དུ་ཡང་སྣང་ཞེས་བྱའོ། །དེ་ལས་ཀྱང་རྩའི་འཁོར་ལོ་བཞི་འབྲས་བུ་སྐུ་བཞི་རུ་སྣང་བར་སྟོན་པ་ནི། སྤྲུལ་པའི་འཁོར་ལོ་ལ་ཞེས་པ་ལ་སོགས་པ་ཚིག་བཞིས་སྟོན་སྟེ(ཏེ)། དེ་ལ་དྲུག་སྟེ། མིང་ན་གནས་པ་དང་། དུས་ནམ་གནད་དུ་འགྲོ་བ་དང་། འཐད་པ། གྲངས་མང་ཉུང་། རྣམ་པར་དག་པའོ། །
1-1-108a
དེ་ལ་མིང་ནི་རྟག་པ་ཕྱི་མའི་ལེའུ་བཞི་པ་ནས། ཆོས་དང་ལོངས་སྤྱོད་སྤྲུལ་པ་དང་། དེ་བཞིན་དུ་ཡང་བདེ་ཆེན་ཉིད་ཞེས་སྟེ(ཏེ)། ཆོས་སྐུ། ལོངས་སྐུ། སྤྲུལ་སྐུ། བདེ་བ་ཆེན་པོའི་སྐུའོ། །སྐུ་བཞིའི་གནས་ས་ནི། ཡང་དེ་ཉིད་ནས། སྐྱེ་གནས་སྙིང་མགྲིན་མགོ་བོར་ཡང་། སྐུ་གསུམ་པོར་ནི་རྣམ་པར་གནས་ཞེས་པ་སྟེ། ལྟེ་བ་སྙིང་ཁ། མགྲིན་པ། སྤྱི་བོའི་རྩ་བཞིའོ། །དུས་ནམ་གནད་དུ་འགྲོ་ན་སྙོམས་འཇུག་གི་དུས་སུ་སྤྱི་བོར་གནས། རྨི་ལམ་གྱི་དུས་སུ་འགྲིན་(མགྲིན་)པ། གཉིད་གྱི་དུས་སུ་སྙིང་ཀ(ག) །དེ་གསུམ་མ་ཡིན་པའི་ཐ་མལ་པའི་དུས་ཐམས་ཅད་དམ་གཏུམ་མོའི་དུས་སུ་ལྟེ་བར་གནས་པས། གནས་དེ་དང་སྒོམས་པས་ཡེ་ཤེས་འཆར་རོ། །མ་ཐད་པ་ནི་ཅིའི་ཕྱིར་ལྟེ་བ་ལ་སྤྲུལ་པའི་སྐུ་ཞེས་བྱ་ན། ཐེ་ཙོམ་སེལ་བའི་ལེའུ་ལས། གང་ཕྱིར་སྤྲུལ་པ་གནས་བརྟན་ཕྱིར། དེ་ལ་སྤྲུལ་པའི་སྐུ་ཉིད་ཡིན། གང་ཞིག་སྐྱེད་དང་སྤྲུལ་བྱེད་པའི། གང་གི་སྤྲུལ་པ་ཅན་ཞེས་བརྗོད། ཞེས་ཚིག་དྲུག་གིས་བསྟོན་སྟེ(ཏེ)། གྲངས་མང་ཉུང་ནི་སྤྲུལ་པའི་འཁོར་ལོ་འདབ་མ་དྲུག་བཅུ་(ཅུ་)རྩ་བཞི་ཞེས་པས་སྟེ། འཁོར་ལོ་བཞི་ཀ་ན་རྩ་འདབ་བརྒྱད་བརྒྱད་ཡོད་ལ། ཀྱོག་ལ་རྩིས་པས་དྲུག་བཅུ་(ཅུ་)རྩ་བཞི་དང་། སྙིང་ཀ་(ག་)ཀྱོག་མེད་བརྒྱད། འགྲིན་(མགྲིན་)པ་བཅུ་དྲུག །སྤྱི་བོ་ན་སོ་གཉིས་སོ། །རྣམ་པར་དག་པ་ནི་སྤྲུལ་པའི་དྲུག་བཅུ་(ཅུ་)རྩ་བཞི་པ་ནི་དབྱུག་གུ་དྲུག་བཅུ་(ཅུ་)རྩ་བཞི་དག །སྙིང་ཀས་(གས་)ཐུན་རྒྱད་(བརྒྱད་)དག །འགྲིན་(མགྲིན་)པས་འཕོ་བ་བཅུ་དྲུག་དག །སྤྱི་བོས་ཐུན་ཚོད་ཆེན་པོ་སོ་གཉིས་དག་པའོ། །དེ་ལྟར་སྐུ་བཞི་ཚང་བར་སྟན་(བསྟན་)ནས། ད་ནི་སེམས་ཉིད་དེ་ལ་ཆོས་དཀོན་མཆོག་ཚང་བར་སྟན་(བསྟན་)པ་ནི། དེ་ཡང་འཁོར་བའི་རྒྱུ་འབྲས་གཉིས་ཚང་བ་ནི་སྤྲུལ་པའི་འཁོར་ལོ་ལ་སྡུག་བསྔལ་
1-1-108b
དང་། ཆོས་ཀྱི་འཁོར་ལོ་ལ་ཀུན་འབྱུང་པོ། །མྱང་འདས་ཀྱི་རྒྱུ་འབྲས་གྱི(ཀྱི)། ལོངས་སྤྱོད་འཁོར་ལོ་ལ་འགོག་པ་དང་། བདེ་ཆེན་འཁོར་ལོ་ལ་ལམ་མོ། །དེ་ཡང་ཐེ་ཙོམ་སེལ་བ་ལས། ཨེ་བྃ་རྣམ་པར་རྒྱུ་མཐུན་ཉིད། རྣམ་སྨིན་ཆོས་ཀྱི་འཁོར་ལོ་ལས་ཞེས་པ་ལ་སོགས་པ་གསུངས་སོ། །དེ་ལྟར་ལུས་ལ་གནས་པ་ཡིན་པ་ལ་ལམ་དུ་བཟློག་ནས་སྒོམས་(སྒོམ་)ན་ཙན་ད་ལིའི་དུས་སུ་སྟེང་འོག་རླུང་ལུས་བཅོས་ནས་རླུང་སྡོམ་པ་ཀུན་སྡུག་བསྔལ་གྱི་བདེན་པས་སྟེ་(ཏེ་)སྡུག་བསྔལ་དེ་རྣམས་ཀྱིས་རྒྱུ་བྱས་འབྲས་བུ་ཟུག་གཟེར་བྱུང་བ་ནི་སྡུག་བསྔལ་བདེན་པའོ། །དེ་ཡང་བདེ་བའི་སྣ་སྡུག་བསྔལ་གྱིས་འདྲེན་པའོ། །དེ་ནས་གཏུམ་མོ་ལ་མེ་འབར་ཚོད་དེ་ལ་ཀུན་འབྱུང་གི་བདེན་པ་ཞེས་བྱའོ། །དེ་ནས་རྩ་དམིགས་ཐམས་ཅད་ནས་ཐིག་ལེ་གཤེགས་པ་ནི་ལམ་གྱི་བདེན་པའོ། །དེའི་དུས་སུ་མེ་དང་བྱང་སེམས་འདྲེས་པས་ལྷན་སྐྱེས་ཉམས་སུ་མྱོང་ནས་རྣམ་རྟོག་འགགས་པ་ལ་འགོག་པའི་བདེན་པ་ཞེས་བྱའོ། །དེ་ཡང་ལམ་དངོས་མ་ཡིན་སྟེ་(ཏེ་)ལུས་སེམས་ལ་ཚང་བར་སྟན་(བསྟན་)པའོ། །དེས་འཕགས་པའི་བདེན་པ་བཞི་ཆོས་དཀོན་མཆོག་ཚང་བར་སྟན་(བསྟན་)ནས། ད་ནི་དགེ་འདུན་དཀོན་མཆོག་ཚང་བར་བསྟན་པ་ནི། སྡེ་པ་བཞི་ནི་ཞེས་གསུངས་སྟེ(ཏེ)། གནས་བརྟན་པའི་སྡེ་པ་ནི་སྤྲུལ་པའི་འཁོར་ལོ་ལ་ཚང་། སྙིང་ཀར་(གར་)ཐམས་ཅད་ཡོད་པར་སྨྲ་བ། འགྲིན་(མགྲིན་)པར་མང་པོས་བཀུར་བ། སྤྱི་བོར་ཕལ་ཆེན་པོའི་སྡེ་པར་བསྟན་པའོ། །དེ་ལ་ཡང་ཐེ་ཙོམ་སེལ་བ་ལས་གང་ཕྱིར་སྤྲུལ་པ་གནས་བརྟན་ཕྱིར། སྤྲུལ་པའི་འཁོར་ལོ་གནས་བརྟན་ཉིད་ཞེས་པ་ལ་སོགས་པ་གསུངས་སོ། །དེ་ལྟར་དཀོན་མཆོག་གསུམ་ལ་ཚང་བར་བསྟན་ནས། ད་ནི་ལུས་སེམས་གཉིས་སྡོམས་(སྡོམ་)པ་དེ་ལ་སྐད་ཅིག་མ་བཞི་དང་དགའ་བ་བཞི་ཡང་
1-1-109a
ཚང་བར་སྟོན་པ་ནི། རྣམ་པ་སྣ་ཚོགས་པའི་སྐད་ཅིག་མ་ནི་སྤྲུལ་པའི་འཁོར་ལོ་ལ་ཚང་། རྣམ་པར་སྨིན་པ་སྙིང་ཀ(ག) །རྣམ་པར་ཉེད་པ་འགྲིན་(མགྲིན་)པ། མཚན་ཉིད་དང་བྲལ་བ་སྤྱི་བོ་ལ་ཚང་ངོ་། །དགའ་བ་བཞི་ཡང་ལྟེ་བར་དགའ་བ། སྙིང་ཀར་(གར་)མཆོག་དགའ། འགྲིན་(མགྲིན་)པར་དགའ་བྲལ། སྤྱི་བོར་ལྷན་གཅིག་(ཅིག་)སྐྱེས་པ་ཚང་ངོ་། །དེ་གཉིས་གྱི་ཁྱད་ནི་མི་འདྲ་བ་དང་དུས་ཚོད་དུ་གཅོད་པའི་སྒོ་ནས་སྐད་ཅིག་མ་བཞི། ཡེ་ཤེས་རང་གི་ངོ་བོའི་སྒོ་ནས་དགའ་བ་བཞིའོ། །དེ་རྣམས་ཀྱང་གཏུམ་མོ་ལ་སོགས་ལམ་ལས་ཀྱི་ཕྱག་རྒྱའི་སྐབས་སུ་འབྲས་བུ་དེ་ལྟར་འཆར་བས། འབྲས་བུའི་རིམ་པ་སྟན་(བསྟན་)པ་ལས། ཉམས་སུ་བླང་དུ་མི་བཞེད་དོ། །དེ་རྣམས་ཀྱང་རེ་ཤིག་ལམ་སྒོམ་པ་གཏུམ་མོ་དང་སྦྱར་ན་སྟེང་འོག་གི་རླུང་བསྡོམས་ནས་ཨ་ལ་སེམས་སྟོད་པ་ནི་རྣམ་པ་སྣ་ཚོགས་པའི་སྐད་ཅིག་མ་སྟེ་དགའ་བ། སྤྱི་བོ་ནས་ཐིག་ལེ་འབབ་ཚོད་ནི་རྣམ་པར་སྨིན་པས་སྟེ་(ཏེ་)མཆོག་དགའོ། །ཐིག་ལེ་དང་མེ་འདྲེས་ནས་བདེ་སྟོང་ཉམས་སུ་མྱོང་བ་ནི་མཚན་ཉིད་དང་བྲལ་བ། ལྷན་ཅིག་སྐྱེས་པའི་དགའ་བའོ། །རྗེས་ལ་གོང་གི་བདེ་བ་རྟོག་དཔྱོད་ནི་རྣམ་པར་ཉེད་པ་དགའ་བྲལ་ལོ། །འདིར་དགའ་བ་བཞི་དང་སྐད་ཅིག་མ་བཞི་པོ་ལམ་ལ་སྦྱར་བ་ཡིན། དེ་རྣམས་ཀྱང་སྒོམ་པ་མིན་ཏེ་འབྲས་བུ་གནས་ཐབས་གྱིས་(ཀྱིས་)རང་ཤུགས་ལ་དེ་ལྟར་འབྱུང་བའོ། །དེ་ཡང་རྫ་མའི་ནང་དུ་མར་མེ་གཏང་བས་ཁང་པའི་ནང་མི་གསལ་བ་འམ། དུང་གིས་སྲེ་མོག་བཞིན་དུ་དེ་ལྟར་གནས་པ་དེའི་སྒྲིབ་པ་འམ་བག་ཆགས་གྱིས་(ཀྱིས་)སྒྲིབ་སྟེ། དེ་བསལ་བའི་ཐབས་ལམ་སྒོམས་(སྒོམ་)པས་འབྲས་བུ་གནས་ཐབས་འཆར་རོ། །དེ་ཡང་ཕྱག་རྒྱ་མ་སྟེན་(བསྟེན་)ནས་བསྒོམས་ན། ལས་རྒྱ་དང་གཉིས་སྙོམས་པར་ཞུགས་པ་དེ་རྣམ་པ་སྣ་ཚོགས་པ་དགའ་བའོ། །ཐིག་ལེ་རྡོ་རྗེའི་རྩ་བར་ཕྱིན་པ་ནི་
1-1-109b
རྣམ་པར་སྨིན་པ་དང་མཆོག་དགའོ། །རྡོ་རྗེ་ནོར་བུའི་རྩེ་མོར་ཐིག་ལེ་བཟུང་བའི་དུས་ན་མཚན་ཉིད་དང་བྲལ་བ་དང་ལྷན་ཅིག་སྐྱེས་པའི་དགའ་བའོ། །དེ་ནས་ཐིག་ལེ་ཟློག་པའི་དུས་ན་རྣམ་པར་ཉེད་པའི་སྐད་ཅིག་མ། དགའ་བྲལ་གྱི་དགའ་བའོ། །དེ་ལྟར་རང་གི་ལུས་སེམས་གཉིས་བསྡོམ་(སྡོམ་)པ་ནི་དེ་ལ་དེ་ཁོ་ན་ཉིད་བཞི་ཚང་བར་སྟན་(བསྟན་)པ་ནི། དེ་ཁོ་ན་ཉིད་བཞི་ཞེས་པ་གསུངས་པས་སྟེ(ཏེ)། དེ་ལ་བདག་གི་དེ་ཁོ་ན་ཉིད་ལྟེ་བའི་འཁོར་ལོ་ལ་ཚང་། སྔགས་ཀྱི་དེ་ཁོ་ན་ཉིད་སྙིང་ཀ(ག) །ལྷའི་འགྲིན་(མགྲིན་)པར། ཡེ་ཤེས་ཀྱི་དེ་ཁོ་ན་ཉིད་སྤྱི་བོར་ཚང་། དེ་ལྟར་རང་གི་ལུས་ལ་ཚང་བས་ལམ་དུ་ཟློག་ནས་སྒོམ་པ་ལ་ཚང་བས། སྒོམ་པ་ལ་སྦྱར་ན་དངོས་པོའི་གནས་སྟབས། ལམ་གྱི་གནས་སྟབས། འབྲས་བུའི་གནས་སྟབས་གསུམ་དུ་བསྡུའོ། །དེ་ཡང་དངོས་པོའི་གནས་སྟབས་བདག་གི་དེ་ཁོ་ན་ཉིད་ལྷའི་དེ་ཁོ་ན་ཉིད་གཉིས་སུ་བསྡུས། འབྲས་བུའི་གནས་སྟབས་སུ་ཡེ་ཤེས་ཀྱི་དེ་ཁོ་ན་ཉིད་བསྡུས་སོ། །དེ་ཡང་བདག་གི་དེ་ཁོ་ནས་ལུས་དངོས་པོའི་གནས་སྟབས་སྒོམས་(སྒོམ་)པའི་གནད་ཤེས་པར་བྱེད། ལྷའི་དེ་ཁོ་ན་ནི་སེམས་དངོས་པོའི་གནས་སྟབས་ལྟ་བ་གཏན་ལ་འབེབས། སྔགས་གྱི་(ཀྱི་)དེ་ཁོ་ནས་རྫོགས་རིམས་གང་རུང་གཅིག་གིས་ཡིད་སྐྱོབས་ལ་བྱ་སྟེ། དེ་ཉིད་ལམ་གྱི་གནས་སྟབས་སོ། །ཡེ་ཤེས་ཀྱི་དེ་ཁོ་ན་ཉིད་འབྲས་བུའི་གནས་སྟབས་ཏེ། རྫོགས་རིམས་གྱི་ཉམས་གོང་ནས་གོང་དུ་འབྱུང་བ་ལ་བྱའོ། །རྒྱས་པར་ལེའུ་ལྔ་པར་སྟོན། འདིར་ལུས་ལ་ཚང་བར་བསྟན་པའོ། །དེས་ནི་མྱ་ངན་ལས་འདས་པའི་ཆོས་ཚང་བར་བསྟན་ནས། ད་ནི་འཁོར་བའི་རྒྱལ་པོ་དབྱུག་གུ་ལ་སོགས་པ་རང་ལ་ཚང་བར་སྟན་(བསྟན་)པ་ནི། ཟླ་བ་དང་ཞེས་པ་ལ་སོགས་པའོ། །དེ་ལ་ཟླ་བ་ནི་གཡོན་ནས་རྒྱུ་བའི་རླུང་། ཉི་མ་ནི་གཡས་ནས་རྒྱུ་བའི་རླུང་། ཨ་ལི་ནི་ནང་དུ་འཇུག་པའི་རླུང་། ཀ་ལི་ཕྱིར་འགྲོ་བའི་རླུང་ངོ་། །
1-1-110a
ཡང་ན་ཨ་ལི་ནི་གཡོན་ཐུར་ལྟ། ཀ་ལི་ནི་གྱེན་ལྟའོ། །དེ་རྣམས་ཀྱང་ལུས་ལ་རང་བཞིན་གྱིས་ཚང་བའོ། །དེ་ལྟ་བུའི་རླུང་གི་སྒོ་ནས་ལས་ཤིས་པ་དང་མི་ཤིས་པ་བསྟན་པའོ། །འཕོ་བ་ལ་སོགས་པ་ནི་ཕྱིའི་ཆུ་ཚོད་དང་། དབྱུ་གུས་ནམ་ཟླ་དང་ལས་ཀྱི་དུས་ཚོད་འཛིན་ལ། དེ་ཡང་གསེར་བསྲང་གཅིག་ལ་གསེར་གྱི་བཞོང་(གཞོང་)པ་ཞེང་དུ་གཉིས་པ་སྤངས་སོར་བཞི་པ་གཅིག་བྱས་ལ། གསེར་ཞོ་བཞི་ལ་ཐུར་མ་སོར་དྲུག་པ་གཅིག་བྱས་སྟེ(ཏེ)། དེས་གཞོང་པའི་དབུས་ཕུག་པའི། གཞོང་པ་དེ་སྣོད་ཆུས་བཀང་བར་བཞག་ལ། ཟངས་གྱི་(ཀྱི་)ཁ་ལ་དབྱུག་པ་གཅིག་རྒྱབ། ཐུར་མ་བྱུང་ལ། དེ་ནས་ཆུ་དེ་གང་ནས་སྣོད་གཅིག་དུ་གཞག་(ཏུ་བཞག་)ལ་དེ་ལ་དབྱུག་གུ་གཅིག་རྒྱབ་པས་ཟད་པས། དེ་ལྟར་ན་གཅིག་ཏུ་བགྲངས་པས་དབྱུག་གུ་དྲུག་བཅུ་རྩ་བཞི། ཆུ་ཚོད་སུམ་བཅུ་(ཅུ་)རྩ་གཉིས། སྣོད་གཅིག་ནས་གཅིག་དུ་(ཏུ་)འཕོ་བ་བཅུ་དྲུག །ཐུན་ཆེན་པོ་བརྒྱད། ཐུན་ཆེན་པོ་བཞིའོ། །ཕྱིའི་ཆུ་ཚོད་དེ་རྣམས་རྣལ་འབྱོར་པའི་རླུང་ལ་བཟུང་བ་ནི། རྒན་པ་ལ་རླུང་མི་ཐེམ། གཞོན་པ་ལ་ལྷག །དར་ལ་བབ་པ་གཅིག་ལ་རླུང་ཉི་ཁྲི་ཆིག་སྟོང་དྲུག་རྒྱ་རྒྱུ་སྟེ། རླུང་ལ་རྩི་བ་ནི། འཕོ་བ་བཅུ་དྲུག་གི་རེ་རེ་ལ་རླུང་སྟོང་སུམ་བརྒྱ་ལྔ་བཅུ་རྒྱུ་བའོ། །དབྱུག་གུ་དྲུག་བཅུ་(ཅུ་)རྩ་བཞི་རེ་རེ་ལ་རླུང་སུམ་བརྒྱ་སུམ་བཅུ་(ཅུ་)སོ་ཕྱེད་དང་བརྒྱད་བརྒྱད་རྒྱུའོ། །ཆུ་ཚོད་སུམ་བཅུ་(ཅུ་)རྩ་གཉིས་རེ་རེ་ལ་རླུང་དྲུག་རྒྱ་བདུན་བཅུ་(ཅུ་)རྩ་ལྔ་རྒྱུའོ། །ཐུན་བཞིའི་རེ་རེ་ལ་ལྔ་སྟོང་བཞི་བརྒྱ་རྒྱུའོ། །དེ་རྣམས་ལ་ལས་གང་ཤིས་པ་དང་། མི་ཤིས་པ་བརྟག་གོ། །དེ་རྣམས་ཀྱི་འཇུག་བསྡུ་བ་ནི་དེ་ལྟར་ན་ཐམས་ཅད་བཞི་བཞིའོ། །དབྱེ་བས་སོ། །དེ་ལྟར་ན་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རང་ལུས་དང་དེ་ལ་བརྟེན་པའི་སེམས་ལ་ཚང་བར་རྟོགས་པས་ཕྱིའི་འཁོར་བ་དང་མྱ་ངན་ལས་འདས་པའི་
1-1-110b
ཆོས་ཀྱི་གདུང་བ་གཅད་པའོ། །ཤེས་བྱའི་ཡུལ་དེ་ཉིད་བཞག་ནས་ད་ནི་ཁ་ནང་དུ་བལྟས་སྟེ་(ཏེ་)རང་ལ་དེ་ལྟར་ཚང་བས། ལམ་གྱི་གནས་སྟབས་ཙན་ད་ལི་སྒོམས་པ་ནི་ལྟེ་བར་ཞེས་པ་ལ་སོགས་པ་གསུངས་སྟེ(ཏེ)། དེ་ཡང་ལུས་བཅོས་ཏེ་རླུང་སེམས་བྱང་སེམས་ཨ་བ་འདུ་(དྷུ་)ཏིར་བཅུག་ལ། དེ་ནས་སྣང་བ་ཐམས་ཅད་བདེ་བར་ཤར་ནས་ནི། ལྟེ་བར་གཏུམ་མོ་སྦྱར་བ་ཡིས། །སྤྱི་བོའི་ཧྃ་བསྲེགས་པས་རི་བོང་ཅན་འཛག་པས་སྟེ(ཏེ)། སྲན་མ་ཙམ་ཕྲལ་ཕྲལ་འཛག་པ་ལ་བྱའོ། །དེས་ཕུང་པོ་ལྔར་འཛིན་པའི་རྟོག་པ་ནུབ་པ་ལ། དེ་བཞིན་གཤེགས་པ་ལྔ་བསྲེགས་ཅེས་(ཞེས་)བྱའོ། །ལུས་ཀྱི་འབྱུང་བ་བཞི་ཡང་ས་ཧ་ཛ་ར་གནས་པ་འམ་སྤྱན་ལ་སོགས་པ་བསྲེག་ཅེས་བྱའོ། །རྡོ་རྗེ་ནི་དངོས་པོའི་གནས་ལུགས་ལ། རིགས་ནི་དེའི་སྡེ་ཚན་ནོ། །ལེའུ་ནི་གཞུང་སྐྱོང་བའོ། །དང་པོ་ནི་གྲངས་གྱིའོ(ཀྱིའོ)། །ལེའུ་དང་པོའི་ཊྰི་ཀའོ།། །།
༄། །ལེའུ་གཉིས་པ། སྔགས་ཀྱི་ལེའུ།
བླ་མ་རྗེ་བཙུན་དམ་པ་རྣམས་ལ་ཕྱག་འཚལ་ལོ། །འདི་མན་ཆད་ལ་གསུམ་ཏེ། ལེའུ་ཡི་འབྲེལ་དང་། ལེའུ་མངོན་པར་རྟོགས་པའི་འབྲེལ། མདོར་སྟན་(བསྟན་)རྒྱས་བཤད་གྱི་སྒྲིག་ལུགས་གསུམ་མོ། །དེ་ལྟར་ལེའུ་དང་པོར་མདོར་སྟན་(བསྟན་)པ་དེ་ལ་སྔགས་མེད་ན་མི་འགྲུབ་པས་སྔགས་ཀྱི་ལེའུ་བསྟན། མདོར་སྟན་(བསྟན་)རྒྱས་བཤད་ཀྱི་སྒྲིག་ལུགས་ནི། ལེའུ་དང་པོའི་ལྟ་སྟངས་ལ་སོགས་པའི་དོན་འདིས་རྒྱས་པར་འཆད་དོ། །མངོན་པར་རྟོགས་པའི་འབྲེལ་ནི་ཐད་ཀར་སོ་སོ་ལམ་དུ་སློང་བའོ། །དེའི་ལེའུ་འདི་ལ་དོན་གསུམ་སྟེ། བཤད་པར་ཞལ་གྱིས་བཞེས་པ་དང་། ལེའུ་ཡི་གཞུང་དངོས་དང་། ལེའུ་ཡི་མཚན་སྟན་(བསྟན་)པའོ། །དང་པོ་བཤད་པར་ཞལ་གྱིས་བཞེས་པ་ནི། སྔགས་ཀྱི་ལེའུ་བཤད་པར་བྱའོ། །ཞེས་པས་སྟན་(བསྟན་)ཏེ། དེའི་སྔགས་ལ་ལྔ་སྟེ། ངོ་བོ་དབྱེ་བ་དང་། ངེས་ཚིག་དང་། སྤེལ་ཚིག་དང་། དག་བྱེད་ལྔའོ། །ངོ་བོ་ནི་ཨ་ལི་ཀ་ལི་སྟེ། དོན་ཐབས་
1-1-111a
ཤེས་རབ་བོ། །དབྱེ་བ་སྔགས་མཚན་ཉིད་པ་དང་། སྔགས་རྒྱུ་མཐུན་པའོ། །སྔགས་མཚན་ཉིད་པ་ནི་སངས་རྒྱས་ཀྱི་ཐུགས་ཡང་དག་པའི་ཡེ་ཤེས་སོ། །དེ་ལྟར་རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། སངས་རྒྱས་ཀུན་གྱི་ཐུགས་ཡིན་སྟེ(ཏེ)། ཆོས་ཀྱི་དབྱིངས་གྱི་(ཀྱི་)རང་བཞིན་སྟེ(ཏེ)། ཆོས་ཀྱི་སྙིང་པོ་སྒྲུབ་བྱེད་པས། སྔགས་རྣམས་ཀུན་གྱི་མཚན་ཉིད་དོ་ཞེས་སོ། །སྔགས་རྒྱུ་མཐུན་པ་ལ་གཞིའི་རྒྱུད་ཀྱི་སྔགས། རང་བཞིན་གྱི་རྒྱུད་གྱི་སྔགས། འབྲས་བུའི་རྒྱུད་གྱི་སྔགས་སོ། །སྔགས་ཀྱི་ངེས་ཚིག་ནི་སྤྱན་འདྲེན་པས་སམ་ཐུགས་བསྐུལ་བས་སོ། །དེ་ལྟར་གུར་གྱི་ལེའུ་དྲུག་པ་ནས། སྔགས་ནི་སྤྱན་འདྲེན་པར་གསུངས་སྟེ(ཏེ)། སངས་རྒྱས་བྱང་ཆུབ་སེམས་དཔའ་དང་ཞེས་པ་ལ་སོགས་པ་གསུངས་སོ། །དགོངས་པ་ལུང་སྟོན་ལས་ཀྱང་། སྔགས་རྣམས་སྔགས་རྣམས་ཞེས་པ་ནི། དེ་ཁོ་ན་ཉིད་བསྐུལ་བར་བྱེད། སྔགས་ཀྱི་སྤེལ་ཚིག་ནི་གུར་གྱི་ལེའུ་བཅུ་གཅིག་པར་ཤེས་པར་བྱས་སྟེ(ཏེ)། ཞི་བའམ་རྒྱས་པ་ལ་ཇི་ལྟར་ཟླས་པ་སྟོན་ཏོ། །དག་པར་བྱེད་པའི་དོན་ནི་རྟག་པ་ཕྱི་མའི་ལེའུ་དགུ་པའི་སྔགས་བསྡུ་བར་བསྟན་ཏོ། །ལེའུ་ནི་གཞུང་སྐྱོང་བའོ། །བཤད་པར་བྱའོ་ནི་ཞལ་གྱིས་བཞེས་སོ། །ད་ནི་ལེའུ་ཡི་གཞུང་དངོས་སྟོན་ཏོ། །དེ་ཡང་རྒྱུད་གྱི་(ཀྱི་)ཆིངས་སུ་སྡུས(བསྡུས)། གཏོར་མའི་སྔགས་བཞིའི་རྒྱུད་དབང་བསྐུར་བྱེད་པའི་དུས་དང་། རང་བཞིན་གྱི་རྒྱུད་སྐྱེད་(བསྐྱེད་)རྫོགས་སྒོམ་པའི་ཐུན་མཚམས་དང་། འབྲས་བུའི་རྒྱུད་ལ་གསུམ་ཅར་དུ་དགོས་སོ། །དེ་བཞིན་གཤེགས་པའི་ས་བོན་རང་བཞིན་གྱི་རྒྱུད་བསྐྱེད་རིམས་དུས་སུ་སྙིང་ཁར་དགོད་པ། དེ་བཞིན་གཤེགས་པ་སྐྱེད་པ་ལ་འགྲོ། རྫོགས་རིམས་དུས་ན་སྙིང་ཁར་དགོད་པ་ལ་འགྲོ་སྟེ་རང་བཞིན་རྒྱུད་དུ་བསྡུའོ། །ཀྱེའི་རྡོ་རྗེའི་སྙིང་པོ་དང་
1-1-111b
རྣལ་འབྱོར་མ་རྣམས་ཀྱི་ས་བོན་དང་། ཕྱག་གཉིས་པའི་སྔགས་དང་། ཕྱག་བཞི་པའི་སྔགས་དང་། ཕྱག་དྲུག་པའི་སྔགས་དང་། སྐུ་གསུང་ཐུགས་བྱིན་གྱིས་རླབས་པའི་སྔགས་དང་དེ་རྣམས་རང་བཞིན་གྱི་རྒྱུད་དེའི་ནང་ནས་སྐྱེད་(བསྐྱེད་)རིམས་ཀྱི་སྔགས་སུ་བསྡུའོ། །སྔགས་ཐམས་ཅད་གྱི་(ཀྱི་)རྐང་པར་ཞེས་པ་ལ་སོགས་པ་རྒྱུད་གསུམ་ཆར་དུ་བསྡུས་ཏེ། ཨོཾ་དང་ཧཱུྃ་ཕཊ་མེད་པ་ལ་གཞུག་གོ། །གྲོང་ཁྱེར་དཀྲུག་པའི་སྔགས་ནི་རྫོགས་རིམས་གཏུམ་མོ་ནང་གི་གྲོང་ཁྱེར་དཀྲུག་པ་དང་། འབྲས་བུ་ལས་ཚོགས་ཀྱི་ཕྱིའི་གྲོང་ཁྱེར་དཀྲུག་པའོ། །དེ་ནི་རང་བཞིན་རྒྱུད་དང་འབྲས་བུའི་རྒྱུད་གཉིས་སུ་བསྡུའོ། །ས་སྦྱང་བའི་སྔགས་ནི་བཞིའི་རྒྱུད་ཀྱི་སྔགས་སུ་བསྡུའོ། །དེ་ལྟར་ན་དེ་ན་སྔགས་བཅུ་གཅིག་ཡོད་དེ་ཁ་ཅིག་ནི་བཞིའི་རྒྱུད་གྱི་སྔགས། ཁ་ཅིག་ནི་རང་བཞིན་གྱི་རྒྱུད་གྱི་(ཀྱི་)སྔགས། ཁ་ཅིག་ནི་རང་བཞིན་དང་འབྲས་བུ་གཉིས་ཆར་གྱི་སྔགས། ཁ་ཅིག་ནི་གཞི་རང་བཞིན་དང་འབྲས་བུ་གསུམ་ཆར་གྱི་སྔགས་སུ་འདུག་གོ། །རེངས་པར་བྱེད་པའི་སྔགས་དང་། དབང་དུ་བྱེད་པའི་སྔགས་དང་། སྐྲོད་པར་བྱེད་པའི་སྔགས་དང་། སྡང་བར་བྱེད་པའི་སྔགས་དང་། མངོན་སྤྱོད་ཀྱི་སྔགས་དང་། དགུག་པའི་སྔགས་དང་། གསོད་པར་བྱེད་པའི་སྔགས་དང་། བདུན་ནི་མཁའ་འགྲོ་མ་བདུན་གྱི་ལས་བདུན་བསྒྲུབ་པར་བྱེད་པའི་སྔགས་བདུན་ནོ། །ཀུ་རུ་ཀུ་ལེའི་སྔགས་དང་བརྒྱད། ཆར་དབབ་པའི་སྔགས་དང་དགུ། སྤྲིན་བྲལ་ཏེ་ཆར་བཅད་པའི་སྔགས་དང་བཅུ། རྡོ་རྗེ་གྲི་གུག་གི་ཆོ་ག་དང་བཅུ་ཅིག །ལྷ་འགས་པའི་ཆོ་ག་དང་བཅུ་གཉིས་ཚ་བའི་ཆོ་གས་ཏེ་དགྲ་ལ་རིམས་བཏང་བའི་ཆོ་ག་དང་བཅུ་གསུམ། ཆང་སྐྱུགས་པའི་ཆོ་ག་དང་བཅུ་བཞི། རབ་ཏུ་མྱོས་མ་སྟེ་བུད་མེད་དབང་དུ་བྱ་བ་དང་བཅོ་ལྔ། ཉི་ཟླ་དབང་དུ་བྱ་བ་དང་བཅུ་དྲུག །
1-1-112a
རྡོ་རྗེ་སྐར་མས་པྲ་དབབ་པ་དང་བཅུ་བདུན། གླང་པོ་ཆེ་འབྲོས་པ་དང་བཅོ་བརྒྱད། སྟག་འབྲོས་པ་དང་བཅུ་དགུ། བསེ་འབྲོས་པ་ཉི་ཤུ། སྦྲུལ་འབྲོས་པ་དང་ཉེར་གཅིག །ཁྱི་འབྲོས་པ་དང་ཉེར་གཉིས་སོ། །དེ་ལྟར་ཉེར་གཉིས་སྔགས་ཉེར་གཉིས་པོ་འདི་ནི་བཞིའི་རྒྱུད་ཀྱི་སྔགས་མ་ཡིན། རང་བཞིན་གྱི་རྒྱུད་ཀྱི་སྔགས་ཀྱང་མ་ཡིན་ནོ། །འདི་ནི་འབྲས་བུའི་རྒྱུད་ཀྱི་སྔགས། དེའི་ནང་ནས་འབྲས་བུ་ལས་ཚོགས་འབའ་ཞིག་གི་སྔགས་ཡིན་གྱི། གཞན་གྱི་ནི་མ་ཡིན་ནོ། །དེ་ལྟར་ན་ལེའུ་ཡི་གཞུང་ལ་སྔགས་སོ་གསུམ་ཡོད་དོ། །དེ་ལ་གཏོར་མའི་སྔགས་ལ་ལྔ་སྟེ། གཏོར་མ་དབུལ་བ་དང་། གཏོར་མའི་དགོས་པ་དང་། ངེས་ཚིག་དང་། དབུལ་བའི་ཐབས་དང་། དབུལ་བའི་སྔགས་སོ། །དབུལ་ས་ནི་ལྷ་ཆེན་པོ་བརྒྱད། ཀླུ་ཆེན་པོ་བརྒྱད། ཕྱོགས་སྐྱོང་བརྒྱད་སྟེ་(དེ་)མགྲོན་ཉེར་བཞི་གུར་གྱི་ལེའུ་གསུམ་པ་ནས་བསྟན། དགོས་པ་ནི་བརྟག་པ་ཕྱི་མའི་ལེའུ་བཞི་པ་ནས་བར་གཅོད་ཐམས་ཅད་ཉེར་ཞིའི་ཕྱིར། རྒྱུན་དུ་གཏོར་མ་བཏང་བར་བྱ་ཞེས་སོ། །ངེས་ཚིག་ནི་བྷ་ལི་ཞེས་སྟོབས་སམ་ནུས་པ་སྐྱེད་པའོ། །དབུལ་བའི་ཐབས་ནི་བརྟག་པ་དང་པོའི་ལེའུ་བདུན་པ་ནས་རྡོ་རྗེ་ཐོད་པའི་སྦྱོར་བ་ཡིས་ཞེས་པས་བསྟན། དབུལ་བའི་སྔགས་ནི་རྒྱས་པར་བརྟག་པ་ཕྱི་མའི་ལེའུ་བཞི་པ་ནས་འོང་། བསྡུས་པ་འདི་ཡིན་ནོ། །ལས་ཚོགས་ཉེར་གཉིས་པོ་སྟན་(བསྟན་)པ་རྣམས་བསྡུས་ན་ནི་ལས་ཆེན་བརྒྱད་དུ་བསྡུས་སྟེ(ཏེ)། དེའང་དབང་དང་། མངོན་སྤྱོད་དང་། དགྲའི་སྡེ་འཇིག་པ་དང་། བསྐྲད་པ་དང་། བསད་པ་དང་། དགུག་པ་དང་། ཞི་བ་དང་། རྒྱས་པའོ། །ཀུ་རུ་ཀུ་ལེ་ནི་དབང་གི་ལས། ཆར་དབབ་གཅད་གཉིས་རྒྱས་པའི་ལས། རྡོ་རྗེ་གྲི་གུག་གི་ཆོ་ག་དང་། ལྷ་འགས་པ་དང་། རིམས་བཏང་བ་དང་། ཆང་སྐྱུག་པ་རྣམས་ནི་
1-1-112b
མངོན་སྤྱོད་དུ་བཏགས་སོ། །བུད་མེད་དབང་དུ་བྱ་བ་དང་། ཉི་ཟླ་དབང་དུ་བྱ་བ་དང་། པྲ་དབབ་པ་དང་། དེ་གསུམ་དབང་དུ་བསྡུའོ། །གླང་པོ་ཆེ་འབྲོས་པ་ལ་སོགས་པ་བགར་(དགར་)བའི་ལས་སམ་ཞི་བའི་ལས་སུ་བསྡུ། ཌཱ་ཀིའི་ལས་བདུན་པོ་དེ་མིང་གིས་དོན་དེ་གསལ་བར་ཡོད་དོ། །ཞི་བའི་ལས་ནི་ཤུགས་ལ་ཤེས་པར་བྱའོ། །གུར་གྱི་ལེའུ་བཅུ་གཅིག་པ་ལ་ཤེས་པར་བྱའོ། །ཌཱ་ཀི་མ་བདུན་གྱི་ལས་བདུན་བསྒྲུབ་པ་ལ་སྔོན་དུ་ཧེ་བཛྲའི་བསྙེན་པ་སུམ་འབུམ་མམ་བྱེ་བ་སྐྱོལ་བ་གཅིག་གིས་སྒྲུབ་པ་ལ་སྔོན་འགྲོ་བླ་མ་དག་པའི་ཆོ་ག་དང་། ཚད་མེད་པ་བཞི་སྒོམ། དངོས་བཞི་ལ་སྟོང་པ་ཉིད་དུ་སྒོམ། དེ་ནས་ས་བོན་ཨ་ཨཱ་ཨི་ཨཱི་ཨུ་ཨཱུ་ཨཾ་ཨ། གང་སྐྱེད་ཀྱི་ས་བོན་དེ་སྒོམས་ལ། དེ་ལས་གཟུགས་རྫོགས་པ་དང་རྡོ་རྗེ་མ་དང་། {བསང་}(གསང་)བའི་གྷོ་ར་དང་། ཆུའི་རྣལ་འབྱོར་མ་དང་། རྡོ་རྗེ་མཁའ་འགྲོ་མ་དང་བདག་མེད་མ། ས་སྤྱོད་མ། མཁའ་སྤྱོད་མ། དེ་ཚོ་གང་ཡིན་གྱི་གཟུགས་སུ་སྒོམས་སྟེ(ཏེ)། དེ་ཡང་སྐུ་མདོག་གནག་པ་གཡས་གྲི་གུག་གཡོན་ཐོད་པ་ཁྲག་གིས་བཀང་བ། ཁ་ཊཱྃ་ཁ་མཆན་ཁུང་ཏུ་(དུ་)བཅུག་པ། རུས་པའི་རྒྱན་གྱིས་བརྒྱན་པར་བསམ་མོ། །དེ་ནས་གང་ཡིན་པའི་ས་བོན་སྙིང་ཁར་བསམ་མོ། །རྗེས་ལ་སོ་སོ་གང་ཡིན་གྱི་ཡེ་ཤེས་སེམས་དཔའ་སྤྱན་དྲངས་ལ་གཉིས་མེད་དུ་བསྲེའོ། །དེ་ནས་དབང་བསྐུར་བས་དབང་རྟགས་སུ་རྣམ་སྣང་རིན་འབྱུང་མཐའ་དོན་ཡོད་མི་སྐྱོད་(བསྐྱོད་)པ། དེ་རྣམས་རིམ་པ་བཞིན་དུ་དབུ་རྒྱན་པའོ། །དེ་ནས་བཟླས་པ་སོ་སོ་གང་ཡིན་པའི་ཟླས་པས་འགྲུབ་བོ། །ལས་སྦྱོར་གཞུང་ནས་འབྱུང་བཞིན་དུ་ལས་ལ་སྦྱར། ཀུ་རུ་ཀུ་ལེའི་སྒྲུབ་ཐབས་ལེའུ་བཅུ་གཅིག་པར་སྟོན་ཏོ། །ཆར་དབབ་པ་ལ་བསྙེན་པ་བསྒྲུབ་པ་
1-1-113a
ལས་སྦྱོར་མ་ཕེབས་ན་སྤོགས་པའི་ཆོ་གའོ། །དེ་ལ་བསྙེན་པ་སྟེ་བཛྲ་ལ་བྱའོ། །སྒྲུབ་པ་ལ་ཧེ་གོང་བཞིན་དུ་ཆོ་ག་ཐོ་བརྒྱད་ཀྱིས་སྐྱེད་ལ། ༀ་གུ་ཏུ་ཞེས་པ་ལ་སྔགས་ཁྲི་ཕྲག་གཅིག་བཟླའོ། །ལས་སྦྱོར་ལ་གཞུང་ནས་འབྱུང་བ་བཞིན་དུ་རྫས་བསག་པ་དང་དལ་བྲི་བ་ལ་སོགས་བྱས་ལ། རང་ཧེ་བཛྲ་ཆོ་ག་ཐོ་བརྒྱད་ཀྱིས་སྐྱེད་ལ། དེ་ནས་དལ་སྐྱེད་པ་ལ་པདྨ་འདབ་མ་བརྒྱད་ལ་ནམ་བརྒྱད་ལས་ཀླུ་བརྒྱད་མགོ་བསྡུས་པར་བསམ་ལ། དེའི་སྟེང་དུ་ཁིམ་ལས་བྱ་ཁྱུང་གི་སྦར་བས་ཀླུ་འཆིང་བར་བསམ་དེའི་སྟེང་དུ་ཧཱུྃ་ལས་སྟོབས་པོ་ཆེ་ཞལ་བཞི་ཕྱག་བརྒྱད་པ་གུར་ལེའུ་གསུམ་པ་ལས་འབྱུང་བ་བཞིན་བསམས་ལ་དེ་རྣམས་ལ་ཡེ་ཤེས་པ་སྟིམ། དབང་སྐུར་(བསྐུར་)མཆོད་ལ། སློབ་དཔོན་གྱི་ནང་གི་མ་རུངས་པའི་སེམས་ཀྱིས་ཞེས་པ་ནི། བདག་གིས་ཐེ་ཙོམ་མི་ཟ་བའི་སེམས་ཀྱིས་སྔགས་བཟླས་ཤིང་སྟོབས་པོ་ཆེ་ལ་ཆར་ཕོབ་ཅིག་ཅེས་པས་གཟིར། དེས་བྱ་ཁྱུང་ལ། དེས་ཀླུ་བརྒྱད་ལ། དེས་ནུབ་བྱང་འཚམས་གྱི་(མཚམས་ཀྱི་)མཐའ་ཡས་ལ་ཆར་ཕོབ་ཅིག་ཅེས་གཟིར་བས་ངེས་པར་ཕེབས་(འབེབས་)སོ། །དེས་སྡེ་ཚན་དུ་མས་ལོགས་སུ་བཟླས་པས་འབབ། ཆར་བཅད་པ་ལ་ཧེ་བཛྲའི་བསྙེན་པ་སྔོན་དུ་སོང་བས་ཧེ་བཛྲས་ང་རྒྱལ་གྱིས་ཨརྱ་ཞེས་པ་ལ་ཁྲི་བཟླས། ལས་སྦྱོར་ལ་རོ་རས་གྱི་སྟེང་དུ་འདུག་ནས་སྤྲིན་གཞིག་པའི་བསམ་པ་དང་ལྡན་པས། འཛུབ་མོ་ནམ་མཁའ་ལ་སྒྲེང་ཞིང་སྔགས་ཟླས་ན་ཆར་ངེས་པར་འཆད་དོ། །ཕ་རོལ་གྱི་སྡེ་བཅད་པ་ལ་ཧེ་བཛྲའི་བསྙེན་པ་འབུམ་སོང་བས། སྒྲུབ་པ་ལ་གཞུང་ནས་བྱུང་བའི་རྫས་ལ་རི་ལུ་ན་རེ་བ་བྱས་ལ་བསྙེན་པ་ཐེ་ཙོམ་མི་ཟ་ན་སྔགས་བཛྲ་ཀ་ཏ་རི་ལ་ཁྲི་བཟླས། བསྙེན་པ་ལ་ཐེ་ཙོམ་ཟ་ན་བྱེ་བ་བཟླས་སོ། །ལས་སྦྱོར་ལ་བུམ་པའི་སྐེ་
1-1-113b
ལ་བསྐོར་ནས་བཅད་ན་ངེས་པར་མགོ་འཆད་དོ། །དེ་ཡང་བྷིར་བ་པ་བཞིན་ནོ། །ཧཱི་བསྙེན་པ་སྔོན་དུ་སོང་བས་བསྒྲུབ་པ་ལ་གཞུང་ནས་བྱུང་བའི་རྫས་ལ་བསྙེན་པ་ལ་ཐེ་ཙོམ་མི་ཟ་ན་བཛྲ་ཀུ་ཐ་ར་ཞེས་པ་ཁྲི་ཟླས། ཐེ་ཙོམ་ཟ་ན་བྱེ་བ་བཟླས་ལ་རང་གི་རྐང་པའི་འོག་ནས་རྫས་དེ་ཕྱུང་ནས། དེ་ནས་རྫས་དེས་རང་གི་དཔྲལ་པར་ཐིག་ལེ་བྱས་དེའི་ནང་དུ་དགྲ་སྟའི་དབྱིབས་གཅིག་བྱས་ནས་མུ་སྟེགས་གྱི་(ཀྱི་)ལྷ་ལ་གཏད་ཅིང་བྷན་དྷ་ཡ་མི་ཞེས་བརྗོད་ན་ངེས་པར་ལྷ་འགས་སོ། །དེ་ཡང་བྷི་བ་པ་བཞིན་ནོ། །ཧེའི་བསྙེན་པ་སྔོན་དུ་སོང་བས་བསྒྲུབ་པ་ལ་གཞུང་ནས་འབྱུང་བ་བཞིན་ལིང་ག་བཅས་ནས་ཧེ་བཛྲ་ཛྭ་ར་ཞེས་པ་ལ་ཁྲི་བཟླས་ལ། ལས་སྦྱོར་ལ་གཞུང་ནས་འབྱུང་བའི་ཤིང་བུའི་རྩེ་ལ་ལིང་ག་བསྐྱོན་ནས་འབྲས་ཕུབ་གྱི་(ཀྱི་)དུད་པ་ལ་བདུགས་ན་ངེས་པར་རིམས་འབྱུང་ངོ་། །གསོ་བར་འདོད་ན་ལིང་ག་ཕྱུང་ལ་འོ་མས་བཀྲུས་ན་སླར་ཐར་བར་འགྱུར་རོ། །ཧེའི་སྙེན་(བསྙེན་)པ་སྔོན་དུ་སོང་བ་གཅིག་གིས་གཞུང་ནས་འབྱུང་བའི་ཏིང་ངེ་འཛིན་དེས་བྱས་ན་ངེས་པར་བྲམ་ཟེ་འམ་དགེ་སློང་ཆང་མི་འཐུང་བ་ལ་ཡང་ཆང་སྐྱུག་པའོ། །བྷིར་བ་པ་བཞིན་ནོ། །བསྙེན་པ་སྔོན་དུ་སོང་བས་སྒྲུབ་པ་ལ་ཨ་མུ་ཞེས་པ་ལ་ཁྲི་ཟླས་ལ། ལས་སྦྱོར་ལ་གཞུང་ནས་བྱུང་བའི་རྫས་ལ་རང་གི་དཔྲལ་པར་ཐིག་ལེ་གཅིག་བྱས་ལ་དེའི་དབུས་སུ་ཟླ་བ་ཕྱེད་པ་གཅིག་བྱས་ནས། སྔགས་ཅི་རིགས་པ་ཟློས་ཞིང་དཔྲལ་བའི་ཐིག་ལེ་མཐོང་བ་ཙམ་གྱིས་བུད་མེད་ངེས་པར་དབང་དུ་འགྲོའོ། །བསྙེན་པ་ཧེ་ལ་སྔོན་དུ་སོང་བས་སྒྲུབ་པ་ལ་གཞུང་ནས་འབྱུང་བའི་རྫས་ལ་ཉི་ཟླ་གང་འཛིན་པའི་གཟུགས་བྱས་ལ་དྲི་ཆུ་ལ་ཁ་ཆོད་བྱས་ལ། དེ་ལ་སྔགས་བྱེ་བ་ཕྲག་བདུན་བཟླས་ལ། ལས་སྦྱོར་
1-1-114a
ལ་ཡེ་ཤེས་ཀྱི་བཀུག་ལ་དེ་ལ་བསྟིམ། དེ་ནས་ཕུར་པས་བཏབ་ན། ཉི་ཟླ་མི་ནུབ་པར་འགྱུར་རོ། །དེ་ཡང་བྷིར་བ་པ་བཞིན་ནོ། །བསྙེན་པ་སྔོན་དུ་སོང་བས་ན། དགྲ་ལ་ཁྲི་ཕྲག་གཅིག་ཏུ་བཟླས་པ་སྒྲུབ་པའོ། །ལས་སྦྱོར་ལ་པྲ་རྟེན་དང་རྫས་བསོག །པྲ་ཪྟེ་ན་ལྷར་བསྐྱེད་ལ་དེ་ལ་མཆོད་སྙན་གསན་དབབ། དེ་ནས་ཐེ་བོང་རྫས་ཀྱིས་བསྐུས་ལ་དེ་ལ་ལྟར་གཞུག །བདག་ཉིད་ཀྱིས་སྔགས་ཟླས་ཤིང་ངའི་རྫས་སུས་ཁྱེར་སྨྲོས་དང་བྱས་ན་ངེས་པར་སྨྲའོ། །ཕྱག་རྒྱ་ཐེ་ཆུང་ཐེ་བོང་པྲད་ལྷག་མ་གསུམ་དུ་གུག་གེ་བྱས་པས་གླང་པོ་ཆེའི་སྣ་འུག་གླང་པོ་ཆེ་འབྲོས་སོ། །སྲིན་ལག་དང་གུང་ལོག་གཉིས་བཀུག་ཐེ་བོང་དེ་ལ་སྦྱར་ལ་ཐེའུ་ཆུང་དང་འཛུབ་མོ་གཉིས་ཀེ་རེ་བྱས་ན་སྟག་འབྲོས་སོ། །ཁུ་ཚུར་བཅངས་ནས་འཛུབ་མོ་བསྒྲེང་བས་བསེ་འབྲོས་སོ། །སོར་མོ་རྣམས་སྦྲུལ་མགོ་གདེངས་པའི་ཕྱག་རྒྱ་བྱས་པས་སྦྲུལ་འབྲོས་སོ། །ཐེའུ་ཆུང་སྲིན་ལག་སྐུམ་ལ་ལྷག་མ་ཤ་རེ་བྱས་པས་ཁྱི་འབྲོས་སོ། །དེ་སྐད་གསུང་ཡང་སྦར་པོ་དེང་ངེ་བྱ་བར་མདོ་ནས་གསུངས་སོ། །སྔགས་བཏུབ་ལ་སོགས་པ་གཞུང་ནས་གསལ། རྡོ་རྗེ་མ་དང་ཞེས་པ་ལ་སོགས་པས་ཌཱ་ཀི་མ་བདུན་གྱི་ལས་བདུན་སྒྲུབ་པའི་ཌཱ་ཀི་མ་བདུན་བསྟན་པའོ། །འོ་ན་དེ་རྣམས་ཀྱི་ལས་བྱེད་པར་ཅིས་ཤེས་ན་རེངས་པར་བྱེད་པ་ལ་སོགས་པ་ཞེས་པས་བསྟན་ཏོ།། །།ལེའུ་མཚན་གཞུང་གསལ་ལོ། །ལེའུ་གཉིས་པའོ།། །།
༄། །ལེའུ་གསུམ་པ། ལྷའི་ལེའུ།
ལེའུ་གསུམ་པ་འདི་ལེའུ་འབྲེལ་ནི། སྔགས་དེ་ཡང་ལྷ་མེད་ན་མི་འགྲུབ་པས་ལེའུ་གསུམ་པ་ལྷའི་ལེའུ་ཡི་བསྟན་པའོ། །མདོར་བསྟན་རྒྱས་བཤད་དུ་སྒྲིགས་(སྒྲིག་)ན་ལེའུ་དང་པོའི་ལྷ་རྣམས་ཇི་
1-1-114b
ལྟར་འབྱུང་བའོ་ཞེས་པས་མདོར་བསྟན། ལེའུ་གསུམ་པ་འདི་བརྒྱས་(རྒྱས་)པར་འཆད་དོ། །ལེའུ་མངོན་པར་རྟོགས་པའི་འབྲེལ་ནི་གང་ཟག་གི་ཆ་སྐྱེན་(རྐྱེན་)དུ་ལམ་དུ་སློང་བའོ། །ལེའུ་གསུམ་པ་འདི་ལ་གསུམ་སྟེ། བཤད་པར་ཞལ་གྱིས་བཞེས་པ་དང་། ལེའུ་ཡི་གཞུང་དངོས་དང་། ལེའུ་ཡི་མཚན་བསྟན་པའོ། །དེ་ནས་ཞེས་པ་ལེའུ་གཉིས་པའི་རྗེས་ལའོ། །ལྷ་ནི་སྔོན་སྲིད་པ་ཆགས་པའི་དུས་ན་མུ་སྟེགས་པ་རྣམས་ཀྱི་ཚངས་པ་དང་ཁྱབ་འཇུག་ལ་ལྷ་ཞེས་བྱ་བར་མིང་བཏགས་པས་དེའི་གདུལ་བྱ་ལ་ཡང་ལྷ་ཞེས་བྱའོ། །ལེའུ་ནི་གཞུང་སྐྱོང་བའོ། །བཤད་པར་བྱའོ་ནི་ཞལ་གྱིས་བཞེས་པའོ། །ལེའུ་ཡི་གཞུང་འདི་ཆིངས་སུ་བསྡུ་ན། གཞི་རང་བཞིན་འབྲས་བུ་གསུམ་ལས་རང་བཞིན་དུ་བསྡུ་ལ། དེ་ལས་ཀྱང་ཧེ་བཛྲ་ལྷ་དགུ་རུ་བསྡུ་ལ། དེ་ལས་ཞལ་གཅིག་ཕྱག་གཉིས་པ་ལ་སོགས་གསུམ་གྱི་སྒྲུབ་ཐབས་སུ་བསྡུས་པའོ། །དེ་ཡང་ཧེ་རུ་ཀ་གསུམ་ལ་བསྒྲུབ་ཐབས་རྒྱས་བསྡུས་གསུམ་ཡོད་དོ། །རྟག་པ་ཕྱི་མའི་ལེའུ་ལྔ་པའི་ཞལ་བརྒྱད་ཕྱག་བཅུ་དྲུག་པ་ལ་ཡང་བསྒྲུབ་ཐབས་གསུམ་འོང་ངོ་། །དེ་རྣམས་ལོག་པས་བཅོ་ལྔ་ཡོད་པ་ཡིན་ནོ། །དེ་ཡང་བསྡུས་པའི་དབང་དུ་བྱས་ན་ཆོས་རྐང་གྲངས་བཅུ་གཉིས་ལས་དང་པོ་བླ་མ་དག་པའི་ཆོ་ག །དེ་ཡང་ལེའུ་གཞུང་ནས་བསྐྱེད་ཆོག་གསུམ་འབྱུང་ངོ་། །རྡོ་རྗེ་རྣམ་བཞིའི་བསྐྱེད་ཆོག་དེ་ནི་ཆོ་ག་བསྡུས་པ་ལ་དགའ་བའི་དོན་དུ་བསྟན། ཆོ་ག་གསུམ་གྱིས་བསྐྱེད་པ་དེ་ནི་དེ་བས་སྤྲོས་པ་ལ་དགའ་བའི་དོན་དུ་བསྟན། བྱང་ཆུབ་པ་ལྔའི་སྐྱེད་པ་ནི་གང་ཟག་ཤིན་ཏུ་སྤྲོས་པ་ལ་དགའ་བའི་དོན་བསྟན་ཏོ། །དེའི་ཕྱིར་ན་ཧེ་རུ་ཀ་གསུམ་ལ་སྐྱེད་ཆོག་མི་འདྲ་བ་
1-1-115a
གསུམ་གསུམ་སྦྱར་བས་བསྒྲུབ་པའི་ཐབས་དགུ་རུ་འགྱུར་རོ། །དེ་བཞིན་དུ་ལེའུ་བརྒྱད་པའི་བདག་མེད་མ་ལ་བསྒྲུབ་ཐབས་གསུམ་མོ། །བརྟག་པ་ཕྱི་མའི་ལེའུ་ལྔ་པའི་ཞལ་བརྒྱད་ཕྱག་བཅུ་དྲུག་པ་ལ་ཡང་སྒྲུབ་ཐབས་གསུམ་མོ། །དེ་རྣམས་ལོག་པས་བཅོ་ལྔ་ཡོད་པ་ཡིན་ནོ། །དེ་ཡང་བསྡུས་པའི་དབང་དུ་བྱས་ན་ཆོས་རྐང་གྲངས་བཅུ་གཉིས་ལས་དང་པོ་བླ་མ་དག་པ་ནི་རང་གི་སྙིང་ཀར་རེ་པ་ཞེས་པའི་ཚིག་བཞི་དང་། ནམ་མཁར་རྗེ་བཙུན་ཞེས་པའི་ཚིག་བཅུ་བཞིས་བསྟན་ནོ། །དང་པོ་བྱམས་པ་ཞེས་པའི་ལ་སོགས་པ་ཚིག་བཞིས་ཚད་མེད་པ་བཞི་སྒོམ་པ་བསྟན་ཏོ། །ཡང་ནི་སྟོང་པ་ཉིད་དུ་སྒོམ་པའོ། །གཉིས་པ་ཞེས་པས་ས་བོན་བསྡུ་བའོ། །གསུམ་པ་ཞེས་པ་སོ་སོའི་ཧེ་རུ་ཀ་གང་ཡིན་གྱི་གཟུགས་རྫོགས་པའོ། །བཞི་པ་ལ་ནི་ཞེས་པས་ས་བོན་འགོད་པའོ། །དེ་ནས་ནམ་མཁའི་དལ་ཞེས་པ་ནས་འདོན་པའི་བདག་ཞེས་པའི་བར་གྱིས་ཞལ་གཅིག་ཕྱག་གཉིས་པ་སྒོམ་པའི་བསྐྱེད་པའི་རིམ་པའི་ཏིང་ངེ་འཛིན་བསྟན་ཏོ། །ཕྱག་བཞི་ནི་ཞེས་པ་ལ་སོགས་པས་ཞལ་གསུམ་ཕྱག་བཞི་པ་སྒོམ་པ་སྐྱེད་པའི་རིམ་པའི་ཏིང་ངེ་འཛིན་བསྟན་ཏོ། །ཕྱག་དྲུག་པ་ཞེས་པ་ལ་སོགས་པ་ཞལ་གསུམ་ཕྱག་དྲུག་པ་སྒོམ་པའི་སྐྱེད་(བསྐྱེད་)རིམས་ཀྱི་ཏིང་ངེ་འཛིན་བསྟན་པའོ། །དེ་ལས་སྐྱོན་གོང་ལེའུ་གཉིས་པར་བསྟན་པ་བཞིན་སོ་སོའི་བཟླས་པ་བྱའོ། །དེ་ནས་རྫོགས་རིམས་བསྒོམས། དེ་ལས་སྐྱོ་ན་ཐུན་འཚམས་(མཚམས་)བྱའོ། །དེ་ནི་བསྡུས་པ་ལ་དགའ་བའི་གང་ཟག་གསུམ་གྱིས་དེ་གསུམ་བསྟན་པའོ། །དེ་བས་སྦྲོས་པ་ལ་དགའ་བ་ལས་ཏ་གསུམ་པ་བསྟན་པ་ལ། རྐང་གྲངས་བཅུ་གཅིག་ཡོད་པ་ལས། བླ་མ་དག་པ་དང་། ཚད་མེད་པ་དང་། 
1-1-115b
སྟོང་པ་ཉིད་དུ་སྒོམས་པ་དང་གསུམ་གོང་དང་འདྲའོ། །སྟོང་པའི་ངང་ལས་རེ་བས་ཞེས་ཚིག་བཞིས་བསྲུང་བའི་འཁོར་ལོ་བསྟན། དང་པོར་རོ་ནི་ཞེས་པ་ཚིག་བཞིས་གདན་སྒོམ་པའོ། །ཧཱུྃ་ལས་བྱུང་བའི་རྡོ་རྗེ་ནི་ཞེས་པའི་ཚིག་བཅུས་ཆོ་ག་གསུམ་ལས་ཧེ་རུ་ཀ་སོ་སོ་བསྒོམ་པ་གོ། །བཞི་པ་ལ་ནི་ཞེས་པ་ཚིག་གཅིག་གིས་ཡི་གེ་དགོད་པའོ། །ཡེ་ཤེས་སེམས་དཔའ་སྤྱན་དྲངས་པ་གོང་དང་འདྲ། དེ་ནས་དབང་བསྐུར་མཆོད་བསྟོད་བདུད་རྩི་མྱང་བ་བཞི་པོ་རྒྱུད་བསྡེབས་ལ་ཁ་སྐང་། དེ་ནས་བསྐྱེད་རིམས་ཏིང་ངེ་འཛིན་སྒོམ་པ་གོང་བསྡུས་པ་དང་འདྲ། དེ་ནས་གོང་གཞན་བཟླས་ས་དང་རྫོགས་རིམས་དང་ཐུན་མཚམས་གོང་དང་འདྲ། །གང་དེ་བས་ཤིན་ཏུ་སྤྲོས་པ་ལ་དགའ་བའི་དབང་དུ་བྱས་ན། བསྐྱེད་རིམས་སྒོམ་པ་དང་། བཟླས་དང་། རྫོགས་རིམས་སྒོམ་པ་དང་། ཐུན་མཚམས་ཀྱི་ཆོ་གའོ། །བསྐྱེད་རིམས་ལ་གཉིས་སྟེ། རྒྱུའི་ཧེ་རུ་ཀ་སྐྱེད་པ་དང་། འབྲས་བུའི་ཧེ་རུ་ཀ་སྐྱེད་པའོ། །དང་པོ་ལ་བཅུ་ལས། བླ་མ་དག་པ་དང་། ཚད་མེད་པ་བཞི་དང་སྟོང་པ་ཉིད་དང་བ་རྣམས་དང་འདྲའོ། །དེ་ནས་བར་དེར་ཆོས་འབྱུང་སྒོམ་པ་དང་བཞི་འབྱུང་བ་རིམ་རྩེགས་སྒོམ་པ་དང་། དེ་ལས་གཞལ་ཡས་ཁང་སྐྱེད་པ་རྣམས་དང་པོའི་ལེའུ་བརྒྱད་པ་དང་། གུར་ལེའུ་བཞི་པ་ནས་བསྟན་པ་གཞན་ཁ་བསྐང་ལ་དེར་གདན་སྒོམས་པ་གོང་དང་འདྲ། དེ་ནས་ཨ་ལི་ཟླ་བ་ཀ་ལི་ཉི་ཞེས་པ་ཚིག་བཞི་དང་། གོང་གི་གཉིས་པ་ལ་ནི་ས་བོན་བསྡུ་ཞེས་པ་ཚིག་གཉིས་ཀྱིས་ནི་རྒྱུའི་རྡོ་རྗེ་འཆང་བྱང་ཆུབ་པ་ལྔས་བསྒོམ་པའོ། །ཧེ་རུ་ཀ་གང་ཡིན་ཡང་སེམས་དཔའ་སུམ་རྩེགས་སུ་བརྩེགས་པར་བཞེངས་པའོ། །
1-1-116a
དེ་ནས་རྡོ་རྗེ་པདྨ་བྱིན་གྱིས་བརླབ་པ་ཁ་བསྐང་བ་སྙོམས་འཇུག་བྱ་སྟེ་འཁོར་གྱི་ལྷ་བརྒྱད་བསྐྱེད་པ་ནི། རྣལ་འབྱོར་མ་བརྒྱད་ཡོངས་བསྐོར་ནས་ཞེས་པའི་ཚིག་བཞིན་ནོ། །དེ་འབྲས་བུའི་ཧེ་རུ་ཀར་བཞེས་པ་ཆོས་བཅུ་ལས་འདྲི་ཟ་ཞུགས་པ་དང་བཀུས་བསྐུལ་བ་ཁ་སྐང་། ཧཱུྃ་ལས་བྱུང་བ་རྡོ་རྗེ་ནི་ཞེས་པ་ཚིག་བཅུས་ཆོ་ག་གསུམ་གྱིས་འབྲས་བུའི་ཧེ་རུ་ཀ་བ་ཞེས་པ་བསྟན་ཏེ། སོ་སོ་གང་ཡིན་སྒོམ་མོ། །ཧེ་རུ་ཀ་དེ་གང་ཡིན་ཡང་སེམས་དཔའ་གསུམ་རྩེགས་པར་བསྒོམ་མོ། །བཞི་པ་ནི་ཡིག་འབྲུ་དགོད་ཞེས་(ཅེས་)སྐྱེ་མཆེད་དྲུག་དང་སྐུ་གསུང་ཐུགས་བྱིན་གྱིས་བརླབ་པ་བསྟན་ནོ། །ནམ་མཁའི་དལ་ཞེས་པ་ཚིག་བཞིས་ཡེ་ཤེས་སེམས་དཔའ་སྤྱན་དྲངས་ནས་གཉིས་སུ་མེད་པར་བསྲེ་བ་བསྟན་ནོ། །དེ་ནས་དབང་བསྐུར། མཆོད་པ། བསྟོད་པ། བདུད་རྩི་མྱང་བ་ཁ་བསྐོང་། སྔོ་དང་ཉི་མ་ཞེས་པ་ལ་སོགས་པ་དེ་རྣམས་ཐམས་ཅད་ཀྱིས་བསྐྱེད་པའི་རིམ་པའི་ཏིང་ངེ་འཛིན་བསྒོམས་པས་ཏེ་སོ་སོའི་གང་ཡིན་དུ་སྒོམ་མོ། །དེ་ནས་ཟླས་པ་བྱ་བ་ལེའུ་གཉིས་པ་རྫོགས་རིམ་ལེའུ་ལྔ་པ་བཞིན་སྒོམ། དེ་ནས་ཐུན་མཚམས་བྱས་སྟེ་(ཏེ་)རྣམ་དག་སྒོམ་པ་དང་། གཏོར་མ་བཏང་བ་དང་། གླུ་བླང་བ་དང་། སྨོན་ལམ་གདབ་པ་བྱའོ། །ལེའུའི་མཚན་གཞུང་ན་གསལ་ལོ། །ལེའུ་གསུམ་པའི་འོ།། །།
༄། །ལེའུ་བཞི་པ། ལྷ་དབང་བསྐུར་བའི་ལེའུ།
ལེའུ་བཞི་པའི་ལེའུ་ཡི་འབྲེལ་པ་ནི། ལྷ་དེ་ལ་ཡང་དབང་མ་བསྐུར་ན་གནས་སྐབས་ཀྱི་ཆོ་ག་རྫོགས་པར་མི་འགྱུར་བས་ལེའུ་བཞི་པ་དབང་བསྐུར་བ་བསྟན་པའོ། །མདོར་སྟན་(བསྟན་)རྒྱས་བཤད་ནི་ལེའུ་དང་པོའི་གཞིས་ཞེས་པ་དེ་རྒྱས་པར་འདིས་འཆད་དོ། །མངོན་པར་རྟོགས་པའི་འབྲེལ་
1-1-116b
ནི་སྐྱེད་རིམས་ཀྱི་ནང་དུ་བསྡུའོ། །ལེའུ་འདི་ལ་གསུམ་སྟེ། བཤད་པར་ཞལ་གྱིས་བཞེས་པ་དང་། ལེའུའི་གཞུང་དང་། མཚན་ནོ། །བཤད་པར་ཞལ་གྱིས་བཞེས་པ་ནི་ལྷ་དབང་བསྐུར་ཞེས་པ་ནི་མངོན་རྟོགས་ཀྱི་ལྷ་དང་ལས་ཚོགས་ཀྱི་ལྷ་ལ་དབང་བསྐུར་བའོ། །ལེའུ་ནི་གཞུང་སྐྱོང་བའོ། །བཤད་པར་བྱའོ་ཞེས་པ་ནི་སྟོན་པས་ཞལ་གྱིས་བཞེས་པའོ། །ལེའུའི་གཞུང་ལ་ཆོས་གཉིས་ལས་དང་པོ་ལྷ་དབང་བསྐུར་བ་སྟོན་ཏེ། རང་གི་ནི་མངོན་རྟོགས་ཀྱི་ལྷ་འམ་ལས་ཚོགས་གྱི་(ཀྱི་)ལྷའི་སྙིང་ཁ་གང་ཡིན་པའི་ས་བོན་བསམ་མོ། །འོད་ཟེར་ནག་པོ་ཉེ་བར་མཚོན་པས་སྟེ(ཏེ)། རང་གི་སྐུ་མདོག་དང་མཐུན་པའོ། །ལྕགས་ཀྱུ་ནི་དགུག་པའི་ངོས་ནས་བཞག་པའོ། །དེས་སངས་རྒྱས་སྤྱན་དྲངས་ལ། དེ་ལ་མ་མོའི་མཆོད་པ་ནི་མངོན་པར་རྟོགས་པའི་ལྷ་ལ་འདིས་མཆོད་ལ་ལས་ཚོགས་ལྷ་ལ་ནི་མེ་ཏོག་ལ་སོགས་པས་མཆོད་དོ། །གཞན་གཞུང་-དུ་-གསལ་ལོ། །དབང་རྫོགས་པར་ཐོབ་ན་འདིར་ཡང་བླང་ངོ་། །གཞུང་གི་དོན་གཉིས་ཐུན་གསུམ་དུ་ཞེས་པའི་ཚིག་ཅིག་གིས་བསྐྱེད་རིམས་ཀྱི་བསྟན་པ་བསམ་པ་སློབ་པའི་སྤྱོད་པ་སྟན་(བསྟན་)ནོ། །ལེའུའི་མཚན་ཀྱུས་གསལ་ལོ། །ལེའུ་བཞི་པའོ།། །།
༄། །ལེའུ་ལྔ་པ། དེ་ཁོ་ཉིད་ཀྱི་ལེའུ།
ལེའུ་ལྔ་པའི་འབྲེལ་ནི། དེ་ལྟར་ལྷ་དབང་བསྐུར་ཡང་འབྲས་བུ་མཐར་ཐུག་ཐོབ་པར་བྱེད་པ་ལ་རྫོགས་རིམས་བསྒོམ་དགོས་པས་ལེའུ་ལྔ་པ་རྫོགས་རིམས་ཀྱི་ལེའུ་སྟན་(བསྟན་)ནོ། །མདོར་བསྟན་རྒྱས་བཤད་ནི་ལེའུ་དང་པོ་ནས། ཧེ་རུ་ཀ་ནི་བསྐྱེད་པའི་རྒྱུ། །དང་པོར་གཅིག་ནི་སྒོམ་པར་བྱ། །ཞེས་པ་དང་། དེ་ཁོ་ན་ཉིད་བཞིན་ཞེས་པ་ལ་སོགས་པས་མདོར་བསྟན། ལེའུ་ལྔ་པ་འདིར་
1-1-117a
རྒྱས་པར་འཆད་དོ། །མངོན་པར་རྟོགས་པའི་འབྲེལ་ནི་སེམས་ཀྱི་ཞེན་པ་ཟློག་པའི་ཕྱིར་རྫོགས་རིམས་སྒོམ་པ་དང་འབྲེལ་ལོ། །ལེའུ་འདི་ལ་ཆོས་གསུམ་ལས། དང་པོ་བཤད་པར་ཞལ་གྱིས་བཞེས་པ་ནི། དེ་ནས་ནི་ལེའུ་བཞི་པ་བཤད་པའི་རྗེས་དེ་ནས་སོ། །དེ་ཞེས་པ་གཟུགས་སྒྲ་དྲི་རོ་རེག་བྱའོ། །ཁོ་ན་ནི་སྭ་ཧཱ་ཛའི་ཉམས་སོ། །ཉིད་ནི་མི་སླུ་བའོ། །ལེའུ་གཞུང་སྐྱོང་བའོ། །བཤད་པར་བྱའོ་ནི་བསྟོན་(སྟོན་)པས་ཞལ་གྱིས་བཞེས་པའོ། །ལེའུའི་གཞུང་ལས་བཅད་ན་ལྔ་སྟེ། ངོ་བོ་གཟུགས་མེད་ཞེས་(ཅེས་)པ་ལ་སོགས་པས་ཡེ་ཤེས་གྱི་དེ་ཁོ་ན་ཉིད་བསྟན། སྐྱེད་བྱེད་མ་དང་ཞེས་པས་སྔགས་ཀྱི་དེ་ཁོ་ན་ཉིད་བསྟན། སྒོམ་པ་པོ་མེད་ལ་སོགས་པ་ལྷའི་དེ་ཁོ་ན་ཉིད་བསྟན། །ཨ་ལི་ཀ་ལི་ལ་སོགས་པས་བདག་གི་དེ་ཁོ་ན་ཉིད་བསྟན། ཇི་ལྟར་ཕ་ལ་སོགས་པས་དེ་ཁོ་ན་ཉིད་བཞི་ལ་གདམས་པ་བསྟན། །དེ་རྣམས་ཀྱང་བསྡུས་ན་རང་བཞིན་གྱི་རྒྱུད་དེའི་ནང་ནས་ཀྱང་རྫོགས་རིམས་སུ་བསྡུའོ། །རྫོགས་རིམས་ལ་དངོས་པོའི་གནས་སྟབས་ལམ་གྱི་གནས་སྟབས། འབྲས་བུའི་གནས་སྟབས་གསུམ་དེ་ཁོ་ན་ཉིད་བཞིར་བསྡུའོ། །དེ་ཡང་དངོས་པོའི་གནས་སྟབས་སུ་ལྷའི་དེ་ཁོ་ན་དང་། བདག་གི་དེ་ཁོ་ན་ཉིད་བསྡུའོ། །ལམ་གྱི་གནས་
1-1-117b
སྟབས་སུ་སྔགས་ཀྱི་དེ་ཁོ་ན་ཉིད་བསྡུའོ། །ཡེ་ཤེས་ཀྱི་དེ་ཁོ་ན་འབྲས་བུའི་གནས་སྟབས་སུ་བསྡུའོ། །དེ་ཡང་རྫོགས་རིམས་སུ་ལེན་པའི་གང་ཉམས་སུ་ལེན་པའི་གང་ཟག་ལ་གཉིས་སྟེ(ཏེ)། རང་ལུས་ལ་རྟེན་(བརྟེན་)པ་དགེ་སློང་ངམ། གཞན་ལུས་བརྟེན་པ་ཆགས་ཅན་ནོ། །དེ་གཉིས་ཀ་དངོས་པོའི་གནས་སྟབས། དེའི་ནང་ནས་སེམས་དངོས་པོའི་གནས་སྟབས་ཏེ། ལྷའི་དེ་ཁོ་ན་ཉིད་ལྔ་པ་ཤེས་དགོས་སོ།། །།ཇོ་བོའི་བཞེད་པས་སེམས་ཉིད་རྣམ་མེད་དག་པ་གསལ་བ་ཟུང་འཇུག་གཉིས་སུ་མེད་པའོ། །ད་ལྟ་ཤེས་པ་ཅི་སྐྱེས་འཁྲུལ་བའི་དྲི་མ་ཡིན་ནོ། །དེ་ཡང་དཔེར་ན་དུང་དཀར་པོ་ཡིན་པ་ལ་མིག་གསེར་(སེར་)གྱི་ནད་གྱིས་(ཀྱིས་)གཏབ་པ་ལ་དུང་སེར་པོར་འཁྲུལ་བ་བཞིན་ནོ། །འོ་ན་དུང་དཀར་པོར་མཐོང་བར་བྱེད་པ་ལ་ཅིག་(གཅིག་)གིས་བརྗོད་ནས་དུང་དཀར་པོ་ཡིན་བྱས་པས་དཀར་པོར་མཐོང་ངམ་ཞེ་ན། མི་མཐོང་སྟེ་དཀར་པོ་ལ་ཡིན་པ་ལ་སེར་པོར་འདུག་སྙམ་པ་ལས་སེར་པོར་འཁྲུལ་བཞིན་སྣང་ཐབས་མེད། དེ་བཞིན་དུ་སེམས་ཙམ་འཁན་(མཁན་)དང་དབུ་མ་མཁན་གྲུབ་མཐའ་མི་འདྲ་བ་ལས་གཏན་ལ་འབེབས་ཏེ། དེ་རྣམས་ཀྱིས་སྒྲ་སྤྱིའི་རྣམ་པ་གཅིག་ལས་དོན་རང་གི་མཚན་ཉིད་ཡེ་མི་གོའོ། །འོ་ན་དུང་དཀར་པོར་མཐོང་བར་བྱེད་པ་ལ་མིག་སེར་གྱིས་བཏབ་པའི་གང་ཟག་དེ་སྨན་པ་མཁས་པ་ཅིག་(ཞིག་)གིས་མིག་སེར་གྱིས་ནད་དེ་གཅོས་(བཅོས་)ནས་ནད་དག་པའི་དུས་ན་རང་བཞིན་གྱིས་དུང་
1-1-118a
ཉིད་དཀར་པོ་ཡིན་པས་དཀར་པོར་མཐོང་བ་བཞིན་དུ། དངོས་པོ་གཤིས་ཀྱི་ཆོས་དེ་རྟོགས་པར་བྱེད་པ་ལ། དབང་བཞི་པ་དང་གསུམ་པར་གཏན་ལ་དབབ་དགོས་སོ། །འོ་ན་དེ་ལྟར་གཏན་ལ་ཕེབས་(འབེབས་)སམ་ཞེ་ན། ལེའུ་བརྒྱད་པ་ནས། གཞན་གྱིས་བརྗོད་མིན་ལྷན་གཅིག་(ཅིག་)སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་མཐའ་བསྟེན་པ་ཡིས། །བདག་གི་བསོད་ནམས་ལས་ཤེས་བྱ་ཞེས་གསུངས་པ་དང་། ཡང་དེ་ཉིད་ལས། ངག་གི་ལམ་འདས་སྤྱོད་ཡུལ་ཏེ། འདི་ནི་བྱིན་རླབས་རིམ་པའི་ཕྱིར་ཞེས་པ་དང་། བརྟག་པ་ཕྱི་མའི་ལེའུ་གསུམ་པ་ནས། སངས་རྒྱས་ཀུན་གྱི་སྡོམ་པ་ནི། །ཨེ་བྃ་རྣམ་པ་བདེ་ཆེན་པོ། །དབང་ལས་ཡང་དག་ཤེས་པར་འགྱུར་ཞེས་དང་། ཕྱི་མའི་ལེའུ་གཉིས་པ་ནས། ཕྱག་རྒྱ་ཆེན་པོར་དབང་བསྐུར་བར། །ཇི་ལྟར་ཤེས་པའི་བདེ་ཆེན་པོ། །དེའི་དེ་ནི་བྱིན་རླབས་ཡིན། །གཞན་ལས་དཀྱིལ་འཁོར་འབྱུང་བ་མེད་ཞེས་(ཅེས་)པ་དང་། དེ་རྣམས་ཀྱི་དགའ་བའི་གོ་རིམས་ཡང་དེ་ཉིད་ནས། མཆོག་དགའི་མཐའ་སྟེ་བྲལ་དགའི་མདུན། མུན་པ་ལ་ནི་མར་མེ་ལྟར། །དེ་བཞིན་བུས་ཀྱང་ཡིད་ཆེས་གྱིས་ཞེས་གསུངས་སོ། །དེ་ལྟར་གཏན་ལ་ཕབ་པའི་དངོས་པོ་གཤིས་ཀྱི་ཆོས་དེ་ཡང་། ལེའུ་དང་པོ་ནས་ལུས་ལ་ཡེ་ཤེས་ཆེན་པོ་གནས་ཞེས་པ་ལ་སོགས་པ་གསུངས་སོ། །འདི་ནས་བསྒོམ་པ་པོ་མེད་ཞེས་(ཅེས་)པ་ལ་སོགས་པ་དང་། གུར་ལེའུ་དང་པོ་ནས། འདི་ལྟར་ཀུན་གཞིའི་རྣམ་ཤེས་དང་། ཞེས་པའི་ཚིག་ལྔས་དེ་ཤེས་པ་ཡིན་ནོ། །དེའི་ཕྱིར་ན་དངོས་པོ་གཤིས་ཀྱི་ཆོས་དེ་ནི་དབང་
1-1-118b
བཞི་གསུམ་གྱི་དུས་སུ་གཏན་ལ་དབབ་དགོས་ཏེ་གཞན་དུ་མི་གོ་བའོ། །དེ་ཡང་གང་ཟག་དེ་གཉིས་ཀས་བདག་གི་དེ་ཁོ་ན་ཉིད་ལུས་དངོས་པོའི་གནས་སྟབས་གཏན་ལ་དབབ་དགོས་ཏེ། དེ་ཡང་རང་བཞིན་གྱི་སྐུ་གསུམ་ནི་ཤི་བ་སྟོང་པ་ཆོས་སྐུ། །བར་དོ་ལོངས་སྐུ། མའི་མངལ་དུ་ལུས་གྲུབ་ནས་ཕྱིར་བྱུང་བ་དང་ད་ལྟ་སྤྲུལ་སྐུའོ། །དེ་ཡང་འཆི་བའི་དུས་ན་རང་བཞིན་ཉེར་ལྔ་འབྱུང་བ་ཆེན་པོ་བཞི་ལ་འདུས་ཏེ། དེ་ཡང་ས་ཆུ་ལ་ཐིམ་པའི་དུས་ལུས་ཟུག་གིས་མི་ཐུབ་པ་འབྱུང་། ཆུ་མེ་ལ་ཐིམ་པས་ཁ་ཆུ་མིག་ཆུ་ཏོག་གིས་སྐམ། མེ་རླུང་ལ་ཐིམ་པའི་དུས་སུ་ལུས་ཀྱི་དྲོད་འཆོར། རླུང་སེམས་ལ་ཐིམ་པས་དབུགས་དབྱུང་རྔུབ་དཀའ་བའོ། །སེམས་སྣང་བ་རགས་པ་ལ་བསྡུས་ཏེ། དེ་ཕྲ་བ་ལ་བསྡུས། དེ་ཤིན་ཏུ་ཕྲ་བ་ལ་བསྡུས་ནས་སྣང་བ་ཐམས་ཅད་འགགས་པ་ཡིས་ཤི་བ་སྟོང་པ་འོད་གསལ་ཞེས་བྱ་བ་ཆོས་ཀྱི་སྐུ་ཞེས་བྱའོ། །དེ་ནས་རླུང་གིས་བར་དོའི་སེམས་ཅན་དུ་སོང་སྟེ། བར་དོ་ཡིད་ཀྱི་གཟུགས་ཅན་ཐོགས་ཆགས་ཡེ་མེད་པའི་ཕྱ་ཕྱ་ཡོད་པ་ལ་ལོངས་སྐུ་ཞེས་བྱའོ། །དེ་ནས་ལུས་འདི་ལེན་པ་ལ་ཕ་ནད་མེད་པ་ལ་ཁུ་བ་དང་ལྡན་པ་དང་། མ་ནད་མེད་པ་ལ་ཁྲག་ལྡན་པ་དང་བར་དོ་གསུམ་འཛོམ་པ་ལས་ལུས་ཆགས་སྟེ(ཏེ)། མེར་མེར་བུ་ཞག་བདུན། ལྟར་ལྟར་བུ་ཞག་བདུན། འཁྲང་འགྱུར་ཞག་བདུན་ཁྱབ་འཇུག་ཉའི་རྣམ་པ་ལྟ་བུ་ཞག་བདུན་ན་ཆགས་པས། དང་པོར་གཏུམ་མོའི་མེ་དང་། ཨ་བ་དྷུ་ཏི་གཡས་རྩ་ཆགས་སོ། །དེ་ནས་རྩའི་འཁོར་
1-1-119a
ལོ་བཞི་ལ་སོགས་པ་ཆགས་པའི་དུས་ན་ཁྱབ་འཇུག་རུ་སྦལ་ལྟ་བུ་དང་། སྦལ་པ་ལྟ་བུས་ལུས་རྫོགས། །དེ་ནས་རྩ་སོ་གཉིས་ལ་སོགས་པ། རྩ་སྟོང་ཕྲག་བདུན་བཅུ་རྩ་གཉིས་ལ་སོགས་པ་ཆགས་སོ། །དེར་རྩ་ཐམས་ཅད་འདྲེས་པའི་རྩ་མདུད་གྲུ་གསུམ་པ་བཞི་ཆགས། དེའི་དུས་ན་ད་ལྟའི་ཕ་མ་གཉིས་ཀྱི་ཁུ་ཁྲག་གི་ཐིག་ལེ་བཞི་ཡོད། །དེ་ལས་སེམས་ཀྱི་རྒྱལ་པོ་དེ་བརྟེན་ནས་གནས་པ་ཡིན་ནོ། །དེར་མ་ཁམས་སྙོམས་པ་ཟས་མའི་མངལ་དུ་ཟླ་བ་དགུ་དང་ངོ་བཅུ་བསྡད་ནས་སྐྱེ་ཏེ(སྟེ)། དེ་ནི་སྐྱེས་པ་སྐུ་ཞེས་བྱ་སྟེ། དེ་ལྟར་སྐུ་གསུམ་དུ་བསྟན་པས་ལག་པས་ཅི་བྱས་ཕྱག་རྒྱ། རྐང་པས་ཅི་བོར་དལ། ངག་དུ་(ཏུ་)ཅི་བརྗོད་བཟླས་པ། ཡིད་ལ་ཅི་བསམས་པ་བསམ་གཏན་ཡིན་པའོ། །དེ་ལྟར་ཡང་ཨ་ལི་ཀ་ལི་རབ་བརྟགས་པ་ཞེས་པ་ལ་སོགས་པ་བསྟན་ནོ། །དེ་ལེའུ་དང་པོ་ནས་ཀྱང་ཀྱེ་བཅོམ་ལྡན་འདས་རྡོ་རྗེའི་ལུས་ལ་རྩ་དུ་ལགས་ཞེས་པ་ལ་སོགས་པས་བསྟན་ནོ། །དེ་ལྟ་བུའི་ལུས་ཏེ་གཏན་ལ་ཕབ་པས་ནི་ལུས་ཀྱི་གནས་ལུགས་ཤེས་ལ། དེ་ཤེས་པས་རྩའི་གནས་ལུགས་ཤེས་སོ། །དེ་ཤེས་པས་ཕ་མ་གཉིས་ཀྱི་རྟེན་ཁུ་ཁྲག་གི་ཐིག་ལེ་ཤེས་སོ། །དེ་ཤེས་པས་སེམས་ཀྱི་རྒྱལ་པོའི་བཞུགས་ས་ཤེས་སོ། །དེ་ཤེས་པས་དེ་དང་དེར་བསྒོམས་པས་ཡེ་ཤེས་སྐྱེའོ། །དེ་ཡང་གནད་མ་ཤེས་ན་ཡེ་ཤེས་མི་སྐྱེ་སྟེ། བ་འཇོ་བ་ལ་མཇུག་མའམ་ཡན་ལག་ནས་འཐོན་པ་བཞིན་ནོ། །ནུ་མ་ནས་འཇོས་(འཇོ་)ན་འོ་མ་འོང་བ་
1-1-119b
བཞིན་གནད་དུ་བསྒོམས་ན་ཡེ་ཤེས་སྐྱེའོ། །དེ་ལྟར་ཡང་གུར་ནས་རྒྱལ་པོ་ལན་ཅིག་གིས་ནི་སྟོན། འཕྲལ་དུ་མངོན་དུ་བྱེད་པ་ཡིན་ཞེས་གསུངས། མ་ཧཱ་མ་ཡ་ནས། རྒྱུ་དང་མི་རྒྱུའི་འཇིག་རྟེན་ན། །ཐམས་ཅད་དུ་ནི་དེ་བསྒོམས་ཀྱང་། །དེ་ནི་རྟོགས་པ་མ་ཡིན་ནོ། །གལ་ཏེ་ཐམས་ཅད་རབ་རྟོགས་ན། །འགྲོ་བའི་རོལ་པ་རྣམ་པར་འཇིག་ཞེས་(ཅེས་)གསུངས་པས། ལུས་དངོས་པོའི་གནས་སྟབས་ནི་ཤིན་ཏུ་གལ་ཆེའོ། །ཞེས་ཇོ་བོ་པུ་ལ་ཧ་རི་པ་གསུང་ངོ་། །དེ་ལྟར་ལུས་ཀྱི་གནས་ལུགས་དང་སེམས་ཀྱི་གནས་ལུགས་དེ་ཤེས་ནས། བསྒྲུབ་(སྒྲུབ་)པ་པོ་དེ་རང་གིས་བླ་མ་ལ་དགེ་སློང་གིས་རང་ལུས་མན་ངག་གཏུམ་མོ་འམ། རྨི་ལམ་འམ་གཉིད་དམ། དེ་གང་ན་གང་ཅིག་(ཞིག་)ཞུས་ནས་དབེན་ཁང་དུ་བསྒོམས་པ་ལ། ཆགས་ཅན་རང་གི་བླ་མ་ལ་ལས་ཀྱི་ཕྱག་རྒྱ་ལ་བརྟེན་པའི་མན་ངག་ཅིག་ཞུས་ལ་དབེན་ཁང་ཅིག་ཏུ་བསྒོམས་པའོ། །དེ་ནི་ལམ་གྱི་གནས་སྟབས་དེ་ཁོ་ན་ཉིད་ལས་སྔགས་ཀྱི་དེ་ཁོ་ན་ཉིད་ཞེས་བྱའོ། །དེ་ལྟར་ཡང་བསྐྱེད་བྱེད་མ་དང་སྲིང་མོ་ཞེས་པ་ལ་སོགས་པས་བསྟན། དེ་ལྟར་གང་ཟག་གཉིས་ཀྱིས་དབེན་ཁང་རེ་རེར་བསྒོམས་པས་ཉམས་མྱོང་མཉམ་བཞག་གཉིས་ཀ་ལ་སྐྱེ། རྗེས་ཐོབ་ལ་ཉམས་སྦྱར་ཞིང་བསྒོམ་མོ། །དེ་ལྟར་བསྒོམས་པས་མཉམ་གཞག་རྗེས་ཐོབ་མེད་པར་ཕྲིལ་གྱིས་སོང་ལ། གནས་སྟབས་གསུམ་ལས་འབྲས་བུའི་གནས་སྟབས། དེ་ཁོ་ན་ཉིད་ལས་ཡེ་ཤེས་ཀྱི་དེ་ཁོ་ན་ཉིད་ཞེས་བྱའོ། །ཡང་ངོ་བོ་གཟུགས་མེད་ཞེས་པ་ལ་སོགས་པ་བསྟན་ཏོ། །དེ་རྣམས་ཀྱིས་ནི་མངོན་
1-1-120a
པར་རྟོགས་པ་ཅིག་དུ་(ཞིག་ཏུ་)བསྟན་པ་ཡིན་ལ། ད་གཞུང་དུ་སྦྱར་ནས་ངོ་བོ་གཟུགས་མེད་ལ་སོགས་ཀྱིས་ཡེ་ཤེས་ཀྱི་དེ་ཁོ་ན་ཉིད་ཞེས་བྱ་བ་འབྲས་བུའི་གནས་སྟབས་བསྟན། དེ་ནས་ཡང་བསྒོམ་དགོས་པས་བསྐྱེད་བྱེད་མ་ལ་སོགས་པས་ལམ་ཀྱི་གནས་སྟབས་སྔགས་ཀྱི་དེ་ཁོ་ན་ཉིད་བསྟན་ཏེ། དགེ་སློང་གི་མན་ངག་ལེའུ་འདིར་མ་བསྟན། འདིར་ཆགས་ཅན་ཅིག་མན་ངག་བསྟན་ཏོ། །དེ་ལྟར་ལྷར་ལྟ་བ་ཤེས་ནས་ལུས་དེ་ཡང་སྔོན་དུ་ལྟ་བ་ཤེས་དགོས་པས་ལྷའི་དེ་ཁོ་ན་ཉིད་བསྒོམ་པ་པོ་མེད་དེ་ལ་སོགས་པས་བསྟན་ཏོ། །དེ་ལྟར་ལྷར་ལྟ་བ་ཤེས་ནས་ལུས་ཀྱི་གནས་ལུགས་མ་ཤེས་ན་ཡེ་ཤེས་མི་སྐྱེ་བས་ཨ་ལི་ཀ་ལི་ཞེས་པ་ལ་སོགས་པས་བདག་གི་དེ་ཁོ་ན་ཉིད་ལུས་དངོས་པོའི་གནས་སྟབས་གཏན་ལ་དབབ་པའོ། །དེ་ཡང་དེ་ཁོ་ན་ཉིད་བཞི་ལ་གདམས་པ་ནི་ཇི་ལྟར་ཞེས་པ་ནི་ཇོ་བོ་ཏེ་ལོ་པས་ན་རོ་བ་ལ་ཇི་ལྟར་བསྟན་པའོ། །ཕ་ལས་ནི་གང་ཟག་གཉིས་པོ་དེས་བླ་མ་ལའོ། །བདེ་བ་ཐོབ་པ་ནི་གནས་སྟབས་གསུམ་གྱི་མན་ངག་དེས་ཐོབ་པའོ། །དེའི་བདེ་བ་ནི་རང་ལུས་གཞན་ལུས་ཀྱི་མན་ངག་གོ། །རང་གིས་བཟའ་བ་ནི་གང་ཟག་དེ་གཉིས་དབེན་ཁང་རེ་རེས་སོང་ནས་བསྒོམ་པའོ། །དེ་བསྒོམས་པའི་ཉམས་མྱོང་བདེ་བ་གང་གིས་རྣམ་པར་རྟོག་པ་ཐམས་ཅད་འཆིང་བ་འདིར་དེའི་བདེ་བ་བསམ་གཏན་བརྗོད་དོ། །ལེའུ་ཡི་མཚན་སླངས་སོ། །ལེའུ་ལྔ་པའི་དོན་ཏོ།། །།
༄། །ལེའུ་དྲུག་པ། སྤྱོད་པའི་ལེའུ།
ལེའུ་དྲུག་པའི་ལེའུ་ཡི་འབྲེལ་ནི། །དེ་ལྟར་བསྐྱེད་རིམས་དང་རྫོགས་པའི་རིམ་པ་སེམས་མི་
1-1-120b
གནས་པ་གནས་པ་ལ་དང་པོ་བསྒོམས། གནས་པ་བརྟན་པ་ལ་ཡང་བསྒོམ་ཡང་བསྒོམ་བྱས་ནས་བསྟན་པ་བོགས་དབྱུང་བའི་ཕྱིར་སྤྱོད་པའི་ལེའུ་བསྟན་ནོ། །མདོར་བསྟན་རྒྱས་བཤད་ནི་ལེའུ་དང་པོ་ནས་མཐུ་དང་ཞེས་པ་མདོར་བསྟན་ནས་དེ་རྒྱས་པར་བཤད་པའི་ལེའུ་དྲུག་པ་འདི་བྱུང་བའོ། །མངོན་པར་རྟོགས་པའི་འབྲེལ་ནི་དེ་ལྟར་བསྐྱེད་རྫོགས་བསྒོམས་ནས་དེ་བོགས་དབྱུང་བ་ལ་སྤྱོད་པ་དང་འབྲེལ་ལོ། །ལེའུ་འདི་ལ་ཆོས་གསུམ་ལས། དང་པོ་བཤད་དམ་ཞལ་གྱིས་བཞེས་པ་ནི་དེ་ནས་ནི་ལེའུ་ལྔ་པ་བཤད་པའི་དེ་ནས་སོ། །རྫོགས་རིམས་ལས་བཞིན་(གཞན་)དུ་གྱུར་པ་སྤྱོད་པ་ཡང་རབ་ཏུ་བཤད་པར་བྱ་སྟེ། དེ་ལ་སྤྱོད་པའི་དབྱེ་བ་དང་། །སྤྱོད་པའི་བསྒོམ་པ་དང་། སྤྱོད་པའི་ངེས་ཚིག་དང་། སྤྱོད་པའི་དུས་དང་། སྤྱོད་པ་ཇི་ལྟར་བྱ་བའི་རིམ་པའོ། །དེ་ལ་དབྱེ་བ་ནི། ལས་དང་པོ་པའི་སྤྱོད་པ་དང་། རྟེན་པ་བསམ་པ་སློབ་པའི་སྤྱོད་པ་དང་། རིག་པ་བརྟུལ་ཞུགས་གྱི་སྤྱོད་པའོ། །དེ་ལས་སྤྲོས་བཅས་ཀྱི་སྤྱོད་པ་ལྷ་མོ་བཅོ་ལྔ་ཁྲིད་ནས་བྱེད། སྤྲོས་མེད་ཀྱི་སྤྱོད་པ་བརྒྱད་ཁྲིད་ནས་སྤྱོད་པ་བྱེད། ཤིན་ཏུ་སྤྲོས་མེད་ཀྱི་སྤྱོད་པ་ལྷ་མོ་ཅིག་(ཞིག་)ཁྲིད་ནས་སྤྱོད་པ་བྱེད་པའོ། །དགོས་པ་ནི་སངས་རྒྱས་ཀྱིས་རྒྱུད་དུ་གསུངས་པ་ཡིན་པས་སྤྱོད་པ་བྱས་པས་སངས་རྒྱས་ཀྱི་བཀའ་མི་ཅིག་གཅིག་པར་འགྲོ་བའི་དགོས་པ་དང་གཅིག །གནས་བཅུ་གཉིས་སུ་བགྲོད་པས་ཕ་རོལ་ཏུ་ཕྱིན་པའི་ས་བཅུ་གཉིས་སུ་བགྲོད་པར་འགྲོ་བའི་དགོས་པ་དང་གཉིས། །གནས་དེ་དང་དེར་བགྲོད་པ་ཌྰ་ཀི་མ་རྣམས་ཀྱིས་བྱིན་ཀྱིས་(གྱིས་)རློབ་
1-1-121a
པར་འགྲོ་བའི་དགོས་པ་དང་གསུམ། སངས་རྒྱས་པའི་དགོས་པ་དང་བཞི། ཉིང་དགོས་ཀྱེའི་རྡོ་རྗེའི་དངོས་གྲུབ་ཐོབ་པའི་དགོས་པ་དང་ལྔའོ། །ངེས་ཚིག་ནི་བསྐྱེད་རིམས་ཀྱི་དབང་དུ་བྱས་ན་རིག་པ་ནི་ལྷའི་སྐུར་བསྒོམ་པའོ། །བརྟུལ་བ་ནི་ཐ་མལ་ལུས་ཀྱི་སྤྱོད་པ་བརྟུལ་ནས་ཧེ་རུ་ཀའི་བརྒྱན་(རྒྱན་)ཆ་ལུགས་སུ་ཞུགས་པའོ། །རྫོགས་པའི་རིམ་པའི་དབང་དུ་བྱས་ན། རིག་པ་ནི་ས་ཧ་ཛའི་ཉམས་སུ་མྱོང་བ་ཐ་མལ་གྱི་ལུས་ངག་གི་སྤྱོད་པ་ལས་བརྟུལ་ཞིང་ཞུགས་པས་རིག་པ་བརྟུལ་ཞུགས་ཀྱི་སྤྱོད་པའོ། །དུས་ཚོད་ནི་དྲོད་ཐོབ་ནུས་པ་རྙེད་པ་སྟེ། གཞན་ཀྱི་(གྱི་)མི་དད་པ་སྒྱུར་ནུས་པ། ཞེན་པ་ཏིལ་ཀྱི་(གྱི་)ཕུབ་མ་ཙམ་ཡང་མེད་པའོ། །སྤྱོད་པ་ཇི་ལྟར་བྱ་བའི་རིམ་པ་ལ། ལེའུ་གཞུང་ལ་ཆོས་བཅུ་དྲུག་ཏུ་བྱས་ནས་སྟན་(བསྟན་)ཏེ་གཞུང་བརྟག་གོ། །ལེའུ་མཚན་གོ་སླའོ། །ལེའུ་དྲུག་པའོ། །ལྷ་རྗེ་ལྷོ་པའི་ཡིག་ཆུང་དུམ་བུ་དེ་རྣམས་ཕྱོགས་ཅིག་(གཅིག་)ཏུ་བསྒྲིགས་པའོ།། །།
༄། །ལེའུ་བདུན་པ། ཙྪོ་མྨཱའི་ལེའུ།
ལེའུ་བདུན་པའི་ལེའུ་ཡི་འབྲེལ་ནི། དེ་ལྟར་སྤྱོད་པ་བྱེད་པའི་དུས་སུ་དགྱེས་པ་རྡོ་རྗེའི་སྤུན་ནམ་མིང་སྲིང་དུ་ངོ་ཤེས་པར་བྱ་བའི་ཕྱིར་བལྟ་དགོས་པས་ལེའུ་བདུན་པ་བལྟ་བའི་ལེའུ་བྱུང་བའོ། །མདོར་བསྟན་རྒྱས་བཤད་ནི་ལེའུ་དང་པོའི་བརྡའ་ཆེན་ཞེས་པ་མདོར་བསྟན་ལ། །ལེའུ་བདུན་པ་འདི་རྒྱས་པར་བཤད་པའོ། །མངོན་པར་རྟོགས་པའི་འབྲེལ་ནི་དེ་ལྟར་བསྐྱེད་རྫོགས་ལ་སེམས་མི་གནས་པ་གནས་པར་བྱས། གནས་པ་བསྟན་པ་ལ་ཡང་བསྒོམ་ཡང་བསྒོམ་བྱས་ནས་བསྟན་པ་བོགས་དབྱུང་བ་ལ་སྤྱོད་པ་བྱེད་པ་ལ། སྤྱོད་པའི་དུས་སུ་སྤུན་
1-1-121b
ནམ་སྲིང་མོ་རུ་ངོ་ཤེས་པར་བྱས་པའི་ཕྱིར་བརྡའ་བྱའོ། །ལེའུ་འདི་ལ་གསུམ་དང་པོར་ཞལ་ཀྱིས་(གྱིས་)བཞེས་པ་ནི། དེ་ནས་ཞེས་པའི་ལེའུ་དྲུག་པ་བཤད་པའི་ཚེས་དེ་ནས་སོ། །ཙྪོ་མ་ཞེས་པ་ནི་བརྡའ་སྟེ། བརྡའི་དབྱེ་བ་དང་། དགོས་པ་དང་། ངེས་ཚིག་དང་། དུས་དང་། བརྡའ་ཇི་ལྟར་བྱ་བའི་རིམ་པའོ། །བརྡའི་དབྱེ་བ་ལ་ལུས་ཀྱི་བརྡའ་དང་ངག་གི་བརྡའོ་ལུས་ཀྱི་བརྡའ་ནི་གང་ཞིག་སོར་མོ་ཅིག་(ཞིག་)སྟོན་པ་ཞེས་པ་ལ་སོགས་པས་སྟོན། ངག་གི་བརྡའ་ནི་དེ་ལ་རྣལ་འབྱོར་མས་སྨྲས་པ་ཞེས་པས་བསྟན་གྱི། དེའི་ངེས་པ་སྟེར་བ་བརྟག་པ་ཕྱི་མའི་ལེའུ་གསུམ་པས་སྟན་(བསྟན་)ནོ། །བརྡའི་དགོས་པ་ནི་སྐྱེས་པ་ནང་ཕྲད་སྤུན། སྐྱེས་པ་ཅིག་(གཅིག་)དང་བུད་མེད་ཅིག་(གཅིག་)ཕྲད་ན་མིང་སྲིང་། བུད་མེད་ནང་བརྡའ་བྱས་ཤིང་མཐུན་ན་སྤུན་ཡིན་ནོ། །ངེས་ཚིག་ནི་ཧེ་བཛྲའི་རྣལ་འབྱོར་ནང་གིས་གོང་ཞིང་གཞན་ཀྱིས་(གྱིས་)མི་གོ་བར་བལྟ་སྟེ། དཔེར་ན་གླ་གློའི་སྐད་ལྟ་བུའོ། །བརྡའི་དུས་ནི་སྤྱོད་པའི་དུས་དང་། ཚོགས་འཁོར་དུས་དང་། དབང་བསྐུར་བའི་དུས་དང་། ཐུན་འཚམས་(མཚམས་)སུ་བྱ་བའོ། །བརྡའ་ཇི་ལྟར་བྱ་བའི་རིམ་པ་ལ། ལེའུ་ཡི་གཞུང་ལ་ཆོས་བརྒྱད་དུ་བྱས་ནས་བཤད་པར་བྱའོ། །གང་གིས་ལ་སོགས་པའི་བརྡའ་ཡི་དགོས་པ་བཤད་དེ་གོ་སླའོ། །བརྡའ་སོ་སོ་རང་རང་གི་མཚན་ཉིད་ལ་གང་ཞིག་ཞེས་པས། རྣལ་འབྱོར་པ་ཁྱོད་ལེགས་པར་འོངས་སམ་འདྲི། དེའི་ལན་དུ་གཉིས་ཀྱིས་ཞེས་པས་ལེགས་པར་འོངས་སོ་བའི་ལན་ནོ། །དེ་རྣམས་ལོགས་པ་བྱས་པས་སོ་སོའི་དམ་ཚིག་དང་གདམ་ངག་གི་གནས་ལུགས་ཅིག་(གཅིག་)གམ་
1-1-122a
ཅིག་(གཅིག་)བལྟས་ནས་ཅིག་(གཅིག་)ན་སྟབས་ཅིག་དུ་(གཅིག་ཏུ་)སྤྱོད་པ་ལ་སོགས་བརྩམ། དེ་ལ་ཕྱི་རོལ་ལས་ཟློས་པས་བརྡའི་གནས་བསྟན། དེ་འང་བརྡའི་དུས་ནི་སེམས་ཅན་གྱི་དོན་དུ་བྱས་པའི་བསམ་པས་ཌཱ་ཀི་འདུ་བའི་དུས་ཉི་ཤུ་དགུ་དང་གསུམ་ལ་བྱའོ། །དེའི་དུས་ཀྱི་ཚོགས་ཀྱི་ཡོ་བྱད་བསྟན་པ་ནི། རྒྱལ་མཚན་ལ་སོགས་པས་བསྟན་ཏོ། །དེ་ལ་ཚོགས་འཁོར་དུས་སུ་ནང་དོན་དུ་བཤད་ན། དེ་ལ་ཡང་གཏུམ་མོ་དང་སྦྱར་ན་རྒྱལ་མཚན་ནི་སྤྱི་བོའི་ཧྃ། མཚོན་གཏུམ་མོའི་མེའོ། །བསྣུན་པ་འདི་གཏུམ་མོའི་མེ་དེས་ཧྃ་ལ་འབེབས་པའི་ཐབས་ཀྱིས་ཕབ་པའོ། །ལན་བདུན་པ་ནི་བྱང་ཆུབ་ཀྱི་སེམས་ལ་སྐྱེ་བ་བདུན་ཚང་པའོ། །འབད་པས་ནི་གཏུམ་མོ་མེ་སྦར་བའོ། །སྙིང་རྗེ་བསྐྱེད་པ་ནི་གཏུམ་མོའི་མན་ངག་ཡོད་པས་བསྒོམ་ཞེས་པའོ། །བསད་(གསད་)པ་ནི་རྣམ་རྟོག་གོ། །སྙིང་རྗེ་མེད་ན་ཚིག་གཉིས་ཀྱིས་མན་ངག་མེད་ན་ཉམས་མྱོང་མི་སྐྱེ་བར་བསྟན་ཏོ། །ཐམས་ཅད་ཅེས་པའི་ཚིག་གཉིས་ཀྱིས་རྣམ་རྟོག་གོ་དགག་པ་བསྟན་ཏོ། །དེ་ལས་རྒྱ་དང་སྦྱར་ན་རྒྱལ་མཚན་ཞེས་པས་ལས་རྒྱས་པདྨའོ། །མཚོན་ནི་ཐམས་ཅད་ཀྱི་རྡོ་རྗེའི། བསྣུན་སྙོམས་པར་ཞུགས་པའོ། །གཞན་ཐམས་ཅད་གོང་དང་འདྲའོ། །ཚོགས་ཀྱིས་དུས་སུ་སྤྱོད་པ་ཇི་ལྟར་བྱ་ན་དེ་ལ་འདི་ལྟར་ལ་སོགས་པས་བསྟན་ཏོ། །དེའི་དུས་སུ་ཉམས་སུ་མྱོང་བའི་སེམས་དེ་བཤད་པ། ཧེ་རུ་ཀ་དཔལ་ལ་སོགས་པས་ཧེ་རུ་ཀ་གསུམ་གྱི་མཚན་ཉིད་བསྟན་ཏོ།། །།དོན་བརྒྱད་པ་རྡོ་རྗེ་ཐོད་སྦྱོར་ཀྱི་(གྱི་)
1-1-122b
མཚན་ཉིད་བསྟན་པ་ནི་རྡོ་རྗེ་ཐོད་པ་ལ་སོགས་པའོ། །འདི་ཡང་ཚོགས་ཀྱི་དུས་སུ་གཏོར་མ་གཏང་བས་དེའི་བྱིན་རླབས་དང་སྦྱར་ན། ཐོད་པ་ནི་ཡང་ལས་རླུང་རམ་ལས་མེའི་སྟེང་དུ་ཐོད་པ་བསྒོམ་པའོ། །རྡོ་རྗེའི་སྟེང་དུ་ཟླ་ཕྱེད་རྡོ་རྗེའི་སྦྱོར་བ་ལས་ནི་དམ་ཚིག་གི་བདུད་རྩི་བསྒོམ་ལ་ཡེ་ཤེས་ཀྱི་བདུད་རྩི་ཕབ་ནས་ཡིག་འབྲུ་གསུམ་བསླབས་པའོ། །སྐྱེའོ་ཞེས་པ་ཚིག་ཅིག་གིས་གཏོར་མའི་འགྲོན་བསྟན་པའོ། །ཤ་ལྔ་ཞེས་པ་ཚིག་ཅིག་གིས་གཏོར་མ་བྱིན་ཀྱིས་(གྱིས་)བརླབས་པ་དེ་ཟོས་པའོ། །སེམས་ཅན་ཞེས་པས་གཏོར་མའི་འགྲོན་དེ་བདག་གི་དབང་དུ་འགྱུར་བར་བསྟན་པའོ། །ཚོགས་ཀྱི་ཡོ་བྱད་བྱིན་གྱིས་རླབས་པ་དང་སྦྱར་ན། ཐོད་པ་ནི་ཚོགས་རྫས་ཀྱི་འོག་དུའོ(ཏུའོ)། །རྡོ་རྗེའི་སྟེང་དུ་ཟླ་ཕྱེད་རྡོ་རྗེའོ། །སྦྱོར་བ་གོང་དང་འདྲ། སྐྱེ་བོ་ནི་དཔའ་བོ་དང་དཔའ་མོའོ། །ཤ་ནི་ཚོགས་བྱིན་གྱིས་རླབས་པ་དེའོ། །སེམས་ཅན་ནི་ཌཱ་ཀི་ཐམས་ཅད་དབང་དུ་འགྱུར་བའོ། །དེའི་དུས་སུ་ལས་རྒྱ་ལ་བསྟེན་ནས་བསྒོམས་ན་ཡང་འདུ་ཤེས་གཉིས་ལྡན་ཀྱི་(གྱི་)རྡོ་རྗེ་དང་། ཡུམ་གྱི་པདྨ་ལ་ཐོད་པ། དེ་གཉིས་སྙོམས་པར་ཞུགས་པ་ལ་སྦྱོར་བ་ལས་སོ། །སྐྱེ་བོ་གང་དང་གང་དགོས་པ་ནི་ལས་རྒྱ་ལ་རྟེན་(བརྟེན་)པའི་གང་ཟག་གོ། །ཤ་བཟའ་བ་ནི་དེ་ལ་བརྟེན་པའི་བསྒོམ་པའི་ཉམས་སོ། །སེམས་ཅན་དེ་དེ་དབང་དུ་འགྱུར་བ་ནི་རྣམ་རྟོག་ཐམས་ཅད་བདེ་བའི་དབང་དུ་འགྲོ་ཞེས་སོ། །ཡང་གང་ཟག་ཆགས་བྲལ་ཅིག་ཚོགས་ཀྱི་ནང་དུ་ཞུགས་ན། གཏུམ་མོ་ལ་བརྟེན་ནས་བསྒོམ་ན། དང་པོར་ལུས་བཅོས་ནས་གཏུམ་མོ་སྤར་བ་རྡོ་རྗེ། སྤྱི་བོ་ནས་
1-1-123a
ཐིག་ལེ་བབ་པ་ནི་ཐོད་པ། དེ་གཉིས་འདྲེས་པ་ལས་སྦྱོར་བ་ཞེས་བྱའོ། །སྐྱེ་བོ་ནི་བསྒོམ་ཆེན་པའོ། །ཤ་ཟའ་(ཟ་)བ་ནི་བསྒོམ་པའི་ཉམས་སོ། །སེམས་ཅན་དབང་དུ་འགྱུར་བ་རྣམ་རྟོག་ཐམས་ཅད་བསྒོམ་པའི་ཉམས་སུ་འགྲོ་ཞེས་པའོ། །ལེའུ་ཡི་མཚན་ལ་བརྡའ་ལུས་ངག་ཡིད་གསུམ་གིའོ། །གནས་ནི་གནས་དང་ཉེ་བའི་གནས་ལ་སོགས་པའོ། །གཏན་ལ་ཕབ་པ་ནི་ཚོགས་ཀྱི་ཞལ་ཟས་དང་། སྤྱོད་པ་ཇི་ལྟར་བྱ་བ་དང་། ཧེ་རུ་ཀའི་མཚན་ཉིད་དང་། རྡོ་རྗེ་ཐོད་སྦྱོར་ཀྱི་(གྱི་)མཚན་ཉིད་དེ་རྣམས་ཞར་ལ་གཏན་ལ་ཕབ་པའོ། །ལེའུ་གཞུང་སྐྱོང་པའོ། །བདུན་པ་གྲངས་སོ། །ལེའུ་བདུན་པའོ།། །།
༄། །ལེའུ་བརྒྱད་པ། རྣལ་འབྱོར་མའི་ལེའུ།
ལེའུ་བརྒྱད་པའི་ལེའུ་ཡི་འབྲེལ་ནི། དེ་ལྟར་བརྡའ་དང་སྤྱོད་པ་དེ་བདག་མེད་མའི་རྣལ་འབྱོར་པས་ཀྱང་བྱ་བའི་ཕྱིར་ལེའུ་བརྒྱད་པའི་ཌཱ་ཀི་འདུ་བའི་ལེའུ་སྟན་(བསྟན་)ནོ། །མདོར་བསྟན་རྒྱས་བཤད་དུ་བྱས་ན་ལེའུ་དང་པོའི་ཇི་ལྟར་རིགས་པའི་རྣལ་འབྱོར་མ་བསྐྱེད་དང་ཞེས་པས་མདོར་བསྟན་ལ། །ལེའུ་བརྒྱད་པ་འདིས་རྒྱས་པར་བཤད་པའོ། །ལེའུ་མངོན་རྟོགས་ཀྱི་འབྲེལ་ནི་གང་ཟག་གི་ཆ་རྐྱེན་དུ་{དགྲ་}(རག་)གི་པའོ། །ལེའུ་འདི་ལ་གསུམ་སྟེ། དེ་ལས་དང་པོ་བཤད་པར་ཞལ་གྱིས་བཞེས་པ་ནི། དེ་ནས་ནི་ལེའུ་བདུན་པ་བཤད་པའི་དེ་ནས་སོ། །རྣལ་འབྱོར་མ་ལྷ་མོ་བཅོྭ་ལྔའོ། །འཁོར་ནི་བརྟེན་གཞལ་ཡས་ཁང་རྟེན་པ་ལྷ་དང་བཅས་པའོ། །དེ་བཤད་ཞེས་(ཅེས་)པའོ། །རྫོགས་རིམས་ཀྱི་དབང་དུ་བྱས་ན། རྣལ་འབྱོར་མ་སྤྲོས་མེད་དེ་ལྷན་ཅིག་སྐྱེས་པའི་ཡེ་ཤེས་སོ། །འཁོར་ལོ་ནི་སྒྲོ་འདོགས་གཅོད་པས་སོ། །དེ་བཤད་
1-1-123b
པར་བྱའོ་ཞེས་པའོ། །ལེའུ་གཞུང་ལ་ཆོས་གསུམ་ལས་དང་པོ་བསྐྱེད་རིམས་བསྟན་ཏེ། རྒྱུད་ཆིངས་སུ་བསྡུ་ན། རང་བཞིན་གྱི་རྒྱུད་དེ་ལས་ཀྱང་རྣལ་འབྱོར། །དེ་ལས་ཀྱང་ཌཱ་ཀི་བཅོྭ་ལྔ་ལམ་དུ་བྱེད་པར་བསྡུའོ། །དེ་ཡང་མངོན་རྟོགས་སུ་བླངས་ན་རྒྱུད་ནས་བྱུང་བ་བཞིན་དབང་ཐོབ་པས། ཐང་སྐུ་བྲིས་རབ་གནས་བྱས་ལ་གུར་གྱི་ལེའུ་བཅུ་གཉིས་པ་ནས་བསྟན་པའི་གནས་སུ་བསྡད་ནས། །དང་པོ་བསྐྱེད་རིམས་བསྒོམ་པ་ལ་ཆོས་རྐང་གྲངས་བཅུ་དྲུག་ཡོད་དེ། བླ་མ་དག་པའི་ཆོ་ག་བྱ་བ་དང་། ཚད་མེད་པ་བཞི་བསྒོམ་པ་དང་། ཡེ་ཤེས་ཀྱི་ཚོགས་བསགས་པ་དང་། བསྲུང་བའི་འཁོར་ལོ་དང་། ཆོས་འབྱུང་བསྒོམ་པ་དང་། འབྱུང་བ་རིམ་བརྩེགས་དང་། གཞལ་ཡས་ཁང་བསྒོམ་པ་དང་། རོའི་གདན་བསྒོམ་པ་དང་། བྱང་ཆུབ་པ་ལྔས་ལྷ་མོ་བཅོྭ་ལྔ་བསྒོམ་པ་དང་། སྐྱེ་མཆེད་དྲུག་དང་། སྐུ་གསུང་ཐུགས་རློབ་པ་དང་། ཡེ་ཤེས་སེམས་དཔའ་སྤྱན་དྲངས་ནས་གཉིས་སུ་མེད་པར་བསྲེ་བ་དང་། དབང་བསྐུར་བ་དང་། བདུད་རྩི་མྱང་བ་དང་། མཆོད་པ་དང་། བསྟོད་པ་དང་། རྣམ་དག་དང་བཅས་པས་བསྐྱེད་རིམས་ཀྱི་ཏིང་ངེ་འཛིན་བསྒོམ་པའོ། །དེ་རྣམས་ཀྱི་ཡང་ཆོ་གའི་ཁྱད་པར་ལ་དགོངས་ནས་འདིར་བགྲངས་ཀྱི། ལག་དུ་(ཏུ་)བླངས་པ་རང་སྲོག་ཤིང་བཞིན་བསྒོམ་མོ། །དེ་ཡང་གུར་ལེའུ་བཞི་པ་དེའི་ལེའུ་བརྒྱད་པ་གུར་ལེའུ་བཅུ་གཉིས་པ་གསུམ་སྡེབ་པའོ། །མཁས་པས་ཞེས་པའི་ཚིག་གཉིས་ཀྱིས་གདམས་པའོ། །ཨ་ལི་ཞེས་པའི་ཚིག་གསུམ་གྱིས་འཇུག་བསྡུས་པའོ། །དེ་ཡང་མ་ལི་ཞེས་པས་བྱང་ཆུབ་པ་དང་པོའི་འཇུག་བསྡུས། ཀ་ལིས་བྱང་ཆུབ་
1-1-124a
པ་གཉིས་པའི་འཇུག་བསྡུས། མཉམ་སྦྱོར་བ་དེ་གཉིས་ཁ་སྦྱོར་བའོ། །རྡོ་རྗེ་སེམས་དཔའ་ནི་ས་བོན་བཅུ་བཞི། ཉིད་ཀྱི་གདན་ནི་ཉི་ཟླ་གཉིས་པོ་དེ་ས་བོན་དང་ཕྱག་མཚན་གྱི་གདན་ཏེ། གོང་གི་བྱང་ཆུབ་པ་གསུམ་པའི་འཇུག་བསྡུད་དོ། །ཡི་གེ་ལས་བྱུང་ནི་བྱང་ཆུབ་པ་བཞི་པ་འདྲེས་པ་སྟེ། བཞི་པའི་འཇུག་བསྡུད་དོ། །གོང་བུ་ནི་བྱང་ཆུབ་པ་ལྔ་པོ་ལ་ལྷའི་སྐུར་བཞེངས་པ་སྟེ། བྱང་ཆུབ་པ་ལྔ་པོའི་འཇུག་བསྡུད་དོ། །འབྲུ་གཞན་དཀྱུས་སུ་བསྟན་ནོ། །བསྐྱེད་རིམས་དེ་རྣམས་ཀྱང་ཡན་ལག་དྲུག་ལྷ་རྣལ་འབྱོར་པས་ཞེས་སོ། །དེ་ནས་བཟླས་པ་བྱ་སྟེ། ལྔ་པའི་འཁོར་ལྷ་བཅུ་བཞི་པོ་དང་བཅས་པས་བཟླས་ཏེ་སྔགས་དང་ཕན་ཡོན་གུར་ལེའུ་བཞི་པ་ནས་བསྟན་ནོ། །དེ་ལས་སྐྱོ་ན་འཁོར་རྣམས་གཙོ་མོའི་ཐུགས་ཁར་(ཀར་)བསྡུས་ལ། རྫོགས་རིམས་གང་ན་གང་ཅིག་(ཞིག་)བསྒོམ་པ་ལ་དགའ་བྲལ་ཡང་མཐའ་མཆོག་དགའི་མཐའ་ཡང་ས་ཧ་ཛའི་ཡེ་ཤེས་བསྒོམ་པ་ལ་དེ་བཞིན་ནོ་ཞེས་པས་བསྟན་ནོ། །དེ་ལས་སྐྱོ་ན་གཏོར་མ་གཏང་བ་དང་གླུ་བླང་བ་དང་། སྨོན་ལམ་བཏབ་པ་དང་རྣམས་བྱས་ལ། ཧེ་རུ་ཀ་ཞལ་ཅིག་(གཅིག་)ཕྱག་གཉིས་པའི་ང་རྒྱལ་གྱིས་སྤྱོད་ལམ་ཅི་རིགས་པ་བྱའོ། །ད་ནི་དོན་གཉིས་པ་བསྐྱེད་རྫོགས་ཀྱི་འཚམས་(མཚམས་)སྦྱར་བ་ནི་བསྐྱེད་པའི་རིམ་པ་ཞེས་པ་ཕར་ཕྱིན་པའི་ལུགས་ཀུན་རྫོབ་བདེན་པ། འདིའི་ལུགས་ཀྱིས་བསྐྱེད་པའི་རིམ་པའོ། །རྫོགས་པའི་ཞེས་པས་ཕར་ཕྱིན་པའི་ལུགས་ཀྱིས་དོན་དམ་པའི་བདེན་པ་འདིའི་ལུགས་ཀྱིས་རྫོགས་རིམས་སོ། །རིམ་གཉིས་མཉམ་པ་ཞེས་པ་ཕར་ཕྱིན་པའི་ལུགས་བདེན་པ་གཉིས་སུ་
1-1-124b
མེད་པས་སྔོན་བྱུང་དུ་སངས་རྒྱས་ཀྱི་ཆོས་བཤད་དོ། །འདི་པའི་ལུགས་ཀྱིས་བསྐྱེད་རྫོགས་དབྱེར་མེད་དུ་ཆོས་བཤད་དོ། །ཕར་ཕྱིན་པའི་ལུགས་ཀྱིས་རྗེས་འཇུག་ཏུ་ཡང་དེ་གཉིས་དབྱེར་མེད་དུ་ཡང་ཉམས་སུ་བླང་ངོ་། །འདི་པའི་ལུགས་ཀྱིས་སྐྱེད་(བསྐྱེད་)རྫོགས་དབྱེར་མེད་ཉམས་སུ་ལེན་པའོ། །དེ་ཡང་འདོད་པ་མི་མཐུན་སྟེ(ཏེ)། སྔོན་དུ་བསྐྱེད་པ་ལ་བསྟན་པ་ཐོབ་པར་བྱས་ལ། དེ་ནས་རྫོགས་རིམས་བསྒོམ་པའི་ལུགས་དང་། ཚེ་སྟོད་ལ་བསྐྱེད་རིམས་བསྒོམ་ནས་ཚེ་སྨད་ལ་རྫོགས་རིམས་བསྒོམ་པའི་ལུགས་དང་། ཐུན་བཞི་རུ་བྱས་ནས་ཐུན་གཉིས་ནི་བསྐྱེད་རིམས་བསྒོམ་ལ། ཐུན་གཉིས་ནི་རྫོགས་རིམས་བསྒོམ་པའི་ལུགས་དང་། གདན་གཅིག་ལ་སྤྲུགས་པའི་ལུགས་སོ། །དེ་ལ་ཇོ་བོ་པུ་ལ་ཧ་རི་པ་ནི་སྤྲུགས་པར་བཞེད་དོ། །དེ་ལྟར་ཡང་རིམ་གཉིས་མཉམ་པར་གནས་ནས་ནི་ཞེས་པས་ཤེས་སོ། །བསྐྱེད་པ་ཡི་ནི་ཆ་བཤད་དོ་ཞེས་པས་འདིར་བསྐྱེད་རིམས་དང་རྫོགས་རིམས་ཀྱི་རྣམ་པར་བཞག་པ་ཅིག་(ཞིག་)འཆད་སྟེ(དེ)། དེ་ཡང་བསྐྱེད་པའི་རིམ་པ་ལ་གསུམ་སྟེ། ངོ་བོ་དང་། ངེས་ཚིག་དང་དབྱེ་བའོ། །ངོ་བོ་ནི་བསྐྱེད་རྒྱུའི་ལྷ་ཅི་རིགས་པ་ཅིག་(ཞིག་)བསྐྱེད་ཚུལ་ཅི་རིགས་པས་བསྐྱེད་པ་ནི་བསྐྱེད་རིམས་སོ། །དེ་ལྟར་ཡང་ཇི་ལྟར་རིགས་པའི་རྣལ་འབྱོར་མ། སྐྱེད་དང་ཞེས་གསུངས་སོ། །ངེས་ཚིག་ནི་ཡེ་ཤེས་རྒྱུད་ནས་སྐྱེ་བས་བསྐྱེད་རིམས་སོ། །ད་ལྟར་བསྒོམས་མ་ཐག་དུ་ཉམས་མྱོང་མི་འོང་སྟེ། ཁད་ཀྱིས་ཉམས་སུ་མྱོང་བ་ཅིག་(ཞིག་)སྐྱེད་པ་ལ་ཟེར་རོ། །དབྱེ་བ་ལ་གཉིས་སྟེ། སྦྱང་བཞིའི་སྐྱེད་(གཞིའི་བསྐྱེད་)པའི་རིམ་པ་དང་། སྦྱོང་བྱེད་ཀྱི་སྐྱེད་(བསྐྱེད་)པའི་རིམ་པའོ། །སྦྱང་གཞི་ལ་བཞི་སྟེ་
1-1-125a
གནས་སྐབས་ལྔ་ལས་བསྐྱེད་པ་དང་། ཆེན་པོ་བཞི་ལས་སྐྱེད་(བསྐྱེད་)པ་དང་། རང་རིགས་བདེ་བ་ཆེན་པོ་ལས་བསྐྱེད་པ་དང་། དུམ་བུ་དང་ཆ་ཤས་ལས་བསྐྱེད་པའོ། །དང་པོ་ཕའི་ཁུ་བ་དང་མའི་ཁྲག་དང་གཉིས། །དེ་གཉིས་གྱི་བར་དུ་བར་དོའི་ཤེས་པ་བཞུགས་པ་དང་གསུམ། དེ་འདྲེས་པ་དང་བཞི། དེ་ལས་ཁ་མིག་རྣ་བ་ཅན་གྱི་གཟུགས་རྫོགས་པ་དང་ལྔའོ། །ཆེན་པོ་བཞི་ལ་བསྐྱེད་པ་ནི་ཁུ་ཁྲག་དང་བར་དོ་ལ་འབྱུང་བ་བཞི་ཚང་གཟུགས་སུ་གྲུབ་པའི་ཆོས། གཤེར་བ་ཆུའི་ཆོས་དྲོ་བ་མེའི་ཆོས། ཡང་བ་རླུང་གི་ཆོས། བདེ་བ་ནམ་མཁའི་ཆོས། རང་རིག་པ་བདེ་བ་ཆེན་པོ་ལས་བསྐྱེད་པ་ནི། ཕ་འདོད་ཆགས་ལངས་པའི་དུས་དང་མ་འདོད་ཆགས་ལངས་དུས་སུ་སྙོམས་པར་ཞུགས་པ་ལུས་བདེ་བའི་ལུགས་སུ་བླུགས་པའོ། །དུམ་བུ་དང་ཆ་ཤས་ལས་སྐྱེད་པ་ནི་ཕའི་ཁུ་བ། མའི་ཁྲག་བར་དོར་ཞུགས་པ་དེ་གསུམ་འདྲེས་པ་དང་། མེར་མེར་བུ་དང་། ལྟར་ལྟར་བུ་དང་། གོར་གོར་བུ་དང་། འཁྲང་འགྱུར་དང་ཁྱབ་འཇུག་ཉའི་རྣམ་པ་ལྟ་བུ་ལ་སོགས་པ་ནས་ཟླ་བ་དགུ་དང་ངོ་བཅུ་ན་གཟུགས་རྫོགས་པའོ།། །།དེ་རྣམས་ཀྱི་སྦྱོང་བྱེད་ཀྱི། བསྐྱེད་པའི་རིམ་པ་ནི། དང་པོར་གནས་སྐབས་ལྔ་ལས་བསྐྱེད་པའི་སྦྱོང་བྱེད་དུ་བྱང་ཆུབ་པ་ལྔས་བསྐྱེད་པ་སྟེ། དེ་ཡང་ཕའི་ཁུ་བའི་སྦྱོང་བྱེད་དུ་ཟླ་བའི་དཀྱིལ་འཁོར་མའི་ཁྲག་གི་སྦྱོང་བྱེད་ཉི་མའི་དཀྱིལ་འཁོར་དེ་གཉིས་ཀྱི་བར་དུ་བར་དོ་ཞུགས་པ་དེའི་སྦྱོང་བྱེད་དུ་ཕྱག་མཚན། དེ་ཚོ་འདྲེས་པའི་སྦྱོང་བྱེད་དུ་བྱང་ཆུབ་པ་བཞི་པའོ། །དེ་ལས་ཁ་མིག་རྣ་བ་ཅན་དུ་གཟུགས་རྫོགས་པ་དེའི་སྦྱོང་བྱེད་དུ་བྱང་ཆུབ་པ་ལྔ་ལས་སྐུ་བཞེངས་པ་ཧེ་བཛྲའི་སྐུའོ། །ཆེན་པོ་བཞི་ལས་
1-1-125b
བསྐྱེད་པའི་སྦྱོང་བྱེད་དུ་ལྷ་མོ་བཅོྭ་ལྔའི་དུས་སུ་འཚམས་(མཚམས་)ཀྱི་ལྷ་མོ་བཞི་འབྱུང་བ་བཞི་རྣམ་པར་དག་པ་འམ། ལྷ་དགུའི་དུས་སུ་འཚམས་(མཚམས་)ཀྱི་ལྷ་མོ་བཞིས་མྱ་ངན་གྱི་གླུས་རང་རིག་པ་བདེ་བ་ཆེན་པོ་ལས་བསྐྱེད་པའི་སྦྱོང་བྱེད་དུ་ན་ཧེ་རུ་ཀའི་ཞལ་དུ་ཞུགས་ནས་གཙོ་བོ་ཡབ་ཡུམ་ཞུ་བའོ། །ལྷ་མོ་བཅོ་ལྔའི་དུས་སུ་བྱང་ཆུབ་པ་བཞི་པའི་དུས་ན་ཞུགས་པའོ།། །།དུམ་བུ་དང་ཆ་ཤས་བསྐྱེད་པའི། སྦྱོང་བྱེད་ནི་བླ་མ་དག་པའི་ཆོ་ག་ནས། བསྐྱེད་པའི་རིམ་པའི་ཏིང་ངེ་འཛིན་བསྒོམ་པ་ཡན་ཆད་དུ་ཞི་གནས་ལ་བསྒོམ་པ་དེ་བྱུང་བ་ཡིན་ནོ། །རྫོགས་པའི་རིམ་པ་གསུམ་སྟེ། ངོ་བོ་དང་ངེས་ཚིག་དང་། དབྱེ་བའོ། །རྫོགས་པའི་རིམ་པའི་ངོ་བོ་ནི་བདེ་བ་དང་བདེ་བ་ཆེན་པོའོ། །དེ་ལྟར་བརྟག་པ་ཕྱི་མའི་ལེའུ་གཉིས་པ་ནས། རྫོགས་པའི་རིམ་པའི་རྣལ་འབྱོར་འདི། དེའི་བདེ་བ་བདེ་ཆེན་བརྗོད་ཞེས་པས་སོ། །ངེས་ཚིག་ནི་ཡེ་ཤེས་དངོས་སུ་བསྐྱེད་པ་རྫོགས་པའི་རིམ་པ་སྟེ། ད་ལྟར་ཉིད་དུ་ཡེ་ཤེས་སྐྱེ་སྟེ། པུ་ལ་ཧ་རིའི་བཞེད་པས་དུས་འདིའི་དུས་སུ་ལུས་འདི་ལྟར་ཆོས་ལ་སེམས་འདི་འདི་ལྟར་གཏོད་དང་བྱས་པས་ཡེ་ཤེས་ངེས་པར་སྐྱེའོ། །རྫོགས་རིམས་ལ་དབྱེ་ན་གཉིས་སྟེ། སྦྱང་གཞི་རྫོགས་པའི་རིམ་པ་དང་། སྦྱོང་བྱེད་རྫོགས་པའི་རིམ་པའོ། །སྦྱང་གཞི་ལ་གཞི་(བཞི་)སྟེ། ད་ལྟ་ཐ་མལ་གྱི་རྣམ་རྟོག་མི་དྲན་དགུ་དྲན་གྱི་དུས་དང་གཅིག །གཉིད་འཐུག་པོ་ཏིམ་ཀྱིས་ལོག་པའི་དུས་དང་གཉིས། རྨི་ལམ་ཟང་ཟིང་རྨི་བའི་དུས་དང་གསུམ། ཐ་མལ་གྱི་བུད་མེད་དང་སྙོམས་པར་ཞུགས་པའི་དུས་དང་བཞི་པོ་འདི་རང་རྫོགས་པའི་རིམ་པ་བཤའ་མ་ཡིན་ནོ། །དེའི་
1-1-126a
སྦྱོང་བྱེད་ལ་ཡང་བཞི་སྟེ། དང་པོ་ཐ་མལ་གྱི་རྣམ་རྟོག་དེའི་སྦྱོང་བྱེད་དུ་གཏུམ་མོའི་རྣལ་འབྱོར་ལ་བརྟེན་ནས་ཕྱག་རྒྱ་ཆེན་པོ་བསྒོམ་པའོ། །གཉིས་ཀྱི་སྦྱོང་བྱེད་དུ་གཉིད་དང་བསམ་གཏན་བསྲེ་བའོ། །རྨི་ལམ་སྦྱང་གཞི་དེའི་སྦྱོང་བྱེད་དུ་རྨི་ལམ་དང་བསམ་གཏན་བསྲེའོ། །བུད་མེད་དང་སྙོམས་པར་ཞུགས་པ་སྦྱང་གཞི། དེའི་སྦྱོང་བྱེད་དུ་ལས་ཀྱི་ཕྱག་རྒྱ་མ་རྟེན་(བརྟེན་)པའི་གདམ་ངག་གོ། །སངས་རྒྱས་འདྲ་བའི་བླ་མས་གསུངས་པའོ། །ད་ནི་དོན་གསུམ་པ་རྫོགས་པའི་རིམ་པ་སྟོན་ཏེ། དེ་ཡང་ལེའུ་དང་པོའི་ཡེ་ཤེས་རྣམ་ཤེས་དང་ཞེས་པ་དེ་འདིས་རྒྱས་པར་འཆད་དོ། །རྫོགས་རིམས་ལ་ཆོས་གསུམ་ཡོད་པ་ལས་དང་པོ་ཆགས་ཅན་ལས་ཀྱི་ཕྱག་བརྒྱ་ལྷན་ཅིག་སྐྱེས་པའི་ཡེ་ཤེས་བསྒོམ་པ་ན། ཡུམ་ཀྱི་(གྱི་)པད་མ་ཡུལ་ཆོས་ཉིད་སྟོང་པ། ཡབ་ཀྱི་རྡོ་རྗེ་དེ་ཡུལ་ཅན་རིག་པའི་ཡེ་ཤེས་བསྒོམ་པ་ནི་ཡུལ་ཆོས་ཉིད་སྟོང་པ་དེ་ཡུལ་ཅན་རིག་པའི་ཡེ་ཤེས་རྟོགས་པར་བྱས་པའི་ཕྱིར་སྙོམས་པར་ཞུགས་པའོ། །དགའ་བ་བཞི་རྣམ་རྟོག་གཅོད་པ་དེའི་བདེ་བའོ། །རྟོགས་བཅས་ཀྱི་དགའ་བ་ལ་བརྟེན་ནས་རང་གི་ས་ཧ་ཛ་རིག་པ་ལ་རང་ཉིད་དོ། །ལྷ་ཞེས་པ་ནི་དོན་དམ་བྱང་ཆུབ་ཀྱི་སེམས་བདེ་བ་མི་རྟོག་པའོ། །ཁུ་བ་ཀུན་རྫོབ་བྱང་ཆུབ་ཀྱི་སེམས་བསྟེན་རྒྱུའི་རྣམ་པའོ། །བརྟེན་(རྟེན་)གྱིས་ཕྱེ་བས་ལས་བརྒྱ་དང་སྐྱེས་བུ་གཉིས་ཡོད་དོ། །དེ་གཉིས་ཀ་ལ་ཡང་ཀུན་རྫོབ་དང་དོན་དམ་གཉིས་གཉིས་ཡོད་དོ། །དེ་ལྟར་གང་ཟག་གིས་ཕྱེ་བས་བརྟེན་(རྟེན་)བཞི་རུ་འགྱུར་རོ། །དགའ་བ་དང་པོ་ཞེས་པའི་ཚིག་བཞི་དེ་འང་དབང་གསུམ་པའི་ཉམས་
1-1-126b
མྱོང་གིས་གཏན་ལ་ཕབ་ནས་བསྒོམ་པའི་དགའ་བ་བཞི་གནས་ལུགས་བསྟན་ནོ། །དགའ་བས་ནི་ཚིག་བཞིས་ཆགས་ཅན་ཆགས་བྲལ་གཉིས་ཀའི་དགའ་བ་བཞི་མཚན་ཉིད་བསྟན། གཞན་གྱིས་ལ་སོགས་པས་ཕྱག་རྒྱ་ཆེན་པོ་དེ་བླ་མའི་མན་ངག་གིས་རྟོགས་པར་བསྟན། དམན་པ་ལ་སོགས་པས་ཕྱག་རྒྱ་ཆེན་པོ་དེ་བློ་ལ་བཞག་པའི་ཐབས་བསྟན་པའོ། །ང་ལ་སོགས་པས་ཕྱག་རྒྱ་ཆེན་པོ་དེ་བླ་མ་མན་ངག་རྟོགས་པའི་གང་ཟག་གིས་བལྟས་ན་ཐམས་ཅད་དེ་ལས་བྱུང་ཞིང་དེའི་ཚེ་བསྟན་པའོ། །དེ་ལྟར་ལ་སོགས་པས་དུས་ཡུན་རིང་དུ་བསྒོམས་ན་བསོད་ནམས་ཆུང་བའི་མིས་ཀྱང་འགྲུབ་པར་བསྟན་པའོ། །བཟའ་དང་བཏུང་བ་ལ་སོགས་པས་སྤྱོད་ལམ་ཐམས་ཅད་དུ་ཕྱག་རྒྱ་ཆེན་པོའི་ཉམས་དང་མི་འབྲལ་བར་བསྒོམ་པར་བསྟན་ཏོ། །ཆོས་འབྱུང་བ་ལ་སོགས་པ་སྲིད་པ་ལུགས་འབྱུང་དང་ལུགས་བཟློག་(ཟློག་)བསྟན་ཏོ། །དེ་ཡང་སྲིད་པ་ལུགས་ལས་འབྱུང་བ་ནི། དང་པོ་ཆོས་འབྱུང་ནི་སྟོང་པ་འོད་གསལ་ལོ། །དེ་ལས་སྐྱེས་པའི་ཡེ་ཤེས་ནི་སྣང་བ་ཐོབ་པ། དེ་ལས་སྣང་བ་དེ་ལས་མཆེད་པའོ། །སྣང་བ་གསུམ་པོ་དེ་ཡང་མཁའ་མཉམ་ལྷན་ཅིག །དོན་སྟོང་པ་འོད་གསལ་ལས་མ་འདས་པའོ། །དེ་ལས་ཐབས་དང་བཅས་སྟེ་(ཏེ་བསྐལ་)སྐལ་པ་དང་པོའི་མི་བྱུང་བའོ། །དེ་སྣང་ཡང་མང་པོར་ལོན་ནས་སའི་རོ་མྱངས་ནས་ཟོས་སོ། །བར་འདིར་ཉི་ཟླ་ཡང་བྱུང་དེ་ནས་ཕྱིས་ས་ཞག་མོ་ཟོས་སོ། །དེ་ནས་ཡང་མྱུག་གུའི་ཚལ་བྱུང་ནས་ཟོས་སོ། །དེ་ཡང་ནུབ་ནས་འབྲས་མ་རྨོས་ཀྱི་ལོ་ཐོག་བྱུང་ནས་ཟོས་པས་དྲི་ཆེན་དྲི་ཆུ་འདོར་དང་
1-1-127a
ཕོ་མོ་དབང་པོའི་སྒོ་དོད་དོ། །དེ་ནས་ཉོན་མོངས་པ་འདོད་ཆགས་སྐྱེད་པས་རྒོད་པ་དང་། ལྟ་བ་དང་། འཁྱུད་པ་དང་དབང་པོ་སྒོ་སྦྱོར་བ་བྱུང་ངོ་། །དེ་ཡང་ཐབས་ནི་ཕ་ལ་ཤེས་རབ་ནི་མའོ། །རང་བཞིན་ཕོ་མོ་སྙོམས་པར་ཞུགས་པའི་ཁུ་ཁྲག་བྱུང་བ་ལ་བར་དོ་ཞུགས་སྟེ(ཏེ)། ལུས་བསྐྱེད་དོ། །དེ་ཡང་སྐྱེད་ལུགས་གནས་སྐབས་ལྔ་ལས་བསྐྱེད་པ་དང་། ཆེན་པོ་བཞི་ལས་བསྐྱེད་པ་དང་། རང་རིག་པ་བདེ་བ་ཆེན་པོ་ལས་བསྐྱེད་པ་དང་། དུམ་བུ་དང་ཆ་ཤས་ལས་བསྐྱེད་པའོ། །དེ་ནས་སྔོན་གྱིས་(གྱི་)འགྲོ་བ་རིགས་དྲུག་གི་(གིས་)སེམས་ཅན་ཐམས་ཅད་བསྐྱེད་པས་འཇིག་རྟེན་གསུམ་པོ་དེ་ལས་སྐྱེས་ཞེས་སོ། །དེ་རྣམས་ནི་ལུས་ཀྱི་སྲིད་པ་ལུགས་འབྱུང་ཡིན་ལ། དེའི་ལུགས་བཟློག་(ཟློག་)བསྐྱེད་རིམས་གོང་དང་འདྲའོ། །དེ་ལྟ་བུའི་ལུས་ཆགས་ནས་གནས་པ་ལ་སེམས་ཀྱི་གནས་ལུགས་ནི། ཐ་མལ་ཀྱི་(གྱི་)དུས་དང་། གཉིད་རྨི་ལམ་ཆགས་པ་སྤྱོད་པའི་དུས་བཞིའོ། །དེའི་རྫོགས་རིམས་སྦྱོང་བྱེད་ཀྱང་གོང་དང་འདྲའོ། །ཁུ་བ་ལ་སོགས་པས་ལྷན་ཅིག་སྐྱེད་པའི་ཉམས་དང་མ་བྲལ་བར་བསྒོམས་ན་སྣང་བ་གྲོགས་སུ་འཆར་བར་སྟོན། ཐམས་ཅད་རིགས་བྱེད་ལ་སོགས་པས་རྒྱུད་ཀྱི་ཆེ་བ་སྟན་(བསྟན་)ནོ། །ཆུ་བོའི་རྒྱུན་ནི་ལ་སོགས་པས་བསྒོམས་པ་ལ་གདམས་པའོ། །དེ་ལ་ནང་དོན་དུ་བཤད་ན་ལུས་བཅོས་ལྟེ་བ་ནས་གཏུམ་མོའི་མེ་བྱུང་བ་ལ་མེ་མར་ཙེར་མོ་སྤྱི་བོ་ནས་ཁུ་བ་བབ་པ་ལ་ཆུ་བོའི་རྒྱུན་ནི་རབ་འབབ་ཞེས་(ཅེས་)སོ། །དེ་གཉིས་འདྲེས་པ་ལ་རབ་དུ་(ཏུ་)བཅིངས་པ་ལྟར་ཞེས་སོ། །དེའི་བསྒོམ་པའི་དོན་ལ་བློ་བཞག་ཞེའོ། །ལེའུ་ཡི་
1-1-127b
མཚན་བསྟན་པ་གོ་སླའོ། །ལེའུ་བརྒྱད་པའོ།། །།
༄། །ལེའུ་དགུ་པ། རྣམ་པར་དག་པའི་ལེའུ།
ལེའུ་དགུ་པའི་ལེའུ་འབྲེལ་ནི། དེ་ལྟར་བསྐྱེད་པའི་རིམ་པ་བསྒོམ་པ་དེ་ལ་ཡང་རྣམ་པར་དག་པ་མ་བསྒོམས་ན་དེས་ཀྱང་འཆིང་བར་འགྱུར་བས་ལེའུ་དགུ་པ་བསྟན་ཏོ། །མདོར་སྟན་(བསྟན་)རྒྱས་བཤད་ནི་ལེའུ་དང་པོའི་གནས་དང་ཞེས་པས་མདོར་བསྟན་ནས། སེམས་མི་གནས་པ་གནས་པར་བྱེད་པའི་རྣམ་དག་གི་ལེའུ་དགུ་པ་འདིས་རྒྱས་པར་བཤད་དོ། །མངོན་རྟོགས་ཀྱི་འབྲེལ་ནི་ལེའུ་གཉིས་པ་དང་གསུམ་པར་བསྒོམས་པའོ། །ལེའུ་འདི་ལ་གསུམ་ལས་བཤད་པར་ཞལ་ཀྱིས་(གྱིས་)བཞེས་པ་ནི་གོ་སླའོ། །ལེའུ་ཡི་གཞུང་ལ་ཆོས་གཉིས་སྟེ(ཏེ)། དོན་དམ་དེ་བཞིན་ཉིད་ཀྱི་རྣམ་པར་དག་པ་དང་། ཀུན་རྫོབ་ལྷ་སོ་སོའི་རྣམ་དག་གཉིས་སོ། །དང་པོ་ལ་བཞི་སྟེ། ངེས་པར་ཞེས་པའི་དོན་དམ་དེ་བཞིན་ཉིད་ཀྱི་རྣམ་དག་མདོར་བསྟན། ཤེས་བྱའི་སྒྲིབ་སྦྱང་བྱ་ཡིས་དགོས་པ་བསྟན། རང་རིག་ལ་སོགས་པ་དོན་དམ་དེ་བཞིན་ཉིད་ཀྱི་རྣམ་དག་རྒྱས་པར་བཤད་དོ། །དེ་ཉིད་མི་ཤེས་ལ་སོགས་པས་མཇུག་བསྡུས་པའོ། །ཀུན་རྫོབ་ཀྱི་རྣམ་དག་ལ་ཡང་བཞི་སྟེ། ཕྱིས་ནས་རེ་རེའི་ལ་སོགས་པས་ཀུན་རྫོབ་ཀྱི་མདོར་བསྟན། །ཉོན་མོངས་སྒྲིབ་སྦྱོང་བྱ་ཡིས་དགོས་པ་བསྟན། ཀྱེ་བཅོམ་ལྡན་འདས་རྒྱས་པར་བཤད་དོ། །གང་དང་གང་གིས་འཇུག་(མཇུག་)བསྡུས་པའོ། །དེ་ལྟར་གཞུང་གི་བསྡུས་དོན་བྱས་ནས། མངོན་རྟོགས་སུ་བླངས་ན་ཀུན་རྫོབ་ཀྱི་དག་རྒྱུ་ཕུང་པོ་ཁམས་དང་སྐྱེ་མཆེད་དོ། །གང་དུ་དག་ན་ལྷ་མོར་དག །དག་ལུགས་ཇི་ལྟར་དག་ན་འབད་རྩོལ་མེད་པར་དག་གོ། །དགོས་པ་ཉོན་མོངས་སྒྲིབ་པ་སྤོང་ངོ་། །དེ་ལ་ཡང་
1-1-128a
དེ་བཞིན་ཉིད་ཀྱི་རྣམ་དག་མ་ཤེས་ན་དེས་ཀྱང་འཆིང་བར་འགྱུར་ཏེ། ཉོན་མོངས་པ་རང་ག་མ་ནི་དཔེར་ན་ཐག་པའི་སྒྲོག་དང་འདྲ་ལ། ལྷ་ལ་མངོན་པར་ཞེན་པ་ནི་གསེར་གྱི་སྒྲོག་བཞིན་ནོ། །ལྷ་ལ་ཞེན་པས་འཆིང་འབྲས་བུ་ལྷ་མི་འཐོབ་བོ། །དེའི་ཕྱིར་ན་དོན་དམ་དག་རྒྱུ་ལྷ་རྣམས་སོ། །གང་དུ་དག་ན་ཆོས་ཉིད་སྟོང་པར་དག་གོ། །དག་ལུགས་འབད་བརྩོལ་(རྩོལ་)མེད་པར་དག་གོ། །དགོས་པ་ཤེས་བྱའི་སྒྲིབ་པ་སྦྱོང་ངོ་། །ལེའུ་ཡི་མཚན་གོ་སླའོ། །ལེའུ་དགུ་པའི་འོ།། །།
༄། །ལེའུ་བཅུ་པ། དབང་བསྐུར་བྱ་བའི་ལེའུ།
ལེའུ་བཅུ་པའི་ལེའུ་ཡི་འབྲེལ་ནི། དེ་ལྟར་བསྐྱེད་རིམས་དང་རྫོགས་རིམ་རྣམ་དག་བཅས་ནས་བསྒོམ་པའི་སྔོན་དུ་ཡང་དབང་བསྐུར་མ་ཐོབ་པས་བསྒོམ་དུ་མི་རུང་བས་ལེའུ་བཅུ་དབང་གི་ལེའུ་སྟན་(བསྟན་)ནོ། །མདོར་བསྟན་རྒྱས་བཤད་ནི་ལེའུ་དང་པོའི་ཇི་ལྟར་རིག་པའི་རྣལ་འབྱོར་མ་ཞེས་པས་མདོར་སྟན་(བསྟན་)ལ། ལེའུ་བཅུ་པ་འདི་བརྒྱས་པར་བཤད་པའོ། །མངོན་པར་རྟོགས་པའི་འབྲེལ་པ་ནི་གང་ཟག་གཞན་གྱིས་བྱས་པའི། དཀྱིལ་འཁོར་གྱི་ཆོ་ག་ལ་རག་མི་ལུས་པར་རྒྱུད་སྡེ་ནས་དཀྱིལ་འཁོར་ཀྱི་(གྱི་)ཆོ་གར་སློང་བའོ། །ལེའུ་འདི་ལ་གསུམ་ལས་དང་པོ་དེ་ནས་ལ་སོགས་པའི་ཚིགས་སུ་བཅད་པ་ཅིག་(གཅིག་)གིས་བཤད་པར་ཞལ་གྱིས་བཞེས་པའོ། །ལེའུ་གཞུང་ལ་བཞི་ལས། སློབ་དཔོན་གྱི་མཚན་ཉིད་ལེའུ་འདི་ནས་མི་སྟོན་ཏེ། བརྟག་པ་ཕྱི་མའི་ལེའུ་དང་པོ་དང་། གུར་གྱི་ལེའུ་བརྒྱད་པ་ནས་སྟོན། སློབ་དཔོན་གྱི་ལས་ནི་ལེའུ་བཅུ་པ་ནས་སྟོན་ཏེ་འཁྲུགས་སྡེབ་བོ། །སློབ་མ་དཀྱིལ་འཁོར་དུ་གཞུག་ཅིང་ལྷ་ངོ་སྟོན་པ་བརྟག་པ་ཕྱི་མའི་ལེའུ་ལྔ་པ་ནས་སྟོན་ནོ། །
1-1-128b
དབང་བསྐུར་བ་ལ་བཞི་སྟེ། བུམ་དབང་དང་། གསང་དབང་དང་། ཤེས་རབ་ཡེ་ཤེས་དང་། དབང་བཞི་པའོ། །དེ་ཡང་བུམ་པའི་དབང་དེ་དུས་སྲོད་ལ་བསྐུར་རོ། །ཕྱོགས་ཤར་ཕྱོགས་སུ་བསྐུར་རོ། །དབང་སྟེགས་པའི་རྣམ་ལྔས་བྱུགས་པའི་སར་བསྐུར། [དཀྱིལ་འཁོར་]རྡུལ་ཚོན་གྱི་[དཀྱིལ་འཁོར་ལོ།] དྲི་མ་ལུས་ཀྱི་དྲི་མ་དག་གོ། །ས་ན་བྱང་ཆུབ་སེམས་དཔའི་ས་ཐོབ་བོ། །ཉམས་མྱོང་ནི་བདེ་བ་ངོས་འཛིན་པར་བྱེད་པའི་ཕྱིར། བླ་མ་རྡོ་རྗེ་སློབ་དཔོན་དུ་གྱུར་པའོ། །རྗེས་སུ་གནང་བ་ནི་བསྐྱེད་རིམས་བསྒོམ་པ་དང་བཟླས་པ་ལ་སོགས་པ་དང་རྒྱུད་མཉན་པ་དང་བཤད་པའི་རྗེས་སུ་གནང་བའོ། །དམ་ཚིག་ནི་རྩ་བ་བཅུ་བཞི་ལ་སོགས་བསྲུངས་པའོ། །གསང་བའི་དབང་ལ་ཡང་དུས་ནམ་ཕྱེད་ན། [དཀྱིལ་འཁོར་]ཀྱི་(གྱི་)ལྷོ་ཕྱོགས་སུའོ། །བདུད་རྩི་ལྔས་བྱུགས་པའི་མཎྜལ་ཀྱི་(གྱི་)སྟེང་དུའོ། །[དཀྱིལ་འཁོར་]ལུས་ཀྱི་[དཀྱིལ་འཁོར་ལོ།] །དྲི་མ་ངག་གི་དྲི་མ་འབྱུང་། །དེ་བཞིན་གཤེགས་པའི་ས་ཐོབ་པའོ། །ཉམས་མྱོང་བདེ་ལ་མི་རྟོག་པ་ངོས་འཛིན་པར་བྱེད་དོ། །བླ་མ་རྡོ་རྗེ་སློབ་དཔོན་དུ་གྱུར་པའོ། །རྗེས་སུ་གནང་བ་ནི་རྩ་རླུང་གི་རྫོགས་རིམས་དང་ཤ་ལྔ་པ་དང་བདུད་རྩི་ལྔ་བསྟེན་དུ་རུང་བའོ། །དམ་ཚིག་ནི་རྩ་ལྟུང་དགུ་པ། བཅུ་གཉིས་པ། བཅུ་བཞི་པའོ། །དབང་གསུམ་པ་ལ་དུས་ཚོད་ནི་ཐོ་རངས་སོ། །[དཀྱིལ་འཁོར་]གྱི་ནུབ་ཕྱོགས་སུའོ། །དབང་རྟགས་ནི་བྱང་སེམས་ཀྱིས་བྱུགས་པའི་མ་འདལ་གྱི་སྟེང་དུའོ། །[དཀྱིལ་]འཁོར་བ་གའི་[དཀྱིལ་འཁོར་ལོ།] །དྲི་མ་སེམས་ཀྱིས་དྲི་མ་འཁྲུད་པའོ། །རྡོ་རྗེ་འཆང་གི་ས་ཐོབ་པའི་ཕྱིར་རོ། །བདེ་སྟོང་དབྱེར་མེད་ལྷན་ཅིག་སྐྱེས་པའི་ཡེ་ཤེས་ངོས་འཛིན་པའོ། །སྲིང་
1-1-129a
མོ་དེ་སློབ་དཔོན་དུ་གྱུར་པའོ། །རྗེས་གནང་ནི་ལས་རྒྱུ་བསྟེན་པ་དང་ལྷ་ཞལ་སྦྱར་བསྒོམ་དུ་རུང་པའོ། །དམ་ཚིག་ནི་རྩ་བ་བཅུ་བཞི་པའོ། །དབང་བཞི་པ་ལ་ཡང་དུས་ཉི་མ་རྩེ་ཤར་པའོ། །[དཀྱིལ་འཁོར་]ཀྱི་(གྱི་)བྱང་ཕྱོགས་སུའོ་ཁྲག་གིས་བྱུགས་པའི་མ་འདལ་ཀྱི་(གྱི་)སྟེང་དུའོ། །བྱང་ཆུབ་ཀྱི་སེམས་འོད་གསལ་གྱི་དཀྱིལ་འཁོར་དུའོ། །ལུས་ངག་ཡིད་གསུམ་ཐ་དད་དུ་འཛིན་པའི་དྲི་མ་འཁྲུད་དོ། །བདེ་བ་ཆེན་པོའི་ས་ཐོབ་པའོ། །ཉམས་མྱོང་ནི་གསུམ་པའི་དོན་དེ་ཚིག་གིས་གཏན་ལ་ཕེབས་(འབེབས་)སོ། །སེམས་སློབ་དཔོན་དུ་གྱུར་པའོ། །རྗེས་གནང་ཕྱག་རྒྱ་ཆེན་པོ་བསྒོམ་པའོ། །དམ་ཚིག་ནི་རྩ་ལྟུང་བཅུ་ཅིག་(གཅིག་)པའོ།། །།དབང་བསྐུར་ཐབས་ནི་ད་ལའི་ཆོ་ག་ཡིས་ཤེས་སོ། །འབྲུ་ནི་འཆན་ན་གསལ་ལོ། །ལེའུ་ཡི་མཚན་གོ་སླའོ། །ལེའུ་བཅུ་པའི་འོ།། །།
༄། །ལེའུ་བཅུ་ཅིག་པ། མངོན་པར་བྱང་ཆུབ་པའི་ལེའུ།
ལེའུ་བཅུ་ཅིག་(གཅིག་)པའི་ལེའུ་ཡི་འབྲེལ་ནི། དེ་ལྟར་དབང་ཐོབ་དེས་འབྲས་བུ་ལས་ཀྱི་ཚོགས་འདི་ལྟ་བུ་འགྲུབ་བོ། །ཞེས་བསྟན་པའི་ཕྱིར་ལེའུ་བཅུ་གཅིག་པ་ལས་ཚོགས་ཀྱི་ལེའུ་འབྱུང་ངོ་། །མདོར་བསྟན་རྒྱས་བཤད་ནི་ལེའུ་དང་པོའི་ལྟ་སྟངས་བྱ་བ་དེ་འདིས་བཤད་པའོ་མངོན་རྟོགས་ཀྱི་འབྲེལ་ནི་ཐད་སོར་དོན་སྡེབས་སོ། །ལེའུ་འདི་ལ་ཆོས་ལྔ་ཡོད་པ་ལས་དང་པོ་སྒྲོལ་མས་དབང་དུ་བྱ་བ་སྟོན་ཏེ། རྒྱས་པར་བརྟག་པ་བཅུ་གཉིས་ལས་ཞེས་བྱ་བར་སྡེབས་སྟེ(ཏེ)། སྤྱིར་ཀུ་རུ་ཀུ་ལེའི་ཆོ་ག་རྟག་པ་བཅུ་གཉིས་ཡན་ཆད་ན་ཐོ་རེ་བ་ཅིག་(ཞིག་)ཡོད་པའོ། །གོང་དུ་གསུངས་པར་ཞེས་པ་སྡེབས་ཏེ་གོང་ལེའུ་གཉིས་པའི་སྔགས། ཨོཾ་ཀུ་རུ་ཀུ་ལཱེེ་ཧྲི་སྭཱ་ཧཱ། ཞེས་པའོ།། །།མདོ་རུ་བསྡུས་ཞེས་
1-1-129b
པ་ནི་སྒྲུབ་ཐབས་ཅིག་(ཤིག་)འདིར་བསྡུས་ནས་སྟོན་པ་ཡིན་ནོ། །དེ་ལ་ཡང་སྔོན་འགྲོ་ཀུ་རུ་ཀུ་ལཱེེ་དང་བླ་མ་གཉིས་ནམ་མཁར་སྤྱན་དྲངས་ལ་བདུན་རྣམ་དག་བྱ། དེ་མི་དམིགས་པར་བསྒོམས་ལ་ཚད་མེད་པ་བཞི་བསྒོམ། དངོས་གཞི་ལ་དང་པོ་སྟོང་པ་ཉིད་བསྒོམ། དེའི་ངང་ལས་པདྨ་དམར་པོ་དང་ཉི་མའི་གདན་བསམ། དེའི་སྟེང་དུ་ས་བོན་ཧྲི་དེ་ལས་བྱུང་བའི་ལྷ་མོ་ནི་ཞལ་ཅིག་(གཅིག་)ཕྱག་བཞི་པ་ཕྱག་མཚན་དཀྱུས་ན་གསལ་ལོ། །དེའི་སྙིང་ཁར་(གར་)ཉི་མའི་སྟེང་དུ་ས་བོན་ཧྲི་ལས་ལེའུ་གཉིས་པའི་སྔགས་ཀྱིས་བསྐོར་བ་ཅིག་(ཞིག་)བསམ་མོ། །དེ་ལས་འོད་སྤྲོས་ལ་ཡེ་ཤེས་སྟིམ། དབང་བསྐུར་ལ་སྣང་མཐས་དབུ་རྒྱན་པར་བསམ། དེ་བསྒོམས་པའི་ཕན་ཡོན་འདི་ནི་ཞེས་པའི་ཚིག་གཉིས་སོ། །དེ་ནས་ལྟ་སྟངས་བཞིས་བཞི་བསྒྲུབ་པ་ནི་མཉམ་པར་མ་རུངས་ཞེས་པ་ལ་སོགས་པ་ཎི་ལྟ་སྟངས་བཞི། རླུང་བཞི། ཉམས་སད་པའི་གནས་བཞི་ཡོད་དེ་གཞུང་ན་གསལ་ལོ། །ཟླ་དྲུག་ཞེས་(ཅེས་)པ་ལ་སོགས་པས་དུས་ཀྱི་བསྙེན་པ་སྟན་(བསྟན་)ནོ། །ལྟ་སྟངས་བཞི་པོ་བསྒྲུབ་པའི་དགོས་པ་ནི་ལྟ་སྟངས་ཞེས་པ་ལ་སོགས་པས་བསྟན་ནོ། །དེ་ལ་དོན་གསུམ་པ་ཤ་ལྔ་བདུད་རྩི་ལྔ་བཟའ་བར་བསྟན་པ་ནི། དེ་ལ་ཞེས་པ་ལ་སོགས་པས་སྟན་(བསྟན་)ཏོ། །དོན་བདུན་པ་སྐྱེ་བ་བདུན་པའི་ཤ་བཟའ་བ་ཕན་ཡོན་ཏན་དང་བཅས་པ་ནི་ཀྱེའི་རྡོ་རྗེ་ཞེས་པ་ལ་སོགས་པ་སྟོན་ཏོ། །དེ་ཡང་སྐྱེ་བ་བདུན་པའི་ཤ་ཟོས་པས་ནི་དགའ་བ་རྟོག་བཅས་པ་དགའ་ཞིང་རྟོག་མེད་ལྷན་ཅིག་སྐྱེས་པའི་ཡེ་ཤེས་ལ་སྨོན་པ་དེས་ཀྱང་ལན་བདུན་པའི་ཤ་ཟོས་ན་དངོས་གྲུབ་འགྲུབ་པར་
1-1-130a
འགྱུར་རོ། །དེའི་མཚན་ཉིད་ཀྱང་སྐད་སྙན་ཞིང་བདེ་བ་དང་། མིག་དང་ལྡན་པ་ནི་མིག་མས་འགེངས་པ་མིག་དཀྱུས་རིང་བ་མིག་རྩ་དམར་བར་འདུག་པ་དང་གཉིས། དྲི་ལུས་ནི་ལུས་ལ་དྲི་ཞིམ་པ་འདུག་པ་དང་གསུམ། གཟི་བརྗིད་ནི་འོད་མདངས་ཡོད་པ་དང་བཞི། གྲིབ་མ་ནི་མར་མེ་ལ་ལྟས་ན་གྲིབ་མ་ལྔ་བདུན་ཤར་རེ་ཡོད་པ་དང་ལྔ་པོ་དེ་འདི་ན་ཡོད་ལ། རྒྱུད་གཞན་ནས་བསྐོང་ན་གཡས་ངོས་སུ་ལྡོག་པ་དང་དྲུག །འགྲོ་ན་བྱ་ངང་པའི་འགྲོས་ལྟར་འགྲོ་བ་དང་བདུན་ནོ། །དེ་ལྟ་བུ་དེ་མཐོང་ནས་བྱང་ཆུབ་སེམས་དཔའི་རིགས་ཡིན་པས་བདག་གིས་ཕྱག་དང་བསྐོར་བ་བྱས་ནས། མེ་ཏོག་ཕུལ་ནས་ལུས་འདི་སྦྱིན་དགོས་བྱས་ན་སྟེར་ཏེ། དེ་ལ་རི་ལུ་བྱས་ནས་ཟོས་པ་ཙམ་གྱིས་མཁའ་སྤྱོད་དུ་འགྱུར་ཏེ། ཉི་ཟླ་གནས་ཀྱི་བར་གྱི་དངོས་གྲུབ་ཡིན་ནོ། །དཔེར་ན་རྒྱལ་པོ་སེངྒེ་བཟང་པོ་བཞིན་ནོ། །དེ་རྣམས་ཀྱིས་རྒྱུད་ཀྱིས་(ཀྱི་)དོན་དུ་བསྡུ་ན་ཀུ་རུ་ཀུ་ལ་ལས་ཚོགས་ཀྱི་ལྷ་བསྐྱེད་རིམས་སུ་བསྡུ་སྟེ། དོན་ལ་རང་བཞིན་གྱི་རྒྱུད་དུ་བསྡུའོ། །ལྟ་སྟངས་བཞི་ལས་བཞི་བསྒྲུབ་པ་དེ་འབྲས་བུ་ལས་ཚོགས་སུ་བསྡུ་བ་འདི། དོན་ལ་འབྲས་བུའི་རྒྱུད་དོ། །ཤ་ལྔ་བདུད་རྩི་ལྔ་དང་སྐྱེ་བ་བདུན་པའི་ཤ་བཟའ་བ་རྣམས་བཟའ་བའི་དམ་ཚིག་ཏུ་བསྡུའོ། །དོན་ལྔ་ལ་ལེའུའི་མཚན་ནི་ཀྱེའི་རྡོ་རྗེ་ནི་ཧེ་རུ་ཀའོ། །མཁའ་འགྲོ་མ་ནི་བདག་མེད་མ་ལ་སོགས་པའོ། །དྲ་བ་ནི་གཙོ་བོ་དང་འཁོར་དུ་འབྲེལ་པའོ། །སྡོམ་པ་ནི་སྐྱེད་(བསྐྱེད་)པའི་རིམ་པ་དང་རྫོགས་པའི་རིམ་པ་སྡོམ་པའོ། །རྡོ་རྗེ་སྙིང་པོས་ཞུས་ཤིང་དབང་བྱས་པས་ན་མངོན་པར་
1-1-130b
བྱང་ཆུབ་པའོ། །ཞེས་བྱ་བ་ནི་གཞུང་ཚིག་དང་ཡི་གེའི་ཚོགས་ལ་བྱའོ། །རྟག་པ་ནི་སེམས་ཅན་ཀྱི་(གྱི་)དོན་དུའོ། །རྒྱལ་པོ་ནི་གོང་ན་གཞན་མེད་པའོ། །དེས་ན་རྟག་པ་སུམ་བཅུ་(ཅུ་)རྩ་གཉིས་ཀྱི་སྟོད་ཀྱི་རྟག་པ་གཅིག་དེས་རྫོགས་སྷོ།། །།འདིར་མ་རྒྱས་བ་རྣམས་ཆན་དང་། སྲོག་ཤིང་དང་། སྒོམ་རིམས་དང་། དཀྱིལ་འཁོར་གྱི་ཆོ་ག་དང་། དེ་རྣམས་སུ་བལྟས་ན་རྒྱུད་མུལ་ཀྱིས་(གྱིས་)འགྲོའོ།། །།བརྟག་པ་དང་པོའི་ཊི་ཀ་རྫོགས་སྷོ།། །།
༄། །བརྟག་པ་གཉིས་པ་ལ། ལེའུ་དང་པོ། རབ་གནས་ཀྱི་ལེའུ།
བླ་མ་རྗེ་བཙུན་དམ་པ་རྣམས་ལ་ཕྱག་འཚལ་ལོ། །དཔལ་དགྱེས་པ་རྡོ་རྗེའི་བརྟག་པ་ཕྱི་མ་འདི་ལ་ལེའུ་བཅུ་གཉིས་ཡོད་ཀྱང་། ཆོས་རྣམ་པ་བཞི་རུ་བསྡུ་སྟེ། དེ་ཡང་ཚངས་པ་ལ་ཁ་བསྐོང་(སྐོང་)བ་དང་། དངོས་གྲུབ་གཏན་ལ་དབབ་པ་དང་། ངེས་པ་སྟེར་བ་དང་། ཐེ་ཙོམ་སེལ་བ་དང་བཞིའོ། །དེ་ཡང་བརྟག་པ་ཕྱི་མའི་ལེའུ་དང་པོ་དང་། ལེའུ་ལྔ་པ་མན་ཆད་ལེའུ་བརྒྱད་དེ་ལེའུ་དགུ་མ་ཚང་བ་ཁ་སྐོང་བའོ། །ལེའུ་གཉིས་པས་དངོས་གྲུབ་གཏན་ལ་འབེབས་སོ། །ལེའུ་གསུམ་པས་ངེས་པ་སྟེར་རོ། །ལེའུ་བཞི་པས་ཐེ་ཙོམ་སེལ་བའོ། །དེ་ལ་ལེའུ་དང་པོས་རབ་ཏུ་གནས་པ་འདིས་བརྟག་པ་དང་པོའི་ལེའུ་གསུམ་པ་དང་ལེའུ་བརྒྱད་པའི་བསྐྱེད་རིམས་ལ་ཐང་སྐུ་དགོས་ལ། དེ་ལ་རབ་གནས་དགོས་པས་དེའི་མ་ཚང་བ་སྟོན་ཏོ། །བརྟག་པ་དང་པོའི་ལེའུ་བཅུ་པར་དབང་བསྐུར་བྱུང་བ་ལ་སྔོན་དུ་སློབ་དཔོན་གྱི་མཚན་ཉིད་དང་ལྡན་པ་ཅིག་(ཞིག་)དགོས་པས་དེ་འདི་ནས་སྟོན། བརྟག་པ་དང་པོའི་ལེའུ་གསུམ་པར་ནང་གི་མཆོད་པ་དང་གསང་བའི་མཆོད་པ་བྱུང་བ་ལ། ཕྱིའི་མཆོད་པ་མ་ཚང་བ་འདི་ནས་སྟོན། རྟག་པ་དང་པོའི་ལེའུ་གཉིས་
1-1-131a
པར་ལས་ཀྱི་ཚོགས་མང་དུ་བཤད་ཀྱང་ཧོ་མ་ལ་བརྟེན་པ་མ་ཚང་བས་དེ་འདི་ནས་བསྟན། བརྟག་པ་དང་པོའི་ལེའུ་བཅུ་པར་ས་སྦྱང་བ་ལ་སོགས་པ་བྱུང་བ་ལ། དེའི་སྔོན་དུ་ས་སླང་པ་འདི་ནས་སྟོན་ནོ། །དེའི་ཕྱིར་ནི་ལེའུ་འདི་ལ་མ་ཚང་བ་ཁ་བསྐོང་(སྐོང་)བའི་ལེའུ་ཞེས་བྱའོ། །ལེའུ་འདི་ལ་ལེའུ་ཡི་གཞུང་དང་མཚན་ནོ། །ལེའུ་ཡི་གཞུང་ལ་ཆོས་ལྔ་ཡོད་པ་ལས་དང་པོ་དྲི་བ་སྔོན་དུ་འགྲོ་བས་རབ་ཏུ་གནས་པ་བསྟན་ནོ། །དེ་ལ་དྲི་བ་ནི་རྡོ་རྗེ་སྙིང་པོས་དྲིས་པའོ། །རབ་གནས་ལ་མཚན་ཉིད་ནི་དབྱེ་བ་དང་། སྒྲ་འཇུག་པའི་རྒྱུ་མཚན་དང་། མ་བྱས་པའི་སྐྱོན་དང་། བྱས་པའི་ཕན་ཡོན་དང་། ཅི་ལྟར་བྱ་བའི་རིམ་པའོ། །དབྱེ་བ་ལ་སྐུའི་རྟེན་རབ་ཏུ་གནས་པ་དང་། གསུང་གི་རྟེན་དང་། ཐུགས་ཀྱི་རྟེན་ནོ། །སྒྲ་འཇུག་པའི་རྒྱུ་མཚན་ནི་པྲ་ནི་པ་ཏིཥྚ་ཞེས་པའི་སྒྲ་ལས་དྲངས་ན། བརྟན་པོར་གནས་པ། ཡུན་རིང་དུ་གནས་པ། མི་འགྱུར་བར་གནས་པ་ཞེས་བྱའོ། །ཡང་པྲ་ཏིཥྚ་ཞེས་རིང་པོར་དྲངས་ན་དེ་ཉིད་རབ་ཏུ་གནས་བཟང་པོ་འམ་མཆོག་དུ་(ཏུ་)གནས་པའོ། །མ་བྱས་པའི་སྐྱོན་ནི་རྟེན་བཟང་པོ་དེ་ལ་མི་མ་ཡིན་ཞུགས་ནས་ཤིན་ཏུ་བཀྲ་མི་ཤིས་པ་འབྱུང་བའོ། །བྱས་པའི་ཕན་ཡོན་ནི་བཀྲ་ཤིས་ཤིང་མཆོད་པའི་གནས་སུ་རུང་བའོ། །ཅི་ལྟར་བྱ་བའི་རིམ་པ་ལ། རྒྱས་པ་བར་བ་བསྡུས་པ་གསུམ་དུ་བྱས་ནས། རིམ་པ་ཅི་ལྟར་བཤད་དུ་གསོལ་ཞེས་གསོལ་བ་བཏབ་བོ། །དེའི་ལན་བཀའ་སྩལ་པ་ནི། ཆོ་ག་བསྡུས་པ་ནི་ཐུན་ཅིག་(གཅིག་)གི་ནང་དུ་རྫོགས་པར་བྱེད་པ་སྟེ། ད་ལྟའི་གང་ཟག་རྣམས་ཀྱི་གནས་སྐབས་
1-1-131b
མིན་ཏེ་གྲུབ་ཐོབ་ཅིག་(གཅིག་)གི་རབ་གནས་ཡིན། རབ་གནས་བར་པ་ནི་ཡོན་བདག་སྟ་གོན་བྱེད་པའི་ནུབ་མོ་རབ་གནས་ཀྱི་རྒྱུ་དེ་ཡང་སྟ་གོན་བྱེད་པའོ། །གཞན་མ་རྣམས་ཀྱི་ཆོ་ག་འདྲའོ། །རྒྱས་པར་ནི་རབ་གནས་ཀྱི་ཆོ་གཱའི་བུམ་དུ་ཤེས་པར་བྱའོ། །དེ་ལ་ཡང་གཞུང་དང་སྦྱར་ན་དཀྱིལ་འཁོར་དམ་པ་བཞེངས་པ་ནི་སྔོན་དུ་བསྙེན་པ་ཡོངས་བས་དེ་ནས་ས་ཆོག་བྱ། དེ་ནས་སྟ་གོན་བྱས་པའི་ཏིང་ལ་དཀྱིལ་འཁོར་གང་ཡིན་བྲི་བའོ། །དེ་ནས་དཀྱིལ་འཁོར་བསྒྲུབ་པ་ལ་སློབ་དཔོན་བདག་འཇུག་བྱས་པའི་རྗེས་ལ་ཧོ་མ་བྱ་བ་ནི། ཅི་གསུངས་སྦྱིན་བསྲེག་བྱས་ནས་ནི་ཞེས་པས་བསྟན་ནོ། །སྔར་བར་ཞེས་པས་སོགས་ཚིག་བཞིས་རབ་གནས་ཀྱི་རྒྱུ་ལ་སྲོད་ལ་སྟ་གོན་བྱ་བ་དང་ཐོ་རས་(རངས་)སྤྱན་འབྱེད་གཉིས་ལ་སྦྱར་རོ། །རང་འདོད་ཞེས་(ཅེས་)པས་གྷུ་རུའི་མཚན་ཉིད་བསྟན་ཏོ། །མཆོད་པ་འདི་རྣམས་གཡོན་དུ་མཆོད་ཡོན་དང་ཞལ་བསིལ། བསང་གཏོར་ཆུ་གསུམ་བཞག་ལ། གཡས་ངོས་སུ་མེ་ཏོག་ལ་སོགས་པ་བཞག་པ་གོ་རིམས་ཀྱང་ངེས་པ་མེད་པ་ལ་དབུལ་བ་ཡང་གང་ཟིན་ཟིན་ནས་དབུལ་གསུང་། རྡོ་རྗེ་བསང་གཏོར་ཆུར་བཅུག་པས་གཏོར་ལ། ངག་ཏུ་ཛྙ་ཞེས་པས་མཆོད་པའི་བགེགས་བསྐྲད། དེ་ནས་ལག་པས་རྡོ་རྗེ་གཟུང་བས་ཨོཾ་ཨཱ་ཧཱུྃ་ཞེས་པ་བརྗོད་པས་བདེ་སྟོང་དུ་བྱིན་གྱིས་བརླབས་ལ་ཨོཾཱ་ཛ་ཧྰྃ་བྃ་ཧོ་ལ་སོགས་པས་དབུལ་ལོ། །དེ་ཡང་ཨོྃ་ནི་བཀྲ་ཤིས་པའོ། །བཛྲ་བདེ་སྟོང་ངོ་། །པུས་པེ་མེ་ཏོག་གོ། །ཨཱ་ཧཱུྃ་ནི་སྐུ་གསུང་ཐུགས་གསུམ་མོ། །སྭཱ་ཧཱ་ནི་མཉེས་པར་གྱུར་ཅིག་པའོ། །དེས་ཀུན་ལ་སྦྱར་རོ། །ཡང་ན་གུར་གྱི་ལེའུ་
1-1-132a
བཅུ་བཞི་པའི་ཚིགས་སུ་བཅད་པ་དང་སྦྱར་རོ། །དེ་རྣམས་ཀྱིས་ཕྱི་མཆོད་བསྟན་ནོ། །ད་ནི་ཧོ་མ་བསྟན་པ་ནི་ཞི་བ་ལ་སོགས་པས་ཐབས་ཀྱི་དབྱིངས་བསྟན། །ཁྲུ་གང་བ་ལ་སོགས་པས་ཐབ་(ཐབས་)ཀྱི་ཚད་བསྟན། །ཞི་བ་ཁ་དོག་ལ་སོགས་པས་ཁ་དོག་བསྟན་ནོ། །ཞི་བ་ལ་ཏིལ་ལ་སོགས་པས་ཁྱད་པར་གྱི་རྫས་བསྟན། ཨོཾ་ལ་སོགས་པས་ཡེ་ཤེས་ཀྱི་མེ་ལྷ་སྤྱན་དྲང་བ་སྟན་(བསྟན་)སྦ་ལ་སོགས་པའི་ཡེ་ཤེས་ཀྱི་མེ་ལྷ་གཤེགས་སུ་གསོལ་བ་བསྟན་ནོ། །དེ་རྣམས་ལག་ཏུ་བླངས་པ་ཧོ་མའི་ཆོ་གར་ཤེས་པར་བྱའོ། །ད་ནི་སའི་ལྷ་མོ་ལས་བླང་བ་ནི་མཎྜལ་བྱས་པའི་དབུས་སུ་བརྡུད་(བདུད་)རྩིའི་ཆུས་དྲིའི་ཐིག་ལེ་གྲུ་བཞི་པ་ཅིག་(ཞིག་)བྱ། དེའི་དབུས་སུ་མེ་ཏོག་གི་ཚོམ་བུ་ཅིག་(གཅིག་)བཀྲམ་ལ། དེ་བྃ་ལས་སའི་ལྷ་མོར་བསྐྱེད་ཡེ་ཤེས་བསྟིམ། མཆོད་མ་མ་ཞེས་པས་གསོལ་བ་གདབ་བོ། །རྷྃ་རྷྃ་ནེ་པ་ཏེ་དང་གཉིས་འདམ་ཀའོ། །ལེའུ་ཡི་མཚན་གཞུང་ན་གསལ་ལོ། །ལེའུ་དང་པོའོ།། །།
༄། །ལེའུ་གཉིས་པ། དངོས་གྲུབ་ཀྱི་ལེའུ།
ལེའུ་གཉིས་པ་འདིར་བརྟག་པ་དང་པོར་བསྐྱེད་རྫོགས་བཟླས་པ་རྣམ་དག་དང་བཅས་པ་བསྒོམ་ཤིང་བརྡའ་དང་སྤྱོད་པ་ལ་སོགས་པ་བྱས་པས། དུས་ཚོད་ཅི་ཙམ་ན་སངས་རྒྱས་པ་མི་ཤེས་པ་ལ་འདིར་ཟླ་བ་གསུམ་དང་ཞག་བདུན་ན་སངས་རྒྱས་པར་བསྟན་ལ་འབེབས་པས་དངོས་གྲུབ་བསྟན་ལ་དབབ་པའི་ལེའུ་འདི་བསྟན་ནོ། །ལེའུ་འདི་ལ་ཡང་གཞུང་དང་མཚན་ལས་དང་པོ་གཞུང་ངོ་། །དེ་ལག་གཉིས་ལས་དང་བ་དྲི་བ་ནས་ནམ་མཁར་རྫོགས་པའི་རིམ་པའོ། །དཔེར་ན་རྒྱ་མཚོའི་ནང་ན་ཀུ་བ་ཕྱ་ཕྱ་བ་དེ་ལ་དགོས་པ་མེད་པ་བཞིན་དུ། རྫོགས་
1-1-132b
རིམས་ཟབ་མོའི་དོན་ལ་བསྐྱེད་རིམས་ལྷའི་སྐུའི་རྣམ་རྟོག་དེ་བསྒོམས་པ་ལ་དགོས་པ་ཅི་ཡོད་བྱས་པའམ། ཡང་ན་རྒྱ་མཚོ་ལ་ཀུ་བས་ཚུ་བཙལ་ཀྱང་རྒྱ་མཚོ་ལ་བྲི་བ་མེད་པ་བཞིན་དུ། ཉོན་མོངས་པ་རྒྱ་མཚོ་དང་འདྲ་བ་དེའི་བསྐྱེད་རིམས་ཀ་བ་འདྲ་བ་དེས་ཉོན་མོངས་པ་ཡེ་མི་འབྲི་བྱ་བའོ། །ཡང་ན་ཀུ་བ་ཁ་བ་ཅད་ན་རྒྱ་མཚོའི་སྟེང་འགྲོ་དགོས་གསུང་ངོ་། །བཅོམ་ལྡན་འདས་ཀྱིས་ལྕོགས་པ་བསྟན་ཏེ་དེ་ལ་ཆོས་ལྔ་ཡོད་ཀྱང་། དང་པོ་བསྐྱེད་པའི་རིམ་པ་སྒོམ་པ་བསྟན་ནོ། །དེ་ཡང་ཉིན་མོ་དང་མཚན་མོའི་གནས་སུ་བསྐྱེད་རིམས་ཌིག་བཅོྭ་ལྔ་འམ་ཁྲག་འཐུང་ལྷ་དགུ་གང་ཅིག་ལ་བརྟེན་ནས་རྫོགས་རིམས་གང་མོས་ཅིག་(ཞིག་)དང་གདན་གཅིག་ལ་སྤྲུགས་ནས་སེམས་ཡེངས་པ་མེད་པ་ཅིག་(གཅིག་)གིས་བསྒོམས་པས་དེ་ཡང་རྐང་པ་འཁྲུད་དང་ཟ་བ་དང་ཞེས་པ་ལ་སོགས་པས་བསྟན། བསྐྱེད་པའི་རིམས་པ་ལ་ནི་བརྟན་པ་ཐོབ། རྫོགས་པའི་རིམ་པ་ལ་ནི་རྟགས་འགའ་ཐོན་ཅིག་གིས་ཟླ་བ་གསུམ་དང་ཞག་བདུན་ནས་སངས་རྒྱས་པ་ནི། དེ་ཡང་སྤྱོད་ལ་ཅི་བྱེད་ཀྱང་ལྷའི་ང་རྒྱལ་དང་མི་འབྲལ་སྤྱོད་ལམ་བྱའོ། །དེ་ནས་ནང་དུ་ཡི་དམ་ལྷ་ཟླ་ཕྱེད་བསྒོམས་ལ་དེ་འོད་དུ་ཞུ་བ་སྤྱི་བོ་ན་མར་ལ་འོད་དཀར་མེར་གྱིས་བླུགས་པས། ལུས་ངག་ཡིད་གསུམ་གྱི་དྲི་མ་དག་པ་དང་བྱིན་གྱིས་བརླབས་པ་དང་སྐུ་གསུམ་ཐུགས་ཀྱི་དམ་ཚིག་ཉམས་པའི་དགོས་པའོ། །ཟླ་བ་ཅིག་(གཅིག་)ཏུ་གསངས་ལ་སྤྱོད་ཞེས་(ཅེས་)པའི་ཚིག་གཉིས་ཀྱིས་གསང་སྒྲུབ་རྫོགས་པའི་རིམ་པ་བསྒོམ་པ་བསྟན་ཏེ། དེ་ཡང་སྤྱོད་པ་མངོན་དུ་ཕྱུང་སྒོམ་པ་གསང་བའི་གསང་སྤྱོད་དང་། སྒོམ་པ་མངོན་དུ་ཕྱུང་
1-1-133a
སྤྱོད་པ་གསང་སྤྱོད་དང་གཉིས་ལ། འདིར་བསྒོམ་པ་མངོན་དུ་ཕྱུང་སྤྱོད་པ་གསངས་ལ་ཟླ་བ་བ་ཅིག་(གཅིག་)སྒོམ། དེ་ཡང་དེ་ལྟར་བསྐྱེད་རིམས་རྫོགས་པའི་རྗེས་ལ། རྫོགས་རིམས་གང་སྒོམ་ཡང་རིམ་པ་ལྔ་ལྡན་དང་ཟླ་བ་ཅིག་(གཅིག་)ཏུ་བསྒོམས་པས་དགོས་པ་ནི། ཇི་སྲིད་ཕྱག་རྒྱ་མ་རྙེད་པར་ཞེས་པས་བསྟན་ཏོ། །གནང་བ་ཅི་སྙེད་འགྱུར་ལ་སོགས་པས་དོན་གསུམ་པ་རིག་པ་བརྟུལ་ཞུགས་ཀྱི་སྤྱོད་པ་བྱ་བར་བསྟན་ཏེ། དེ་ཡང་ལུང་བསྟན་པའི་ཕྱག་རྒྱ་མའམ་ཡང་ན་བདག་གིས་ནུས་པས་བཀུག་པ་དེ་ཁྲིད་པ་ཡིན་ཏེ། དེ་ལ་ཡང་འཁོར་བའམ་ངན་སོང་གསུམ་གྱི་སྐྱོན་བཤད། མྱ་ངན་ལས་འདས་པའམ་བདེ་འགྲོ་ལྷ་མིའི་གོ་འཕང་བཤད་དོ། །དེ་ནས་འཁོར་བ་ལས་ལྡོག་པ་ལ་སྐྱབས་འགྲོ་དང་སེམས་བསྐྱེད་བྱ་དགོས། དེ་ནས་དབང་སྐུར་རོ། །དེ་ཁྱེར་ནས་སྤྱོད་པ་ཟླ་བ་ཅིག་(གཅིག་)བྱའོ། །བདག་མེད་མ་སྒོམ་པ་ཅིག་(ཞིག་)གིས་ཀྱང་ཧེ་རུ་ཀར་སྒྱུར་ལ་སྤྱོད་པ་བྱའོ། །བསྐྱེད་པའི་རིམ་པའི་རྣལ་འབྱོར་གྱིས་ལ་སོགས་པ་དོན་བཞི་པ་སྤྲོ་བསྡུ་བྱ་སྟེ་འབྲས་བུས་སངས་རྒྱས་ཐོབ་པར་བསྟན། །དེ་ཡང་སྤྱོད་པ་ལས་འོག་ནས་ཕྱག་རྒྱ་མ་ལ་ཡོན་ཕུལ་ལ་གཤེགས་སུ་གསོལ་ལ། རང་ཉིད་གནས་ཁང་ཅིག་(ཞིག་)ཏུ་སྟན་ལ་འདུག་ལ་ཡི་དམ་ལྷའི་སྐུ་སྤྲོ་བསྡུ་ཞག་བདུན་བྱའོ། །དེ་ཡང་བདེ་སྟོང་གི་ངོ་བོར་བྱ་སྟེ་རྨི་ལམ་སྒྱུ་མ་ལྟ་བུའི་སྤྲོ་བསྡུ་བྱའོ། །དེ་ནས་མི་སྐྱོད་པ་རིན་འབྱུང་སྣང་མཐའ་རྣམ་སྣང་། དོན་གྲུབ་རྡོ་རྗེ་འཆང་གི་སྐུ་དེ་ཞག་རེ་ལ་སྤྲོ་བསྡུ་བྱའོ། །རྒྱུ་བ་དང་མི་རྒྱུ་བ་ཐམས་ཅད་བདེ་སྟོང་ལས་མ་འདས་པའོ། །མཐར་ནི་སྤྲོས་
1-1-133b
པ་ཉིད་ནི་སྒྱུ་ལུས་སོ། །སྤྲོས་མེད་བྱེད་ནི་སྒྱུ་ལུས་ལྷའི་སྐུ་དེ་རྣམས་ཀྱང་འོད་གསལ་སྟོང་པར་ཐིམ་པའོ། །དེའི་འབྲས་བུ་ནི་ཟུང་འཇུག་མི་སློབ་པའོ། །དེ་ལྟར་རྟགས་བརྒྱད་འབྱུང་སྟེ། ཕྲ་བ་དང་ཡང་བ་དང་། བདག་པོར་གྱུར་དང་། གར་ཡང་ཕྱིན་པ་དང་། མཆོད་པར་འོས་པ་དང་། འདོད་རྒུར་སྒྱུར་བའོ། །དགའ་མགུ་གནས་པ་དང་། དབང་དུ་འགྱུར་བའི་ཡོན་ཏན་གྱི་མཚན་ཉིད་དང་ཡང་ལྡན་པར་འགྱུར་རོ། །རྡོ་རྗེ་སྙིང་པོ་ལ་སོགས་པས་དོན་ལྔ་པ་བཅད་པའི་སྐྱོན་ཡང་སྟོན། དེ་མ་སྙེས་པས་ཚིག་ལྔ་དྲིས་པའོ། །བཅོམ་ལྡན་འདས་ལ་སོགས་པ་ལན་ནོ། །དེ་ལ་བཞི་ལས་དང་པོའི་བསྐྱེད་རིམས་མེད་ན་འགྲུབ་པར་མི་འགྱུར་བས་དཔེ་དོན་གྱིས་བསྟན་ཏོ། །དངོས་དང་དངོས་མེད་ལ་སོགས་པས་དེ་ཡང་ཐ་མི་དད་པ་མེད་ཏེ་(དེ་)བསྐྱེད་རིམས་དང་དངོས་པོ་དངོས་མེད་གཉིས་མེད་{ལས་}འདས་པར་བསྟན་ཏོ། །དེ་ཡང་ཆོས་ཐམས་ཅད་ཟག་མེད་ལྷན་ཅིག་སྐྱེས་པ་ཡིན་ལ། དེ་རྟོགས་ན་སངས་རྒྱས་ཀྱང་དེ་ཡིན་ནོ། །གང་ཞིག་ཞེས་(ཅེས་)པའི་ཚིག་གཉིས་ཀྱིས་ཕྱིའི་བྱ་བ་གཙོ་བས་མི་རྟོགས་པའོ། །དེའི་རྟོགས་པ་ཡང་རྡོ་རྗེ་བཙུན་མོ་ལ་སོགས་པས་རང་ལུས་དང་གཞན་ལུས་ལ་བརྟེན་ནས་རྟོགས་པར་བསྟན་ཏོ། །རྟོགས་པའི་གནས་དེ་ཉིད་ན་ཕུན་སུམ་ཚོགས་པ་ལྔའི་ངོ་བོར་བཞུགས་པར་བསྟན་པ་ནི། འཆད་པ་པོ་ང་ཆོས་ཀྱང་ང་ལ་སོགས་པས་བསྟན་ནོ། །དེ་ལྟ་བུའི་ཕུན་སུམ་འཚོགས་(ཚོགས་)པ་ལྔའི་ངོ་བོ་ལྷན་ཅིག་སྐྱེས་པའི་ཡེ་ཤེས་དེ་ཉིད་དགའ་བའི་གོ་རིམས་གར་གཏོགས་པ་ཡིན་ཞེ་ན། མཆོག་དགའ་དགའ་བྲལ་དང་པོར་ནི་ལ་སོགས་
1-1-134a
པས་བསྟན་ཏོ། །བཙུན་མོའི་བྷ་ག་བདེ་ཅན་དུ་ལ་སོགས་པ་ལ་ལུས་དང་པོ་ཆགས་པའི་དུས་སུ་ཡང་སྐུ་གསུམ་དུ་ཆགས་ཏེ། དེ་ཡང་དང་པོ་རང་བཞིན་སྟོང་པ་ཆོས་ཀྱི་སྐུ་མའི་བྷ་གར་ཐིག་ལེ་བདེ་བར་གནས་པ་ལོངས་སྤྱོད་རྫོགས་པའི་སྐུའོ། །དེ་ལས་གནས་སྐབས་ལྔ་ལས་ལུས་གྲུབ་ནས་ཕྱིར་ཐོན་པ་ནི་སྤྲུལ་པའི་སྐུའོ། །དེ་ལམ་དུ་བཟློག་པ་ལ་ཡང་ཁུ་བ་དེ་ཉིད་ལ་སྐུ་གསུམ་ཚང་བར་བསྟན་པའོ། །དུག་གི་དུམ་བུ་ཅིག་(གཅིག་)ཉིད་ཀྱིས་ཞེས་པ་ལ་སོགས་པ་ནི་མར་ལ་རིགས་མཐུན་གཉེན་པོར་བཏང་བར་འཐད་པ་དང་བཅས་པ་བསྟན། །དེ་ཡང་ཇོ་བོས་ཉམས་སུ་བླངས་བ་དང་སྦྱར་བ་ལ་དཔེ་དེ་རྣམས་བརྗོད་པའི་དོན་བསྟན་པ་ནི། སྐྱེ་བོ་ནི་རྟེན་གྱི་གང་ཟག་གོ། །མི་བཟད་པའི་ལས་ནི་ཐ་མལ་རྣམ་རྟོག་དང་གཉིད་འཐུག་པོ་དང་། རྨི་ལམ་དང་བུད་མེད་དང་སྙོམས་པར་ཞུགས་པ་དང་། དེ་རྣམས་གང་དང་གང་གིས་འཁོར་བར་འཆིང་བར་འགྱུར་བས་དེ་ལ་ཐབས་དང་བཅས་པ་ནི། ཐ་མལ་གྱི་རྣམ་རྟོག་ལ་གཏུམ་མོ་ལ་བརྟེན་ནས་ཕྱག་རྒྱ་ཆེན་པོ་དང་བཅས་པ་དང་། དེ་བཞིན་དུ་འོད་གསལ་སྒྱུ་ལུས། ལས་ཀྱི་ཕྱག་རྒྱ་བསྟེན་པའི་ཐབས་བཅས་པའོ། །དེ་ལྟ་བུའི་ཐབས་དེ་ཉིད་ཀྱིས་ནི་སྲིད་པའི་འཆིང་བ་ལས་འགྲོལ་བར་འགྱུར་རོ། །ཞེས་བསྟན་ནོ། །འཇིག་རྟེན་འཆིང་བ་ནི་ཐ་མལ་པས་ཞེན་ནའོ། །འདོད་ཆགས་གྲོལ་ནི་གོང་གི་ཐ་མལ་བསྟེན་པའི་ཉམས་མྱོང་དང་བཅས་པའོ། །དེ་ལྟ་བུའི་གདམ་ངག་དེ་རྣལ་འབྱོར་རྒྱུད་མན་ཆད་ཀྱིས་མི་ཤེས་སོ། །འབྱུང་བ་ལྔ་ཡི་རང་བཞིན་ལ་སོགས་པས་རིགས་ལ་ཞེན་
1-1-134b
པ་མེད་པའི་ཕྱིར་རིགས་ཀྱི་དབྱེ་བ་བསྟན་ཏོ། །ལེའུ་ཡི་མཚན་ནི་ཀྱེ་རྡོ་རྗེ་ཧེ་རུ་ཀ་མཁའ་འགྲོ་ནི་བདག་མེད་མ་ལ་སོགས་པ། དྲ་བ་ནི་གཙོ་འཁོར་དུ་འབྲེལ་བའོ། །སྡོམ་པ་ནི་སྐྱེད་(བསྐྱེད་)རྫོགས་སྡོམ་པའོ། །དངོས་གྲུབ་གཏན་ལ་དབབ་པ་ནི་བརྟག་པ་དང་པོའི་འོ།། །།ལེའུ་གཞུང་སྐྱོང་བའོ། །གཉིས་པ་ནི་གྲགས་སོ།། །།
༄། །ལེའུ་གསུམ་པ། དགོངས་པའི་སྐད་ཀྱི་ལེའུ།
ལེའུ་གསུམ་པ་འདིས་བརྟག་པ་དང་པོའི་ངེས་པ་བསྟེར་བ་ཡིན་ཏེ། དེ་ཡང་བརྟག་པ་དང་པོར་རྒྱས་པར་ཡོད་པ་དཀྱིལ་འཁོར་འདིར་བསྐྱར་ནས་བཤད་པ་ལ་ནི་ངེས་པ་བསྟེར་བ་ཞེས་བྱའོ། །ལེའུ་འདི་ལ་གཞུང་དང་མཚན་གཉིས་ལས་དང་པོ་གཞུང་ངོ་། །དེ་ལ་གཉིས་ལས་མཚམས་སྦྱར་བ་སྔོན་དུ་འགྲོ་བས་མདོར་བསྟན་པ་ནི་དེ་ནས་ལ་སོགས་པས་བསྟན་ཏོ། །རྒྱས་པར་བཤད་པ་ལ་ཆོས་དགུ་ཡོད་པ་ལས་དང་པོ་དེ་ལ་སྡོམ་པ་བཀའ་སྩོལ་པ་ལ་མ་རྩིག་པས་སྡོམ་པའི་ངེས་པ་སྟེར་བ་སྟེ། དེ་ཡང་རྟག་པ་དང་པོའི་ལེའུ་དང་པོ་ནས་སྡོམ་པའི་དབྱེ་བ་བཤད་བྱ་ཞེས་པས་དེའི་ངེས་པ་སྟེར་བ་སྟེ། དེར་ནི་ལུས་སེམས་གཉིས་སྡོམས་པ་ལ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཚང་བར་བཤད་པ་དེ། ཅི་ལྟར་ཤེས་པར་འགྱུར་བའི་ངེས་པ་སྟེར་བའོ། །དེ་ཡང་སངས་རྒྱས་ཀྱི་སྡོམ་པ་ནི་དངོས་པོ་གཤིས་ཀྱི་ཆོས་དེ་དབང་གསུམ་པར་གོ་ཕྱེ་ནས་བཞི་པར་ཚིག་དབང་རིན་པོ་ཆེ་གཏན་ལ་ཕབ་པ་ཅིག་(ཞིག་)གིས་གོ་བར་ཡིན་གྱིས་(གྱི་)གཞན་གང་གིས་ཀྱང་མི་གོ་སྒྲོ་འདོགས་མི་ཆོད་པར་བསྟན་ནོ། །དེ་ནས་མཁའ་འགྲོ་མ་རྣམས་ཀྱི་སྡོམ་པ་ནི། དེར་དངོས་པོའི་གནས་ལུགས་དེ་གོ་བ་ཅིག་(གཅིག་)པུས་མི་ཆོག་སྟེ། 
1-1-135a
དེ་གོ་ནས་རྒྱུན་བསྲིང་བ་ལ་གཞན་ལུས་ཕྱག་རྒྱ་མ་འམ་རང་ལུས་གཏུམ་མོའི་རྣལ་འབྱོར་ཅིག་(གཅིག་)པུ་ལ་སྒོམ་ཞེས་པར་སྟོན་ཏོ། །སྐད་ཅིག་དབྱེ་བས་ཕྱེ་བ་ཉིད་ལ་སོགས་པས་དགའ་བ་བཞི་དང་སྐད་ཅིག་མ་བཞིའི་ངེས་པ་སྟེར་བ་སྟོན་ཏེ། དེ་ཡང་རྟག་པ་དང་པོའི་ལེའུ་དང་པོ་དང་ལེའུ་བརྒྱད་པ་དང་ལེའུ་བཅུ་པ་རྣམས་སུ་དགའ་བ་བཞི་དང་སྐད་ཅིག་མ་བཤད་པའི་ངེས་པ་སྟེར་བའོ། །དུས་ཚོད་དང་རྣམ་པ་མི་འདྲ་བར་གཅོད་པས་སྐད་ཅིག་མ་བཞི་ཡིན་ལ། ཡེ་ཤེས་རང་གི་ངོ་བོའི་སྒོ་ནས་དགའ་བ་བཞི་ཡིན་ནོ། །དེ་ཡང་དོན་ལ་ཐ་དད་པ་མེད་དོ། །དེ་ཡང་སྐྱེ་ལུགས་ནི་རང་ལུས་དང་གཞན་ལུས་ཀྱི་དུས་དང་པོ་དགའ་བ་དང་རྣམ་པ་སྣ་ཚོགས་སྐད་ཅིག་མ་དང་། གཉིས་པ་ལ་རྣམ་པར་སྨིན་པའི་སྐད་ཅིག་མ་དང་མཆོག་དགའ་བོ། །གསུམ་པ་ལ་མཚན་ཉིད་དང་བྲལ་བའི་སྐད་ཅིག་མ་དང་ལྷན་ཅིག་སྐྱེས་པའི་དགའ་བའོ། །རྗེས་ཐོབ་ལ་རྣམ་པར་ཉེད་ཀྱི་སྐད་ཅིག་མ་དང་དགའ་བྲལ་གྱི་དགའ་བའོ། །དེ་ལྟར་རིམས་ཀྱིས་སྐྱེ་བའོ། །སློབ་དཔོན་གསང་བ་ཤེས་རབ་དང་ཞེས་པ་ལ་སོགས་པས་དབང་གི་ངེས་པ་བསྟེར་བ་བསྟན་ཏོ། །དེ་ལ་དབང་གི་དབྱེ་བ་ནི་བཞིའོ། །དབང་གི་རྣམ་པར་གཞག་(བཞག་)པ་ལས་ཆོས་གསུམ་ལས། དང་པོ་དབྱེ་བ་གྲངས་དང་སྦྱར་བ་ནི་དབང་བཞི་དང་དགའ་བ་བཞི་སྦྱར་རོ། །དེའི་གཉིས་པ་དང་དབང་གི་མཚན་ཉིད་དཔེའ་དང་སྦྱར་བ་ནི་འདོད་ཆགས་བཞིས་འཁོར་བར་འཇོག་པ་ཡིན་ལ། འདོད་ཆགས་བཞི་རྣམ་པར་དག་པ་རྒྱུད་སྡེ་བཞི། རྒྱུད་སྡེ་བཞི་རྣམ་པར་དག་པ་
1-1-135b
དབང་བཞི་ཡིན་ལ་དེས་མྱ་ངན་ལས་འདས་པའི་སར་འཇོག་པའོ། །དེའི་གསུམ་པ་དགོས་པ་ནི་དངོས་གྲུབ་ཐོབ་པའི་དགོས་པ་ཡོད། དབང་གི་ངེས་ཚིག་ནི་ཨ་བྷི་ཤིཉྩ་ཞེས་པ་དྲི་མ་གཏོར་ཞིང་འཁྲུད་པས་དབང་ངོ་། །ཡང་ཨ་བྷི་ཤི་ཀ་ཏ་ཞེས་པ་ནུས་པ་འཇོག་ཅིང་གླུགས་པས་ནས་ཡང་དབང་ངོ་། །དེ་ཡང་བུམ་པའི་དབང་གི་ནི་ལུས་ཀྱི་དྲི་མ་འཁྲུད་པ། བསྐྱེད་རིམས་དང་བཟླས་པ་གཏོར་རྒྱུད་ཉན་པ་བྱར་རུང་བའི་ནུས་པ་བཞག་པའོ། །གསང་བའི་དབང་གིས་ངག་གི་དྲི་མ་འཁྲུད་ལ། རྩ་རླུང་བྱ་གྲུབ་ཀྱི་ཡེ་ཤེས་ཀྱི་རྫོགས་རིམས་སྒོམ་པ་དང་། ཤ་ལྔ་བདུད་རྩི་ལྔ་བསྟེན་དུ་རུང་བའི་ནུས་པ་བཞག་པའོ། །དབང་གསུམ་པས་སེམས་ཀྱི་དྲི་མ་འཁྲུད་ལ། ལས་ཀྱི་ཕྱག་རྒྱ་མ་བསྟེན་པ་འམ། རང་ལུས་འོད་ཀྱི་རིག་མ་བསྒོམ་དུ་རུང་བའི་ནུས་པ་བཞག་པའོ། །ཚིག་དབང་རིན་པོ་ཆེས་ལུས་ངག་ཡིད་གསུམ་ཐ་དད་དུ་འཛིན་པའི་དྲི་མ་འཁྲུད་ལ། ཕྱག་རྒྱ་ཆེན་པོ་སྒོམ་དུ་རུང་བའི་ནུས་པ་གཞག་པའོ། །དབང་སྐུར་དངོས་ལ་བཞི་ལས་ནུས་པའི་དབང་ནི་སློབ་མ་ལ་ཕྱག་རྒྱ་མ་གཏད་ནས། སློབ་མའི་ལག་དུ་(ཏུ་)རྡོ་རྗེ་དྲིལ་བུ་བྱིན་ནས། རིག་མ་ལ་འཁྱུད་པའི་ཚུལ་བྱེད་དུ་བཅུག་ལ་ལེའུ་བཅུ་གཉིས་པའི་རྗེས་གནང་སྦྱིན། གཞན་མ་གསང་དབང་དང་ཤེས་རབ་ཡེ་ཤེས་དང་བཞི་བའོ། །དེའི་སྐུར་ཐབས་ནི་དཀྱིལ་འཁོར་གྱི་ཆོ་གར་ཤེས་པར་བྱའོ། །འབྲུ་མཚན་གསལ་ལོ། །དཀྱིལ་འཁོར་ཐབས་ཀྱིས་ནི་ཞེས་པ་ཚིག་གཉིས་ཀྱིས་འཇུག་བསྡུད་པའོ། །དེ་ནས་རྡོ་རྗེ་སྙིང་པོ་ལ་སོགས་པས་དཀྱིལ་འཁོར་གྱི་འཁོར་ལོའི་དྲིན་ལན་
1-1-136a
བསྟན་པ་ནི། དེ་ཡང་མཇུག་སྡུད་ཚིག་གཉིས་པོ་ལ་འདྲིས་སྟེ(ཏེ)། ལུས་ཀ་བ་ཅིག་(གཅིག་)སྒོ་དགུ་དང་བཅས་པ་ལ་དཀྱིལ་འཁོར་ཟེར་རམ། རྟེན་གཞལ་ཡས་ཁང་རྟེན་པ་ལྷ་དང་བཅས་པ་ལ་དཀྱིལ་འཁོར་ཟེར་རམ། སྤྲོས་མེད་ལྷན་ཅིག་སྐྱེས་པའི་ཡེ་ཤེས་ལ་དཀྱིལ་འཁོར་ཟེར་རམ། དེ་རྣམས་གང་ཡིན་པ་དྲིས་པའོ། །ལན་དུ་དཀྱིལ་འཁོར་གཉིས་པོ་ལ་མི་ཟེར་ཏེ། སྤྲོས་མེད་ལྷན་ཅིག་སྐྱེས་པའི་ཡེ་ཤེས་ལ་ཟེར་བ་ཡིན་བྱ་སྟེ། འབྲུ་ཆན་གསལ་ལོ། །འོ་ན་སྤྲོས་མེད་ས་ཧ་ཛ་དེས་ཅི་བྱེད་ཞེས་(ཅེས་)ན། འཁོར་ལོ་ཞེས་གནས་ནམ་མཁའི་ཁམས་དེས་ནི་ཡུལ་ལ་སོགས་པ་རྣམ་པར་སྦྱོང་ཞེས་བསྟན་ཏོ། །ལྷན་ཅིག་སྐྱེས་པའི་ཡེ་ཤེས་དེ་གང་ལ་བསྟེན་ནས་རྟོགས་ཞེ་ན། བོ་ལ་ཀ་ཀོ་ལ་ཞེས་པས་ཚིག་གཉིས་སྟོན་ཏོ། །དེ་ཡང་རང་ལུས་ཐབས་ལྡན་གྱི་དབང་དུ་བྱས་ན་བོ་ལ་ནི་སྤྱི་བོའི་ཧྃ། ཀ་ཀོ་ལ་ནི་ལྟེ་བའི་ཨ་དེ་གཉིས་ལ་བརྟེན་ནས་ལན་ནུས་པས་བདེ་བ་ཤེས་པར་འགྱུར་ཞེས་སོ། །ཆགས་ཅན་ཅིག་གིས་འབོ་ལ་ནི་ཐབས་ཀྱི་རྡོ་རྗེ། ཀ་ཀོ་ལ་ནི་ལས་རྒྱའི་པདྨ། སྦྱོར་བ་ནི་སྙོམས་འཇུག །དེ་བྱས་པས་བདེ་བ་ལན་ནུས་པས་དེའི་བདེ་བ་ཤེས་པར་འགྱུར་ཞེས་སོ། །རྡོ་རྗེ་སྙིང་པོས་གསོལ་བ་ལ་སོགས་པས་དབང་རྫོགས་པར་ཐོབ་པས་ཐུན་མོང་མ་ཡིན་པའི་དམ་ཚིག་དང་སྡོམ་པ་བསྟན་ཏེ་གོ་སླའོ། །དེ་ནས་རྣལ་འབྱོར་མ་ཐམས་ཅད་ཀྱིས་ཞེས་པ་ལ་སོགས་པས་དབང་གི་དོན་ལྡན་པས་ཡུལ་རྣམས་བདེ་སྟོང་དུ་སྒོམ་པ་ནི། གོང་གི་ཡུལ་ལ་སོགས་པ་རྣམ་པར་སྦྱོར་ལ་དྲིས་ལན་དུ་བྱས་
1-1-136b
པའོ། །དེས་ནི་རྗེས་འཇུག་ཏུ་རྟེན་གྱི་གང་ཟག་གིས་རང་ལུས་གཞན་ལུས་ལ་རྟེན་(བརྟེན་)ནས་སྒོམས་པའི་ཉམས་ཕྱག་རྒྱ་ཆེན་པོ་བསྒོམ་པ་བསྟན་པ་ཡིན་ནོ། །དེ་ནས་རྣལ་འབྱོར་མ་བདག་མེད་མ་ལ་སོགས་པས་ཞེས་པ་ལ་སོགས་པས་མཆོད་པ་སྔོན་དུ་འགྲོ་བས་བླ་མའི་བྱིན་རླབས་ཀྱིས་སྤྱོད་ལམ་གྱི་ངེས་པ་བསྟན་ཏོ། །དེ་ཡང་སྔོན་འབྱུང་དུ་འཁོར་གྱིས་མཆོད་པས་སྟོན་པ་དགྱེས་ནས་མན་ངག་འདི་གསུངས། རྗེས་འཇུག་དུ་(ཏུ་)བླ་མ་ལ་འཁོར་རྣམས་ཀྱིས་ཚོགས་མཆོད་བྱས་ནས་བླ་མས་མན་ངག་སྟོན་པའི་གསུང་། སློབ་མ་རྣམས་ཉན་ཏེ་གུར་གྱི་ལེའུ་བཅུ་བཞི་པ་དང་འབྲེལ་ཏེ་འདི་ནི་དབང་གསུམ་པའི་ཡེ་ཤེས་དབབ་པའི་མན་ངག་ཡིན་བྱ་བ་པུ་ལ་ཧ་རི་པ་གསུང་ངོ་། །བྱིན་བརླབས་ཐོབ་ཅིང་ཉམས་མྱོང་དང་ལྡན་པ་ཅིག་(ཞིག་)གི་སྤྱོད་ལམ་ནི། བཟའ་བཏུང་ཇི་ལྟར་རྙེད་པ་དང་ཞེས་པ་ལ་སོགས་པ་སྟེ། བརྟག་པ་དང་པོའི་ལེའུ་བདུན་པ་དང་བཅུ་ཅིག་(གཅིག་)པའི་ངེས་པ་སྟེར་བར་བྱུང་བའོ། །དེ་ནས་རྡོ་རྗེ་སྙིང་པོས་གསོལ་བ་ལ་སོགས་པས་སྐྱེ་མཆེད་ཀྱི་གོ་ཆ་བགོད་པ་དགོས་པ་དང་བཅས་པ་བསྟན་ནོ། །དེ་ཡང་གོང་གི་གཏི་མུག་རྡོ་རྗེ་ལ་སོགས་ལྡན་ཞེས་(ཅེས་)པའི་དྲིས་ལན་དུ་བྱུང་བའོ། །གཞུང་གོ་སླའོ། །རྡོ་རྗེ་སྙིང་པོས་གསོལ་པས་དགོངས་པའི་སྐད་ལ་གདམས་པ་དང་བཅས་པ་སྟེ་བརྟག་པ་དང་པོའི་ལེའུ་བདུན་པ་ནས། ཨེ་མ་རྣལ་འབྱོར་མས་སྨྲས་པ་ཞེས་པའི་ངེས་པ་སྟེར་བ་སྟེ། དེས་ནི་ངག་གི་བརྡའི་དོན་བྱུང་བ་ཡིན་ནོ། །བརྡའ་མ་སྨྲས་པའི་སྐྱོན་གཞུང་གསལ། ལེའུ་ཡི་མཚན་གོ་སླའོ། །བརྟག་པ་དང་པོའི་ངེས་པ་སྟེར་
1-1-137a
བའི་ལེའུ་སྟེ་གསུམ་པའོ།། །།
༄། །ལེའུ་བཞི་པ། ཕྱག་རྒྱ་བསྡུས་པའི་ལེའུ།
ལེའུ་བཞི་པ་འདིས་ནི་བརྟག་པ་དང་པོའི་ཐེ་ཙོམ་སེལ་བ་སྟེ། དེ་ཡང་ཐེ་ཙོམ་སེལ་བ་དང་ངེས་པ་བསྟེར་བ་གཉིས་ལ་ཁྱད་ཅི་ཡོད་ན། ངེས་པ་སྟེར་བ་ནི་བརྟག་པ་དང་པོར་ཤེས་ཟིན་པ་ཅིག་(ཞིག་)ལ་བསྐྱར་ནས་བཤད་པ་ནི་ངེས་པ་སྟེར་བ་ཡིན་ལ། བརྟག་པ་དང་པོར་མགོ་བ་ཅིག་(གཅིག་)ལ་དྲིས་པ་ནི་ཐེ་ཙོམ་སེལ་བའོ། །དཔེར་ན་མི་ཅིག་(ཞིག་)ལ་འཕྲིན་བརྫངས་པའི་དུས་ན་ཁོས་འཕྲིན་གོང་བཞིན་དུ་བསྐྱར་ནས་འཕྲིན་ཐོབ་པ་ནི་ངེས་པ་སྟེར་བ་ཡིན་ལ། ཁོ་ལ་འཕྲིན་མ་བཏང་བའི་དུས་ན་ཐེ་ཙོམ་ཟ་ནས་ཁོས་དྲིས་ནས་ཡིན་མིན་གྱི་ལན་སྟེར་བ་ནི་ཐེ་ཙོམ་སེལ་བའོ། །ལེའུ་འདི་ལ་ཆོས་གཉིས་ཡོད་པ་ལས་དང་པོའི་ལེའུ་ཡི་གཞུང་སྟོན་ནོ། །དེ་ལ་གཉིས་ཡོད་པ་ལས་དང་པོས་མཚམས་སྦྱར་བ་སྔོན་དུ་འགྲོ་བས་གསོལ་བ་བཏབ་པ་ཡིན། དེ་ནས་ལ་སོགས་པས་སྟོན་ཏོ། །དེ་སྤྱིར་རམ་གཙོ་བོ་ཐེ་ཙོམ་བཞི་དྲིས་སོ། །དོན་གཉིས་པ་ལན་བསྟན་པ་ལ་ཆོས་བཅུ་གསུམ་ཡོད་པ་ལས་ཀོ་ལ་ཞེས་པ་ལ་སོགས་པས་གླུ་དང་གར་གྱི་ཐེ་ཙོམ་སེལ་བའི་ལན་སྟོན་ནོ། །དེ་ཡང་གླུ་དེ་ཐུན་ཚམས་(མཚམས་)སུ་གླུ་བླང་བ་དང་། སྤྱོད་པའི་དུས་སུ་དང་། ཚོགས་འཁོར་གྱི་དུས་སུ་དང་། དབང་བསྐུར་བའི་དུས་སུ་བླང་བའོ། །གླུ་དེ་ཡང་བཞི་འགྱུར་དུ་བླང་བ་དང་དྲུག་འགྱུར་དུ་ལས། བཞི་འགྱུར་དུ་བླངས་སྟེང་། ཚིག་དང་པོ་གཉིས་གཉིས་ཀྱིས་ཞབས་སུ་ཞབས་ཐག་གི་ཚིག་གཉིས་བདགས་(བཏགས་)ནས་ལེན་པའོ། །གཞན་དཀྱུས་བརྟག་གོ། །ཚོགས་ཀྱི་བདག་པོ་སྔར་བྱས་ནས་ཞེས་
1-1-137b
པ་ནི། དཔའ་བོ་དཔའ་མོ་སོ་སོར་བྱེད་ཀྱང་རུང་འདུས་ནས་བྱེད་ཀྱང་རུང་སྟེ། ཚོམ་བུ་མིའི་དཀྱིལ་འཁོར་བཀོད་ནས་ཚོགས་ནས་བྱུང་བ་བཞིན་ཚོགས་བྱས་ནས་དམ་ཚིག་ཉམས་པ་དང་གསོའ་བ་དང་ཚོགས་གཉིས་ལ་སོགས་པར་འགྱུར་རོ། །དངོས་གྲུབ་གྲུབ་པའི་ཚོགས་འཁོར་བྱེད་ན་ལྷ་གྲངས་དང་མཉམ་པའི་དཔའ་མོ་འཚོགས་ནས་ཚོགས་ཀྱི་ཆོ་ག་ཇི་ལྟ་བ་བཞིན་དུ་ཐུན་མཚམས་སུ་གླུ་གར་ལ་སོགས་པ་བྱ། དེ་དངོས་གྲུབ་མ་གྲུབ་བར་དུ་བྱའོ། །དེ་ལྟར་གྲུབ་པ་དེ་ལ་རྟགས་འདི་འབྱུང་ཞེས་པས་ལ་སོགས་པ་འབྲེལ་བ་ཡིན་ནོ། །ཕྱི་རོལ་ཚལ་དུ་ཞེས་པས་ནི་ཕྱི་ནང་གི་གནས་གཉིས་གར་དྲི་དང་སྒྲ་དེས་གང་ནས་འོང་ངོ་། །ཕྱག་རྒྱ་རྟགས་དང་མཚན་མ་སྟེ་ཞེས་པ་ལ་སོགས་པས་ལྷ་དང་བཀུར་བའི་དྲིས་ལན་བསྟན་པའོ། །དེ་ཡང་གཞུང་ན་གསལ་ལོ། །ཨ་ལི་དང་པོ་བདག་མེད་མ་ལ་སོགས་པས་ལེའུ་གཉིས་པ་ལྷ་མོ་བཅོ་ལྔའི་ས་བོན་གྱི་ལན་ནོ། །རིགས་ཀྱི་ལེའུ་ལ་སོགས་པས་མས་རྩི་བ་རྣམ་པར་དག་པའི་ལེན་ནོ། །དེ་རྩ་གཉིས་གཉིས་ལ་ལྷ་མོ་རེ་རེ། རྩའི་གཙོ་མོ་གསུམ་དང་མིང་མཐུན་པ་ལ་བདག་མེད་མའོ། །དེ་ལྟར་རྩ་སུམ་བཅུ་(ཅུ་)རྩ་ཅིག་(གཅིག་)ལ་རྣམ་པར་དག་པར་བྱས་ནས་རྩ་གཅིག་ལ་རྣམ་པར་དག་པར་མི་རྩི་བ་དེ་གང་ཕྱིར་སྤོང་བ་ཡིན་ཞེ་ན། དེའི་ལན་ནི་ཅིག་(གཅིག་)ཏུ་ཆ་མེད་པས་ཞེས་པ་སྟེ། ཅིག་དུ་(གཅིག་ཏུ་)ཞེས་པ་ནི་རྩ་ཟུང་ཅིག་དུ་(གཅིག་ཏུ་)ཆ་དང་བཅས་པ་ནི་རྣམ་པར་དག་པ་མེད་པས་ན་ཞེས་པའོ། །འབད་པས་ཀུན་གྱི་ལྷག་མ་སྤང་ཞེས་པ་ནི་འབད་པ་ནི་བརྩོན་འགྲུས་དང་ལྡན་པ་ཡིས། ཀུན་གྱི་ལྷག་མ་
1-1-138a
སྤང་སྟེ། རྩ་སུམ་བཅུ་(ཅུ་)གཉིས་ཀྱི་ཐ་མ་བདུད་བྲལ་མ་ལ་རྣམ་པར་དག་པ་མེད་པས་སྤང་ཞེས་སོ། །དེའི་དྲིས་པ་ནི་དེ་ཡོད་པའི་རྒྱུ་མཚན་ཅིའི་སླད་དུ་ཞེ་ན་ཞེས་དྲིས་པའོ། །དེའི་ལན་དོན་གྱི་བྱ་བ་མི་བྱེད་པའི་ཕྱིར་ཞེས་པ་ལ་སོགས་ཚིག་བཞིས་བསྟན་ཏེ། རྩ་བདུད་བྲལ་མ་ནས་བྱང་ཆུབ་ཀྱི་སེམས་མི་རྒྱུ་སྟེ་རྩ་སྟོང་པར་ཡོད་པས་ཐབས་ཤེས་ཟུང་འཇུག་མེད་དོ། །བྱང་སེམས་རྒྱུ་བའི་དོན་གྱི་བྱ་བ་མི་བྱེད་པའི་ཕྱིར་སྤང་ཞེས་པའོ། །འོ་ན་གཞན་ལས་རྒྱུ་འམ་ཞེས་ན། བཅོྭ་ལྔ་ཆའི་བདག་ཉིད་ཀྱི། ཟླ་བ་བྱང་ཆུབ་སེམས་སུ་འབབ་པར་འགྱུར་ཞེས་པས་སྟོན་ཏོ། །བཅོྭ་ལྔ་ཞེས་པ་ནི་རྩ་ཟུང་བཅོྭ་ལྔ་དང་། ཆ་ཞེས་པས་ཡན་གར་བ་ཆ་ཅིག་(གཅིག་)དང་ཅིག་(གཅིག་)གི་ནང་ནས་ཟླ་བ་བྱང་ཆུབ་སེམས་འབབ་པར་འགྱུར་ཞེས་པའི་ཐ་ཚིག་གོ། །བྱང་སེམས་དེ་གཟུགས་ཇི་ལྟ་བུས་འབབ་ཞེ་ན། བདེ་བ་ཆེན་པོ་ཨ་ལིའི་གཟུགས་ཞེས་པས་ན། རྩ་རྣམས་ཀྱི་ནང་ནས་ཀུན་རྫོབ་ཀུན་དྷ་ལྟ་བུ་དེས་ལྷན་ཅིག་སྐྱེས་པའི་ཡེ་ཤེས་ཀྱི་བདེ་བ་མཚོན་པའོ། །བྱང་ཆུབ་ཀྱི་སེམས་དེ་ནི་ཨ་ལི་བཅོྭ་ལྔའི་གཟུགས་ཀྱིས་འབབ་ཞེས་སོ། །རྣལ་འབྱོར་མ་རྣམས་དེ་ཡི་ཆ་ཞེས་པ་ཡིན་ལྷ་མོ་བཅོྭ་ལྔ་རྣམ་པར་དག་པའི་རྩ་ཟུང་བཅོྭ་ལྔ་དང་ཆ་ཞེས་པ་ཡན་གར་བ་ཆ་ཅིག་(གཅིག་)ཏུ་གནས་པ་ནི་ཤེས་རབ་སྟོང་པ་མཚོན་ལ། དེའི་ནང་ནས་བྱང་སེམས་འབབ་པ་ནི་ཐབས་བདེ་བ་མཚོན་ཏེ། དཔའ་བོ་དང་དཔའ་མོའི་ལུས་ལ་གནས་པའི་རྩ་དང་བྱང་སེམས་ཀྱང་ཐབས་ཤེས་རབ་གཉིས་མེད་དུ་བསྟན་ཏོ། །དོན་ལ་ལུས་ཐབས་རབ་ཏུ་གཏན་ལ་དབབ་པ་ཡིན་ནོ། །འོ་ན་ལེའུ་དང་པོ་ནས་རྩ་
1-1-138b
རྣམས་ནི་སུམ་བཅུ་(ཅུ་)རྩ་གཉིས་ཏེ་བྱང་ཆུབ་ཀྱི་སེམས་སུམ་བཅུ་(ཅུ་)རྩ་གཉིས་འབབ་བོ་ཞེས་གསུངས་པ་དང་། འགལ་ཞེ་ན། དེ་ལེའུ་དང་པོ་ནི་སྤྱིར་བསྟན་པ་ཡིན་ལ། དེ་ཉིད་ལ་ཐེ་ཙོམ་སྐྱེས་ནས་དྲིས་པ་ཡིན་པས་འདི་གཙོ་བོ་ཡིན་ནོ། །ཐད་སོ་དེ་རྣམས་མ་གོ་ནས་ཞུས་ནས་བླ་མས་ཡོང་བའི་ཡི་གེ་ཅིག་(ཞིག་)ཡིན་ནོ། །རྡོ་རྗེའི་སྙིང་པོས་གསོལ་བ་ལ་སོགས་པས་རྩ་དྲིས་པའི་ཞར་ལ་རང་ལུས་དང་གཞན་ལུས་ཀྱིས་བྱང་ཆུབ་སེམས་དེ་མི་སྤང་བར་བསྟན་ནོ། །དེ་ཡང་ལེའུ་འདིའི་འགོར་དྲིས་པའི་ཐེ་ཙོམ་མ་ཆོད་ནས། འདི་ན་མར་ལ་ཞར་བྱུང་གི་ཐེ་ཙོམ་ཡིན་ཏེ། དེ་ཡང་རྩའི་ནང་གི་བྱང་སེམས་དེ་ཡང་དོར་རམ་འོན་ཏེ་བླང་ཞེས་དྲིས་པས། ལན་དུ་ཅིས་ཀྱང་བླང་བར་བྱ་བ་ཡིན་ཟེར་རོ། །འོ་ན་ཐབས་གང་གིས་བྱང་སེམས་བསྐྱེད་དྲིས་པ་ལ། དཀྱིལ་འཁོར་འཁོར་ལོའི་ཐབས་ལས་ཀྱི་ཕྱག་རྒྱ་ལུས་རྒྱས་ཤིང་བདེ་བ་བསྐྱེད་པ་དང་། རང་བྱིན་གྱིས་བརླབས་པ་སྟེ་དགེ་སློང་གིས་རང་ལུས་ཐབས་ལ་བརྟེན་ནས་བསྒོམ་པའོ། །བུད་མེད་གོ་ལ་ལ་སོགས་པས་གོང་ལས་རྒྱ་ལ་བསྟན་ནས་རྒྱས་པར་བཤད་དོ། །ག་པུར་ཉིད་ནི་བདག་མེད་མ་ལ་སོགས་པས་རང་ལུས་ཐབས་ལྡན་གྱི་དོན་རྒྱས་པར་བཤད་པ་སྟེ་སྒོམ་ཐབས་གཉིས་ཀ་བླ་མ་ལ་རག་ལས་སོ། །དཀྱུས་ནི་ཆད་ན་གསལ་ལོ། །རྡོ་རྗེ་སྙིང་པོས་གསོལ་པ་ལ་སོགས་པས་ལེའུ་དང་པོའི་སྡོམ་པའི་ཐེ་ཙོམ་སེལ་བ་སྟོན་ཏོ། །དེ་ཡང་ལེའུ་དང་པོར་རང་བཞིན་དང་སྦྱར་བའི་བཤད་པ་དང་། དབང་གསུམ་པ་དང་སྦྱར་བ་དང་། ལམ་བསྐྱེད་རིམས་དང་སྦྱར་བའི་བཤད་པ་བྱས་ནས་དེ་ཉིད་ལམ་དུ་རྫོགས་རིམས་སྦྱར་ན་
1-1-139a
ཇོ་བོ་མི་ཏྲི་ཡིད་ཀྱི་ཕྱག་རྒྱ་ཟེར། ཚོགས་པ་ལ་བཤད་ན། ན་རོ་པ་བྷོ་ལ་བརྟེན་པའི་བདེ་བ་ཟེར་ཏེ། ཆན་གསལ་ལོ། །མན་ངག་དུ་(ཏུ་)ན་དྲི་བ་སླའོ། །ལན་ནི་དཔའ་བོ་དང་དཔའ་མོ་ཐམས་ཅད་ཀྱི་ལྟེ་བའི་དབུས་ན་སེམས་ཀྱི་རྒྱལ་པོ་ཨ་རུ་བསྡོམས་ནས་གནས་པའོ། །ཇི་ལྟར་ཕྱིར་རོལ་ནི། ལས་རྒྱ་པ་ལ་བརྟེན་ནས་ཐིག་ལེ། འབེབས་པ་བཞིན་དུ་དེ་བཞིན་ནང་སྟེ་གཏུམ་མོ་ལ་བསྟེན་(བརྟེན་)ནས་ཕེབས་ཞེས་པའི་དོན་ཏོ། །སྡོམ་པ་དེ་ཉིད་ནི་ལྟེ་བའི་མེ་དང་སྤྱི་བོ་བྱང་སེམས་འདྲེས་པའོ། །ས་གང་དུ་འདྲེས་བྷོ་ལ་སྟེ་སྤྱི་བོའི་ཐིག་ལེ་དང་ལྟེ་བའི་རྩ་མདུད་དུ་ཕབ་པས་སོ། །ཕྱག་རྒྱ་ཆེན་པོ་ནི་ཉམས་སོ། །རྡོ་རྗེ་སྐྱེ་མཆེད་ནི་ནང་ཉམས་ཕྱིར་ཤར་བའོ། །གསང་བའི་སྙོམས་འཇུག་ནི་ཨ་ཧྃ་གིའོ། །ཕྱི་རོལ་གཉིས་ནི་ལས་རྒྱ་དང་ཞལ་སྦྱར་ཏེ་འདི་མ་བསྟན་ནོ། །སྐུ་གསུམ་ལུས་ཀྱི་ནང་དུ་ནི་ཞེས་པ་ལ་སོགས་པས་ལུས་དཀོན་མཆོག་གསུམ་དུ་གནས་པའི་ལེའུ་དང་པོའི་ཐེ་ཙོམ་སེལ་བ་བསྟན་ཏོ། །དེ་ལས་དང་པོ་སངས་རྒྱས་དཀོན་མཆོག་དུ་(ཏུ་)གཏན་ལ་དབབ་པ་མདོར་བསྟན་རྒྱས་བཤད་གཉིས་སོ། །དེ་ལ་སངས་རྒྱས་ཀྱི་མིང་དང་། གནས་པ་དང་། འཁོར་ལོ་བཞི་ལ་སྐུ་བཞིར་བཞག་པའི་འཐད་པ་དང་གསུམ་གྱིས་བསྟན་ཏོ། །ད་ནི་ཆོས་དཀོན་མཆོག་དུ་(ཏུ་)གཏན་ལ་དབབ་པ་ལ་མདོར་བསྟན་ཚིག་བཞི། །མཇུག་སྡུད་ཚིག་གཉིས། རྒྱས་བཤད་ཚིག་བརྒྱད་ཀྱིས་བསྟན་ཏོ། །དེ་ཡང་མདོར་བསྟན་པ་ལ་བཤད་པ་གསུམ་ལས་དང་པོའི་ལུས་ཆགས་པ་དང་སྦྱར་ནས་བཤད། ཨེ་ནི་ད་ལྷ་མའི་ཆོས་བྱུང་ངོ་། །བྃ་ནི་ཕའི་ཐབས་
1-1-139b
ཀྱི་རྡོ་རྗེའོ། །རྒྱུ་མཐུན་ནི་དེ་གཉིས་ལས་ཁུ་ཁྲག་གི་གཉིས་བྱུང་བས་ཉེས་པར་ལེན་པའི་རྒྱུ་བྱས། དེ་ལ་བར་དོ་ཞུགས་པ་དེས་ལྷན་ཅིག་བྱེད་པའི་རྐྱེན་བྱས་ནས་ལྟེ་བ་ནས་ལུས་ཆགས་པ་དེ་ལ་རྒྱུ་མཐུན་པའི་འབྲས་བུ་ཞེས་བྱའོ། །དེ་ནས་མས་བཟའ་བཏུང་ཟོས་པ་དང་ལུས་དེ་ཡན་མན་དུ་བསྐྱེད་ནས་སྙིང་ཀ་ཆོས་ཀྱི་འཁོར་ལོ་གྲུབ་པ་ལ་རྣམ་པར་སྨིན་པའི་འབྲས་བུ་ཞེས་བྱའོ། །དེ་ནས་འགྲིན་པ་ལོངས་སྤྱོད་ཀྱི་འཁོར་ལོ་ཆགས་པ་དེ་ལས་སྐྱེས་བུ་བྱེད་པའི་འབྲས་བུ་ཞེས་བྱའོ། །དེ་ནས་ཡང་ལུས་ཡན་མན་སུ་བསྐྱེད་ནས་སྤྱི་བོ་བདེ་བ་ཆེན་པོའི་འཁོར་ལོའི་བར་དུ་ལུས་རྫོགས་པ་ལ་དྲི་མེད་ཀྱི་འབྲས་བུ་ཞེས་བྱའོ།། །།ད་ནི་ད་ལྟ་ལུས་གནས་པ་དང་སྦྱར་ནས་བཤད་ནས་ཨེ་ལྟེ་བའི་རྩ་མདུད་གྲུ་གསུམ་པའོ། །བྃ་གཏུམ་མོའི་མེ་སྟེ་དེས་བཟའ་བཏུང་ཅི་ཟོས་པའི་དྭངས་རྩིགས་འབྱེད་པས་རྒྱུ་མཐུན་གྱི་འབྲས་བུའོ། །དེ་ནས་ཟས་ཀྱི་དྭངས་མ་དེས་སྙིང་ཀ་ཆོས་ཀྱི་འཁོར་ལོར་སླེབས་པ་ལ་རྣམ་པར་སྨིན་པའི་འབྲས་བུའོ། །དེ་ནས་དྭངས་མ་དེས་འགྲིན་པ་ལ་ངོས་སུ་སླེབས་པ་ལ་སྐྱེས་བུ་བྱེད་པའི་འབྲས་བུའོ། །དེ་ནས་དྭངས་མ་དེས་སྤྱི་བོའི་ཧྃ་ལ་སླེབས་ནས་ལུས་རྒྱས་པ་ལ་དྲི་མེད་ཀྱི་འབྲས་བུ་ཞེས་བྱའོ། །དེས་ནི་ལུས་ཆགས་པ་ཡང་ཨེ་བྃ་ཐབས་ཤེས་རབ་ཏུ་བསྟན་ལ། ད་ལྟ་ལུས་གནས་པ་ཡང་ཨེ་བྃ་ཐབས་ཤེས་རབ་ལས་མ་འདས་པར་བསྟན་པའོ། །ད་ལམ་དུ་བསྒོམ་པ་ཡང་ཐབས་ཤེས་རབ་གཉིས་མེད་དུ་བསྒོམས་པའི་ཕྱིར་ལམ་དང་སྦྱར་ན་ཨེ་ལྟེ་བའི་རྩ་མདུད་གྲུ་གསུམ་མོ། །བྃ་དེའི་དབུས་ན་ད་ལྟ་རང་གི་སེམས་ཀྱི་ངོ་བོ་
1-1-140a
གཏུམ་མོའི་མེ་ཨའི་རྣམ་པར་ཡོད་པའོ། །དེའི་དུས་ན་ལུས་བཅོས་པ་ལ་སོགས་པ་རྣམ་རྟོག་རགས་པར་འདུག་པས་རྒྱུ་མཐུན་པའི་འབྲས་བུ་ཞེས་བྱའོ། །དེ་ནས་གཏུམ་མོའི་མེ་དེས་སྙིང་ཀར་སླེབས་པའི་དུས་སུ་རྣམ་པར་སྨིན་པའི་འབྲས་བུ་ཞེས་བྱའོ། །དེ་ནས་འགྲིན་པར་མེས་ཕྱིན་པའི་དུས་སུ་ཐིག་ལེ་ཞུ་ནི་མ་ཞུ་འཇུར་ནི་ཉེ་བ་དེ་ལ་སྐྱེས་བུ་བྱེད་པའི་འབྲས་བུ་ཞེས་བྱའོ། །དེ་ནས་གཏུམ་མོ་དེས་ཐིག་ལེ་དངོས་སུ་ཞུ་ནས་ས་ཧ་ཛའི་ཉམས་སྐྱེས་པ་དེ་ལ་དྲི་མེད་ཀྱི་འབྲས་བུ་ཞེས་བྱའོ། །དེ་རྣམས་ཀྱི་རྒྱས་པར་བཤད་པ་ནི་ལུས་ཆགས་པའི་དུས་སུ་ཕ་མའི་ཁུ་ཁྲག་གི་བར་དུ་བར་དོའི་ཡིད་ཀྱི་གཟུགས་ཅན་དེ་ལས་ཀྱི་རླུང་གིས་འཕེན་པ་ལ་རྒྱུ་མཐུན་ཞེས་(ཅེས་)བྱའོ། །ལས་ཆུང་ཞེས་པའི་ལ་སོགས་གོང་མའི་རེ་རེའི་རྒྱས་བཤད་དུ་སྦྱར་རོ། །ལུས་གནས་པའི་དབང་དུ་བྱས་ན་ད་ལྟ་གཏུམ་མོའི་མེས་དྭངས་སྙིགས་འབྱེད་པ་ལ་ལས་ཀྱིས་རླུང་གིས་ཞེས་པ་ལ་སོགས་པ་རྒྱུ་མཐུན་གྱི་འབྲས་བུ་ཡིན་ནོ། །ལས་ཆུང་ཞེས་པ་ལ་སོགས་པ་གོང་བཞིན་སྦྱར་རོ། །དེ་ལམ་དུ་བཟློག་ནས་སྒོམ་པ་ལ་གཏུམ་མོའི་མེས་ཤེས་པའི་དྭངས་སྙིགས་འབྱེད་པ་ལ་ལས་ཀྱི་རླུང་གིས་ཞེས་པ་ལ་སོགས་པ་རྒྱུ་མཐུན་གྱི་འབྲས་བུ་ཡིན་ནོ། །ལས་ཆུང་ཞེས་པ་ལ་སོགས་པའི་གོང་མ་བཞིན་སྦྱར་རོ། །ད་ནི་རང་གི་ལུས་སེམས་གཉིས་བསྡོམས་(སྡོམ་)པ་ལ་དགེ་འདུན་དཀོན་མཆོག་ཚང་བར་བསྟན་པ་ནི། གང་ཕྱིར་སྤྲུལ་པ་གནས་བརྟན་ཕྱིར་ཞེས་པ་ལ་སོགས་པས་སྟོན་ཏེ་འཁོར་ལོ་བཞི་ལ་བསྟེ་(ལྟེ་)བ་བཞི་རུ་འཇོག་པའི་འཐད་པ་གཞུང་དུ་གསལ་ལོ། །ལྟོ་
1-1-140b
བ་གནས་སུ་བརྗོད་པར་བྱ་ཞེས་པ་ལ་སོགས་པས་ལུས་སྤྲུལ་པའི་སྐུ་རུ་གྲུབ་པར་བསྟན་ཏོ། །དེ་ཡང་ལེའུ་དང་པོར་བསྟན་པ་བཞིན་ཤི་བ་སྟོང་པ་ཆོས་སྐུ། བར་དོ་ལོངས་སྐུ། མའི་མངལ་དུ་ལུས་གྲུབ་པ་སྤྲུལ་སྐུའོ། །འོ་ན་ལུས་སྤྲུལ་པའི་སྐུ་རུ་གཏན་ལ་ཕབ་པས་ལུས་ཀྱི་གནས་ལུགས་ཤེས་པས་རྩའི་གནས་ལུགས་ཤེས་ལ། དེ་ཤེས་པས་རྩ་མདུད་ཤེས་ལ། དེ་ཤེས་པས་ཕ་མའི་ཁུ་ཁྲག་གི་བཞུགས་ས་ཤེས་ལ། དེ་ཤེས་པས་སེམས་ཀྱི་བཞུགས་ས་ཤེས་པའི་དགོས་པ་ཡོད་དོ། །དེ་ནས་རྣམ་འབྱོར་མ་བདག་མེད་མ་ལ་སོགས་པས་འཁོར་རྣམས་བརྒྱལ་བསླངས་པའི་སྔོན་དུ་འགྲོ་བས་སེམས་ཅན་སངས་རྒྱས་ཡིན་ཀྱང་རྣམ་རྟོག་གི་གྲིབ་མས་བསྒྲིབས་པ་ཡིན་གྱི་དོན་ལ་སངས་རྒྱས་ཡིན་བྱར་བསྟན་ཏོ། །གཞན་དཀྱུས་གསལ་ལོ། །རྡོ་རྗེ་སྙིང་པོས་གསོལ་པ་ལ་སོགས་པས་ལྷ་མོ་བརྒྱད་ཀྱི་རྒྱ་འཆོལ་བའི་ཐེ་ཙོམ་སེལ་བ་སྟོན་ཏེ་ཆན་གསལ་ལོ། །ཀྱེའི་རྡོ་རྗེ་འཛིན་ལ་སོགས་པས་གཏོར་མའི་སྔགས་ལས་ཚོགས་དང་བཅས་པ་སྟོན་ཏེ་གཞུང་གསལ་ལོ། །རྡོ་རྗེ་སྙིང་པོས་གསོལ་པ་ལ་སོགས་པས་ལྷ་རྣམས་རིགས་གསུམ་དུ་བསྡུ་བར་ཤེས་པར་བྱ་བའི་ཕྱིར་ལྷ་མོ་གསུམ་གྱི་ཐེ་ཙོམ་སེལ་བའོ། །རྒྱས་པར་རབ་ཏུ་ཕྱེ་བ་ལས་ཞེས་པ་ལ་སོགས་རིགས་ལ་ཞེན་པ་མེད་པའི་ཕྱིར་རིགས་ཀྱིས་(ཀྱི་)དབྱེ་བ་བསྟན་ཏོ། །ལེའུ་ཡི་མཚན་ནི་ཀྱེའི་རྡོ་རྗེ་ལས་རྒྱུད་ཐམས་ཅད་ཀྱི་བརྟག་པ་དང་པོའོ། །ཕྱག་རྒྱ་བསྡུས་པའི་དོན་ནི་འདིར་གཙོ་བོར་ལེའུ་ཡི་གཞུང་དུ་བྱུང་པའོ། །བརྟག་པ་དང་པོའི་ཐེ་ཙོམ་སེལ་བའི་ལེའུ་ཞེས་བྱ་སྟེ་བཞི་པའོ།། །།
༄། །ལེའུ་ལྔ་པ། མངོན་པར་འབྱུང་བའི་ལེའུ།
ལེའུ་ལྔ་པ་འདིས་རྟག་པ་དང་པོའི་
1-1-141a
ལེའུ་གསུམ་པར་ཧེ་རུ་ཀ་ཞལ་ཅིག་(གཅིག་)ཕྱག་གཉིས་པ་དང་། ཕྱག་རྒྱ་བཞི་པ་དང་ཕྱག་དྲུག་པའི་ལེའུ་དང་གསུམ་བྱུང་པ་ལ་ཞལ་བརྒྱད་ཕྱག་བཅུ་དྲུག་པའི་བསྒྲུབ་ཐབས་ཏེ་འདིར་འོང་བར་རིགས་པ་ལ་དེར་མ་བྱུང་བས་ལེའུ་གསུམ་པའི་མ་ཚང་བ་ཁ་བསྐོང་(སྐོང་)བའོ། །ཡང་བརྟག་པ་དང་པོའི་ལེའུ་གཉིས་པར་སྙིང་པོ་དང་ཉེ་བའི་སྙིང་པོ་བྱུང་བས་རྩ་བའི་སྔགས་དེ་དེར་འོང་པར་རིག་པ་ལ་མ་བྱུང་སྟེ། འདིར་རྩ་སྔགས་བྱུང་བ་དེས་ལེའུ་གཉིས་པའི་མ་ཚང་བ་ཁ་བསྐོང་(སྐོང་)བའོ། །ཡང་བརྟག་པ་དང་པོའི་ལེའུ་བཅུ་པར་བདག་མེད་མའི་དབང་བསྐུར་ཐབས་བྱུང་བ་ལ་ཧེ་རུ་ཀ་ལྷ་དགུའི་དབང་བསྐུར་བས་དེ་དེར་མ་བྱུང་བས་དེའི་མ་ཚང་བ་ཁ་བསྐོང་པའོ། །དེ་ལས་དང་པོ་དྲི་བ་སྟོན་ཏེ་གོ་སླའོ། །ལན་ལ་གསུམ་ལས་དང་པོ་བསྐྱེད་རིམས་པའི་བསྒོམ་པ་སྟོན་ནོ། །དེ་ལ་རྒྱའི་ཧེ་རུ་ཀ་བསྐྱེད་པའི་ཆོས་བཅུ་ལས། བླ་མ་དག་པའི་ཚིག་བྱ། ཚད་མེད་པ་བཞི་སྟོང་པ་ཉིད་སྲུང་འཁོར། ཆོས་འབྱུང་འབྱུང་བ་རིམས་བརྩེགས་པ། དེ་རྣམས་འདིར་རྒྱུད་སྡེབས་ལ་ཁ་སྐོང་། དེ་ཞུ་བ་ལས་གཞལ་ཡས་ཁང་སྒོམ་པ་ནི། འཁོར་ལོ་ཇི་ལྟར་སྔར་གསུངས་པ་ལ་སོགས་པས་བསྟན། དེར་བྱང་ཆུབ་པ་ལྔས་གཙོ་བོ་ཡབ་ཡུམ་སྒོམ་པ་ཁྱོད་དང་ལྷན་ཞེས་པས་བསྟན། རྡོ་རྗེ་པདྨ་བྱིན་གྱིས་བརླབས་ནས་སྙོམས་པར་འཇུག་བྱ་བ་འདོད་ཆགས་ཆེན་པོ་ཞེས་བྱ་བ་ལ་སོགས་པས་བསྟན། དེ་ནས་ཡུམ་གྱི་པདྨར་ས་བོན་བྃ་སྃ་ཙྃ་ཞེས་པས་བསྟན། དེ་ལས་འཁོར་གྱི་ལྷ་གདོན་པ་ནི། དཀར་མོ་དབང་པོའི་ལ་སོགས་པས་བསྟན། དེས་རྒྱུའི་ཧེ་རུ་ཀ་བསྐྱེད་པའི་
1-1-141b
ཆོས་བཅུའོ། །དེ་ནས་འབྲས་བུའི་ཧེ་རུ་ཀ་བསྐྱེད་པའི་ཆོས་བཅུ་ཡོད་པ་ལས། དང་པོ་དྲི་ཟ་ཉེ་བར་བཞུགས་པ་ནི། དེ་ནས་རྡོ་རྗེ་ཆགས་ཆེན་ཞེས་(ཅེས་)པས་བསྟན་ཏོ། །དེ་ནས་ལྷ་མོས་མྱ་ངན་གྱིས་གླུས་བསྐུལ་བ་ནི། སྣ་ཚོགས་གླུ་ཡི་ཞེས་པས་བསྟན་ནོ། །དེ་ལས་འབྲས་བུའི་ཧེ་རུ་ཀ་བཞེངས་པ་ནི་ཨ་དང་ཧཱུྃ་གིས་ཞེས་པ་ལ་སོགས་པས་བསྟན་ཏོ། །དེ་ནས་རྒྱུད་སྡེབས་ལ་སྐྱེ་མཆེད་དྲུག་དང་སྐུ་གསུང་ཐུགས་བྱིན་གྱིས་བརླབས་པ་བྱ། ཡེ་ཤེས་སེམས་དཔའ་དྲང་། དབང་སྐུར་བདུད་རྩི་མྱང་། མཆོད་བསྟོད་ཚོགས་ཁ་བསྐང་ངོ་། །དེ་ནས་བསྐྱེད་པའི་རིམ་པའི་ཏིང་ངེ་འཛིན་སྒོམ་པ་ནི། མ་མོའི་འཁོར་ལོ་གྲོང་ཉམས་དགའ་ཞེས་པ་ལ་སོགས་པས་བསྟན་ཏོ། །ཞིབ་དུ་(ཏུ་)སྒོམ་རིམས་(རིམ་)དུ་ཤེས་པར་བྱའོ། །བྷོ་ལ་གཞིབ་པ་ལ་སོགས་པས་རྩ་བའི་སྔགས་བསྟན་ཏོ། །སྔགས་འདི་ལ་གཏུ་བ་མེད་པའི་ལྷ་རྗེ་ལྷོ་པས་དཔེ་ལྔ་བཅུ་པ་སོགས་པས་མཐུན་པ་བྱུང་ནས། པུ་ལ་ཧ་རི་པ་ལ་ཞུས་པས་འདི་ལྟར་ཟློས་གསུང་ནས་དག་པ་ཅིག་(ཞིག་)ལོགས་ན་ཡོད་དོ། །བཤད་པ་ཆེན་གསལ་ལོ། །དེ་ནས་ལྷ་མོ་དེ་དགྱེས་ནས་ཞེས་པ་ལ་སོགས་པས་ལྷ་དགུའི་དབང་བསྐུར་སྟོན་ཏེ་སྲོག་ཤིང་དང་དཀྱིལ་འཁོར་གྱི་ཆོ་གར་ཞིབ་དུ་བསྟོན་(ཏུ་སྟོན་)ཏོ། །དེ་ཡང་འཕར་མ་ཅིག་(ཞིག་)པ་ལ་སོགས་པས་རྩ་བའི་སྔགས་བསྟན་ཏེ། མང་དུ་ལ་སོགས་པས་བུམ་དབང་ངོ་། །བཅུ་གཉིས་ལ་སོགས་པས་གསང་བའི་དབང་ངོ་། །གོས་ཀྱི་ལ་སོགས་པས་དབང་གསུམ་ཀའི་ཐུན་མོང་ངོ་། །མཚན་མོ་ལ་སོགས་པས་ཤེས་རབ་ཡེ་ཤེས་ཀྱི་དབང་ངོ་། །དེ་ཉིད་དེ་ལ་བསྟན་ལ་སོགས་པས་དབང་བཞི་པ་ཚིག་དབང་བསྐུར་དང་རིན་པོ་ཆེ་བསྟན་ནོ། །ལོངས་སྤྱོད་ལ་སོགས་
1-1-142a
པས་དགེ་སློང་ལ་དབང་གསུམ་བསྐུར་བསྟན་ནོ། །ལེའུ་ཡི་མཚན་ནི་གོ་སླའོ། །ལེའུ་ལྔ་པའི་དོན་ཏོ།། །།
༄། །ལེའུ་དྲུག་པ། བྲིས་སྐུའི་ལེའུ།
ལེའུ་དྲུག་པ་འདིས་རྟག་པ་དང་པོའི་ལེའུ་གསུམ་པ་དང་དྲུག་པ་དང་བརྒྱད་པ་གསུམ་དུ་རུང་བའི་རྒྱན་བྱུང་བ་ལ་དེ་ལ་དགོས་པར་མ་བྱུང་བས། དེའི་དགོས་པ་འདི་ནས་སྟོན་པ་དང་། ཡང་བརྟག་པ་དང་པོའི་ལེའུ་གསུམ་པ་དང་ལེའུ་བརྒྱད་པར་བསྐྱེད་རིམས་བྱུང་བ་ལ། དེ་ལ་ཐང་སྐུ་བྲི་དགོས་པས་དེ་འདི་ནས་སྟོན་པས་མ་ཚང་བ་ཁ་བསྐོང་བ་ཞེས་བྱའོ། །བླ་མ་སློབ་དཔོན་ཞེས་པ་ལ་སོགས་པས་དགོས་པ་བྱུང་སྟེ་དོན་ལ་དེ་བཞིན་གཤེགས་པ་ལྔ་མཚོན་པའི་ཕྱག་རྒྱ་ལྔས་ཅིས་ཀྱང་རྒྱས་གདབ་པའོ། །དེ་ནས་རབ་ཏུ་ཞེས་པ་ལ་སོགས་པས་བྲིས་སྐུ་སྟེ། འདིར་ལྷ་བཟོ་དབང་ཐོབ་པ་དམ་ཚིག་དང་ལྡན་པ་དང་། རང་ཡང་དམ་ཚིག་མེད་ན་ཐང་སྐུ་ཅིག་(ཞིག་)བྲིས་པས་མི་ཕན་པས་དམ་ཚིག་དང་ལྡན་པ་དང་། ཧེ་བཛྲའི་སྐུ་འདི་ཆགས་པ་དང་ཞེ་སྡང་གི་སྐུ་ཅིག་(ཞིག་)ཡིན་ནོ། །མཚོན་སྣོད་ཐོད་པ་ལ་སོགས་པ་གཞུང་ན་གསལ། བཞིན་བཟངས་ལ་སོགས་པས་ལྷ་བཟོའི་གྲོགས་མོ་ཅིག་(ཞིག་)བསྟན་ནོ། །ལེའུ་དྲུག་པའོ།། །།
༄། །ལེའུ་བདུན་པ། བཟའ་བའི་ལེའུ།
ལེའུ་བདུན་པ་འདིས་བརྟག་པ་དང་པོར་བཤད་པའི་གཞི་རང་བཞིན་འབྲས་བུ་གསུམ་སྟོན་པའི་རྒྱུད་འདི་ཅི་ལྟར་བྲི་བ་མ་ཚང་བ་དང་། བརྟག་པ་དང་པོའི་ལེའུ་བདུན་པའི་རྒྱལ་མཚན་དང་ནི་མཚོན་བསྣུན་དང་། ལན་བདུན་པ་ཡང་བཟའ་བར་བྱ་ཟེར་བས། དེའི་ཚོགས་འཁོར་གྱི་གོ་ནས་ཇི་ལྟར་བཟའ་བ་གཉིས་མ་ཚང་བ་འདི་ནས་སྟོན་ནོ། །དེ་ཡང་པོ་ཏི་དེའི་སྣག་ཚ་ནི་སྦྲང་ཆེན། ཞེས་པ་བྱི་ཞུན་གྱི་མེ་མར་དེ་ཐོད་པ་མཚན་ངན་ལ་དེའི་
1-1-142b
དུད་པ་ཆགས་སུ་བཅུག་ལ། དེའི་དུད་པ་དང་ཅིག(གཅིག) །རྒྱ་སྐགས་ཀྱི་ཁུ་བ་དང་གཉིས། ཨ་རུ་རའི་ཁུ་བ་དང་གསུམ་ལྕགས་སྐོང་དུ་མཉེས་པའི་དུད་པས་ནག་པོ་བྱེད་ལ། རྒྱ་སྐགས་ཀྱིས་འཚེར་བྱེད། ཨ་རུ་རས་སྦྱིན་བྱེད་ཤིན་ཏུ་འཚེར་བ་ལེགས་པ་ཅིག་(ཞིག་)འོང་ངོ་། །རིང་ཐུང་སོར་བཅུ་གཉིས་ཞེང་སོར་བཞི་པ་སྟེ་བསྐུར་ཐོབ་པའི་དམ་ཚིག་དང་སྡོམ་པ་ཅིག་(གཅིག་)གིས་བྲིས་སོ། །གླེགས་བམ་དང་ནི་ཞེས་པ་ལ་སོགས་པས་གདམས་པའོ། །དེ་གཞུང་གསལ་ལོ། །བྷ་གར་ཞེས་པ་ལ་སོགས་པས་ཚོགས་འཁོར་སྟོན་ཏེ། །དེ་ཡང་གང་དུ་ཟོས་པས་དགོས་པ་བསྟན། དུར་ཁྲོད་ཞེས་(ཅེས་)པས་གནས་བསྟན། དེ་ལ་གདན་དུ་ཞེས་པས་དཔའ་བོ་དང་དཔའ་མོའི་གདན་བསྟན། དབུས་སུ་ཞེས་པས་མངོན་པར་རྟོགས་པའི་ཅིག་(ཞིག་)བསྒོམ་པ་བསྟན། དམ་ཚིག་ལ་སོགས་པས་ཚོགས་ཀྱི་ཡོ་བྱད་ལ་ལོངས་སྤྱོད་པ་བསྟན། མ་མོའི་མཆོད་པ་ནི་ལྷག་མའི་གཏོར་མས་དུར་སོལ་མཆོད་པ་དང་། ཕྱག་རྒྱ་མཆོད་པ་གཉིས་ཀ་བསྟན། སྐྱེས་པའི་ཐོད་པ་ཞེས་པ་ལ་སོགས་པས་ལས་ཀྱི་ཧེ་རུ་ཀས་ཚོགས་ཀྱིས་རྫས་གཉིས་ཐབས་ཤེས་རབ་ཀྱི་ཚུལ་དུ་ཡིན་པས་དྲངས་པ་ལ་བྱའོ། །ལེའུ་བདུན་པའོ།། །།
༄། །ལེའུ་བརྒྱད་པ། འདུལ་བའི་ལེའུ།
ལེའུ་བརྒྱད་པ་འདིས་བརྟག་པ་དང་པོའི་ལེའུ་ལྔ་པ་དང་བརྒྱད་པ་དང་བཅུ་པ་གསུམ་དུ་ཕྱག་རྒྱ་མ་ལ་བསྟེན་པ་བཤད་པ་ལ། དེའི་མཚན་ཉིད་བརྟག་པ་དང་པོར་མ་ཚང་བ་ལེའུ་འདི་ནས་སྟོན་པ་མ་ཚང་བ་ཁ་བསྐོང་(སྐོང་)བའོ། །ཡང་བརྟག་པ་དང་པོའི་ལེའུ་གསུམ་པ་ལྔ་པ་བརྒྱད་པ་གསུམ་དུ་བསྐྱེད་རྫོགས་སྒོམ་པ་བཤད་པ་ལ། ཐུན་མཚམས་སུ་སྨོན་ལམ་བསྟན་པ་ལེའུ་འདིས་ཁ་སྐོང་བའོ། །བརྟག་པ་
1-1-143a
དང་པོའི་གཞི་རང་བཞིན་འབྲས་བུ་གསུམ་རྟེན་པའི་རྒྱུད་འདི་ལ་མི་མོས་ན་གདུལ་ཀ་བའི་སེམས་ཅན་འདུལ་བའི་ལེའུ་འདི་ནས་སྟོན་ནོ། །ཕྱག་རྒྱ་བརྟག་པ་ཡང་དབྱིབས་ཀྱི་སྒོ་ནས་བརྟག་པ་དང་། ཁ་དོག་དང་དྲིའི་སྒོ་ནས་དང་ལུས་ངག་གི་སྒོ་ནས་བརྟག་པ་དང་། ཕྱིའི་རི་མོའི་སྒོ་ནས་བརྟག་པའོ། །དེ་ལྟ་བུ་ཅིག་(ཞིག་)རྙེད་ན་བུ་ག་དེ་པདྨའི་དབྱིབས་འདྲ་བ་ཁ་ཟུམ་པ་ཅིག་(ཞིག་)ངེས་པར་ཡོད་དོ། །བརྟག་ལུགས་ཞིབ་དུ་(ཏུ་)ལས་རྒྱའི་མན་ངག་དུ་(ཏུ་)ཤེས་པར་བྱའོ། །སྨོན་ལམ་འདི་ནི་དགེ་སྦྱོར་ཅི་བྱས་པའི་ཞབས་སུ་གདབ་སྟེ། སྐྱེ་བ་བརྒྱད་ནིའ་སངས་རྒྱས་པ་བཟང་བ་ཡིན་ནོ། །བསྐྱེད་རིམས་སྨོན་ལམ་ནི་རིགས་སུ་སྐྱེ་དང་ནི་དགྱེས་པ་རྡོ་རྗེ་སྤྱོད་པའི་རིགས་སུའོ། །དམ་ཚིག་ཅན་ནི་ཧེ་བཛྲའི་བཟའ་བསྲུང་གི་དམ་ཚིག་ལ་འདུས་པའོ། །བསྙོ་མེད་ནི་འཇིག་རྟེན་གྱི་ཐོ་ཅོ་སྣ་ཚོགས་མི་བྱེད་པའོ། །ཀྱེའི་རྡོ་རྗེ་སྟོན་པ་ནི་ཧེ་བཛྲ་འདི་ཉན་པ་དང་། འཆང་བ་སྒོམ་པ་ཅིག་(ཞིག་)ཏུ་ཤོག་ཅེས་པའོ། །བླ་མ་ལ་གུས་ནི་ཧེའི་བསླབ་བྱ་གཉིས་སྟོན་པའི་བླ་མ་དེ་ལ་ལུས་ངག་ཡིད་གསུམ་གྱི་སྒོ་ནས་ཤིན་ཏུ་གུས་པ་ཅིག་(ཞིག་)ཏུ་ཤོག །སྙིང་རྗེ་ལྡན་ནི་སྙིང་རྗེ་རྣམ་པ་གསུམ་དང་ཡེ་མི་འབྲལ་བ་ཅིག་(ཞིག་)ཏུ་ཤོག །དེ་ལྟར་བསྐྱེད་ཞིང་ཕྱི་མ་ལའོ། །སྐྱེ་བར་འགྱུར་བར་ཤོག་ཡང་(ཀྱང་)ཕྱི་མ་ལ་ཤོག་ཅིག་པའོ། །རྫོགས་རིམས་ཀྱི་སྨོན་ལམ་ནི། ལག་པས་རྡོ་རྗེ་ནི་ཐབས་ལ། དྲིལ་བུ་ནི་ཤེས་རབ་བོ། །འཁྲོལ་བ་ནི་དབྱེར་མེད་དུ་རྟོག་པའོ། །ཟབ་མོའི་ཆོས་ནི་ས་ཧ་ཛྲའི་ཡེ་ཤེས་རྒྱུད་ལ་སྐྱེད་པའོ། །བཙུན་མོ་སྟོང་པ་ཁུ་བ་བྱང་སེམས། མཉམ་ཟས་ནི་ཀུན་རྫོབ་བྱང་སེམས་ལ་བརྟེན་ནས་དོན་
1-1-143b
དམ་པ་ས་ཧ་ཛ་རྟོགས་པར་ཤོག་ཞེས་པའོ། །སྐྱེ་ཞིང་ལ་སོགས་པ་གོང་དང་འདྲའོ། །དེ་ནས་ལྷ་མོ་དེ་དགྱེས་ཞེས་པ་ལ་སོགས་པས་ཐེག་པ་ཐུན་མོང་གི་བསླབ་བྱ་སྟེ་ཆོས་ཐམས་ཅད་ཧེ་བཛྲའི་ལམ་སྟེགས་ཡིན་མཐར་ཧེ་བཛྲ་ལ་མ་བརྟེན་པར་སངས་རྒྱས་ཡེ་མི་འཐོབ་པ་སྟེ་ཧེ་བཛྲ་བསྟན་ཞེས་པའོ། །ལེའུ་བརྒྱད་པའོ།། །།
༄། །ལེའུ་དགུ་པ། སྔགས་བཏུ་བའི་ལེའུ།
ལེའུ་དགུ་པ་འདིས་བརྟག་པ་དང་པོའི་ལེའུ་གཉིས་པ་ནས། མཁའ་སྤྱོད་མའི་གསང་བའི་ལས་བཤད་པ་མ་ཚང་བ་དང་། བརྟག་པ་དང་པོའི་ལེའུ་གསུམ་པའི་ཧེ་རུ་ཀའི་བསྐྱེད་རིམས་ཀྱི་རྣམ་དག་མ་ཚང་དང་། བརྟག་པ་དང་པོའི་ལེའུ་གཉིས་པའི་སྔགས་བཤད་པ་ལ། སྔགས་དག་པའི་ཡན་ལག་དུ་(ཏུ་)སྔགས་བཏུ་བ་ཚོ་མ་ཚང་བ་ཁ་བསྐོང་(སྐོང་)བའོ། །ལེའུ་འདི་ལ་ཆོས་གསུམ་ཡོད་པ་ལས། དང་པོ་ཁ་སྦྱར་དབྱེ་བ་སྟོན་ཏེ། [ལེའུ་དགུ་པའི་ཕྱེད་དང་། བཅུ་པ་དང་། བཅུ་གཅིག་པའི་དབུ་དང་། བཅུ་གཉིས་པའི་ནང་། མ་དཔེར་མ་ཚང་བས་གཞན་ནས་ཁ་སྐོང་ཡོད།] དེ་ནས་ཁ་སྦྱར་དབྱེ་བ་ཡི། །མཚན་ཉིད་ཡང་དག་རབ་ཏུ་བཤད། །གང་གིས་རྣམ་པར་ཤེས་ཙམ་གྱིས། །སྒྲུབ་པོས་དངོས་གྲུབ་ཐོབ་པར་འགྱུར། །བསྒྲུབ་བྱའི་ལྟེ་བའི་རྩ་བ་ལ། །བརྟུལ་ཞུགས་ཅན་གྱི་ལག་པས་གདོན། །ཁ་སྦྱར་འབྱེད་པ་ནི། རང་བཞིན་གྱི་ཁ་སྦྱར་འཁོར་ལོ་བཞི། གཉིས་གཉིས་སུ་ཁ་སྦྱར་བའི་དབུས་ན། སེམས་ཀྱི་རྒྱལ་པོ་བཞུགས་པས་འབྱེད་དགོས། བྱིན་གྱིས་བརླབས་པའི་ཁ་སྦྱར་ནི། བླ་མས་དབང་བསྐུར་བྱས་ནས་ཡེ་ཤེས་སེམས་དཔའ་བཅུག་པ་དེས་འབྱེད་པའོ། །བསྲུང་བའི་ཁ་སྦྱོར་ནི། ཆོས་པ་རྣམས་ལ་ཆོས་སྤྱོད་པའི་སྲུང་མ་རེ་རེས་སྲུང་སྐྱོབ་བྱེད་པ་ཞིག་ཡོད་ལ། ད་ལྟའི་མི་སོ་སོ་སྐྱེ་བོ་རྣམས་ལའང་ཡུལ་ལྷ་རེ་རེས་བསྲུང་ངོ་། །དེ་རྣམས་མ་ཕྱེ་བར་མཐུ་མི་འོང་བས། དེ་རྣམས་འབྱེད་པའི་ཐབས་ཤིག་བསྟན་ཏེ། ཧེ་རུ་ཀ་མཉམ་རྣལ་འབྱོར་གྱིས། །ནང་གི་མ་རུངས་སེམས་ཀྱིས་ནི། །འདི་ནི་བསྒོམས་པ་ཙམ་གྱིས་ནི། །སངས་རྒྱས་ཀྱང་ནི་ངེས་པར་འཇིག །ཧེ་རུ་ཀ་མཉམ། ལ་སོགས་པས་ལྷ་གང་གིས་བྱ་བ་སྟེ། བསྙེན་པ་ལ་ཧེ་རུ་ཀའི་ཆོ་ག་ཐོ་བརྒྱད་ཀྱིས་བསྐྱེད་ལ། སྒྲུབ་ཅིང་ལས་སྦྱོར་ལ་ནི། མཁའ་སྤྱོད་མ་བསྐྱེད་ལ་ཨོཾ་
1-1-144a
གྷུ་སྭཱ་ཧཱ་ལ་ཁྲི་བཟླས་ལ། ལས་སྦྱོར་ལ་ཅི་རིགས་པར་བཟླའོ། །བསྟན་ལ་གནོད་པ་བྱེད་པ་དང་། །བླ་མ་སངས་རྒྱས་འཇིག་པ་ནི། །བླ་མ་ཐུབ་པ་ལ་ཞུས་ནས། །སྙིང་རྗེས་གསད་པར་བྱ་བ་ཉིད། །བསྟན་པ་ལ་གནོད། ལ་སོགས་པས་ཡུལ་གང་ལ་མཐུ་བྱ་བ་སྟོན། ཇི་ལྟར་ཕྱུགས་ཀྱི་གཟུགས་མཐོང་ནས། །ཁྲག་ནི་སྐྱུག་པ་ཉིད་དང་ཡང་། །འདར་ཞིང་མགོ་སྐྱེས་གྲོལ་བ་དང་། །ཁ་ནི་འོག་ཏུ་རྣམ་པར་བསྒོམ། །དེ་ཡི་ལམ་དུ་ཁབ་ནི་མེའི །གཟུགས་ཅན་འཇུག་པར་བསམ་པ་སྟེ། །སྙིང་གར་བྱིན་ཟའི་ས་བོན་ཉིད། །དམིགས་ནས་སྐད་ཅིག་གསོད་པར་བྱེད། །ཇི་ལྟར། ལ་སོགས་དང་། གོང་གི་བསྒྲུབ་བྱའི་ལྟེ་བའི། །ལ་སོགས་པས་གསད་པའི་ཏིང་ངེ་འཛིན་བསྟན་ཏོ། །རྒྱུད་འདི་ལ་ནི་བསྲེག་བླུགས་མེད། །ཕྱག་རྒྱ་བཅིང་དང་བྱ་བའང་མེད། །རྒྱུད་ཆེན་བཀླགས་པས་འགྲུབ་པ་ཉིད། །བསམ་གཏན་ཙམ་གྱིས་འགྲུབ་པར་འགྱུར། །རྒྱུད་འདི་ལ་ནི། ལ་སོགས་པས་བསམ་གཏན་གྱི་ཆེ་བའོ། །རྟོག་མེད་དངོས་གྲུབ་སྦྱིན་པ་པོ། །སྲིད་པ་སྦྱོང་བ་ཉམས་དགའ་བ། །གསང་བ་མཆོག་ནི་བཤད་བྱ་ཡིས། །ཉོན་ཅིག་ལྷ་མོ་བཞིན་བཟང་མ། །རིན་ཆེན་གཟི་བརྗིད་འབར་བ་ཡི། །ཕྲེང་བ་འཁྲུགས་པ་ལྷ་མོ་ལྟོས། །མ་ཕུག་པས་ནི་སྦྱོར་བྲལ་འགྱུར། །ཕུག་པས་དགའ་བ་སྦྱིན་པ་པོ། །དེ་ལྟར་འཁོར་བ་འདོད་པ་ཡི། །ཡོན་ཏན་ལྔ་ལྡན་རིན་ཆེན་ཉིད། །མ་དག་པས་ནི་དུག་ཏུ་འགྲོ། །དག་པས་འདུད་རྩི་ལྟ་བུར་འགྱུར། །ད་ནི་ཧེ་རུ་ཀའི་རྣམ་དག་བསྟན་ཏེ། དེ་ཡང་དཔེར་ན་རིན་པོ་ཆེ་ཁ་ཅིག་ལ། བུག་པ་མ་ཕུག་ན་འོད་ཡེ་མི་འབྱུང་། བུག་པ་འབུག་ལེགས་ན་འོད་འོང་བ་དེ་བཞིན་དུ། འཁོར་བ་འདོད་པའི་ཡོན་ཏན་ལྔ་པོ་འདི་རིན་པོ་ཆེ་དང་འདྲ་སྟེ། བསྟེན་སྟངས་མ་ལེགས་ན་འཆིང་བར་འགྱུར་ལ། བསྟེན་ལེགས་ན་གྲོལ་བར་འགྱུར། དེའི་བསྟེན་ལུགས་ཇི་ལྟར་བསྟན་ན། འཁོར་བའི་རྣམ་པ་ཧེ་རུ་ཀ །འགྲོ་བ་སྒྲོལ་བའི་གཙོ་བོ་ཉིད། །གང་གི་གཟུགས་ཀྱིས་གྱུར་པ་ཉིད། །དེ་ནི་ང་ཡི་སྨྲ་ཡི་ཉོན། །སྙིང་རྗེའི་སྤྱན་ནི་དམར་པོ་ལ། །བྱམས་པའི་ཐུགས་ལས་ཡན་ལག་ནག །བསྡུ་བའི་དངོས་པོ་བཞི་ཡིས་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་བརྒྱད། །ཕྱག་ནི་སྟོང་པ་བཅུ་དྲུག་ཉིད། །གུག་སྐྱེས་ཀྱིས་ནི་སངས་རྒྱས་ལྔ། །གདུག་པ་འདུལ་ཕྱིར་ཁྲོ་བོ་ཉིད། །ཤ་ནི་པུཀྐ་སཱི་རུ་བྱ། །དེ་བཞིན་ཁྲག་ནི་རི་ཁྲོད་མ། །གདོལ་པ་མོ་ནི་ཁུ་བར་བརྗོད། །གཡུང་མོ་རྐང་དང་ཚིལ་བུ་དག །པགས་པ་བྱང་ཆུབ་ཡན་ལག་བདུན། །རུས་པ་བདེན་པ་བཞི་པོ་ཉིད། །སྙིང་རྗེའི་སྤྱན་ནི་དམར་པོ་ལ་སོགས་པས་བསྟན་ཏེ། ཀུན་རྫོབ་ཀྱི་རྣམ་དག་དང་། དོན་དམ་གྱི་རྣམ་དག་གཉིས་གཉིས་གོང་བཞིན་སྦྱར་རོ། །བདག་མེད་མས་གསོལ་པ། སྔགས་བཏུ་བ་ནི་ཇི་ལྟར་འགྱུར། །གང་གི་སྔགས་ཀྱི་སྐྱེ་བ་ཡི། །ལས་ཀྱི་དངོས་གྲུབ་འགྱུར་བ་ཉིད། །བདེ་བ་ཆེན་པོ་བཤད་དུ་གསོལ། །བཅོམ་ལྡན་རྡོ་རྗེ་ཆེན་པོ་ཅན། །གཟི་བརྗིད་ཆེན་པོས་བཀའ་སྩལ་པ། །སྔགས་ནི་ཁྱོད་ལ་ངས་བཤད་ཀྱིས། །ལྷ་མོ་ཤེས་རབ་ཆེན་མོས་ཉོན། །བདག་མེད་མས་གསོལ་པ། ལ་སོགས་པས་སྔགས་བཏུ་བ་བསྟན་ཏོ། །དང་པོར་རྣམ་པར་སྣང་མཛད་སྦྱིན། །ཨུཥྨ་རྣམས་ཀྱི་བཞི་པ་ལ། །པུཀྐ་སཱིས་བརྒྱན་སྟོང་པས་མནན། །མདོག་དཀར་མཐར་ནི་སྭཱ་ཧཱ་སྦྱར། །འདིས་ནི་བཟླས་པ་འབུམ་གྱིས་ནི། །འགྲོ་བ་རྟག་ཏུ་རེངས་པར་བྱེད། །དང་པོར་ཡིག་འབྲུའི་བདག་པོ་བཞག །དེ་རྗེས་མཁའ་སྤྱོད་མ་དེ་ནས། །མཐར་ནི་སྭཱ་ཧཱ་སྦྱར་བྱས་པས། །སངས་རྒྱས་རྣམས་ཀྱང་དབང་དུ་བྱེད། །རིག་བྱེད་རྣམས་ཀྱི་དང་པོ་སྦྱིན། །དང་པོ་ཡི་ནི་གཉིས་པ་ལ། །སྟོང་བཅས་མཐར་ནི་སྭཱ་ཧཱ་སྦྱར། །སངས་རྒྱས་ཀྱང་སྐྲོད་ཤེས་རབ་ཅན། །དང་པོར་རྣམ་པར་སྣང་མཛད་སྦྱིན། །གཉིས་པ་ཡི་ནི་གསུམ་པ་ལ། །ར་དང་ལྡན་ཞིང་ཆུ་མས་བརྒྱན། །མི་རྣམས་ཐམས་ཅད་སྡང་བར་བྱེད། །དང་པོར་ཡིག་འབྲུའི་དབང་ཕྱུག་གཞག །ལྔ་པ་ཉིད་ཀྱི་གསུམ་པ་ལ། །སྟོང་བཅས་མཁའ་འགྲོ་མ་དང་ལྡན། །མཐར་ནི་སྭཱ་ཧཱ་མངོན་སྤྱོད་ཆེ། །ཡང་ནི་ཡི་གེའི་ཐུ་བོ་སྦྱིན། །ཧཱུྃ་ནི་ཁྲག་དང་འདྲ་བ་ཡི། །མཐར་ནི་སྭཱ་ཧཱ་ཐིག་ལེ་མཆོག །དགའ་བ་བཟང་པོ་རྟག་ཏུ་འགུགས། །གཏི་མུག་རིགས་ནི་དང་པོར་སྦྱིན། །གྷུ་ནི་ཡང་དག་རབ་ཏུ་སྦྱར། །མཐར་ནི་སྭཱ་ཧཱ་ཡང་བྱས་པས། །ལྷ་དང་མི་རྣམས་གསོད་པར་བྱེད། །དང་པོར་རྣམ་པར་སྣང་མཛད་བཞག །དང་པོ་ཉིད་ཀྱི་དང་པོ་ལ། །རྡོ་རྗེ་མཁའ་འགྲོ་མ་དང་ལྡན། །མཐར་གནས་པ་ཡི་གསུམ་པ་ལ། །རྡོ་རྗེ་མཁའ་འགྲོ་མ་དང་ལྡན། །ཡང་ནི་དང་པོའི་རྩེ་མོ་ལ། །རྡོ་རྗེ་མཁའ་འགྲོ་མ་དང་ལྡན། །མཐར་གནས་པ་ཡི་གསུམ་པ་ལ། །ཡང་ནི་དེ་ཉིད་ཡང་དག་ལྡན། །སྟེང་དུ་ཆོམ་རྐུན་མ་ཡིས་བརྒྱན། །དེ་རྗེས་ཧྲཱིཿཡིག་རྣམ་པར་སྦྱར། །མཐར་ཡང་སྭཱ་ཧཱ་སྤྱོད་པ་ཉིད། །ཀུ་རུ་ཀུ་ལླེ་ཡི་སྔགས་སོ། །ཨོཾ་ནི་དང་པོ་བཞི་པ་ཡི། །གསུམ་པ་ཆོམ་རྐུན་མ་ཡིས་བརྒྱན། །མཐར་གནས་པ་ཡི་བཞི་པ་ལ། །པིཙུ་བཛྲ་དང་སྦྱར་བ། །ཨུཥྨ་རྣམས་ཀྱི་བཞི་པ་ལ། །པུཀྐ་སཱི་ནི་རྣམ་པར་བརྒྱན། །སྟོང་པས་མནན་ཞིང་སུམ་འགྱུར་ཉིད། །ལྔ་པ་ཡི་ནི་གཉིས་པ་ལ། །གསུམ་པའི་དང་པོ་མཐར་སྭཱ་ཧཱ། །ཀྱེ་ཡི་རྡོ་རྗེའི་སྙིང་པོའོ། །སྣང་མཛད་དང་པོ་ཛྭ་ལ་གཉིས། །སྦྱར་ནས་ལྔ་པའི་བཞི་པ་ལ། །མཐར་གནས་རྣམས་ཀྱི་དང་པོ་ལྡན། །གྷསྨ་རཱིས་ནི་རྣམ་པར་བརྒྱན། །ཨུཥྨ་རྣམས་ཀྱི་བཞི་པ་ལ། །རྡོ་རྗེ་མཁའ་འགྲོ་མ་ཡིས་བརྒྱན། །སྟོང་པས་མནན་ཅིང་སུམ་འགྱུར་ཉིད། །ལྔ་པ་ཡི་ནི་གཉིས་པ་དང་། །གསུམ་པའི་དང་པོ་མཐར་སྭཱ་ཧཱ། །ཕྱག་བཞི་པའི་སྔགས་སོ། །དང་པོར་རྣམ་སྣང་དང་པོ་ཡི། །དང་པོ་ནང་གི་དཀར་མོས་བརྒྱན། །གསུམ་པ་ཉིད་ཀྱི་དང་པོ་ལ། །ནང་གི་དཀར་མོས་རྣམ་པར་བརྒྱན། །ཉིས་འགྱུར་ལྔ་པའི་གསུམ་པ་དང་། །གཉིས་པའི་གསུམ་པ་མེ་ཡིས་བརྒྱན། །ཧཱུྃ་གི་རྣམ་པ་གསུམ་སྦྱར་ནས། །ལྔ་པ་ཉིད་ཀྱི་གཉིས་པ་དང་། །གསུམ་པའི་དང་པོ་མཐར་སྭཱ་ཧཱ། །ཕྱག་དྲུག་པའི་སྔགས་སོ། །དང་པོར་རྣམ་སྣང་བཞི་པ་ཡི། །དང་པོ་བྱིན་ཟ་ཡང་དག་ལྡན། །རོ་ལངས་མ་ཡིས་རྣམ་པར་བརྒྱན། །མཐར་གནས་པ་ཡི་གསུམ་པ་ལ། །གྷསྨ་རཱི་ཡིས་རྣམ་པར་བརྒྱན། །དང་པོ་ཡི་ནི་དང་པོ་ལ། །མཐར་གནས་པ་ཡི་དང་པོ་དང་། །རྡོ་རྗེ་མ་ཡིས་རྣམ་པར་བརྒྱན། །ཀྵ་ནི་ཆོམ་རྐུན་མ་ཡིས་བརྒྱན། །ལྔ་པ་ཉིད་ཀྱི་དང་པོ་དང་། །ཨུཥྨ་རྣམས་ཀྱི་བཞི་པ་ལ། །རྡོ་རྗེ་མཁའ་འགྲོ་མ་ཡིས་བརྒྱན། །སྟོང་པས་མནན་ཅིང་སུམ་འགྱུར་ཏེ། །ཕཊ་དང་མཐར་ནི་སྭཱ་ཧཱ་ཉིད། །ཕྱག་གཉིས་པའི་སྔགས་སོ། །བདག་མེད་དང་པོའི་དང་པོ་དང་། །གཉིས་པ་ཉིད་ཀྱི་དང་པོ་དང་། །གསུམ་པ་ཉིད་ཀྱི་དང་པོ་དང་། །བཞི་པ་ཡི་ནི་དང་པོ་དང་། །ལྔ་པ་ཡི་ནི་དང་པོ་དང་། །མཐར་གནས་རྣམས་ཀྱི་དང་པོ་དང་། །ཨུཥྨ་རྣམས་ཀྱི་དང་པོ་ཉིད། །དང་པོར་རྣམ་སྣང་མཐར་སྭཱ་ཧཱ། །གྲོང་ཁྱེར་དཀྲུགས་པའི་སྔགས་ཀྱི་བཟླས་པ་ནི་འབུམ་མོ། །མཐར་གནས་རྣམས་ཀྱི་གཉིས་པ་དང་། །ཀྵ་ཡི་རྣམ་པ་གཉིས་འགྱུར་ཉིད། །ཧཱུྃ་གི་རྣམ་པ་གསུམ་དང་ལྡན། །དང་པོར་རྣམ་སྣང་ཕཊ་ཉིད་ཀྱི། །རྣམ་པ་ནང་བཅུག་མཐར་སྭཱ་ཧཱ། །ས་སྦྱང་བའི་སྔགས་སོ། །དང་པོར་རྣམ་སྣང་དེ་རྗེས་སུ། །རྡོ་རྗེ་མ་ཡིན་མཐའ་རུ་ཧཱུཾ། །བཟའ་བ་དང་བཏུང་བ་བྱིན་གྱིས་བརླབ་པའོ། །དང་པོར་རྣམ་པར་སྣང་མཛད་སྦྱིན། །དེ་རྗེས་ཨཀཱརོ་མུ་ཁཾ། །ཨུཥྨ་རྣམས་ཀྱི་གསུམ་པ་དང་། །མཐར་གནས་པ་ཡི་བཞི་པ་ལ། །སྟེང་དུ་མེ་ཡི་རྣམ་པས་བརྒྱན། །དྷ་རྨཱ་ཎཱཾ་རྗེས་རྡོ་རྗེ་མ། །དྱ་ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུྃ་སྭཱ་ཧཱ། འབྱུང་པོ་ཐམས་ཅད་ཀྱི་གཏོར་མའི་སྔགས་སོ། །ཀྱེའི་རྡོ་རྗེ་ལས་སྔགས་བཏུ་བའི་ལེའུ་སྟེ་དགུ་པའོ། །ལེའུ་དགུ་པའོ། །བརྟག་པ་གཉིས་པའི་ལེའུ་དགུ་པ་རྫོགས་སོ།། །།
༄། །ལེའུ་བཅུ་པ། བཟླས་པའི་ལེའུ།
ལེའུ་བཅུ་པ་འདི་ནས་ཆོས་གཉིས་སྟོན་པ་ལས། དེ་ནས་ཆོས་ཀུན་སྡོམ་གཅིག་པའི། །རྡོ་རྗེ་སེམས་དཔའ་ཞེས་བྱས་གསུངས། །བདག་མེད་མ་ལ་འོ་མཛད་ནས། །བཟླས་པའི་ཡུལ་ནི་རབ་ཏུ་དབྱེ། །ཤེལ་གྱིས་རེངས་པའི་བཟླས་པ་ཉིད། །ཙནྡན་དམར་པོས་དབང་དག་ལ། །ལུང་ཐང་གིས་ནི་མངོན་སྤྱོད་ཉིད། །ནི་རཾ་ཤུས་ནི་སྡང་བ་ལ། །རྟ་ཡི་རུས་པས་སྐྲོད་པ་ཉིད། །བྲམ་ཟེའི་རུས་པས་དགུག་པ་ལ། །གླང་པོའི་རུས་པས་ཆར་པ་ཉིད། །མ་ཧེ་ཡིས་ཀྱང་གསད་པ་ལའོ། །ཤེལ་གྱིས་རེངས་པ། ལ་སོགས་པས་ཕྲེང་བ་བསྟན་ཏེ། བརྟག་པ་དང་པོའི་ལེའུ་གཉིས་པའི་ལས་ཚོགས་ཀྱི་མ་ཚང་བ་སྟོན་པ་ཡིན། རེངས་པར་འོ་མ་བཏུང་བ་ཉིད། །དབང་ལ་རང་གི་འདུན་པས་སྤྱད། །གསད་པ་ནི་སིཧླ་ཉིད། །དགུག་པ་ལ་ནི་བཞི་མཉམ་ཉིད། །སྡང་ལ་སཱ་ལུ་སྐྱེས་པས་བརྗོད། །སྐྲོད་པ་ཉིད་ལ་གླ་རྩིར་བརྗོད། །ཡང་ན་མཐའི་ཤ་དང་། དང་པོའི་ཤ་དང་། ན་དང་པོ་དང་། ག་དང་པོ་དང། ཧ་དང་པོ་ཉིད་ཀྱང་དེ་བཞིན་ནོ། །རེངས་པར་འོ་མའི་གཏུང་བ། ལ་སོགས་པས་ལེའུ་གཉིས་པའི་ལས་ཚོགས་ཀྱི་ཁ་ཟས་སྟོན་ཏེ། མ་ཚང་བ་ཁ་སྐོང་བའོ། །ཀྱེའོ་རྡོ་རྗེ་ལས་བཟླས་པའི་ལེའུ་སྟེ་བཅུ་པའོ། །ལེའུ་བཅུ་པའོ། །བརྟག་པ་གཉིས་པའི་ལེའུ་བཅུ་པ་རྫོགས་སོ།། །།
༄། །ལེའུ་བཅུ་གཅིག་པ། ལྷན་ཅིག་སྐྱེས་སྦྱོར་གྱི་ལེའུ།
ལེའུ་བཅུ་གཅིག་པ་འདི་ནས་བརྟག་པ་དང་པོའི་ལེའུ་ལྔ་པ་ནས། རིགས་ལྔའི་ཕྱག་རྒྱ་མ་ལྔ་བྱུང་བ་ལ། དེའི་རིགས་བརྟག་པ་འདི་ནས་སྟོན། ཡང་བརྟག་པ་དང་པོའི་ལེའུ་ལྔ་པ་དང་། བརྒྱད་པར་ཕྱག་རྒྱ་མའི་མན་ངག་བྱུང་བ་ལ། དེའི་མ་ཚང་བ་འདི་ནས་སྟོན་པས། འདི་ཡང་མ་ཚང་བ་ཁ་སྐོང་བའོ། །ཀྱེ་རྡོ་རྗེ་ལ་དམ་འཁྱུད་ཅིང་། །ཚེམས་ཀྱིས་མ་མཆུ་རབ་བཙིར་ནས། །ལུས་ཅན་རྣམས་ཀྱི་རིགས་ཀྱི་གཟུགས །དེ་ལ་བདག་མེད་མས་ཞུས་པ། །བྷ་གར་ལིངྒ་བཞག་ནས་ནི། །འཁོར་ལོའི་འདྲེན་པས་འདི་སྐད་གསུངས། །ལུས་ཅན་རང་གི་རིགས་བཤད་ཀྱིས། །ཤེས་རབ་ཕ་རོལ་ཕྱིན་མ་ཉོན། །བུད་མེད་དམ་ནི་སྐྱེས་པ་ཉིད། །གང་གི་སྲིན་ལག་རྩ་བ་ལ། །རྡོ་རྗེ་རྩེ་དགུ་པར་གྱུར་པ། །མི་བསྐྱོད་པ་ཡི་རིགས་མཆོག་ཉིད། །རྣམ་སྣང་མཛད་ཀྱི་འཁོར་ལོར་འགྱུར། །དཔག་མེད་མགོན་གྱི་འདམ་སྐྱེས་ཉིད། །རིན་ཆེན་འབྱུང་བའི་རིན་ཆེན་ཉིད། །ལས་ཀྱི་རིགས་ཀྱི་རལ་གྲི་ཉིད། །བུད་མེད་དམ་ནི། ལ་སོགས་པས་
1-1-144b
མཚན་མ་ལ་བརྟག་པའོ། །རྣལ་འབྱོར་པ་གང་། ལ་སོགས་པས་ཁ་དོག་ལ་བརྟག་པའོ། །སྐྱེ་བོ་རྣལ་འབྱོར་ལ་སོགས་པས་གདམས་པ་བསྟན་པའོ། །བྷ་ག་ལིང་ག་ལ་སོགས་པས་བསྟན་ཉན་པར་རྣ་གཏད་པར་བསྐུལ་བའོ། །ཚལ་དང་ལས་རྒྱ་ལ་སོགས་པས་ལས་བརྒྱ་བསྟེན་པའི་གནས་བསྟོན་(སྟོན་)ཏེ། བརྟག་པ་དང་པོར་མ་བྱུང་བ་འདི་ནས་བསྟོན(སྟོན)། དེ་ཡང་ཕྱག་རྒྱ་མ་དང་རང་གཉིས་ཀ་ལྷའི་སྐུར་བྱས་ལ་གཞུང་ནས་བྱུང་བའི་བདེ་བ་བསྐྱེད་པ་དེ་ཚོ་བྱའོ། །འཁྱོགས་དང་ཞེས་པ་སྙོམས་པར་ཞུགས་ནས་ཕྱག་རྒྱ་མས་སྨད་ཁོག་ཁྱོགས་པའོ། །བརླ་ནི། བྷ་ག་ཕྱེ་བ་ན་རྐང་པ་ཡ་གཅིག་ཐབས་ཀྱིས་ཕྲག་པ་ལ་བཀལ་བའོ། །ཤིན་ཏུ་བཀལ་བ་ནི། བརླ་གཉིས་ཀ་ཐབས་ཀྱིས་ཕྲག་པའི་གོང་དུ་བཏང་བ་བསྒོམ། བྷ་ག་ཕྱེ་ནས་དེ་བཞིན་དུ་བྱའོ། །ཡང་ཡང་རྡོ་རྗེ་ནི། བྷ་གར་འབྱུང་འཇུག་མང་དུ་བྱེད་པའོ། །སྟེང་ནི། ཕྱག་རྒྱ་མ་ཁ་སྟེང་དུའོ། །འོག་ནི། ཐབས་ཁ་འོག་ཏུ་བལྟ་བའོ། །དེ་ལ་ག་བུར་ནི། ལུས་ཟུངས་རྒྱས་པར་བྱའོ། །ལེའུ་བཅུ་ཅིག་(གཅིག་)པའོ།། །།
༄། །རྫོགས་པའི་ལེའུ།
ལེའུ་བཅུ་གཉིས་པ་འདིས་བརྟག་པ་དང་པོའི་ལེའུ་བཅུ་པའི་དབང་གི་ཚིགས་སུ་བཅད་པ་མ་ཚང་བ་དང་། བརྟག་པ་དང་པོའི་ལེའུ་གསུམ་པའི་བསྐྱེད་རིམས་ཀྱི་དུས་སུ། རྡོ་རྗེ་པདྨ་བྱིན་གྱིས་བརླབ་དགོས་པ་དང་། ལེའུ་ལྔ་པ་དང་། བརྒྱད་པ་གཉིས་སུ་ལས་ཀྱི་ཕྱག་རྒྱ་མ་བསྟན་པའི་དུས་སུ། རྡོ་རྗེ་དང་པདྨ་བྱིན་གྱིས་བརླབ་དགོས་པ་ལ། དེའི་སྔགས་འདི་ནས་སྟོན་པས། དེའི་མ་ཚང་བ་ཁ་སྐོང་བའོ། །ཨོཾ་པདྨ་ལ་སོགས་པས་ཡུམ་གྱིས་པདྨ་བྱིན་གྱིས་བརླབ་པར་བསྐུལ་བའོ། །ཨོཾ་བཛྲ་མ་ཧཱ་ལ་སོགས་པས་ཡུམ་གྱིས་ཡབ་ལ་བསྐུལ་
1-1-145a
བའོ༑ ཨོཾ་ལ་སོགས་པ་ནི་རྡོ་རྗེ་པདྨ་བརླབ་པ་དང་། སྐུ་གསུང་ཐུགས་བྱིན་གྱིས་བརླབ་པ་གཉིས་སུ་སྦྱར་རོ། དེ་ལྟར་བརྟག་པ་ཕྱི་མ་འདིས། རྟག་པ་དང་པོའི་མ་ཚང་བ་ཁ་སྐོང་བ་དང་། དངོས་གྲུབ་གཏན་ལ་དབབ་པ་དང་། ངེས་པ་སྟེར་བ་དང་། ཐེ་ཙོམ་སེལ་བ་དང་བཞི་རུ་བྱས་ནས། རྟག་པ་དང་པོའི་ནང་དུ་གདབ་བོ། །བརྟག་པ་དང་པོའི་ལེའུ་མདོར་བསྟན་རྒྱས་བཤད་དུ་བྱས་ནས་ལེའུ་དང་པོར་གདབ་བོ། །ལེའུ་དང་པོ་བཞིའི་རྒྱུད་དང་། རང་བཞིན་གྱི་རྒྱུད། འབྲས་བུའི་རྒྱུད་གསུམ་དུ་བསྡུས་སོ། །དེ་ལས་ཕྱེ་བས་ཆོས་ཚན་སུམ་བཅུ་(ཅུ་)སོ་ལྔ་ཡོད་དོ། །སྒྱུ་མའི་བརྟག་པ་ཞེས་བྱ་བ་བརྟག་པའི་རྒྱལ་པོ་གཉིས་པ་སྟེ། འཕྲོ་ཅན་དུ་གནས་པའོ། །དེ་ལྟར་གུར་ལེའུ་བཞི་པས་ཤེས་སོ། །རྒྱུད་འདི་བརྟག་པ་གཉིས་ཀྱིས་(ཀྱི་)བདག་ཉིད་ཅན་གྱི་འབུམ་ཆུང་ཉི་མ་ཞེས་པ་རྫོགས་སྷོ།། །།
